Телегамри t.me/ifilato каналтан илнӗ скриншот

Чӑваш Енри шкулсемпе Раҫейӗн Патшалӑх Думин депутачӗ Ирина Филатова кӑсӑкланнӑ. Вӑл Телеграмри хӑйӗн страницинче пӗлтернӗ тӑрӑх, республикӑра пурӑнакансенчен ҫӑхав нумай ҫитнӗ.

Депутат Раҫҫейӗн ҫутӗҫ министрӗ Сергей Кравцов патне информацие ҫитернӗ, хӑш-пӗр объекта тӗрӗслесе тӑма ыйтнӑ.

«Унти хӑш-пӗр шкул тӗлӗшпе ҫивӗч ыйту пур. Шкулсенчен чылайӑшӗ ҫӗнӗ, пӗрне халь ҫеҫ тума тытӑннӑ», — тесе пӗтӗмлетнӗ Ирина Филатова.

Тӗслӗх вырӑннӗ вӑл Сӗнтӗрвӑрринчи К.Д. Ушинский ячӗллӗ шкула илсе кӑтартнӑ. Ӑна уҫнӑ, анчах пушар хӑрушсӑрлӑхӗ енчен кӑлтӑксем тупӑннӑ. Район прокуратури хула администрацине ҫыру ҫырса янӑ, анчах вырӑнти тӳре-шара хускалма васкамасть-мӗн.

Е тата Шупашкарти Таллеров урамӗнчи шкул. Асӑннӑ ҫӗр лаптӑкӗ ҫинче ӑна тума хула администрацийӗ ирӗк паман иккен, анчах строительствӑна пуҫӑннӑ.

cap.ru сӑнӳкерчӗкӗ

Шупашкарти 4-мӗш гимнази валли тинех директор тупӑннӑ. Ку вырӑна унччен физкультура учителӗнче ӗҫленӗ Максим Валерьевич Антонов йышӑннӑ.

Палӑртмалла: гимназире 2022 ҫулхи авӑн уйӑхӗнченпе директор ҫук. Унччен директор унта Андрей Михайлов пулнӑ. Максим Валерьевич 1996-2002 ҫулсенче Йӗпреҫ округӗнчи Пысӑк Упакассинчи шкулта физкультура учителӗнче ӗҫленӗ. Кайран Йӗпреҫри 2-мӗш шкулта тӑрӑшнӑ, 2006-2018 ҫулсенче ӑна ертсе пынӑ.

62-мӗш вӑтам шкул сайтӗнчен илнӗ сӑнӳкерчӗк

Чӑваш Енри педагогсене — тӗрлӗ конкурс ҫӗнтерӳҫисене — преми парса хавхалантарма йышӑннӑ.

150 пин тенке Ҫӗнӗ Шупашкарти 18-мӗш лицейри истори учителӗ, «Чӑваш Енри ҫулталӑк учителӗ» Артём Максимов тивӗҫнӗ. Улатӑрти «Теремок» 1-мӗш ача пахчинче воспитательте ӗҫлекен Любовь Дубровскаяна, «Чӑваш Енри ҫулталӑк воспитательне», 100 пин тенкӗ пама йышӑннӑ.

50-шар пин тенке Шупашкар муниципаллӑ округӗнчи Тренккассинчи вӑтам шкулти класс ертӳҫине Анна Степановӑна, Шупашкарти 2-мӗш вӗпенӳ центрӗн социаллӑ педагогне Дария Волковӑна, Шупашкарти 23-мӗш ача пахчинчи Анастасия Степанова педагог-психолога, Ҫӗнӗ Шупашкарти 6-мӗш гимназин директор ҫумне Александр Карпова, Шупашкарти сывлӑх енчен хавшак ачасен 2-мӗш шкулӗнчи музыка учительне Наталья Яровӑна, Сывлӑх енчен хавшак ачасен вӗренӳ центрӗн тьюторне Галина Степановӑна, Шупашкарти 59-мӗш вӑтам шкулти пуҫламӑш классен учительнеКарина Гордеевӑна, Шупашкарти 205-мӗш ача пахчин учитель-логопедне Екатерина Мурчинӑна, Шупашкарти 62-мӗш вӑтам шкулти чӑваш чӗлхи тата литературин учительне Людмила Николавӑна парӗҫ.

