forum.na-svyazi.ru сӑнӳкерчӗкӗ

Шупашкар хулинче пурӑнакан, кунти военкоматра ӗҫлекен 24 ҫулти Александр Моряков вырӑнти тӳре-шара пулӑшманран «RT» МИХран пулӑшу ыйтнине эпир унччен пӗлтернӗччӗ-ха.

Аса илтерер: Воркутара ҫуралнӑскер пӗлтӗрхи ҫу уйӑхӗнче ятарлӑ ҫар операцийӗнче икӗ урасӑр тӑрса юлнӑ. Кӑҫалхи ҫу уйӑхӗнче вӑл Чӑваш Енӗн тӗп хулинчи ҫар ӗҫ комиссариатне ӗҫе вырнаҫнӑ. Шупашкарта вӑл хваттер те туяннӑ. Анчах сусӑр ҫынна кӳмепе тухса кӗме май ҫук. Арҫын ҫине тӑнипе ӑна малтан падус вырнаҫтарса панӑ-ха, анчах вӑл меллӗ пулман. Прокуратура шухӑшланӑ тӑрӑх, урӑхларах пандус кирлӗ. Ӑна хваттерӗн балконӗ витӗр урама тӳрех тухмалла туса парасшӑн. Малтанласа ку ыйтӑва ҫав ҫуртра пурӑнакансен пухӑвӗнче татса памалла.

Инкелӗ лару-тӑру министерстви тунӑ сӑн

Шупашкар муниципаллӑ округӗнчи Йӑршу ялӗнче пушар пулнӑ. Унта ялти клуб ҫунма пуҫланӑ.

Инкеклӗ лару-тӑру министерстви пӗлтернӗ тӑрӑх, ҫулӑм чӳк уйӑхӗн 25-мӗшӗнче 22 сехет те 10 минутра тухнӑ. Вӑл 1936 ҫулта хута янӑ клуба ярса илнӗ. Йывӑҫ ҫуртӑн тӑрри, шалти пайӗ ҫунса кайнӑ. Вулавӑшӑн шалти отделки те сиенленнӗ.

Пушарнӑйсем ҫулӑма пӗр сехетрен сӳнтернӗ. Халӗ ҫулӑм ӑҫтан тухнине тӗпчеҫҫӗ.

Инкеклӗ лару-тӑру министерстви тунӑ сӑн

Паян 11 сехет те 5 минутра Шупашкарти Николаев урамӗнчи 46-мӗш ҫуртӑн 1-мӗш корпусӗнчи хваттерте пушар тухни пирки пӗлтернӗ.

Иккӗмӗш хутри хваттер ҫуннӑ. Ҫуртра пурӑнакан хӑш-пӗр ҫын пулӑшу ыйтнӑ. Мӗншӗн тесен ҫӑра тӗтӗм подъездра хӑвӑртах сарӑлнӑ.

Ултӑ ҫынна урама тухма пулӑшнӑ. Пӗр хӗрарӑма тухтӑрсен пулӑшӑвӗ кирлӗ пулнӑ. Ӑна пульницӑна илсе ҫитернӗ.

Пушара 12 сехет те 7 минутра сӳнтернӗ. Пушар хваттерти шалти отделкӑна, сӗтел-пукана тӗп тунӑ.

Чӳк уйӑхӗн 24-мӗшӗнче Узбекистан ҫыннисене тытса чарнӑ.

Патшалӑхӑн ҫул-йӗр хӑрушсӑрлӑхӗн инспекторӗсем Узбекистан номерӗллӗ «Чери Тиго» автомашинӑна тӗрӗслеме чарнӑ.

Асӑннӑ ҫӗршывра пурӑнакан 36 ҫулти арҫын Мускавран хӑйӗн ентешӗсене илсе кайнӑ. Вӗсен пирӗн ҫӗршывра пулмалли вӑхӑчӗ тухнӑ иккен.

Водитель ӗлӗшпе административлӑ протокол ҫырнӑ. Машинӑри тӑватӑ пассажира (вӗсем 20-30 ҫулсенчискерсем пулнӑ) пирӗн ҫӗршывран кӑларса ярӗҫ. Кайран вӗсен пирӗн ҫӗршыва тепӗр 5 ҫул иртмесӗр те килме юрамӗ.

21.мвд.рф сӑнӳкерчӗкӗ

Чӳк уйӑхӗн 23-мӗшӗнче Шупашкарта ӳсӗр пӗр водителе асӑрхакансем тупӑннӑ. «Лада Ларгус» автомобиль пӗр енчен тепӗр еннелле пӗрмай пӑрӑннӑ, ӑна пула тепӗр машинӑсем инкеке лекме пултарнӑ.

Маншӑн пулсан ик айкки те тӑвайкки теме хӑнӑхман пӗр ҫын шанчӑксӑр водитель пирки йӗрке хуралҫисене систернӗ. Хӑй вара ҫав машина хыҫҫӑн пынӑ. Вырӑна пырса ҫитнӗ ҫул-йӗр хӑрушсӑрлӑхӗн инспекторӗсем 34 ҫулти арҫын ӳсӗррине палӑртнӑ. Водитель тӗлӗшпе икӗ протокол ҫырнӑ, машинӑна ятарлӑ стоянкӑна ӑсатнӑ.

