Шупашкарта пуранакан 28 ҫулти хӗр Алтайра канас тенӗ. Халӑх тетелӗнчи пӗлтерӳпе вӑл хӑна ҫуртне йышӑнса, уншӑн 8 пин тенкӗ тӳлесе хунӑ. Анчах кайран Алтайри ҫурт хуҫи ҫыхӑнӑва тухма пӑрахнӑ. Ҫавӑн хыҫҫӑн Шупашкар хӗрӗ йӗрке хуралҫисенчен пулӑшу ыйтнӑ.
Улталаканни Пестово хулинчи 34 ҫулти хӗрарӑм пулнине палӑртнӑ. Вӑл хӑй те тахҫан ҫавӑн пек улталаннине пӗлтернӗ¸ ҫавӑнпа ҫынсене те шӑнман пӑрпа лартса яма шут тытнӑ-мӗн.
Хӗрарӑм тӑкака саплаштарнӑ, анчах ун тӗлӗшпе пуҫарнӑ пуҫиле ӗҫе малалла тӗпчеҫҫӗ.
Шупашкарта пурӑнакан 40 ҫулти арҫын тӗнче тетелӗнче пӗр хӗрпе паллашнӑ. Унпа вӑл ҫыру ҫӳретнӗ, унтан иккӗшӗ тӗл пулма калаҫса татӑлнӑ.
Хӗр хайхи арҫынна кинора курнӑҫма сӗннӗ, унти вип-залта вырӑн йышӑнма ыйтнӑ, ҫавӑн валли ятарлӑ каҫӑ ярса панӑ.
Арҫын ҫав каҫҫа пусса пӑхнӑ та унӑн банк картти ҫинчен 5 пин тенкӗ ҫухалнӑ.
Сайтӑн техслужбипе ҫыхӑнсан арҫынтан лешсем смспа килекен кода тата ыттине ыйтма тытӑнса кайнӑ.
Улталаннине ӑнланса илсен арҫын йӗрке хуралҫисенчен пулӑшу ыйтнӑ, хӑйӗн счечӗсемпе ют ҫынсем усӑ курмалла мар туса хунӑ.
Шупашкар хулинче пурӑнакан 22 ҫулти хӗр патне мессенджерсенчен пӗринче ют ҫын шӑнкӑравланӑ. Вӑл хӑйӗнпе банк ӗҫченӗ тесе паллаштарнӑ. Пикен телефонӗнче сиенлӗ приложени пур, унран тасалма ятарлӑ приложени вырнаҫтармалла тесе ӗнентернӗ.
Хӗр ют ҫын каланине итленӗ. Кӑштахран ҫав арҫын тепре шӑнкӑравланӑ, хӑй ултавҫӑ пулнине пӗлтернӗ. Ҫав приложени урлӑ вӑл пикен сӑнӳкерчӗсене уҫласа илме пултарнине пӗлтернӗ, сӑнӳкерчӗксемшӗн 100 пин тенкӗ тапӑннӑ. Хӗрӗн интимлӑ сӑнӳкерчӗкӗсене вӑл пикен амӑшне ярса панӑ, ытти ҫын патне те ярса парассипе хӑратнӑ.
Арӑмӗпе упӑшки пухнӑ пӗрӗм укҫине, 8 миллион тенке яхӑн, ултавҫӑсене куҫарса панӑ, чутах хваттерсӗр юлман.
Ку Шупашкарта пулса иртнӗ. Кӑрлач вӗҫӗнче 76 ҫулти арҫын патне палламан ҫын шӑнкӑравланӑ. Вӑл пенси фончӗн ӗҫченӗ имӗш, пенси укҫине ҫӗнӗрен шутласа параҫҫӗ-мӗн. Арҫын ултавҫа ӗненсе СНИЛС номерне пӗлтернӗ.
Кӑштахран ун патне «банк ӗҫченӗ» тесе паллаштарнӑ ҫын шӑнкӑравланӑ. Такам арҫыннӑн счечӗ ҫинчи укҫана вӑрланӑ имӗш, ӑна каялла тавӑрма пулать иккен, хайхискер пулӑшма шантарнӑ. Ҫапла пенсионерсем вӑл мӗн хушнине пурнӑҫласа пухнӑ укҫине банкомат урлӑ куҫарса панӑ.
Палламан ҫын хваттер сутма хушсан тин арӑмӗпе упӑшки ултавҫӑсен серепине ҫакланнине ӑнланнӑ.
Чӑваш Енре пурӑнакансем хушма укҫа ӗҫлесе илес тесе час-часах улталанаҫҫӗ.
Шупашкарта пурӑнакан 56 ҫулти ӗҫсӗр хӗрарӑм, ав¸ мессенджерсенчен пӗринче пӗлтерӳ курнӑ та инвестици платформинче укҫа ӗҫлесе илес тесе 925 пин тенкӗ хывнӑ, ҫав шутран 350 пинӗ хӑйӗн, ыттине хӗрарӑм кредит илнӗ.
Канашра воспитатель пулӑшаканӗнче тӑрӑшакан 42 султи хӗрарӑм ултавҫӑсем каланӑ счёт ҫине 200-е яхӑн пин тенкӗ хунӑ, ку укҫаран пысӑк пайне вӑл кредит илнӗ.
Шупашкарти 69 ҫулти пенсионер 146 пин тенкӗсӗр юлнӑ. Юрать, кредит илмен-ха. Хӑйӗн укҫи пулнӑ. 32-ри электромонтажник тавар туянас тесе 98 пинсӗр юлнӑ.
