cheb.mk.ru сӑнӳкерчӗкӗ

Паян Чӑваш Ен Правительство ҫуртӗнче республикӑн влаҫ органӗсенче тӑрӑшакансемпе ирттернӗ канашлура Шупашкарпа Ҫӗнӗ Шупашкар хушшинче троллейбус ҫӳретес ыйтӑва хускатнӑ.

Канашлӑва яланхиллех Михаил Игнатьев Элтепер ертсе пынӑ. Тунтикунхи планеркӑна пухӑннӑ тӳре-шара тӗрлӗ ыйтӑва хускатнӑ. Ҫав шутра ҫул-йе ҫинчи хӑрушсӑрлӑхпа, транспорт ыйтӑвӗпе, коммуналлӑ хуҫалӑхпа ҫыхӑннисем те пулнӑ.

Республикӑн транспорт министрӗ Александр Николаев пирӗн тӑрӑха ҫӗнӗ йышши троллейбуссем килсе ҫитмеллине пӗлтернӗ. Транспорта Шупашкара раштав уйӑхӗн 16-мӗшӗнче илсе килесшӗн.

Троллейбуссем Ҫӗнӗ ҫул тӗлне ҫула тухас шанчӑк пур. Кунта сӑмах Шупашкарпа Ҫӗнӗ Шупашкар хулине троллейбуспа ҫыхӑнтарасси пирки пырать.

ЧР Элтеперӗ Михаил Игнатьев «Комсомольская правда» радиона интервью панӑ. Михаил Васильевич унта палӑртнӑ тӑрӑх, Чӑваш Енре кирек мӗнле яла та кирек мӗнле машинӑпа кӗрсе тухма пулать.

Ертӳҫӗ малтанах ӗненемен, тепӗр хутчен ыйтнӑ: «Ку мӗнпе пынинчен килет!. Тракторпа ав — хӑть упа шӑтӑкне! «Мерседеспа» вара?» Элтепер хуравланӑ: Кирек мӗнле автотранспортпа та! Ҫил-тӑман чухне, паллах, ҫулсене хӳсе лартать, тӳрех кӗрейместӗн. Техника тасатса ӗлкӗреймест. Анчах ку – темиҫе сехетлӗхе кӑна».

Ҫапах Элтепер республикӑра мӗнпур ҫул лайӑхах маррине пӗлет. Ҫакна вӑл ӗҫпе ҫӳренӗ чухне курать.

forum.na-svyazi.ru сайтри сӑн

ЧР Транспорт министерстви «Шупашкар – Сурски» автоҫула федераци харпӑрлӑхне памашкӑн документсем хатӗрлет. Кун пирки ЧР Элтеперӗн администрацийӗн пресс-служби хыпарлать.

Палӑртмалла: халӗ вӑл – республика харпӑрлӑхӗнче. Ҫапах ҫул Нурӑс, Пӑрачкав, Улатӑр урлӑ Мӑкшӑ Республикине илсе ҫитерет. Ҫул тӑршшӗ – 200 ҫухрӑм.

Халӗ тӳре-шара ҫак ҫула федераци хыснине памашкӑн ҫине тӑрсах ӗҫлет. «Документацие тӗплӗн хатӗрлеме ыйтатӑп. Документсене япӑх хатӗрлесен комисси йышӑнмасан та пултарать», - тене Михаил Игнатьев Элтепер.

PIXABAY.COM сӑнӳкерчӗкӗ

«Мускав-Хусан» автоҫулӑн малтанхи икӗ участокне («Мускав — Улатимӗр» тата «Канаш — Хусан») 2021 ҫулхи III-IV кварталсенче проектласа пӗтермелле. Ҫакӑн пирки РФ Правительствин ӑнлантару хутӗнче каланӑ. Документа нормативпа право акчӗсен федераци порталӗнче пичетленӗ.

2022-мӗш ҫулхи II-III кварталсенче «Улатимӗр — Арзамас» тата «Арзамас — Канаш» участоксен проектне вӗҫлемелле.

Проектра пӑхса хӑварнӑ тӑрӑх, 2020-2024 ҫулсенче «Мускав — Улатимӗр» тата «Канаш — Шали», 2021-2025 ҫулсенче «Улатимӗр — Арзамас», 2022-2027 ҫулсенче «Арзамас — Канаш» лаптӑка тумалла.

