Республикӑра иккӗмӗш эрне ӗнтӗ кӑшӑлвируспа чирлекен сахалланса пырать. Анчах ҫынсем вилнӗ тӗслӗхсем каллех пулнӑ.
Стопкоронавирус.рф сайт пӗлтернӗ тӑрӑх, юпан 9-15-мӗшӗсенче республикӑра 280 ҫын кӑшӑлвируспа чирленӗ. Унччен 393 тӗслӗх пулнӑ. Иртнӗ эрнере 23 ҫынна пульницӑна вырттарнӑ, ун умӗнхи эрнере – 23 ҫынна. Анчах иккӗмӗш эрне ӗнтӗ ҫын вилнӗ тӗслӗх пулнӑ. Иртнӗ эрнере 1 ҫын сывалайман.
Сӑмах май, пандеми пуҫланнӑранпа республикӑра 117,6 пин ҫын кӑшӑлвируспа чирленӗ. Вӗсенчен 4742-шӗ вилнӗ.
Чӑваш Енри тата тепӗр икӗ пульницӑна пӗрлештересшӗн. Реорганизаци текен утӑма ҫӳлтисем хысна укҫа-тенкне перекелессипе чылай чухне сӑлтавлаҫҫӗ.
Иртнӗ эрнере Республикӑн ача-пӑча клиника пульниципе Шупашкар хулинчи 2-мӗш ача-пӑча пульницине пӗрлештерме йышӑннӑ.
Асӑннӑ икӗ учреждени те унчченхилле ӗҫлӗ. Анчах та асли (ансат чӗлхепе каласан) Республикӑн ача-пӑча клиники пулӗ. Пурлӑх хуҫи те вӑл шутланӗ.
Шупашкарта бетон хутӑштармалли хатӗрте ҫын пурнӑҫӗ татӑлнӑ.
Пӑтӑрмах ҫурла уйӑхӗн 31-мӗшӗнче пулса иртнӗ.
Предприятире ӗҫлекен 29 ҫулти рабочи бетон хутӑштармалли хатӗре тасатма тесе кӗрсе кайнӑ. Моторист шалта ҫын пуррине пӗлмен те инҫет ҫыхӑну мелӗпе хатӗре ӗҫлеттерсе янӑ. Йывӑр суранланса пӗтнӗ арҫын инкек вырӑнӗнчех вилсе кайнӑ.
Пӑтӑрмах ӗҫ хӑрушсӑрлӑхӗн правилисене пӑхӑнманран сиксе тухнӑ. Халӗ ку ӗҫе тӗпчевҫесем тишкереҫҫӗ.
Чӑваш Енре икӗ уйӑх ҫурӑ кӑшӑлвирусран вилнӗ тӗслӗх пулманччӗ. Юлашки эрнере вара, шел те, Стопкоронавирус.рф сайтри статистика пӗр ҫын вилнине кӑтартать.
Юпан 2-8-мӗшӗсенче республикӑра 393 ҫын кӑшӑлвируспа чирленӗ. Вӗсенчен 30-шне пульницӑна вырттарнӑ. Юлашки эрнере 585 ҫын сывалнӑ.
Пандеми пуҫланнӑранпа Чӑваш Енре 117,4 пин ҫын кӑшӑлвируспа чирленӗ. Вӗсенчен 4741-шӗ вилнӗ.
Улатӑрти хӗрарӑм чӗрепе аптӑранӑ. Юпа уйӑхӗн 3-мӗшӗнче каҫхине санавиаци вертолечӗ ӑна Республикӑри кардиологи диспансерне 40 минутра илсе ҫитернӗ.
Хӗрарӑма унта операци тунӑ, вӑл ӑнӑҫлӑ иртнӗ. Унӑн чӗрине хамӑр ҫӗршывра туса кӑларнӑ кардиостимулятор вырнаҫтарнӑ. Халӗ пациентка хӑйне аванах туять, кардиодиспансерта сиплев курсӗ витӗ тухать.
Палӑртмалла: санитари авиацийӗ ӗҫлеме пуҫланӑранпа республикӑри йывӑр чирпе нушаланакан 218 пациентӑн пурнӑҫне ҫӑлма май килнӗ.
Чӑваш Ене кӑшӑлвирусран хӳтӗленмелли 10 пин доза вакцина илсе килӗҫ. Вӗсене пульницӑсене, мобильлӗ пунктсене валеҫсе парӗҫ.
