Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрти социаллӑ мобильлӗ бригада пӗччен ватӑсене тата сусӑрсене машина уйӑрса пулӑшать.
«Бригада тивӗҫӗ — вӑхӑтра тата васкавлӑ пулӑшу кӳресси. Кӑҫалхи пӗрремӗш кварталта 85 ҫынна пулӑшнӑ, 72 хутчен ятарлӑ автомашина уйӑрса панӑ», — каласа кӑтартнӑ центрӑн социаллӑ реабилитаци пайӗн заведующийӗ Марина Васильева.
Ятарлӑ ҫар операцине хутшӑнаканӑн арӑмне нумаях пулмасть Хусана тухтӑрсем патне илсе кайса килнӗ. Сусӑр кӳмипе ҫӳрекен хӗрарӑма унта хӑй тӗллӗн ҫитсе килме калама ҫук йывӑрри каламасӑрах паллӑ.
Тепӗр тӗслӗхре пӗччен пурӑнакан хӗрарӑм инсульт пирки васкавлӑ пулӑшу машинипе лекнӗ. Каялла тухма унӑн ӑшӑ ҫипуҫ та пулман. Социаллӑ учрежденин ятарлӑ машини хӗрарӑма пульницӑран килне ҫитерсе янӑ ҫеҫ мар, инсульт хыҫҫӑн тумалли хӑнӑхтарусене вӗрентсе хӑварнӑ, социаллӑ ӗҫчен пулӑшма пултарни пирки каласа ӑнлантарнӑ.
Шупашкар хулинчи Калинин районӗнчи прокуратура ача канализаци шахтине кӗрсе ӳкнӗ текен хыпара тӗрӗслет.
Тӗнче тетелӗнчи ҫӑлкуҫсенчен пӗринче хыпарланӑ тӑрӑх, Шупашкарти «Ҫӗнӗ хула» микорайонта ача канализаци шахтине ӳкнӗ.
Надзор органӗн ӗҫченӗсем вырӑна тухса тӗрӗсленӗ чухне яваплисем темиҫе канализаци люкне тивӗҫлипе тытса тӑманнине палӑртнӑ та ӗнтӗ. Тӗрӗслев малалла пынӑ май ача шӑтӑка чӑннипех те кӗрсе ӳкнипе ӳкменнине палӑртӗҫ. Пӑтӑрмаха ҫирӗплетсе парсан яваплисене пуҫран шӑлмӗҫ.
Красноармейски районӗнчи прокуратура васкавлӑ пулӑшу машини Вӑрманкасси ялӗнчи пӗр кил патне ҫитеймен тесе тӗнче тетелӗнче пӗлтернӗ хыпара тӗрӗслет.
Тӗнче тетелӗнче ҫырнине ӗненсен, васкавла пулӑшу тухтӑрӗсем чирлӗ ҫын патне ҫитеймен.
Надзор органӗ ҫак хыпара тӗрӗсленӗ май вырӑнти хӑй тытӑмлӑх органӗ ҫула епле тытса тӑнине хак парӗ. Кӑлтӑк пулсан явап тыттарасси пирки асӑрхаттарнӑ.
Нумаях пулмасть Кӳкеҫре пурӑнакан хӗрарӑм васкавлӑ медпулӑшӑва шӑнкӑравланӑ. Вӑл каланӑ тӑрӑх, 67 ҫулти аппӑшӗ кафере апатланнӑ хыҫҫӑн, аш ҫисен, кӑвакарма, сывлӑш ҫитменнипе аптӑрама пуҫланӑ.
Васкавлӑ медпулӑшу бригади вырӑна 5 минутран ҫитнӗ. Ҫав вӑхӑталла ватӑ хӗрарӑм урайӗнче тӑнсӑр выртнӑ. Тухтӑрсем ҫӑварне, пырне пӑхсан нимӗн те тупайман. Вӗсем Геймлих мелӗпе усӑ курса пациенткӑн сывлав ҫулӗ ҫинче кӗрсе ларнӑ какай татӑкне кӑларнӑ. Ҫапла пулӑшнӑ хӗрарӑма Елена Ивановӑпа Елена Юркина фельдшерсем.
Ака уйӑхӗнче Хулари 1-мӗш клиника тухтӑрӗсем Тӑван ҫӗршывӑн Аслӑ вӑрҫин ветеранӗсем тата ҫавнашкал ҫӑмӑллӑха тивӗҫнӗ ҫынсем патне киле ҫитсе вӗсен сывлӑхне тӗрӗслӗҫ, диспансеризаци ирттерӗҫ. Шурӑ халатлисем сывлӑхне кура килтен тухса ҫӳрейменнисем патне ҫитӗҫ.
Вырӑна тухса ҫӳрекен тухтӑрсен йышӗнче тӗрлӗ специалист пулӗ: терапевт, офтальмолог, невролог, хирург... Специалистсем юн анализне илӗҫ, ЭКГ тӑвӗҫ, куҫри юн пусӑмне тӗрӗслӗҫ.