darminaopel.ru сайтри сӑн

Республикӑра Патшалӑхӑн пӗрлехи экзаменӗсен кӑтартӑвӗсем лайӑх. Статистика кӑтартнӑ тӑрӑх, 64 ҫамрӑк 68 экзаменра 100 балл пухнӑ.

Чи лайӑх кӑтартусем ытларах Ҫӗнӗ Шупашкарта, Канашра, Патӑрьел тата Вӑрнар муниципаллӑ округӗсенче пулни паллӑ.

Тата ҫакна палӑртмалла: шкултан вӗренсе тухакансем физикӑпа, математикӑпа, литературӑпа, акӑлчан чӗлхипе ППЭре чи пысӑк балсем тӑтӑшах илме пуҫланӑ.

Комсомольскинче 640 ача валли шкул тӑвасшӑн. Вӑл унччен 2-мӗш шкул пулнӑ территорийӗнче вырнаҫӗ. Шкул икӗ блокран, 3 тата 3 хутлӑ пулӗ.

Подрядчике палӑртма аукцион ирттереҫҫӗ. Малтанхи хак – 1 миллиард та 275 миллион та 462,81 тенкӗ. Аукциона утӑ уйӑхӗн 30-мӗшӗнче пӗтӗмлетӗҫ. Подрядчикӑн шкула икӗ ҫулта туса пӗтермелле, 2026 ҫулхи утӑ уйӑхӗн 31-мӗшӗнче хута ямалла. Малтан кивӗ ҫурта ишсе антармалла, газ пӑрӑхне, пысӑк вольтлӑ линие куҫармалла.

cap.ru сӑнӳкерчӗкӗ

Чӑваш Енре халӑх учителӗ ята илме заявкӑсем йышӑнаҫҫӗ. Кун пирки республикӑн Вӗренӳ министерстви пӗлтернӗ.

Ун пек ят пама пуҫлама пӗлтӗр йышӑннӑ. Ҫав ят учительсен ят-сумне ӳстерме пулӑшӗ тесе шухӑшлаҫҫӗ. Ӑна пысӑк квалификациллӗ вӗрентекенсене парассине пӗлтереҫҫӗ. Педагог пулса чӗрӗк ӗмӗртен кая мар тӑрӑшни кирлӗ.

Хисеплӗ ята ҫулталӑкра пӗрре, Учитель кунӗ умӗн, парӗҫ.

Хальхи вӑхӑтра министерство заявкӑсене йышӑнать. окументсене утӑ уйӑхӗн 15-мӗшӗччен ҫитерсе памалла.

Республикӑра тепӗр ҫамрӑк ППЭре 100 балл пухнӑ. Вӑл – Шупашкарти 37-мӗш шкултан вӗренсе тухнӑ Полина Степанова. Полина историпе экзамен тытса 100 балл илнӗ.

Хальхи вӑхӑтра республикӑра 63 ҫамрӑк ППЭре100 балл пухнӑ. Литературӑпа, географипе, химипе – 8, профильлӗ математикӑпа – 16, вырӑс чӗлхипе – 27, физикӑпа тата математикӑпа 8 ҫамрӑк чи нумай балл илнӗ.

Палӑртса хӑвармалла: 5 яш-хӗр икӗ ППЭре 200 балл пухнӑ. Вӗсен йышӗнче Ҫӗнӗ Шупашкарти 18-мӗш лицейри Екатерина Селезнева, Шупашкарти 5-мӗш гимназири Илья Капралов, Патӑрьелти 1-мӗш шкулти Юлиана Паймуллина, Шупашкарти 5-мӗш гимназири Виктория Жирнова.

