Шупашкарти 2-мӗш шкула Совет Союзӗн Геройӗн Виталий Уроковӑн ятне панӑ. Распоряжение Шупашкар хула администрацийӗн пуҫлӑхӗ Алексей Ладыков алӑ пуснӑ.
Виталий Уроковӑн ячӗпе Шупашкарти, Ҫӗмӗрлери, Шӑмӑршӑри урамсем хисепленеҫҫӗ. 1967 ҫулта Шӑмӑршӑра палӑк-бюст уҫнӑ, 2005 ҫулта Ҫӗмӗрлере Ача-пӑча пултарулӑх ҫурчӗ ҫинче асӑну хӑми ҫакнӑ.
Виталий Уруков Чӗмпӗр кӗпернинче 1919 ҫулта ҫуралнӑ. Вӑл Тӑван ҫӗршывӑн Аслӑ вӑрҫине хутшӑннӑ. 1945 ҫулхи кӑрлачӑн 29-мӗшӗнче Виталий Иванович пуҫ хунӑ. Ӑна ҫав ҫулах ҫу уйӑхӗн 31-мӗшӗнче Совет Союзӗн Геройӗн ятне пама йышӑннӑ.
Чӑваш Енӗн физкультурӑпа спорт министрӗ Сергей Шелтуков пурнӑҫран уйрӑлнӑ. Вӑл 47 ҫулта ҫеҫ пулнӑ. Шанчӑклӑ ҫӑлкуҫсем пӗлтернӗ тӑрӑх, министр усал шыҫӑпа аптӑранӑ. Ӑна ҫывӑх пӗлекенсем каланӑ тӑрӑх, темле пулсан та вӑл хӑйне ҫирӗп тытнӑ. Сергей Шелтуков куҫне ӗнер яланлӑхах хупнӑ.
Министр пулнӑ ҫын ӗҫ биографине 1992 ҫулта Елчӗк районӗнчи Ҫирӗклӗ Шӑхаль ялӗнчи шкулта физкультура учителӗнче тӑрӑшнинчен пуҫланӑ. Каярах вӑл Чӑваш Енӗн Спорт министерствинче вӗренӳпе спорт пайӗн специалистӗнче ӗҫленӗ. Ача-пӑчапа ҫамрӑксен 5-мӗш спорт шкулӗнче директор ҫумӗ, А. Игнатьев ячӗллӗ спорт ӑсталӑхӗн шкулӗн пуҫлӑхӗ пулнӑ. 2012 ҫулта Сергей Шелтукова Чӑваш Енӗн Спорт министрӗн ҫумне лартнӑ. 2015 ҫулхи юпа уйӑхӗн 5-мӗшӗнче ӑна министр пуканне шанса панӑ.
Шупашкарти 651-мӗш шкулта, ыттисемпе танлаштарсан, чи нумай ача ӑс пухать: 1750 вӗренекен. Пӗлӳ ҫуртне вара проектпа килӗшӳллӗн 825 ача валли хӑпартнӑ.
Икӗ сменӑпа вӗренмелле ан пултӑр тесе Социализм урамӗнчи 17-мӗш «а» ҫурта, унччен каҫхи шкул пулнӑ здание, ҫак пӗлӳ ҫуртне пама йышӑннӑ. Ӑна малтан юсаса ҫӗнетмелле. Ҫак тӗллевпе аукцион ирттереҫҫӗ. Килӗшӗвӗн малтанхи хакӗ – 88 015 820 тенкӗ.
Здание 1963 ҫулта хӑпартнӑ. Унта тумалли ӗҫ пайтах: корпуса юсамалла, чӳречесене, урая, алӑксене улӑштармалла, стенасемпе маччана сӑрламалла… Ӗҫе 2019 ҫулхи ҫу уйӑхӗн 15-мӗшӗччен вӗҫлемелле.
Чӑваш Енри ҫул-йӗр пахалӑхӗ начар пулсан Патшалӑхӑн автоинспекцине евитлеме юрать. Асӑннӑ учрежденин сайтӗнче ҫырнӑ тӑрӑх, унтисем вӗренӳ учрежденийӗсем патӗнчи ҫул-йӗр тӑрӑмӗ пирки систерме ыйтнӑ.
Евитлеме никама та чармӗҫ: журналистсене, ашшӗ-амӑшӗсен комитечӗсене, общество организацийӗсемпе пӗрлешӗвӗсене. Ик айкки те тӑвайкки темен мӗнпур ҫын ҫӑхавлама пултарать.
Ҫул-йӗр пахалӑхӗ начарри пирки roadtoschool21@mai.ru электрон пуштӑпа ӑсатмалла. Унта начар ҫул ӑҫтине, хӑш районпа хулара тата урамра пулнине, кӑлтӑка асӑрханӑ вӑхӑта кӑтартма ыйтаҫҫӗ. Япӑх ҫул хӑш вӗренӳ учрежденийӗ ҫывӑхӗнчине те систермелле. Май килсен фото ӳкерсе илмелле, видео пулсан та аван.
