"Про Город" сайтри сӑн

Ӗнер, авӑн уйӑхӗн 18-мӗшӗнче, Шупашкар районӗнчи Кӑшавӑш ялӗнче ҫурт ҫуннӑ. Ку кӑна мар, ҫунма тытӑнсан унта темӗн сирпӗннӗ.

Иртен-ҫӳрен ҫав кун 18 сехет те 50 минутра пӗр пӳрт ҫунма пуҫланине асӑрханӑ. Вӗсем пушарнӑйсем патне шӑнкӑравланӑ, лешсем хӑвӑртах ҫитнӗ.

Ҫулӑм ҫурт ҫинчен хуралтӑсем ҫине те куҫнӑ. Пушар вӑхӑтӗнче пӳртре темӗн сирпӗннӗ, унтан ҫурт ишӗлсе аннӑ.

Юрать, ҫав вӑхӑтра хуҫисем килте пулман, вӗсем ӗҫе кайнӑ. Пушарта ҫынсем шар курман. Ҫуртан вара нимӗн те юлман.

Улатӑр районӗнчи виҫӗ кинемей кӑмпана кайсан ҫухалнӑ. Алтышево поселокӗнче пурӑнакан 77-87 ҫулсенчи виҫӗ тус юпа уйӑхӗн 18-мӗшӗнче кӑмпана ҫывӑхри вӑрмана ҫул тытнӑ. Анчах унта вӗсем ҫӗтсе кайнӑ. Ҫакӑн пирки кинемейсенчен пӗрин мӑнукӗ вырӑнти полицейскисене пӗлтернӗ.

Пакунлисем, кинемейсен тӑванӗсем, пӗр ял ҫыннисем ватӑсене шырама вӑрмана васканӑ. Полицейскисем кӑмпаҫӑсене виҫӗ сехет шыранӑ. Малтан – машинӑпа, кайран –ҫуран. Уплюнкка карҫинккисене вӑрманта пӑрахса хӑварнӑ кинемейсене тупнӑ-тупнах. Ватӑсем хӑйсене йӗркеллех туйнӑ.

Тӗнче курса ҫӳреме юратакансен кӑшӑлвируса пула чӑрмав сиксе тухнӑ хыҫҫӑн хамӑр ҫӗршыври тата тӑван тӑрӑхри кӑсӑклӑ вырӑнсене шырама пуҫларӗҫ. Хитри, ытармалла марри Чӑвашра, чӑн та, пур. Вӑрманпала уй-хир, пӗве-кӳлӗ, авкаланса юхса выртакан юханшывсем, кайӑк-кӑвакал... — пурте пур. Канаш районӗнчи Мӑкӑр ялӗ ҫывӑхӗнчи чукун ҫул кӗперӗ те туристсене илӗртет. Унта Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев та пулнӑччӗ. Вӑл кӗпере юсаса ҫӗнетмелине, ун тавралли террриторие хӑтлӑлатмаллине, ун патне пыма ҫул тумаллине палӑртнӑччӗ.

Ӗнер каҫхи 20 сехет те 50 минутра ҫав вырӑнта инкек пулнӑ. Шупашкартан кайнӑ фотограф, 27 ҫамрӑк, кӗпер ҫинчен персе аннӑ. Вӑл вырӑнтах вилсе кайнӑ. Унта РФ Следстви комитечӗн Чӑваш Енри управленийӗн ӗҫченӗсем ҫитнӗ, тӗпчев пуҫарнӑ.

Эх, эпир, мӑнтарӑн этемсем! Пӗрре килекен пурнӑҫа та йӗркеллӗ пурӑнса ирттерме пӗлместпӗр тесси ҫеҫ юлать кун пек пӑтӑрмахсем пирки пӗлсен.

Муркаш районӗнче пурӑнакан вӑйпитти арҫын йӗкӗрешӗн пуҫне ҫинӗ. Ҫакна суд тусах хальлӗхе ҫирӗплетмен-ха. Анчах пуҫиле ӗҫ пуҫарнӑ ӗнтӗ.

РФ Следстви комитечӗн Чӑваш Енри тӗпчевҫисем шухӑшланӑ тӑрӑх, пӑтӑрмах авӑн уйӑхӗн 15-мӗшӗнче каҫхи 20 сехет тӗлӗнче Муркашра пулса иртнӗ. 41 ҫулти арҫын йӗкӗреш тӑванӗпе пӗр хваттерте пурӑннӑ. Ӳсӗрскер тӑванӗпе урлӑ илнӗ, ӑна ҫӗҫӗпе чӗри тӗлӗнчен чикнӗ. Шар курни кӑштахран вилсе кайнӑ.

Тӑванне ҫӗҫӗпе чикнӗ тесе арҫын тӗлӗшпе пуҫиле ӗҫ пуҫарнӑ, тӗпчев малалла пырать.

ШӖМ тунӑ сӑн

Авӑн уйӑхӗн 15-мӗшӗнче ирхи 3 сехет те 23 минутра «Волгоград – Саратов» ҫул синче Чӑваш Енре пурӑннӑ икӗ ҫыннӑн пурнӑҫӗ татӑлнӑ. Авари Волгоград облаҫӗнче пулнӑ.

«Митцубиси Лансер» руле умӗнче 31 ҫулти арҫын пулнӑ. Вӑл – Чӑваш Енрен. Вӑл, шел те, вилнӗ. Тепӗр ҫыннӑн та, 33-ри арҫыннӑн, пурнӑҫӗ татӑлнӑ. Волгоградра пурӑннӑ 70 ҫулти старикӑн та ҫав аварире чӗри тапма пӑрахнӑ.