Раҫҫейӗн вице-премьерӗ Максим Акимов маларах пӗлтернӗ тӑрӑх, хӑвӑрт ҫӳремелли «Мускав — Хусан» тӳлевлӗ автоҫула 2020 тума пуҫӑнса 2027 ҫулта вӗҫлемелле.

ҪҪХПИ тунӑ сӑн

Йывӑр тиевлӗ машина водителӗ ҫул ҫинче тискер чӗрчуна ҫапса хӑварнӑ та хӑй вырӑнтан тарнӑ. ҪҪХПИ ӗҫченӗсем ӑна тытса чарнӑ.

Чӳк уйӑхӗн 15-мӗшӗнче 14 сехетре Куславкка районӗнче М-7 ҫул ҫинче хир качакине сапса хӑварнӑ. Ҫакна Тверь облаҫӗнчи арҫын туни паллӑ. Вӑл йывӑр тиевлӗ машинӑпа Мускав еннелле кайнӑ. Хир качаки ҫул ҫине ӑнсӑртран сиксе тухнӑ.

Чӗрчуна ҫапса хӑварна хыҫҫӑн машинӑн патшалӑх номерӗ хӑйпӑнса ӳкнӗ. Водитель вара чарӑнса тӑман, малалла вӗҫтернӗ. Ӑна Хыркасси поселокӗнче тытса чарнӑ. Ун тӗлӗшпе административлӑ материал ҫырнӑ. Водителӗн чӗрчуна ҫапса хӑварнӑ хыҫҫӑн полицие пӗлтермелле пулнӑ.

Лира Нурсаитова архивӗнчи сӑнӳкерчӗк

Куславкка районӗнче «Атӑл» М-7 федераци трасси ҫинчи 13 километр лаптӑка юсанӑ. Унта икӗ лаптӑк ҫӗре ҫӗнетнӗ.

«Волго-Вятскуправтодор» федерацин хысна учрежденийӗн халӑх ҫыхӑну тытас енӗпе ӗҫлекен специалисчӗ Лира Нурсаитова ҫак йӗркесен авторне пӗлтернӗ тӑрӑх, ҫула юсанӑ ҫеҫ мар, ӑна 3 метр та 75 сантиметр таран сарнӑ.

Ҫӳрекенсене меллӗ пултӑр тесе ҫутӑ линине 8 километр тӑршшӗ сарнӑ. Ҫуран ҫӳрекенсене каҫмалли вырӑнсем те пур, общество транспорчӗ валли чарӑнусем те. Мартынкасси, Туканаш, Пӑрмас, Муркар, Тӗрлемес ялӗсем патӗнче 11 чарӑну вырӑнӗ вырнаҫтарнӑ. Пӗр ҫӗрте кану вырӑнӗ йӗркеленӗ.

Куславкка районӗнчи асӑннӑ ҫул лаптӑкӗсене тӗплӗ юсав валли федераци хыснинчен 1 миллиард та 300 миллион тенкӗ уйӑрнӑ.

Шупашкар районӗнчи Кӳкеҫсене вырӑнти ача пахчисенчен пӗри патӗнче тротуар ҫукки пӑшӑрхантарать. Унта сӑмах район центрӗнчи ҫӗнӗ районсенчен пӗрин, Совет урамӗн вӗҫӗнче, вырнаҫнӑ «Крепыш» ача пахчи пирки пырать.

Унтан куллен иртсе ҫӳрекенсен машина ҫулӗпе е симӗс курӑк тӑрӑх (вӑл хытса ҫирӗпленнӗ темелле) иртме тивет. Унтан ача-пӑча та, аслисем те ир-каҫ та, кӑнтӑрла та утаҫҫӗ. Шӑпӑрланӗсене ача пахчине илсе пынисен машинисем ирсерен тата каҫсерен ҫавӑнта шӑкӑрттин ларнине кура урапа айне ним мар лекме пулать.

