«ЮВТ АЭРО» авиакомпани самолечӗсем ҫу каҫипех Нижневартовска вӗҫӗҫ.
Авиарейссене ҫӗртме уйӑхӗн 4-мӗшӗнчен пуҫласа ҫурла уйӑхӗн 27-мӗшӗччен уҫнӑ. Самолетсем икӗ хулана юнкунсерен пӗрлештерӗҫ.
Нижневартовскран самолет 18 сехет те 30 минутар хускалӗ те Шупашкара 19 сехет те 40 минута вӗҫсе ҫитӗ. Шупашкартан 20 сехетре хускале те Нижневартовска ҫурҫӗр иртни 40 минутра ҫитӗ. Вӑхӑта вырӑнтипе кӑтартнӑ
Билет хакӗ — 8 пинрен пуҫласа.
К.В. Иванов ячӗллӗ Чӑваш патшалӑх академи драма театрӗнче 9-15 ҫулсенчи ачасем валли «Театральное лето» (чӑв. Театр ҫӑвӗ) театр студийӗ уҫӑлӗ.
Ачасем театр ӳнерӗпе паллашӗҫ, чаршав хыҫӗнче пулса иртекен вӑрттӑнлӑхсене пӗлӗҫ, сцена ҫине тухмалли тумтир тата ытти ҫинчен ҫӗннине, хальччен илтменнине пӗлӗс.
Профессилле актерсем вӗсене сцена ҫинче артистла тытма вӗрентӗҫ. Унсӑр пуҫне ачасене хӑюллӑн калаҫма, хускалма, ушкӑнпа ӗслеме хӑнӑхтарӗҫ.
Программа виҫӗ сменӑран тӑрӗ. Театр смени ҫӗртме уйӑхӗн 16-30-мӗшӗсенче, утӑ уйӑхӗн 1-14-мӗшӗсенче тата ҫурла уйӑхӗн 11-22-мӗшӗсенче ирхи 9 сехетрен 15 сехетчен ӗҫлӗ.
Ыйтса пӗлмелли телефон номерӗ: (8352) 62-02-21.
Паян ирхи 3 сехет иртсен Шупашкарати «ВНИИР» предприяти ҫине икӗ беспилотник ӳкнӗ.
Республика ертӳлӗхӗ малтанлӑха пӗлтернӗ тӑрӑх, вӗсем – Украина беспилотникӗсем. Предприятире пушар пуҫланнӑ, ҫулсене пӳлнӗ. Экстреннӑй служба оперативлӑ ӗҫленипе пушара хӑвӑрт сӳнтернӗ, никам та шар курман, вилмен. Хӑрушсӑрлӑх мерисене пула предприяти ӗҫӗ-хӗлне вӑхӑтлӑха чарнӑ.
Тепӗр 2 беспилотник Краснармейски тата Шупашкар округӗсенчи уйра ӳкнӗ.
Хальхи вӑхӑтра И. Яковлев проспектӗнчи ҫула уҫнӑ, транспорт ҫӳрет.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта тӗлӗнмелле ӑста, художник, Валентина Никитина ӗҫлет. Хӑй вӑл Чулхула облаҫӗнче ҫуралнӑ. Унти Павлово хулинчи ӳнер училищинче тимӗре илемлетме вӗреннӗ, ӳнер енӗпе пӗлӗвне каярах Шупашкарти педагогика институтӗнче анлӑлатнӑ.
Валентина Нииктина социаллӑ сферӑра виҫӗ теҫетке ҫул ӗҫлет. Вал чӑваш пуканисем ӑсталать. Унсар пуҫне вал турилккесене чӑвашла эрешпе те капарлатать.
Шупашкарти апатлану технологийӗпе коммерци техникумӗнче поварсен хушшинче «Профессире чи лайӑххи» конкурс иртнӗ. Республикари ултӑ кулинар тупӑшса хӑйсен ӑсталӑхне кӑтартнӑ: пулӑран, аш-какайран апат-ҫимӗҫ пӗҫернӗ, десерт хатӗрленӗ.
Чи маттурри – Александр Гониашвили. Василий Лашманов тата Екатерина Адамова призерсем пулса тӑнӑ.
Александр Чӑваш Ен чысне Раҫҫей шайӗнче хӳтӗлӗ, «Чӑваш ланчӗ» телепроекта хутшӑнӗ.
