Шупашкарти хӗрарӑм ӗҫ шыранӑ вӑхӑтра тупӑш тумалли мел шыранӑ та самаях пысӑк парӑма кӗрсе кайнӑ.
29 ҫулти хӗрарӑма палламан ҫынсем видеохостингра роликсем пӑхса укҫа ӗҫлесе илме сӗннӗ. Малтанах вӑл куншӑн укҫа илсе тӑнӑ-ха. Кайран ӑна укҫана криптовалютӑна хума ыйтнӑ. Лешӗ килӗшнӗ, пысӑкрах тупӑш илес тесе вӑл тӗрлӗ банкран кредитсем илнӗ. Укҫана йӑлтах палламан счет ҫине куҫарнӑ. Тупӑшне илме тӑна та паман. Хӗрарам тинех хӑйне улталанине ӑнланнӑ.
Ку тӗслӗх тӗлӗшпе пуҫиле ӗҫ пуҫарнӑ.
Шупашкарта пурӑнакан ҫамрӑк хӗрарӑм пӗчӗк ачапа декрет канӑвӗнче пулнӑ чух кӑштах укҫа ӗҫлесе илес тенӗ. Мессенджерсенчен пӗринче пӗлтерӳ курсан ӗҫлеме хирӗҫ маррине пӗлтернӗ.
Таблицӑсемпе презентацисем хатӗрлеме саккас илес тесен хӗрарӑма банкра счёт уҫма сӗннӗ. Унта 60 пин тенкӗ укҫа хумалла тенӗ. Ӗҫ сӗнсе шӑнкӑравлани каланине итлесе хӗрарӑм телефона экран курӑнмалли программа вырнаҫтарнӑ. Ҫав вӑхӑтра ун патне бакран код килнӗ. Ҫав кодпа усӑ курса ултавҫӑсем ҫамрӑк амӑшӗн укҫине вӑрланӑ та.
Вӑрнар муниципаллӑ округӗнче пурӑнакан пӗр хӗрарӑм упӑшки ӗҫнипе аптӑрасах ҫитнӗ. Тата вӑл, мӑнтарӑн, хӑйне такам пӑсса панӑ тесе шухӑшласа пурӑннӑ. Кун пек пӑтӑрмахран юмӑҫ хӑтарасса шаннӑ.
Ҫынсене туххӑмрах пулӑшма шантаракан пӗлтерӗве курсан хӗрарӑм хавхаланса кайнӑ. Вӑт ку ҫӑлӑнӑҫ! Пули-пулми ҫынна укҫа кӑларса тыттар та телейлӗ пурӑнма тытӑн!
Самар тӑрӑхӗнчи 24 ҫулти хӗре ӗненсе чӑваш хӗрарӑмӗ 365 пин тенкӗ куҫарса панӑ. Анчах пурнӑҫӗ ырӑ енне пӗрех улшӑнман. Ҫавӑн хыҫҫӑн Вӑрнар тӑрӑхӗнчи хӗрарӑм йӗрке хуралҫисенчен пулӑшу ыйтнӑ. Юмӑҫ тесе укҫаллӑ пулнӑ хӗр укҫана тавӑрса панӑ, анчах ҫынна улталанӑшӑн ун тӗлӗшпе пӗрех пуҫиле ӗҫ пуҫарнӑ.
Вӑрнар округӗнчи пӗр ялти хӗрарӑм упӑшкине эрехрен пистерме ӗмӗтленнӗ. Вӑл тӗнче тетелӗнче юмӑҫ шыранӑ. Шӑпах Самар облаҫӗнчи 24 ҫулти хӗрарӑм вырнаҫтарнӑ пӗлтерӳ тӗлне лекнӗ.
Хайхи «юмӑҫ» темӗн тӗрлӗ йӑла та туса ирттернӗ. Вӑрнар тӑрӑхӗнчи хӗрарӑм вара кашнинчех укҫа куҫарса панӑ. Пӗтӗмпе 365 пин тенкӗ тӑкакланӑ вӑл.
Йӗрке хуралҫисем ҫав «юмӑҫа» тупнӑ. Самар облаҫӗнчи хӗрарӑм айӑпне йышӑннӑ, тӑкака саплаштарнӑ. Анчах ку явап тытасран хӑтармасть ӑна. Ун тӗлӗшпе пуҫиле ӗҫ пуҫарнӑ, ӑна малалла тишкереҫҫӗ.
Шупашкарта 3-мӗш класс ачи палламан ҫынсене амӑшӗн банк карттин номерне панӑ. Кун хыҫҫӑн 34 ҫулти хӗрарӑмӑн счечӗ ҫинчен 5 пин тенке яхӑн ҫухалнӑ.
9 ҫулти ача компьютер вӑййисене юратнӑ. Пӗрре мессенджерте ун патне скинсем туянма сӗнӳ килнӗ. Ача ҫав ҫынпа ҫырӑннӑ, малтан амӑшӗн банк карттин номерне панӑ, кайран – телефон ҫине килнӗ кода. Ҫапла счет ҫинчен 4800 тенкӗ ҫухалнӑ. Нарӑсӑн 25-мӗшӗнче хӗрарӑм полицие пырса заявлени ҫырнӑ.
Ку тӗслӗх тӗлӗшпе пуҫиле ӗҫ пуҫарнӑ.
