ШӖМ тунӑ сӑн видео скринӗ

Шупашкарти полицейски канмалли кун лавккана кайнӑ та… темиҫе преступление уҫӑмлатма пултарнӑ. 2-мӗш полици уйрӑмӗн уголовлӑ шырав уйрӑмӗн оперуполномоченнӑйӗ Антон Кубиков Тукташ урамӗнчи пӗр лавккара икӗ каччӑ касса умӗнчен чупса иртнине асӑрханӑ. Вӗсен ҫумӗнче вара апат-ҫимӗҫ пулнӑ, куншӑн тӳлемесӗрех урама тухса тарнӑ.

Каччӑсем машинӑна ларса лавкка умӗнчен тарнӑ. Полицейски вара ӑна астуса юлнӑ та кун пирки дежурнӑй чаҫе пӗлтернӗ. Ҫул-йӗр инспекторӗсем ҫак автомашинӑна Ярославль урамӗнче чарнӑ. Багажнике уҫнӑ, унта вара – апат-ҫимӗҫ, эрех-сӑра, йӑлара усӑ курмалли хими, косметика.

Ҫак каччӑсем Тутарстанран иккен. Унччен вӗсем уголовлӑ майпа явап тытнӑ. Хальхинче те вӗсен тӗлӗшпе пуҫиле ӗҫ пуҫарнӑ.

ШӖМ тунӑ сӑн

Шупашкарта паян, авӑн уйӑхӗн 14-мӗшӗнче, 22-мӗш маршрутпа ҫӳрекен «Форд-Транзит» юпа ҫине пырса тӑрӑннӑ. Ку 11 сехет те 20 минутра Константин Иванов урамӗнче пулнӑ.

Малтанлӑха пӗлтернӗ тӑрӑх, 32 ҫулти водитель руле итлеттереймен. Вӑл ӳсӗр пулнине кӑтартакан паллӑсем пулман.

Салонра пулнӑ икӗ пассажир, хӗрарӑмсем, тухтӑрсенчен пулӑшу ыйтнӑ. ЧР ШӖМӗ пӗлтернӗ тӑрӑх, халӗ авари сӑлтавне уҫӑмлатаҫҫӗ.

balala.com.ua сайтри сӑн

Кӑҫал Шупашкарти Мускав районӗнче тӑххӑрмӗш ача пульницӑра мар, килте ҫуралнӑ. Ҫут тӗнчене килнӗ пепкене ЗАГС пайӗнче регистрациленӗ.

Ача килте ҫуралнине ашшӗ тата унпа пӗрле килнӗ кӳнтелен ҫирӗплетнӗ. Арҫын ача, ҫемьери пӗрремӗш пепке, авӑн уйӑхӗн 4-мӗшӗнче кун ҫути пурнӑ. Ҫакна кӳнтелен те ҫирӗплетнӗ.

Ашшӗ-амӑшӗ хӑйсен пӗрремӗш пепкине Тимур ят панӑ.

Г.Тафаев профессор блогӗнчи сӑн

Шупашкарти пӗр урама истори ӑслӑлӑхӗсен докторӗн Василий Димитриевӑн ячӗпе хисеплеме сӗннӗ. Ку шухӑша Чӑваш патшалӑх гуманитари ӑслӑлӑхӗсен институчӗ пӗлтернӗ.

Шупашкар хула администрацийӗ «Уҫӑ хула» порталта сасӑлав ирттерет. Унта эсир те хӑвӑрӑн шухӑша пӗлтерме пултаратӑр. Хальлӗхе сасӑлава 916 ҫын хутшӑннӑ, вӗсенчен 794-шӗ ку шухӑша ырланӑ.

Василий Димитриев 300 ытла ӑслӑлӑх ӗҫӗсен авторӗ. Вӗсен йышӗнче – 19 монографи, 14 брошюра. Вӑл 2013 ҫулта пурнӑҫран уйрӑлнӑ, 89 ҫулта пулнӑ.

atomic-energy.ru сайтри сӑн

Пӗлетӗр ӗнтӗ: ЧР Элтеперӗ Михаил Игнатьев Инстаграмра хӑйӗн страницине тытса пырать. Страницӑна пӑхса тӑракансем нумай. Ҫынсем унта Элтепер патне тӗрлӗ ыйтпу ҫырса яраҫҫӗ. Ҫамрӑк мӑшӑр вара хӑйсене туйпа саламлама ыйтнӑ.

Михаил Игнатьев ҫак ҫамрӑксен ӗмӗтне пурнӑҫланӑ: туй кунхине, аванӑн 7-мӗшӗнче, хӗрпе каччӑ Правительство ҫуртӗнче, 17-мӗш хутра, пулнӑ, Элтеперпе сӑн ӳкерӗннӗ. Михаил Васильевич вӗсеме калаҫнӑ, ҫемье ҫавӑрнӑ ятпа саламланӑ.

Шупашкарӑн ҫуралнӑ кунӗнче вара Элтепер хулара пурӑнакан Петр Корняковӑн ӗмӗтне пурнӑҫланӑ. Вӑл «Вӗршӗнсем» пилотаж ушкӑнӗпе тӗл пулма ӗмӗтленнӗ-мӗн.