Мӗнпур материала пӑхса тухма шантараҫҫӗ.
Куславкка районӗнчи Куснарта Марфа Трубина ҫуралнӑранпа 130 ҫул ҫитнине уявланӑ. Унти шкулта ҫыравҫӑсен пӗр ушкӑнӗ авӑн уйӑхӗн 7-мӗшӗнче пулнӑ. Ҫакӑн пирки Марина Карягина тележурналист, сӑвӑҫ Фейсбукра пӗлтернӗ. Тата вӑл шкула пырса кӗрсенех куҫ тӗлне лекнӗ портретсене ӳкерсе илнӗ.
Ҫыравҫӑ 1888 ҫулхи авӑн уйӑхӗн 2-мӗшӗнче /кивӗ стильпе ҫурла уйӑхӗн 21-мӗшӗнче/ Куславкка районне кӗрекен Аслӑ Куснар ялӗнче ҫуралнӑ. «Пирӗнтен, хӗрӗхелле ҫитнӗ е унтан та иртнӗ ҫынсенчен, кам ас тумасть пулӗ Трубина Мархвине, хамӑр хушӑри пек каласан — «Мархва аппана», хамӑра валли те, пирӗн ачамӑрсем валли те нумай-нумай паха кӗнеке ҫырса хӑварнӑ ҫынна? Пурте питӗ лайӑх ас тӑватпӑр ӑна, пурте ырӑпа асӑнатпӑр, унӑн ҫав тери кӑмӑллӑ, чӑннипех те «чӗре патне пыракан» произведенийӗсене паян кун та хаваслансах вулатпӑр», — тесе ҫырнӑ Леонид Агаков хӑй вӑхӑтӗнче.
Ача-пӑча ҫыравҫине паян та астӑваҫҫӗ — Куславкка районӗнчи мероприятие шкул ачисем те, вӗренекесем те хутшӑннӑ.
Ҫӗнӗ вӗренӳ ҫулӗ пуҫланиччен яланхи пекех Раҫҫейри чи лайӑх вӗрентекенсене палӑртнӑ. Ҫак ята тивӗҫнӗ 1000 педогогӑн ячӗ ҫурла уйӑхӗн 29-мӗшӗнче паллӑ пулнӑ. Вӗсене 200-шер пин тенкӗ парса хавхалантарӗҫ. Кӑҫал ку йыша Чӑваш Енри 9 вӗрентекен кӗнӗ:
Етӗрнери 2-мӗш шкулти вӑй-хал культурин вӗрентекенӗ Александр Меркурьев;
Патӑрьелти 1-мӗш шкул йӗркелӳҫи Юрий Васюткин;
Шупашкарти 47-мӗш шкулти технологи учителӗ Наталия Выйгетова;
Шупашкарти 3-мӗш лицейри физика вӗрентекенӗ Надежда Клинк;
Шупашкарти 49-мӗш шкулти технологи учителӗ Валерий Кудряшов;
Шупашкарти 24-мӗш шкулти историпе обшествознани вӗрентекенӗ Марина Кумалякова;
Вӑрмарти Егоров ячӗллӗ шкулти биологи учителӗ Клавдия Николаева;
Шупашкарти 44-мӗш лицейри истори вӗрентекенӗ Елена Пустовалова;
Йӗпреҫри 2-мӗш шкулти чӑваш чӗлхипе литературин вӗрентекенӗ Алена Ядрицова
Шупашкарти «Университет» микрорайонта ача пахчи иккӗ пулмалла. Вӗсенчен пӗрне тума пуҫланӑ. 1,5 пин ача вырнаҫмалӑх шкул ҫӗклесшӗн, кӑшт каярах — тепӗр ача пахчи. Унсӑр пуҫне унта спорт комплексӗ, хитре парк пулмалла. Ҫакӑн пирки асӑннӑ микрорайона ҫӗклекен строительство организацийӗн пуҫлӑхӗ Чӑваш Ен Элтеперне ӗнентернӗ.
Паян республика ертӳҫи Михаил Игнатьев Шупашкарти пысӑк строительство лаптӑкӗсенче пулнӑ.
Микрорайонӑн пӗтӗмӗшле лаптӑкӗ аванах пысӑк. Вӑл пурӗ 33,7 гектар йышӑнать. Унта хальхи вӑхӑтра 9 пин ытла ҫын пурӑнать. Микрорайона хӑпартнӑҫемӗн халӑх йышӗ ӳлӗмрен 15 пине ҫитмелле.
