cap.ru сӑнӳкерчӗкӗ

Ҫурла уйӑхӗн 29-мӗшӗнче Правительство ҫуртӗнче кӑшӑлвируса сарӑлма парас мар енӗпе ӗҫлекен оперштаб ларӑвӗ иртнӗ. Кун пек ларӑва ҫӗртмен 9-мӗшӗнченпе пухӑнман, мӗншӗн тесен чирлекенсем сахал пулнӑ.

Халӗ вара сӳтсе явмалли пур: кӑшӑлвирус каллех сарӑлма пуҫланӑ. Ҫурла уйӑхӗн пуҫламӑшӗнченпе чирлесси 8 хут ӳснӗ. Роспотребнадзорӑн Чӑваш Енри пуҫлӑхӗ Надежда Луговская ҫынсене общество вырӑнӗсенче маска тӑхӑнма сӗннӗ. Хальлӗхе ку - сӗнӳ кӑна. Ларура оперштаб пайташӗсем ҫӗнӗлӗхсем йышӑнман.

Ракӑн ятарлӑ паллисем ҫук та темелле. Чылай чухне ҫак амак ытти чир хыҫне пытанать. Республикӑн онкологи диспансерӗнче шӑпах ҫавӑн пек пациентсенчен пӗрне пулӑшнӑ та.

45 ҫулти арҫын пыр ыратнипе аптӑранӑ, апат ҫӑтнӑ чух та ӑна кансӗр пулнӑ. Вӑл тӗрӗсленме пульницӑна кайнӑ. Тухтӑрсем усал шыҫӑ мар-ши тесе ӑна Республикӑн онкологи больницине кайса килме сӗннӗ.

Чӑн та, рак пулнӑ. Пыр патӗнчен усал шыҫӑ чӗлхе ҫине куҫнӑ. Рак 3 стадие ҫитнӗ. Арҫынна халӗ операци тунӑ, усал шыҫҫӑ касса илнӗ.

Пӗтӗм Раҫҫейри тухтӑрсен конкурсне пӗтӗмлетнӗ. «Чи лайӑх анестезиолог-реаниматолог» номинацире Президент пепкелӗх центрӗнче ӗҫлекен Екатерина Степанова виҫҫӗмӗш вырӑн йышӑннӑ.

Вӑл тин ҫуралнӑ ачасен интенсивлӑ терапи уйрӑмӗнче ӗҫлет. Екатерина Степанова 16 ҫул ӗнтӗ пепкесен пурнӑҫне ҫӑлать.

Вӑл ача чухнех тухтӑр пулма ӗмӗтленнӗ. И.Н.Ульянов ячӗллӗ ЧПУн медицина факультетӗнче педиатри уйрӑмӗнчен вӗренсе тухсан Президент пепкелӗх центрне ӗҫе вырнаҫнӑ.

Хӗрлӗ Чутай районӗнчи Пантьӑк ялӗнче фельдшерпа акушер пункчӗ уҫӑлнӑ. Тӗрӗссипе, ӑна ҫулталӑк каяллах уҫмалла пулнӑ.

Объекта пӗлтӗр авӑн уйӑхӗн 1-мӗшӗнче вӗҫлеме палӑртнӑ. Анчах подрядчик ӗлкӗреймен. Вӑл каркасне хӑпартнӑ хыҫҫӑн унпа килӗшӗве пӑрахӑҫланӑ.

Прокуратура тӗрӗслев ирттернӗ хыҫҫӑн подрядчике 4,5 миллион тенкӗлӗх штрафланӑ. Ертӳҫине те 226 пин тенкӗ штраф тӳлеме тивнӗ.

ФАПа тепӗр подрядчик туса пӗтернӗ. Ҫапла вӑл нумаях пулмасть, ҫурла уйӑхӗн 23-мӗшӗнче, кӑна алӑкне уҫнӑ.

cheb.ru сӑнӳкерчӗкӗ

Шупашкарта пурӑнакан арҫын хӑйӗн кӳршине, 56 ҫулти хӗрарӑма, кӳрентерсе пӗтернӗ. Хӗрарӑм 33 ҫулти кӳршӗ арҫыннине подъездра пирус туртнӑшӑн тата 23 сехет хыҫҫӑн шавланӑшӑн асӑрхаттарнӑ.

Вӑйпитти этем каҫару ыйтас вырӑнне хӗрарӑма кӳрентерме тапранса кайнӑ.

Кӳршин сӑмахне хӗрарӑм чӗре ҫывӑхне илнӗ, ӑна япӑх пулса кайнӑ. Хӗрарӑм патне васкавлӑ пулӑшу машини чӗнсе илнӗ, ӑна больницӑна вырттарма тивнӗ.

Хӗрарӑма кӳрентерсе пӗтернӗ арҫынна суд административлӗ майпа явап тыттарса 3 пин тенкӗ штраф хуса пама йышӑннӑ.

mk103.med.cap.ru сӑнӳкерчӗкӗ

Пӑрачкав районӗнче пурӑнакан ача урама выляма тухсан йывӑр аманнӑ.