«Халӑх тетелӗсенче пирӗн #мечтыдолжнысбываться хештегпа акци пуҫланнӑ. Эпир Чӑваш Енре пурӑнакансен ырӑ ӗмӗчӗсене пурнӑҫлатпӑр», - ҫапла пӗлтернӗ Элтеперӗн пресс-секретарӗ Олег Сидоров.

cap.ru сайтри сӑн

Ҫитес вӑхӑтра кашни шӑматкун, авӑн уйӑхӗн 14, 21 тата 28-мӗшӗсенче Шупашкарта «Хула чӗри» туризм маршручӗпе экскурсисем ирттерӗҫ. Унта хутшӑнакансен хулари паллӑ вырӑнсемпе паллаштарӗҫ, вӗсен историне каласа кӑтартӗҫ. Ку йӑлтах - тӳлевсӗр.

Экускурсисене 10 ҫын е ытларах пухӑнсан ирттерӗҫ. Хула тӑрӑх ҫуранах утма тивӗ. Малтан Хӗрлӗ тӳремре Контсантин Иванов палӑкӗ патӗнче пухӑнӗҫ. Палӑртнӑ вӑхӑт: кӑнтӑрлахи 12 сехет.

Экскурсие ҫак номерсемпе шӑнкӑравласа ҫырӑнма пулать: (8352) 23-20-30, 23-20-32. Е tic-cheb@mail.ru электрон почтӑна «экскурси» тесе палӑртса заявка ямалла.

cheb.ru сайтри сӑн

Авӑн уйӑхӗн 2-мӗшӗнче каҫхине Шупашкарти аэропорт ӗҫченӗсем иккӗленӳ ҫуратакан сумка асӑрханӑ. Хайхи рюкзак кӗтмелли залра выртнӑ.

Йӗрке хуралҫисем ҫав сумкӑна ҫийӗнчех тӗрӗсленӗ. Юрать, унта нимӗнле хӑрушӑ япала та пулман. Рюкзакра ҫыннӑн харпӑр япалисем, ноутбук тата укҫа выртнӑ. Укҫи вара самаях пулнӑ: 1,5 миллион тенке яхӑн.

Рюкзак хуҫин, ахӑртнех, сехри хӑпнӑ. Хайхи арҫын сумки патне ҫур сехетренех вӗҫтерсе ҫитнӗ. Аэропорт ӗҫченӗсем ҫухалнӑ япалана хуҫине тавӑрса панӑ.

www.kp.ru сайтран илнӗ сӑн

Шупашкарта пурӑнакан 41 ҫулти арҫын тӗлӗшпе пуҫарнӑ пуҫиле ӗҫе тишкерсе пӗтернӗ. Кӗҫех ӑна суд пӑхса тухӗ.

Хайхи арҫынна васкавлӑ медпулӑшу фельдшерне тапӑннӑшӑн айӑплашсӑн. РФ Следстви комитечӗ пӗлтернӗ тӑрӑх, ҫак арҫын, ӳсӗрскер, хӑйех васкавлӑ медпулӑшу чӗннӗ. Тухтӑрсем унӑн сывлӑхне тӗрӗсленӗ хыҫҫӑн пульницӑна кайма сӗннӗ. Анчах лешне ҫакӑ килӗшмен пулмалла – фельдшера хырӑмӗнчен урипе тапнӑ.

Ҫакӑншӑн арҫын суд сакки ҫине ларӗ.

ngzt.ru сайтран илнӗ сӑн

Шупашкарта ҫуралнӑ ачана ашшӗ-амӑшӗ хӑйне евӗр ят панӑ. Тин ҫуралнӑ пепкене Княгиня тесе ҫыртарнӑ. Кун пирки Шупашкарти Калинин район администрацийӗн пресс-служби пӗлтерет.

Сайра-хутра тӗл пулакан ятсене суйлакансем питех нумаййӑн та темелле мар. Кунашкал ятсене палӑртса хӑварар: Амир, Авдей, Архип, Макар, Мадина, Марк, Всеволод, Мелания, Алексия, Антонина, Ника, Эмир, Алита, Дария, Княгиня.

Чылайӑшӗ халӗ ывӑлне Александр, Илья, Михаил ят парать. Хӗрачасене вара Виктория, Анастасия, Анна ят хуракансем нумай.

cap.ru сайтри сӑн

Шупашкарта «Ваттисем валли - ача пахчи» ӗҫлет. Ватӑ ҫынна е сусӑра килте никампа та хӑварма ҫук-и? Эппин, ӑна ача пахчине илсе кайӑр. Вӑл унта кунӗпе тунсӑхласа лармӗ.

Халӑха социаллӑ пулӑшу паракан комплекслӑ центр ӗҫченӗсем пӗлтернӗ тӑрӑх, унта кун гимнастика тунинчен е уҫӑ сывлӑшра Скандинави мелӗпе утнинчен пуҫланать. Ватӑсем аталанмалли занятисене хутшӑнаҫҫӗ: тӑмран ӑсталаҫҫӗ, квиллингпа кӑсӑкланаҫҫӗ, вӗтӗ шӑрҫапа тӗрлеҫҫӗ.

Ача пахчинчи пекех вӗсене апат ҫитереҫҫӗ, кӑнтӑрла выртса илме май параҫҫӗ. Ватӑсемпе психолог юнашарах. Кунашкал ача пахчи 8 сехетрен пуҫласа 16 сехетчен ӗҫлет. Паянхи кун тӗлне унта 9 ватӑ ҫӳрет.