Палӑртмалла: кӑҫал 6,5 пин доза вакцина кӳрсе килнӗ. 5 пинӗшӗ авӑн уйӑхӗн пуҫламӑшӗнче килнӗ. Тепӗр парти вара, пӗрремӗшӗ, ЧР сывлӑх сыхлавӗн министрӗ Владимир Степанов каланӑ тӑрӑх, утӑ уйӑхӗнче пулнӑ.
Аса илтерер: иртнӗ эрнере 505 ҫын кӑшӑлвируспа чирленӗ. 23 пациента стационара сипленме вырттарнӑ.
Стопкоронавирус.рф сайт пӗлтернӗ тӑрӑх, иртнӗ эрнере республикӑра 500 ытла ҫын кӑшӑлвируспа чирленӗ. Анчах ҫав вӑхӑтра ЧР Сывлӑх сыхлавӗн министерстви ку енӗпе лару-тӑру йӗркеллех пулнине пӗлтерет.
Иртнӗ эрнере 505 ҫыннӑн ҫак диагноз ҫирӗпленнӗ. Танлаштарма, ҫурла уйӑхӗн юлашки эрнинче 90 ҫын чирленӗ.
Палӑртмалла: республикӑра кӑшӑлвируспа чирлекенсем валли 60 койка хатӗрленӗ. Авӑнӑн 18-24-мӗшӗсенче пульницӑна 54 ҫынна вырттарнӑ. Иртнӗ эрнере вара 23 пациент стационара лекнӗ.
Республикӑри ача-пӑча клиника пульницине пырса тем тӗрлӗ пулӑшу та ыйтаҫҫӗ.
Авӑн уйӑхӗн 27-мӗшӗнче тухтӑрсем пӗчӗк хӗрачан чӗлхине пластик кӗленче пӑккинчен кӑларма пулӑшнӑ. Ача чӗлхине унта интереслӗ пулнипе чикнӗ иккен.
Тепрехинче тухтӑрсем тепӗр хӗрачан сӑмсинчен вӑлта ҫекӗлне кӑларнӑ. Вӑл пиччӗшӗпе пулла кайнӑ. Арҫын ача вӑлтана шыва пенӗ те ҫекӗлӗпе ӑнсӑртран йӑмӑкӗн сӑмсине ҫаклатнӑ. Тухтӑрсем ӑна ӑнӑҫлах кӑларнӑ, пӗчӗк пациента киле янӑ.
Шупашкар районӗнчи Чаканарти предприятире тӗп инженерта ӗҫлекен ҫынна пуҫиле майпа явап тыттарасшӑн.
Кӑҫалхи ҫу уйӑхӗн 5-мӗшӗнче, 11 сехет тӗлӗнче, предприятире пӗр хӗрарӑм производствӑри машинӑн куҫса ҫӳрекен механизмӗ хӗрарӑм-рабочин аллине туртса кӗрсе кайнӑ. Хӗрарӑм йывӑр суранланнӑ.
Тӗпчевҫӗсем шухӑшланӑ тӑрӑх, пӑтӑрмах тӗп инженер ӗҫ сыхлавӗн мерисене тивӗҫлипе пурнӑҫламанран пулса иртнӗ. Станока хӳтӗлекен пай пулман иккен.
Хальхи вӑхӑтра тӗпчев малалла пырать.
Стопкоронавирус.рф сайт пӗлтернӗ тӑрӑх. Чӑваш Енре кӑшӑлвируспа чирлекенсем нумайланса пыраҫҫӗ. Юлашки эрнере 447 ҫыннӑн ҫак диагноз пулнине палӑртнӑ. Вӗсенчен 54-шне пульницӑна вырттарнӑ.
Танлаштарма: авӑнӑн 4-10-мӗшӗсенче 312 ҫын кӑшӑлвируспа чирленӗ. Юрать-ха, вилекенсем ҫук. Кун пек тӗслӗх утӑ уйӑхӗнченпе пулман. Юлашки эрнере 161 ҫын сывалнӑ.
Палӑртмалла: пандеми пуҫланнӑранпа республикӑра 116,5 пин ҫын кӑшӑлвируспа чирленӗ. Вӗсенчен 4740-шӗ вилнӗ.
+2.7 °C