kprf121.ru сайтри сӑн

Чӑваш Енре коммунистсем каллех Сталин бюстне вырнаҫтарнӑ. Ку – тӑваттӑмӗш.

Хальхинче бюста Комсомольски округӗнчи Асанкасси ялӗнче Киров урамӗнчи 35-мӗш ҫуртӑн пахчинче вырнаҫтарнӑ. Хальхине те, унчченхисене те Н.К.Шемякин скульптор хатӗрленӗ. Тӑваттӑмӗш бюста шӑпах унӑн мӑшӑрӗн ашшӗ-амӑшӗ килӗ умӗнче лартнӑ. Арӑмӗн ашшӗ Тӑван ҫӗршывӑн Аслӑ вӑрҫинче пулнӑ, амӑшӗ – ӗҫ фрончӗн ветеранӗ, хисеплӗ колхозница.

Малтанхи 3 бюст ҫак тӑрӑхсенче вырнаҫнӑ: Канаш округӗнчи Вӑтапуҫра, Хӗрлӗ Чутай тӑрӑхӗнчи Хурапырта тата Вӑрнар округӗнчи Чарӑшкас Хирлеп ялӗнче.

Чӑваш Енре Wi-Fi точкисене сарасшӑн. Вӗсем урлӑ интернета тӳлевсӗр тухма май килӗ.

Чӑваш Енре, пӗтӗм ҫӗршыври пекех, дронсене вӗҫтернӗрен мобильлӗ интернет ҫыхӑнӑвне час-часах пӗчӗклетеҫҫӗ.

Ҫавна пула онлайн-тӳлевсемпе сервиссемпе уса курма йывӑрлӑхсем сиксе тухаҫҫӗ. Ҫавна май ҫынсене усӑ курма тӳлевсӗр Wi-Fi-точкӑсен шутне ӳстереҫҫӗ.

Wi-Fi па усӑ курнӑ чухне пӗлекен сетьсемпе ҫеҫ ҫыхӑнма сӗнеҫҫӗ. Мобильлӗ ҫыхӑнӑва сӳнтерне вӑхӑтра аппаратсене 2G ҫыхӑну ҫине куҫма сӗнеҫҫӗ.

cap.ru сайтри сӑн

Паян, Ҫемье, юрату тата шанчӑклӑх кунӗнче, ЧР Элтеперӗ Олег Николаев Красноармейски округӗнчи Янмурҫин ялӗнче пурӑнакан Ивановсене «Юратупа шанчӑклӑхшӑн» орденпа чысланӑ.

Геннадий Ивановичпа Галина Георгиевна 1972 ҫулта паллашнӑ. Ҫапла 52 ҫул пӗрле вӗсем. Иккӗшӗ те – ӗҫ ветеранӗ. Геннадий Иванович механизаторта 47 ҫул ӗҫленӗ, Галина Георгиевна вӗрентекенре 38 ҫул тӑрӑшнӑ.

Ивановсен – 3 хӗр, кашни аслӑ пӗлӳ илнӗ, пӗри амӑшӗн ҫулӗпе кайса вӗрентекен пулнӑ.

Ивановсем ахаль ларма юратмаҫҫӗ, вӗсем ҫулӗсене пӑхмасӑр пахча ӗҫлеҫҫӗ, выльӑх-чӗрлӗх тытаҫҫӗ.

37.мвд.рф сайтри сӑн

Чӑваш Енре «Автоледи» республика конкурсӗ иртӗ. Ӑна «Ҫул-йӗр ҫинчи хӑрушсӑрлӑх» проектпа килӗшӳллӗн йӗркелеҫҫӗ.

Конкурса 18 ҫул тултарнӑ, водитель правине илнӗ хӗрсемпе хӗрарӑмсем хутшӑнма пултараҫҫӗ. Вӑл икӗ пайпа иртӗ: теори тата практика. Ҫавӑн пекех пултарулӑх заданийӗсем пулӗҫ.

Заявкӑсене ҫак электрон адреспа йышӑнаҫҫӗ:

familycheb@mail.ru.

«Контактри» сӑн

Паян ирхи 9 сехетренпе ҫынсем Шупашкарта, хӑш-пӗр округра мобильлӗ интернет ҫуккине сиснӗ.

Ку пилотсӑр вӗҫекен аппаратсем вӗҫес хӑрушлӑх пулнипе ҫыхӑннӑ. Хӑрушлӑх сирӗлсенех интернет пулассине пӗлтереҫҫӗ.

Мобильлӗ интернета сӳнтернӗрен лавккасенче тӳлев терминалӗсемпе тӳлеме чӑрмавлӑрах, «Ӑслӑ транспорт» приложени те ӗҫлеме пӑрахнӑ. Ҫавӑн пекех такси нумай кӗтме тивет, кунсӑр пуҫне унта хаксем хӑпарнӑ.