Ҫурла уйӑхӗн 15-мӗшӗнче 10 ҫулти ача тӑвайккинчен пысӑк хӑвӑртлӑхпа самокатпа ярӑнса анас тенӗ. Анчах ҫурта пырса ҫапӑнса чул стенана пуҫӗпе тӑрӑннӑ.

Ача суранланнӑ вырӑна тухтӑрсем 6 минутрах пырса ҫитнӗ. Вӗсем юн пусӑмне йӗркене кӗртессипе, чӗре таппине лайӑхлатассипе вырӑнтах ҫине тӑнӑ. Апла пулин те пуҫ мимине хытах амантнӑ ача тӑна кӗрсе пӗтеймен. Ӑна Ҫӗмӗрлери территорисем хушшинчи медицина центрӗнчен Республикӑн ача-пӑча клиника больницине илсе кайнӑ. Вӑл унта сипленет.

Стопкоронавирус.рф сайтри сӑн

Республикӑра кӑшӑлвируспа чирлесси тӑваттӑмӗш эрне ӗнтӗ ӳсет. Утӑн 25-31-мӗшӗсенче - 292 ҫын, ҫурлан 1-7-мӗшӗсенче 538 ҫын инфекциленнӗ.

Иртнӗ шӑматкун республикӑра 158 ҫын чирленине палӑртнӑ. Ӗнер 153 ҫын инфекциленнӗ. Иртнӗ талӑкра 2 ҫынна пульницӑна вырттарнӑ. Ку - пысӑк хисеп мар. Ахӑртнех, нумайӑшӗ чире ҫӑмӑллӑн чӑтса ирттерет.

Юлашки талӑкра 108 ҫын сывалнӑ, вилекенсем пулман. Хальхи вӑхӑтра республикӑра коллектив иммунитечӗ 8,7 процентпа танлашать. Ку - сахал. Чирлекенсем нумай чухне ку кӑтарту 80 е 90 процент пулмалли пирки калатчӗҫ.

Шупашкарта тӑнне ҫухатнӑ арҫын патне васкавлӑ медпулӑшу сирена ҫутса хӑвӑрт ҫитнӗ.Сергей Васильев фельдшер тата Кирилл Мясников медбрат арҫын тӑнне кӑна ҫухатманнине, темле япалапа наркӑмӑшланнӑран комӑна кӗрсе ӳкнине ӑнланнӑ. Вӗсем реанимаци тума пуҫланӑ.

Пациент 5-10 минутлӑха сывлама пӑрахнине кура тухтӑрсем унӑн сывлав ҫулне аспираторпа тасатнӑ, сывлама пулӑшакан укол тунӑ. Ҫапах арҫын комӑран тахман. Анчах фельдшерпа медбрат сывлӑх кӑтартӑвӗсене йӗркене кӗртнӗ, унтан пульницӑна илсе кайнӑ. Лере пациента комӑран кӑларнӑ.

Сергей Васильев фельдшерпа Анна Павлова медсестра. cap.ru сӑнӳкерчӗкӗ

Васкавлӑ межпулӑшу службинче ӗҫлекен ҫамрӑк фельдшерсем Шупашкарти арҫыннӑн пурнӑҫне ҫӑлнӑ. Вӑл эмел ӗҫнӗ те унӑн аллерги пуҫланнӑ. Арӑмӗ часрах тухтӑрсене чӗннӗ.

Сергей Васильев фельдшерпа Анна Павлова медсестра васкавлӑ медпулӑшура нумай вӑхӑт ӗҫлемеҫҫӗ пулин те опыт пухма ӗлкӗрнӗ. Анафилактика шокӗпе вара пӗрремӗш хут тӗл пулнӑ.

Арҫыннӑн пырӗ шыҫӑнса кайнӑ, ҫавӑнпа ӑна сывлама йывӑрланнӑ, чӗре таппи чакнӑ, чӗре ӗҫӗ пӑсӑлнӑ. Фельдшерпа медсестра арҫынна шокпа кӗрешмелли процедурӑсем тунӑ. Кӗҫех унӑн сывлӑхӗ йӗркеленнӗ те ӑна пульницӑна илсе кайнӑ.

Стопкоронавирус.рф сайтри сӑн

Юлашки вӑхӑтра республикӑра кӑшӑлвируспа чирлекенсен йышӗ ӳссе пырать. Стопкоронавирус.рф пӗлтернӗ тӑрӑх, юлашки талӑкра 126 ҫын инфекциленнӗ. Кун пек кӑтарту тахҫанах пулман.

Юрать-ха, иртнӗ талӑкра вилекенсем пулман. 27 ҫынна пульницӑна сипленме вырттарнӑ. 83 ҫын вара сывалнӑ.

Пандеми пуҫланнӑранпа республикӑра 83,1 пин ытла ҫын чирленӗ. Вӗсен 93,6 проценчӗ сывалнӑ – ку 77,9 пин ҫынпа танлашать. 4,7 пине яхан пациент кӑшӑлвируса парӑнтараймасӑр вилнӗ.

Ҫурла уйӑхӗн пуҫланнӑранпа вара Чӑваш Енре 5 ҫын кӑшӑлвируса пула пурнӑҫран уйрӑлнӑ.