Тухтӑрсем ҫар ӗҫӗсен ветеранӗсем патне те ҫитӗҫ.
ЧР Элтеперӗ Олег Николаев пӗлтернӗ тӑрӑх, ака уйӑхӗнче пирӗн пата РФ сывлӑх сыхлавӗн министрӗ Михаил Мурашко килмелле. Нумаях пулмасть Олег Алексеевич унпа Мускавра тӗл пулнӑ.
Министр кунта килсен унпа Республикӑри клиника пульницин ҫӗнӗ корпусне тӑвасси пирки калаҫӗҫ. Ӑна Ҫӗнӗ Шупашкартан инҫех мар хута ярасшӑн. Унта сакӑр корпус пулӗ. Ҫав шутра – инфекци блокӗ тата ҫӗнӗ пепкелӗх центрӗ.
Олег Николаев ҫӗнӗ корпуса 2025 ҫулта тума тытӑнасси пирки пӗлтернӗччӗ. Строительство темиҫе тапхӑрпа пулӗ.
77 ҫулти Светлана Васильева кӑрлач уйӑхӗн варринче картишре юр тасатма шутланӑ. Анчах ӑнсӑртран чӗри тӗлӗнче ыратнине туйнӑ. Кӳрши ӑна хӑйӗн машинипе Шупашкара леҫнӗ, мӗншӗн тесен васкавлӑ медпулӑшӑва юр нумай ҫунине пула унта ҫитме йывӑр пулнӑ.
Кардиодиспансерта ӑна часрах операци сӗтелӗ ҫине вырттарнӑ. Чӗрине стент лартнӑ, анчах кайран миокард ҫурӑлса кайнӑ та хӗрарӑмӑн сывлӑхӗ пушшех те начарланнӑ.
Тухтӑрсем Мускаври специалистсемпе канашланӑ. Ҫулӗсем пур та, хӗрарӑма федераци центрне илсе кайяман. Ҫапла тухтӑрсем йывӑр операцие хӑйсемех тума йышӑннӑ. Бригадӑна Вадим Бабокин ертсе пынӑ. Операци 5 сехете тӑсӑлнӑ. Телее, ватӑ хӗрарӑм ӑна лайӑхах чӑтса ирттернӗ, унӑн халӗ реабилитаци тапхӑрӗ пырать.
Унччен Тӑвай округӗнчи Тӑрмӑш ялӗнче пурӑнакансене фельдшер колхоз правленийӗ пулнӑ ҫуртра йышӑннӑ. Ҫак кунсенче унта ҫӗнӗ ФАП уҫӑлнӑ.
Ҫӗнӗ медпунктра газ, ӑшӑ шыв, кирлӗ медицина хатӗр-хӗтӗрӗ пур. ФАП ку тӑрӑхра пурӑнакан 1200 ытла ҫынна йышӑнӗ.
Ҫав кунах Кармал ялӗнче те ҫӗнӗ ФАП уҫӑлнӑ. Унччен унта кун кунлакан 300 ытла ҫын фельдшер патне ялти клуба ҫӳренӗ.
Республикӑра кӑрлач-нарӑс уйӑхӗсенче хӗрлӗхенпе чирленӗ тӗслӗх нумайланнӑ. Гигиенӑпа эпидемиологи центрӗ пӗлтернӗ тӑрӑх, 186 тӗслӗхе шута илнӗ. Вӗсенчен 140-шӗ - 17 ҫул тултарман ачасем.
Ведомство пӗлтернӗ тӑрӑх, ытларахӑшӗ прививка туманнипе чирленӗ. Ун пек тӗслӗх - 164.
Лидерсен йышӗнче - Шупашкар. Унта 73 ҫын чирленӗ. Унтан - Улатӑр тата Улатӑр округӗ, Ҫӗнӗ Шупашкар, Канаш тата Канаш округӗ. Шупашкар, Красноармейски, Вӑрнар, Комсомольски, Йӗпреҫ, Тӑвай округӗсенче те темиҫешер тӗслӗх пулнӑ. Сӗнтӗрвӑрри, Куславкка, Муркаш, Ҫӗрпӳ округӗсенче пӗрер ҫын чирленӗ.
Красноармейски тӑрӑхӗнчи прокуратура ачасене йытӑ ҫыртнӑшӑн администрацине явап тыттарасшӑн.
Хуҫасӑр йытӑсем ачасене Красноармейскинчи Ленин тата Слукин урамӗсенчи ҫуртсем тӗлӗнче тапӑннӑ. Вӗсем икӗ ачана шар кӑтартнӑ. Вӗсене тухтӑр пулӑшӑвӗ кирлӗ пулса тухнӑ.
Ачасен правине хӳтӗлесе вырӑнти надзор органӗ суда тухнӑ. Тавӑҫра Красноармейски муниципаллӑ округӗн администрацийӗнчен 20 пин тенкӗ укҫа шыраса илес кӑмӑллине палӑртнӑ. Ку вӑл — ачасене кӑмӑл-сипет тӗлӗшӗнчен шар курнине саплаштарма.
+10.3 °C