Паян ирхине 6 сехет те 40 минутра Шупашкарта «Газопровод» чарӑнура маршрутка ҫунса кайнӑ. Ҫулӑм Fiat Ducato автобуса хӑвӑртах ярса илнӗ. Транспортран нимӗн те юлманпа пӗрех.
Ҫав вӑхӑтра йӗрке хуралҫисем «Дорис парк» чарӑну енчен килекен транспорта унталла кайма чарнӑ, тавран янӑ.
Паян, ака уйӑхӗн 9-мӗшӗнче, Шупашкарта мотоциклпа машина пырса ҫапӑннӑ.
Инкек ирхи 10 сехет тӗлӗнче хулари Ленин проспектӗнчи 21-мӗш ҫурт тӗлӗнче пулса иртнӗ. 19 ҫулти каччӑ тытса пыракан мотоцикл сулахаялла пӑрӑнакан «Фольксваген Джетта» автомобиль ҫине пырса кӗнӗ.
Икӗ урапаллӑ транспорт хуҫине тухтӑр пулӑшӑвӗ кирлӗ пулса тухнӑ.
Шупашкарта Чӑваш Ен Элтеперӗ Олег Николаев инкеке лекнӗ. Республика ертӳҫи ӗҫре усӑ куракан «Genesis» шурӑ «Маздӑпа» пырса ҫапӑннӑ.
Инкек Максим Горький проспектӗнче пулса иртнӗ.
Олег Николаев ҫав вӑхӑтра арӑмӗпе хыҫалти ларкӑч ҫинче ларса пынӑ. Руль умӗнче Элтеперӗн водителӗ пулнӑ. Инкекре никам та шур курман.
Малтанласа палӑртнӑ тӑрӑх, пӑтӑрмах пулса тухнишӗн «Мазда» рулӗ умӗнчи хӗр айӑплӑ.
Шупашкарта халӗ кӑвакарчӑнсене ҫитермелли ятарлӑ вырӑн пур. Ӑна Афанасьев урамӗнчи чарӑнуран инҫех мар вырнаҫтарнӑ.
Кун пекки хулара – пӗрремӗш хут. Кайӑксене ҫитермелли вырӑн ҫине ҫаплах ҫырса хунӑ та.
Сӑмах май, унччен ҫынсем кӳлмекри акӑшсене ҫитерме юратнӑ. Унта катамаранпа ярӑнмалли вырӑн туса хунӑран акӑшсем хӑраса хӑмӑш хушшине пытанма, чирлеме тытӑннӑ. Халӗ вӗсем паркра пурӑнаҫҫӗ.
Ака уйӑхӗн 24-мӗшӗнче Чӑваш академи драма театрӗнче «Мӗн-ши вӑл телей?» пьеса тӑрӑх лартнӑ спектакль кӑтартӗҫ.
Асӑннӑ пьесӑна Николай Терентьев иртнӗ ӗмӗрӗн 60-мӗш ҫулӗсенче ҫырнӑ. Унта вӑл колхозсем аталаннӑ тапхӑра ҫутатса панӑ.
Театр ҫӗнӗ ӗҫе ҫыравҫӑ ҫуралнӑранпа 95 ҫул ҫитнине халалланӑ. Спектакльти сюжета паянхи кунпа ҫыхӑнтарнӑ.
Режиссёрӗ — Наталия Сергеева.
Ака уйӑхӗн 10-мӗшӗнче Шупашкара Адыгей Республикинчи патшалӑхӑн академи халӑх ташшин ансамблӗ концертпа килӗ. Унти артистсен пултарулӑхӗпе Чӑваш патшалӑх академи драма театрӗнче паллашма май килӗ.
«Нальмэс» — халӑх ташшин академи ансамбльне 1936 ҫулта йӗркеленӗ. Вал асӑннӑ регионӑн визит карточки шутланать. Коллектива хамӑр ҫӗршывра ҫеҫ мар, тӗнчере те пӗлеҫҫӗ.