«Фольксваген Пассат» машинӑри тӑватӑ ҫын аманнӑ.

Йӗпреҫ поселокӗнче ҫурла уйӑхӗн 27-мӗшӗнче килтен тухса кайнӑ арҫын ачана пӑравусра тупнине Чӑваш халӑх сайчӗ пӗлтернӗччӗ.

Юлашки икӗ эрнере 8 ҫулти ача килтен икӗ хутчен тухса кайнӑ. Халӗ вӑл пульницӑра иккен. Унпа республикӑн Вӗренӳ тата ҫамрӑксен политикин министерствин педагог-психологӗсем тӗл пулнӑ. Вӗсем килтен тухса тарса ҫӳрени мӗнпе вӗҫленме пултарни ҫинчен ачана ӑнлантарса панӑ.

Арҫын ача маларах кукамӑшӗпе пурӑннӑ. Вӑл кайсан пӗчӗкскер питӗ кулянса ӳкнӗ иккен. Арҫын ачан ҫемйинчи лару-тӑрупа йӗрке хуралҫисем кӑсӑкланаҫҫӗ. Ыйтӑва татса памалли майсем пирки вӗсем пуҫ ватнине Чӑваш Ен Шалти ӗҫсен министерствин пресс-службинче пӗлтернӗ.

Инкеклӗ лару тӑру министерстви тунӑ сӑн

Авӑнӑн 13-мӗшӗнче ҫӗрле Муркаш районӗнчи Иштерек ялӗнче пушар алхаснӑ. Инкек 32 ҫулти арҫыннӑн кил-хуҫалӑхӗнче пулнӑ.

Пушар сарая, утӑ упрамалли вырӑна сиенлетнӗ. Инкеклӗ лару-тӑру министерстви пӗлтернӗ тӑрӑх, килти выльӑх-чӗрлӗхе ҫӑлма май килнӗ: 10 сурӑха, пӗр ӗненепе пӑрӑва урама илсе тухнӑ.

Ӗнер Красноармейски районӗнчи Кайри Карӑк ялӗнче те пушар пулнӑ. Унта мунча ҫуннӑ. Шупашкар районӗнчи Апаш ялӗнче вара пушара пула выльӑх-чӗрлӗх тӗп пулнӑ.

ҪҪХПи тунӑ сӑнӳкерчӗк

Авӑн уйӑхӗн 13-мӗшӗнче 18 сехет те 10 минутра «Нурӑс – Патӑрьел – Елчӗк» автоҫулӑн 82-мӗш ҫухрӑмӗнче «десятка» водителӗ руле итлеттереймесӗр ҫаврӑнса ӳкнӗ. ҪҪХПИ ҫапла хыпарлать: аварире виҫӗ ҫыннӑн пурнӑҫӗ татӑлнӑ.

Пассажирсем машинӑран тухса ӳкнӗ. Пурте, виҫҫӗ пассажирӗ те, вилнӗ. 21 ҫулти каччӑн, 48 ҫулти арҫыннӑн тата 81-ри хӗрарӑмӑн чӗри тапма пӑрахнӑ.

Руль умӗнче 21 ҫулти каччӑ ларнӑ. Ӑна пульницӑна илсе ҫитернӗ. Вӑл урӑ е ӳсӗр пулнине анализсем кӑтартӗҫ.

"Про Город" сайтри сӑн

Паян, авӑн уйӑхӗн 12-мӗшӗнче, Шупашкарти 9-мӗш Пилӗкҫуллӑх проспектӗнчи 15-меш ҫуртӑн 1-мӗш корпусӗн 5-мӗш хутӗнчен хӗрарӑм ӳкнӗ. Вӑл, шел те, ҫавӑнтах вилнӗ.

Ку инкек паян кӑнтӑрла, 12 сехет ҫурӑра, пулнӑ. Вырӑна полици, судмедэкспертсем ҫитнӗ. Ҫынсем каланӑ тӑрӑх, ҫав хӗрарӑм 40 ҫултан аслӑрах курӑнман.

Аса илтерер: нумаях пулмасть Улатӑрта чиркӳ тӑрринчен хӗрарӑм ӳксе вилнӗ. Вӑл кунти ҫын пулман, Казахстанра ҫуралса ӳснӗ.

dimitryrostovsky.ru сайтри сӑн

Авӑн уйӑхӗн 10-мӗшӗнче Улатӑр хулинче Ҫветтуй Троица мӑнастирӗ тӑрринчен хӗрарӑм ӳкнӗ. Шел те, вӑл ҫавӑнтах вилнӗ.

Чиркӳ тӑрри 8-мӗш хутпа танлашать. Ҫав хӗрарӑм 47 ҫулта пулнӑ. Вӑл кунтан мар, Казахстанран. Инкек пулсан вырӑна следовательсем, йӗрке хуралҫисем килнӗ.

Халӗ следовательсем ку мӗнле пулса иртнине тӗпчеҫҫӗ. Хӗрарӑм чиркӳ тӑрринче мӗн тунине, вӑл мӗнле ӳкнине уҫӑмлатма тивӗ.

Аса илтерер: нумаях пулмасть Шупашкарти Граждан урамӗнче 4-мӗш хутран, балкон ҫинчен, 7 ҫулти хӗрача ӳксе вилнӗ.