Шупашкарта Ҫӗнҫӗпӗрти арҫын подъездсенчи велосипедсемпе самокатсене вӑрласа ҫӳренӗ. Велосипедсем хулари Новоилларионовски, М.Павлов, Богдан Хмельницкй тата ытти хӑш-пӗр ҫӗрти ҫуртсенчен ҫухалнӑ. Вӑрӑна видеокамера ӳкерсе илнӗ. Ҫын япалине черетлӗ хутчен вӑрласан вӑл велосипеда иртен-ҫӳрене туянма сӗннӗ. Кун пирки ҫынсем йӗрке хуралҫисене пӗлтернӗ.
34 ҫулти арҫын унччен судпа айӑпланнӑскер иккен. Хальлӗхе ӑна 70 пин тенкӗ ытла тенкӗлӗх 5 хутчен вӑрланӑ тесе шухӑшлаҫҫӗ.
Шупашкарта урамра кино кӑтартма тытӑннӑ. Чӑваш патшалӑх ҫамрӑксен театрӗн «Ҫеҫпӗл» кинозалӗ кинона урамра кӑтартать. Ҫӑвӑн малтанхи уйӑхне Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине халаллӗҫ.
Ҫӗртме уйӑхӗн 4-мӗшӗнче «Отряд Светлячков» фильм кӑтартнӑ. Тӳлевсӗр черетлӗ кинона ҫӗртме уйӑхӗн 18-мӗшӗнче курма май килӗ. Ун чухне «Пять сыновей Марии» кинона йыхравлаҫҫӗ. Енчен ҫанталӑк начар пулсан, ҫумӑр ҫусан кинона пӗчӗк залта кӑтартӗҫ.
Шупашкартан тӳрех Адлера каяс килет-и? Ку – юмах мар, тӗп хуламӑртан кӑнтӑрти хулана пуйӑспа ҫитме май пулӗ
Ҫулла тинӗс хӗрринче канма палӑртнисем валли питӗ меллӗ ку.
Пуйӑс Шупашкартан Адлера кун сиктерсе ҫӳрӗ. Ҫул ҫинче 2 кун та 5 сехет иртӗ. Пуйӑс Адлера авӑн уйӑхӗн 20-мӗшӗччен ҫӳрӗ.
Ҫамрӑксен кунӗнче республикӑна Олег Майами килет. Уява ҫӗртмен юлашки шӑматкунӗнче паллӑ тӑваҫҫӗ. Кӑҫал вӑл ҫӗртмен 28-мӗшне лекет.
Олег Майами – шоумен, блогер тата юрӑҫ. Вӑл «Дом-2» реалити-шоуна пула паллӑ пулса тӑнӑ. Ҫавӑн пекех Олег «Голос» вокал конкурсне тата «Форт Боярда» хутшӑннӑ.
Шупашкарта Ҫамрӑксен кунӗ 12-22 сехетсенче Юрӑ уйӗнче тата Хӗрлӗ тӳремре иртӗ.
11-мӗш класран вӗренсе тухакансемшӗн – хӗрӳ тапхӑр. Экзаменсем пыраҫҫӗ. Хӑш-пӗр экзаменпа кӑтартусем паллӑ ӗнтӗ.
12 ҫамрӑк химипе пулнӑ ППЭре 100 балл пухнӑ. Вӗсен йышӗнче ҫаксем: София Ярабаева (Хӗрлӗ Чутай шкулӗ), Мария Федорова (Ҫӗнӗ Шупашкарти 18-мӗш лицей), Игорь Кавказков (Ҫӗнӗ Шупашкарти 18-мӗш лицей), Екатерина Горячева (Ҫӗмӗрлери 8-мӗш гимнази), Полина Нимакова (Шупашкарти 5-мӗш гимнази), Анастасия Никитина (Шупашкарти 3-мӗш лицей), Ольга Степанова (Шупашкарти 3-мӗш лицей), Анна Федотова (Шупашкарти 1-мӗш гимнази), Антон Пигузов (Шупашкарти 62-мӗш шкул), Виктория Адюкова (Шупашкарти 2-мӗш лицей), Злата Александрова (Шупашкарти 2-мӗш лицей), Ярослав Кутилин (Шупашкарти 2-мӗш лицей).
-10.7 °C