Красноармейски округӗнче кӗҫех «19-мӗш ӗмӗрти чӑваш хресченӗн усадьбӑллӑ кану бази» уҫӑлӗ. Ку пуҫару – вырӑнти фермер хуҫалӑхӗн пуҫлӑхӗн Валерий Шумиловӑн.

Пӗлтӗр вӑл «Агротуризм» федераци грантне – 8 миллион тенке – выляса илнӗ. Ку укҫапа вӑл хӑйӗн проектне аталантарать.

Хальхи вӑхӑтра 5 хӑна ҫурчӗ, «хура мунча» туса лартнӑ, кӗҫех хальхи йышши мунча пулӗ. Чи интересли – ӗлӗкхи ҫурт, унта 19-мӗш ӗмӗр вӗҫӗнчи йӑла палӑрӗ.

Территорие 300 тӗмӗ фундук тата 500 кедр хунавӗ илемлетет.

«Контактри» сӑн

Раҫҫейри паллӑ телеертӳҫӗ тата актер, режиссер Александр Стриженов Чӑваш Ене килнӗ, вӑл Улатӑр хулинче пулнӑ.

Вӑл Вырӑс провинцийӗн музейне кӗрсе унти экспонатсемпе, ӗҫсемпе паллашнӑ. Унсӑр пуҫне актер 6-мӗш гимназире йӗркеленӗ мероприятие те ҫитнӗ: вӗренсе тухакансене аттестат панӑ. Вӑл унта ахальтен килмен: выпусниксенчен пӗри унӑн хӗресне ывӑлӗ иккен.

«Контактри» сӑн

Красноармейски округӗнчи Григорьевсем пӗрлешнӗренпе 70 ҫул ҫул ҫитнӗ. Ҫемье ҫак пулӑма паллӑ тунӑ.

Вӗсем мӗн ачаранах пӗрле ӳснӗ: пӗр класра вӗреннӗ, унтан иккӗшӗ те педагогика институтӗнче пӗлӳ илнӗ. Мира Никандровна шкулта физикӑпа математика предмечӗсене вӗрентнӗ, «Халӑх вӗрентӗвӗн отличникӗ» ята илнӗ. Валериян Григорьевич вара вырӑс чӗлхин учителӗ пулнӑ, кайран – парти ӗҫченӗ.

cap.ru сайтри сӑн. Сӑнӳкерчӗкре — Эльвира Платонова

Ҫемье тата юратупа шанчӑклӑх кунӗ умӗн республикӑри 50 ҫултан кая мар пӗрле пурӑнакан мӑшӑрсене чысласси йӑлара. Кӑҫал 7 мӑшӑра «Юратупа шанчӑклӑхшӑн» орденне парӗҫ.

Ҫак йышра — Красноармейски округӗнчи Геннадипе Галина Ивановсем тата Владимирпа Галина Филипповсем, Куславкка тӑрӑхӗнчи Евграфипе Людмила Ивановсем, Пӑрачкав округӗнчи Владимирпа Валентина Кулясовсем, Улатӑр округӗнчи Александрпа Лидия Маланьинсем, Елчӗк тӑрӑхӗнчи Петрпа Зоя Поповсем, Хӗрлӗ Чутай округӗнчи Геннадипе Нина Ухлиновсем.

Ҫавӑн пекех 5 ача ҫуратнӑ икӗ хӗрарӑма амӑшӗн мухтавӗн «Анне» паллине чыслӗҫ. Ӑна Хӗрлӗ Чутай округӗнчи Эльвира Платонова тата Куславкка тӑрӑхӗнчи Екатерина Шильгачева тивӗҫнӗ.

«Контактри» сӑн

Чӑваш Ене паллӑ телеертӳҫӗ Юлия Барановская килни пирки пӗлтернӗччӗ . Вӑл нумай ачаллӑ ҫемьесемпе тӗл пулнӑ. Вӗсенчен пӗри — «Чӑваш Ен» ПТРК режиссерӗн Николай Семеновӑн ҫемйи. Тепри — сӑнӳкерчӗкри.

Кӗҫех вӗсем пирки ӳкернӗ сюжета Пӗрремӗш каналпа пыракан «Большие семьи большой страны» кӑларӑмра курма май пулӗ.

Юлия Барановская телеертӳҫӗ республика Пуҫлӑхӗпе Олег Николаевпа та тӗл пулнӑ, ачаллӑ ҫемьесене мӗнле пулӑшни пирки калаҫнӑ. Ҫавӑн пекех вӑл кӳлмекре уҫӑлса ҫӳренӗ, Раҫҫейӗн тӗрленӗ карттин музейӗпе паллашнӑ.

Телеертӳҫе Чӑваш Ен килӗшнӗ, кунта тепре килес шухӑш пуррине пӗлтернӗ.