Ансамбль репертуарӗ ташӑсенчен ҫеҫ мар, тӗрлӗ трюкпа музыкӑран тӑрать. Сцена ҫине 60 ытла артист тухӗ.
Концерт 19 сехетре пуҫланӗ, 1 сехет те 30 минута пырӗ.
Паян Шупашкарта «БМВ» машинӑпа «Хендай» пырса ҫапӑннӑ. Инкек кӑнтӑрла иртсен Сӗнтӗрвӑрри шосси ҫинче пулса иртнӗ.
Малтанласа палӑртнӑ тӑрӑх, «БМВ» машина умра пыракан машинӑпа ытла та ҫывӑх пынӑ. Руль умӗнче хӗрарӑм пулнӑ. Хура куҫлӑх тӑхӑннӑскер сӑнпа пӑхсан ӳсӗрри сисӗннӗ. Чӑн та, унӑн юнӗнче 1 литр пуҫне 1 миллиграмм ытла эрех пулни палӑрнӑ.
Автомашинӑна хӗрарӑм инкекчен пӗр кун маларах ҫеҫ туяннӑ, ӑна вӑл регистрацилесе те ӗлкӗреймен.
Ҫу уйӑхӗн 9-мӗшӗнче Шупашкарта Ҫӗнтерӳ модине кӑтартӗҫ. Уяв программинче хальччен пулман. Ӑна пуҫараканӗ – Чӑваш Енри Хӗрарӑмсен Канашӗ.
1945-1950 ҫулсенчи тумтире Республика тӳремӗнче иртекен дефилере курма май пулӗ. Вӑл 16 сехетре пуҫланӗ.
Мода кӑтартакансен йышне кӗрес килет-и? Малтан регистраци тухмалла: https://cheboksary555.ru/moda_pobedy.
Шупашкарти ҫамрӑк амӑшӗ ултавҫӑсен аллине лекнӗ, вӑл 5 миллион тенкӗ куҫарса панӑ
Ун патне «налук службин ӗҫченӗ» тесе паллаштарнӑ ҫын шӑнкӑравланӑ. Вӑл 3-НДФЛ справка ярса памаллине, хӗрарӑма черетсӗрех йышӑнассине каланӑ. Ӑна смс-ҫырупа килнӗ пароле калама хушнӑ.
Кайран тепӗр смс килнӗ, унта ҫамрӑк амӑшӗн даннӑйӗсене вӑрланине пӗлтернӗ. Хайхи палламан ҫын хӗрарӑма пулӑшу сӗннӗ, куншӑн укҫа куҫарса пама ыйтнӑ. Хӗрарӑм темиҫе кредит илнӗ, хӑй пухнӑ укҫине те хушнӑ. Ҫапла вӑл 5 млн тенкӗсӗр юлнӑ. Хӑйне улталанине ӑнлансан хӗрарӑм полицие кайнӑ.
Паян, ака уйӑхӗн 6-мӗшӗнче, Шупашкарта пурӑнакан Галина Кустова 100 ҫул тултарнӑ.
Вал Чулхула облаҫӗнчи Бор хулинче ҫуралнӑ. Вӑл ача чухнех йывӑр ӗҫе кӳленнӗ. Ҫичӗ класс вӗренсе тухнӑ хыҫҫӑн вӑл вырӑнти хулари предприятисенчен пӗринче лакировщицӑра ӗҫлеме тытӑннӑ. Кӑштахран ҫар заводӗнче снарядсемпе бомбӑсем кӑларнӑ ҫӗрте тимленӗ.
Шупашкара куҫса килнӗ хыҫҫӑн «Электроприбор» заводра ӗҫленӗ. Мӑшӑрӗпе вӑл виҫӗ ача ура ҫине тӑратнӑ. Паян хӗрӗн, Альбина Николаевнӑн, ҫемйипе пурӑнать.
+12.3 °C