Шупашкар хулинче пурӑнакан 50 ҫулти хӗрарӑма 8 ҫуллӑха тӗрмене ӑсатнӑ. Ӑна РФ Пуҫиле кодексӗн 105-мӗш стайин 1-мӗш пайӗпе килӗшӳллӗн явап тыттарнӑ.

Кӑҫалхи пуш уйӑхӗнче вӑл хӑйӗн пӗлӗшӗпе патӗнче хӑналаннӑ. Унта тусӗн пӗлӗшӗ те, 52 ҫулти арҫын, пулнӑ. Пӗрле эрех ӗҫнӗ чухне хӑна ҫавӑнпа хирӗҫсе кайнӑ. Ӑна вӑл пуҫӗнчен мӑлатукпа хӗнеме тапранса кайнӑ. Суранланса пӗтнӗ арҫын тепӗр кунне пульницӑра вилсе кайнӑ.

Суд хӗрарӑма пӗтӗмӗшле режимлӑ колоние 8 ҫуллӑха ӑсатнӑ.

Прокуратура архивӗнчи сӑн

Ӗнер, чӳк уйӑхӗн 24-мӗшӗнче, Муркаш муниципалитет округӗнчи Кашмаш ялӗнче пӗр ҫуртра амӑшӗпе хӗрӗ вилнӗ. Вӗсем - 73 ҫулта тата 49-та.

Малтанлӑха пӗлтернӗ тӑрӑх, амӑшӗпе хӗрӗ газ котелӗнчен тухнӑ сӗрӗмпе наркӑмӑшланнӑ. Специплистсем тӗтӗм тухмалли ҫул йӗркеллӗ ӗҫлеменнине палӑртнӑ. Котел механизмне улӑштарни те паллӑ: авари чухне сӳнмелли датчик ӗҫлемен.

Икӗ хӗрарӑма ятарласа вӗлернӗ йӗр ҫук. Халӗ ӗҫ-пуҫа следовательсем тата прокуратура ӗҫченӗсем тишкереҫҫӗ.

Инкелӗ лару-тӑру министерстви тунӑ сӑн

Шӑматкун каҫхине Шупашкар муниципаллӑ округӗнчи Олкаш ялӗнче пушар пулнӑ. Ҫуртӑн тӑрри тата веранда ҫунса кайнӑ. Ҫӑлавҫӑсем пушарпа 40 минут кӗрешнӗ. 67 ҫулти кил хуҫи инкек вӑхӑтӗнче сӗрӗмпе наркӑмӑшланса вилнӗ.

Ҫав кунах Етӗрне муниципаллӑ округӗнчи Советское ялӗнче 72 ҫулти арҫыннӑн хуҫалӑхӗнче пушар тухнӑ. Ҫулӑм ҫуртӑн пӗр пайне сиенлетнӗ.

astera.ru сӑнӳкерчӗкӗ

Канаш хулинче пурӑнакан 37 ҫулти арҫын тӑванне пулӑшас тесе улталаннӑ. «Ватсап» мессенджерта ун патне тӑванӗнчен ҫыру килсе выртнӑ, ҫырура хӑйӗн ячӗпе илнӗ банк карттин сӑнӳкерчӗкне ярса панӑ. Ҫийӗнчен 30 пин тенкӗ укҫа ыйтнӑ.

Арҫын малтан тӑванӗ патне шӑнкӑравланӑ-ха, анчах лешӗ телефона тытман. Унтан укҫана куҫарса панӑ.

Кӑштахран хӗрарӑм шӑнкӑравланӑ та унӑн ватсапри аакаунтне такамсем ватни пирки асӑрхаттарнӑ.

Сӑмах май каласан, аккаунта икӗ факторлӑ авторизаци витӗр кӑлармалла. Аккаунта урӑх хатӗртен кӗрсен е электрон почта ҫине ҫыру килӗ е ятарлӑ код.

ianed.ru сайтри сӑн

Юпа уйӑхӗн 28-мӗшӗнче Муркаш районӗнчи Ҫаранҫырма ялӗнче пӗр арҫын теприн патне, сывлӑх енчен хавшакрахскер вӑл, кӗнӗ те эрех валли укҫа ыйтнӑ. Лешӗ пама хирӗҫленӗ.

Хӑна тарӑхса кайнипе кӗпе-йӗм ҫакмалли канра ярса тытнӑ та сусӑра пӑвма пуҫланӑ. Лешӗ тӑнне ҫухатсан хайхискер тарса ҫухалнӑ.

Ҫав арҫынна тытса чарнӑ. Ун тӗлӗшпе пуҫиле ӗҫ пуҫарнӑ. Следстви вӑхӑтӗнче ӑна хупса усрама йышӑннӑ.