Михаил Игнатьев Элтепер Шупашкарӑн Ҫурҫӗр-Хӗвеланӑҫ районӗнчи ҫав микрорайонти стройкӑпа кӑмӑллӑ пулнӑ.
Шупашкарта хӑпартса лартнӑ ҫӗнӗ Кадет корпусне уҫма Олимп чемпионки Аделина Сотникова килӗ.
Вӑл Совет Союзӗн Геройӗн, Александр Васильевич Кочетовӑн мӑнукӗн хӗрӗ пулать. Кадет корпусӗ, пӗлетпӗр ӗнтӗ, А.В. Кочетов ячӗпе хисепленет.
Аделина Сотникова – хӗрарӑмсем хушшинче пӗччен ярӑнассипе уйрӑм зачетра 2014 ҫулта Олимп чемпионки ята тивӗҫнӗччӗ. 2013 тата 2014 ҫулсенче вӑл Европа чемпионачӗсене кӗмӗл медале, 2011 ҫулта юниорсем хушшинче тӗнче чемпионки пулса тӑнӑ. Раҫҫейӗн тава тивӗҫлӗ спорт мастерӗ.
Шупашкарти Кадет корпусне авӑн уйӑхӗн 1-мӗшӗнче савӑнӑҫлӑ лару-тӑрура тӗрлӗ тӳре-шара хутшӑннипе уҫмалла. Кайран ҫамрӑксем ҫӗршывӑн тӗрлӗ регионне: Крыма тата Пермь тӑрӑхне — сбора тухса кайӗҫ.
Паянпа ыран Вӑрнар поселокӗнче волонтерсем килтен киле ҫӳреҫҫӗ. Ирхи вуннӑран пуҫласа каҫхи ҫиччӗччен вӗсем хваттерсемпе килсем тӑрӑх хутлаҫҫӗ. Ҫынсенчен вӗсем поселокра ҫӗнӗ шкул кирлипе кирлӗ маррине тата ӑна Культурӑпа кану паркӗнче хӑпартса лартнине хирӗҫҫипе хирӗҫ маррине ыйтса пӗлӗҫ.
Вӑрнарта 1000 ачалӑх ҫӗнӗ шкул тума ӗмӗтленеҫҫӗ. Халӑхра ыйтӑм ирттерессипе районта ятарлӑ комисси йӗркеленӗ. Ӑна район администрацийӗн пуҫлӑхӗн ҫумӗ — вӗренӳ тата ҫамрӑксен политкиин пайӗн пуҫлӑхӗ Денис Трофимов ертсе пырать.
Ыйтӑм, маларах палӑртрӑмӑр ӗнтӗ, ҫурла уйӑхӗн 30-31-мӗшӗсенче, ирхи 10-ран пуҫласа 19 сехетчен пырӗ. Волонтерсем ыйтӑм хучӗсемпе килсерен ҫӳрӗҫ. Ыйтӑм пӗтӗмлетӗвӗпе каярах райадминистраци сайтӗнче паллаштарӗҫ.
Ҫак кунсенче пирӗн республикӑри массӑллӑ информаци хатӗрӗсем пӗр-пӗринпе ӑмӑртса тенӗ пек Шупашкарти Кадет корпусӗнчи ӗҫ-пуҫ пирки хыпарласа тӑчӗҫ. Аса илтерер, Кадет корпусӗпе ун ҫывӑхӗнчи парка хӑтлӑх кӗртес ӗҫе ниме мелӗпе те йӗркелерӗҫ. Унта студентсемпе кадетсен ашшӗ-амӑшӗ, журналистсемпе вӗрентекенсем, тӳре-шара хутшӑнчӗҫ.
Кадет корпусне авӑн уйӑхӗн 1-мӗшӗ тӗлне туса пӗтереймӗҫ текен сас-хура та хӑш-пӗр МИХра анлӑ сарӑлнӑччӗ. Чӑваш Енӗн влаҫ органӗсен официаллӑ порталӗнче ку хыпара ҫине тӑрсах сирчӗҫ. Чӑн та, халӗ кадетсем парада хатӗрленни паллӑ. Ҫапах та парта хушшине вӗсем авӑн уйӑхӗн 1-мӗшӗнче кӗрсе лараймӗҫ.
«Тепӗр эрнере пирӗн вӗренекенсем сбора тухса кайӗҫ: 5-7-мӗш классем — Крыма, 8-11-мӗшсем — Перме. Унта вӗсем физкультурӑпа спорт занятийӗсенче ӑсталӑха аталантарнисӗр пуҫне тӗрлӗ енӗпе пӗлӗвне тарӑнлатӗҫ», — ӑнлантарнӑ журналистсене Кадет корпусӗн пуҫлӑхӗн ҫумӗ Эльвира Игорева паян журналистсене.
+0.3 °C