Етӗрне округӗнчи Палтай ялӗнче пурӑнакан ватӑ хӗрарӑма палламан ҫынсем хӗрӗ аварие лекнӗ тесе ӗнентернӗ. Унпа вӗсем телефонпа калаҫса тӑнӑ, ҫав вӑхӑтра курьер килсен унран 300 пин тенкӗ илсе кайнӑ та ҫухалнӑ.
Ҫак ӗҫе тӑвакана тытса чарнӑ. Вӑл - Чулхула облаҫӗнче пурӑнакан 33-ри арҫын. Унччен вӑл судпа пӗрре айӑпланман, хӑй тӗллӗн ӗҫлекен пек регистрациленнӗ. Вӑл вӑрланӑ укҫан 5 процентне пама шантарсан хура ӗҫе тума килӗшнӗ.
Арҫынна Чулхула облаҫӗнчен Чӑваш Ене конвойпа илсе килнӗ. Ун тӗлӗшпе пуҫиле ӗҫ пуҫарнӑ. Халӗ вӑл ытти ҫакнашкал преступление тунипе туманнине тӗрӗслеҫҫӗ.
Шупашкарти 66 ҫулти хӗрарӑм патне мессенджерта пуҫлӑхӗ ҫырнӑ. Ячӗ, сӑнӳкерчӗкӗ пӗрешкелех пулнӑран вӑл ӑна ӗненнӗ.
Хайхискер каланӑ тӑрӑх, ун ячӗпе такам кредит илесшӗн, ҫавӑнпа ун патне йӗрке хуралӗнчен шӑнкӑравлӗҫ-мӗн. Лешсем чӑнах та унпа ҫыхӑннӑ.
Хӗрарӑм виҫӗ кредит илнӗ. Пӗтӗмпе - 2 миллион та 770 пин тенкӗ. Пӗр кредитне хваттерне салук хурса илнӗ.
Хӑйӗн пуҫлӑхӗпе калаҫсан тин 66 ҫулти хӗрарӑм ултавҫӑсен серепине лекнине ӑнланнӑ.
Вӑрмар муниципаллӑ округӗнче пурӑнакан арҫын патне пӗр уйӑх каялла палламан ҫын шӑнкӑравланӑ. Вӑл брокер-мӗн. Хайхискер ӑна укҫине инвестицие хывма сӗннӗ.
Арҫыннӑн укҫи самаях пулнӑ: 2,3 миллион тенкӗ. Вӑл палламан ҫынна ӗненсе малтан 100 пин тенкӗ хывнӑ. Ятарлӑ сарӑмра тупӑшӗ ӳссе пынине сӑнасан арҫын татах укҫа хунӑ. Хальхинче - пӗтӗмпех. Ку та ҫитмен-ха. Вӑл кайса кредитсем илнӗ. Ҫапла вӑл ултавҫӑсене 6,5 миллион тенкӗ куҫарса панӑ.
Тупӑшне счет ҫинчен илейменнине кура арҫын хӑйне улталанине ӑнланнӑ та полицие кайнӑ.
Чӑваш Енре пурӑнакан ҫынсем ултавҫӑсен аллине час-часах ҫакланаҫҫӗ. Телефонпа шӑнкӑравласа хӑратакансен меслечӗсем ҫӗнелсе улшӑнса пыраҫҫӗ. Капкӑна лекес мар тесен тӗп правилӑна пӑхӑнмалла — палламан ҫынпа телефонпа калаҫма кирлӗ мар. Кун пирки паян банксенчен пӗрин учрежденийӗсем Шупашкарти ватӑсене Аслӑ ӑрурисен университетӗнчи заняти вӑхӑтӗнче хытах асӑрхаттарнӑ. Хӑвӑра вӗсенчен ӑслӑрах та чеерех тесе шухӑшласан та вӗсем шӑнман пӑрпа лартса яма пултараҫҫӗ. Тепӗр чухне ҫынна хӑратма тытӑнаҫҫӗ.
Юлашки вӑхӑтра ачасем те ултавҫӑсен капкӑнне лекеҫҫӗ. Вӗсем мессенджерсени ют каҫӑпа иртеҫҫӗ те, контента пӑхнӑ хыҫҫӑн «Куншӑн укҫа тӳлемелле», — текен ҫыру килет. Ача ман укҫа ҫук тесе турткалашсан алисен банк карттипе татӑлма хушаҫҫӗ.
Канаш тӑрӑхӗнче ҫуралса ӳснӗ, Раҫҫей Геройӗн ятне тивӗҫнӗ Николай Гаврилова ултавҫӑсем шӑнман пӑр ҫине лартса хаварнӑ. Палламан ҫынсем хӑйсемпе «ФСБ ӗҫченӗ» тесе паллаштарнӑ. 65-ри Николай Гаврилов хӑй те унта тахҫан ӗҫленӗ.
Ун патне Раҫҫейри Геройсен ассоциацийӗнчен шӑнкӑравланӑ имӗш. Унӑн укҫине такамсем хапсӑнаҫҫӗ иккен. Унтан Николай Гаврилова «ФСБ ӗҫченӗпе», «Тӗп банк ҫыннипе» калаҫтарнӑ. Вӗсем ӑна счечӗ ҫинчи 1,5 млн тенкине илсе «хӑрушсӑр счет» ҫине хума ӳкӗте кӗртнӗ.
Герой укҫана тӑватӑ кунра палламан ҫынсене куҫарса панӑ. Нарӑсӑн 14-мӗшӗнче вара вӑл хӑйне улталанине ӑнланнӑ та полицие кайнӑ.
+7.3 °C