Унччен республикӑри икӗ ҫамрӑк икӗ ППЭре 200 балл пухни пирки пӗлтернӗччӗ. Ҫак список тата пуянланнӑ: унта тепӗр икӗ ҫамрӑк хушӑннӑ.

Малтан 200 балл пухнисен йышӗнче Ҫӗнӗ Шупашкарти 18-мӗш лицейра вӗреннӗ Екатерина Селезнева, Шупашкрти 5-мӗш гимназири Илья Капралов пулнӑ. Ку йыша Патӑрьелти 1-мӗш шкулти Юлиана Паймуллина (химипе тата биологипе 100-шер балл пухнӑ) тата Шупашкарти 5-мӗш гимназири Виктория Жирнова (вырӑс чӗлхипе тата историпе 100-шер балл илнӗ) хушӑннӑ.

Legion-Media сӑнӳкерчӗкӗ

Мускавра пурӑнакан Тепляковсен тата тепӗр ачи сакӑр ҫулта Мускаври патшалӑх университетне вӗренме кӗресшӗн. Лейя Теплякова патшалӑхӑн пӗрлехи экзаменне тытнӑ. Хӗрӗн малашлӑх ӗмӗт-шухӑшӗ пирки ачан ашшӗ Евгений Тепляковхӑйӗн «Учимся с Алисой» каналӗнче пӗлтернӗ.

Аса илтерер: Тепляковсен пӗр хӗрӗ, Алиса, 2021 ҫулта патшалӑхӑн пӗрлехи экзаменне вырӑс чӗлхипе, математикӑпа, биологипе тата информатикӑпа тытнӑччӗ. Ун хыҫҫӑн ачан ашшӗ-амӑшӗ МПУн психологи факультетне вӗренме заявлени панӑ, анчах пӗчӗкскере бюджет уйрӑмне илмен. Ун хыҫҫӑн аслисем ачана унта укҫалла вӗрентсе кӑларма йышӑннӑ. Алиса пӗрремӗш сессире экзамен тытайман иккен, преподавательсем ача занятисене сиктернӗшӗн кӑмӑлсӑрланнӑ.

Ҫулталӑк каялла ачасен ашшӗ 10 ҫулти Алиса Теплякова тата унӑн 8 ҫулти шӑллӗ Хеймдалль ҫуллахи каникулта репетитор пулса ӗҫлес ӗмӗтлине пӗлтернӗ.

Тепляковсен ҫемйинче сакӑр ача — Алиса, Хеймдалль, Лейя, Терра, Айлунг, Фейлунг, Тесей и Сулейман. Вӗсен ашшӗ ҫемье ача пахчине йӗркеленӗ, унта пӗчӗккисене хӑй хатӗрленӗ меслетпе вӗрентет-мӗн.

Вӗренӳ тытӑмӗнче лайӑх хыпар: тепӗр 8 ҫамрӑк ППЭре 100 балл пухнӑ: физикӑпа тата обществознанипе.

Физикӑпа Трак шкулӗнчи Вадим Антонов, Ҫӗнӗ Шупашкарти 6-мӗш гимназири Арина Володичева тата Александр Кропчев, Ҫӗнӗ Шупашкарти 18-мӗш лицейри Егор Федоров, Шупашкарти 4-мӗш лицейри Владимир Герасимов 100 балл илнӗ.

Обществознанипе 100 балл илнисем: Шупашкарти 38-мӗш шкулти Джулиана Иванова, Шупашкарти 44-мӗш лицейри Елизавета Липатова. Шупашкарти 2-мӗш лицейри Александр Шнурков.

Хальхи вӑхӑтра республикӑра 57 ҫамрӑк экзаменра 100 балл пухнӑ. Вӗсенчен иккӗшӗн икӗ экзаменра – 200 балл.