Шупашкарта 14 ҫулти хӗрача ашшӗ-амӑше пуйма пулӑшас тенӗ те... ултавҫӑсене 170 пин тенкӗ куҫарса панӑ.
Хӗрача мессенджер урлӑ интернет-аукциона хутшӑннӑ. Унта ҫапла пӗлтернӗ: кам укна нумайрах хывать, ҫавӑ нумайрах укҫа илет. Вӑл унӑн ячӗпе уҫнӑ вкладри укҫана, 170 пин тенке, куҫарса панӑ.
Ашшӗ-амӑшӗ хушӑран вклада укҫа хурса тӑнӑ, хӗрне ӑна никама та куҫарса памалли пирки ӑнлантарнӑ. Апла пулсан та ҫапла пулса тухнӑ.
Шупашкарта соцӗҫченре вӑй хунӑ хӗрарӑм ултавҫӑсене аллине лекнӗ. Ун патне шӑнкӑравлакан ҫын пуҫлӑхӗ пулнине ӗненнӗ вӑл. Ҫавна пула пухнӑ пӗтӗм укҫине куҫарса панӑ.
Лешӗ каланӑ тӑрӑх, учрежденире тӗрӗслев пырать, кӗҫех ун патне ФСБ ӗҫченӗсем шӑнкӑравлӗҫ. Хӗрарӑмӑн счечӗ ҫинчи укҫана экстремистла организацие куҫарма хӑтланнӑ имӗш.
Хӗрарӑм хӑраса кайнӑ та палламан ҫын хушнине йӑлтах пурнӑҫланӑ. Вӑл пурнӑҫ тӑршшӗпех пухнӑ укҫана йӑлтах куҫарса панӑ. Пӗтӗмпе – 3,2 миллион ытла тенкӗ.
Шупашкарти 36 ҫулти усламҫӑ ФСБ ӗҫченӗ тесе ӗненнӗ те ултавӑҫене укҫа куҫарса панӑ кӑна мар, КамАЗне те самай йӳнӗпе сутса янӑ. Паллӑ ӗнтӗ: укҫине палламан счет ҫине куҫарнӑ.
Ӑна палламан ҫынсем машина салукра пулнине ӗнентернӗ. Ӑна тавӑрма пулать-мӗн: анчах вӑхӑтлӑха урӑх ҫын ҫине регистрацилемелле. Ҫапла арҫын малтан вӗсене 800 пин тенкӗ куҫарса панӑ. Кайран КамАЗне сутнӑ. Ҫапла вӑл пӗтӗмпе 1 миллион та 750 пин тенкӗ куҫарса панӑ.
Ку тӗслӗх тӗлӗшпе пуҫиле ӗҫ пуҫарнӑ.
Шупашкарти арҫын 75 ҫулти кинемее ултавҫӑсене укҫа куҫарса парасран хӑтарнӑ.
Палламан ҫынсем кинемейпе мессенджер урлӑ ҫыхӑннӑ. Унӑн сим-картта срокне тӑсмалла-мӗн. Кайран каллех тепӗр ҫын ҫыхӑннӑ, вӑл ултавҫӑпа калаҫнӑ тесе ӗнентернӗ. Ҫапла кинемее пухнӑ 900 пин тенкине счет ҫинчен илме ӳкӗте кӗртнӗ. Ватаскер 275 пин тенкине куҫарса ӗлкӗрнӗ.
Банкра черетре кинемей хыҫҫӑн Илья Карпов тӑнӑ. Вӑл унӑн аллинчи укҫа тӗркисене асӑрханӑ, телефонпа ӑна такам темӗн ӑнлантарнине сиснӗ. Вӑл кинемее ултавҫӑсем пирки каланӑ, полицие чӗннӗ.
Малтанах кинемей арҫынпа вӑрҫӑнса та илнӗ, ӗненмен. Анчах вӑл ӑна укҫасӑр юласран хӑтарнӑ.
Шупашкарта пурӑнакан пӗр учитель ултавҫӑҫене ӗнӗнсе хӑйӗн пӗртен-пер хваттерне сутса янӑ, укҫана вӑл вӗсене куҫарса панӑ. Пилӗк миллиона яхӗн тенкӗ.
67 ҫулти хӗрарам патне пӗр уйӑх каярах мессенджерсенчен пӗринче шкул директорӗн ячӗпе шӑнкӑравланӑ. «Директор» хӗрарӑмран юлашки виҫӗ уйӑхри расчёт хучӗсен сӑнӳкерчӗкне ыйтнӑ, вӑл Украинӑна укҫа куҫарса панине, унпа Федерацин хӑрушсӑрлӑх службин ӗҫчене кӗҫӗх ҫыхӑнассине систернӗ.
Хӑйсемпе право хуралӗн тытӑмӗн тата Росфинмониторинг ӗҫченӗсем тесе паллаштаракансене ӗненнипе хӗрарӑм банкра банкра кредит илнӗ, 20 ҫул пурӑннӑ пӗртен-пӗр хваттерне сутса янӑ.
Банкра вӑл укҫа сипленме кирлӗ тесе каланӑ, хваттер сутнине чирлӗ пӗлӗшне пӑхма Мускава тухса каяссипе сӑлтавланӑ. Кун пек суйма ӑна ултавҫӑсем вӗрентнӗ. Мӗнпур укҫана банк приложенийӗ урлӑ ултавҫӑсене куҫарса панӑ.
Ултавҫӑсем кайран та шӑнкаравлама пӑрахманнине кура хӗрарӑм хӑй улталаннине ӑнланса илнӗ те йӗрке хуралҫисенчен пулӑшу ыйтнӑ.
+16.3 °C