Тӗнче тетелӗнчи халӑх ушкӑнӗсенчен пӗринче ҫырнӑ постпа нумайӑшӗ килӗшет. Тротуар тахҫанах кирлине вӗсем пӗр-пӗринпе ӑмӑртмалла тенӗ пек палӑртса ҫырнӑ. Ҫавӑнти машинӑсен парковки саккун ыйтнипе килӗшсе тӑмасть текен те тупӑннӑ.

«Шӑхасан – Нурӑс» ҫула юсама пуҫлани пирки Пӗрремӗш канал кӑтартнӑ. Анчах репортажра ку ӗҫе лайӑх енчен хакламан.

«12 ҫухрӑм ҫула авӑн уйӑхӗнче ҫеҫ юсама пуҫланӑ – подрядчике чылай вӑхӑт тупайман. Халӗ ҫул-йӗр ӗҫченӗсем хӑҫан асфальт хума пуҫлассине калаймаҫҫӗ», - тенӗ репортажра. «Ҫул-йӗр ӗҫченӗсем каланӑ тӑрӑх, ку ӗҫе тума пулать. Анчах эпир куратпӑр: техника тата ҫын сахал», - Халӑх фрончӗн Чӑваш Енри элчи Илья Васильев федераци телеканалӗн эфирӗнче ҫапла каланӑ.

Халӗ ку ҫулпа машинӑсене ҫӳреме чарнӑ. Анчах маларах кун пирки ЧР Транспорт министерстви те, Чӑвашупрдор та пӗлтермен – пӗр кун ҫак ҫулпа пынӑ водительсем чару палли патӗнче пырса чарӑннӑ. Ҫапах машинӑсем ҫакна пӑхмасарах ҫулпа ҫӳреҫҫӗ-мӗн.

cap.ru сайтри сӑн

Шупашкарти Иван Яковлев проспектӗнчи ҫула юсани чылай ҫыншӑн йывӑрлӑх кӑларса тӑратать. Ара, тавран ҫаврӑнса ҫӳреме тивет-ҫке-ха. Аса илтерер: реконструкци авӑн уйӑхӗнче пуҫланнӑ.

Ҫак кунсенче комисси ӗҫ мӗнле пынине тӗрӗсленӗ. Унта Шупашкар хула администрацийӗн пуҫлӑхӗ Алексей Ладыков та ҫитнӗ. «Иккӗленӳ ҫук: машинсене ку ҫулпа ҫулталӑк вӗҫлениччен ярӑпӑр», - тенӗ сити-менеджер.

2020 ҫулта Ашмарин урамӗнчен пуҫласа Канаш ҫулӗ таран юсӗҫ. Унта полосасен шутне ултта ҫитересшӗн, магистральпе ҫумӑн тротуар тӑвӗҫ, ҫутӑсем лартӗҫ, светофор тата ҫул урлӑ каҫмалли вырӑнсем пулӗҫ.

http://ru.esosedi.org сайтри сӑнӳкерчӗк

Раҫҫейӗн чукун ҫулӗсен Федерацин пассажир компанийӗ Мускавран Петрозаводска хутлакан ҫӗнӗ маршрут уҫӗ. Унта пуйӑс Питӗр тата Сортавалу урлӑ кайӗ.

Хальхи вӑхӑтра «Карели» фирма пуйӑсӗ «Мускав—Петрозаводск» маршрутӑа хутлать-ха. Кӑҫалхи раштавӑн 3-мӗшӗнчен унта икӗ хутлӑ пуйӑссем ҫӳреме пуҫлӗҫ.

Раштавӑн 2-мӗшӗнчен уҫӑлакан рейс Мускаври Ленинград вокзалӗнчен 16:00 сехетре хускалӗ, Петрозаводска тепӗр кунхине 12:10 сехете ҫитӗ. Карелин тӗп хулинчен пуйӑс 14:10 сехетре хускалса ҫӗршывӑн тӗп хулине 10:16 сехетре ҫитӗ.

Пуйӑс Тверь, Чудово, Питӗр (Ладога вокзалӗ), Белоостров, Зеленогорск, Выборг чарӑнусенче, Хийтола, Элисенваар, Яккима, Сортавала, Хелюля, Маткаселькя, Янисъярви, Суоярви, Новые Пески, Эссойла, Чална станцисенче чарӑнӗ.