Канаш районӗнчи 45 ҫулти арҫынна тытса чарнӑ. Вӑл ашшӗне вӗлерме пултарнӑ тесе шутлаҫҫӗ. Следстви комитечӗ ун тӗлӗшпе пуҫиле ӗҫ пуҫарнӑ.
Следстви версийӗ тӑрӑх, чӳк уйӑхӗн 21-мӗшӗнче Вӑрӑмпуҫ ялӗнче пурӑнакан арҫын 71 ҫулти ашшӗне килте ҫӗҫӗпе темиҫе хутчен чикнӗ. Ватӑскер сурансене пула вилнӗ. Палӑртмалла: вӗсем пӗрле пурӑннӑ.
Ывӑлне тытса чарнӑ. Ҫитес вӑхӑтра ӑна следстви вӑхӑтӗнче хупса усрас ыйтӑва татса парӗҫ.
Вӑрнар районӗнчи Кӳлхӗрри ялӗнче арҫын пӑр айне анса кайса вилнӗ. Кун пирки Республикӑри ҫӑлавпа шырав службин пресс-служби пӗлтерет.
Чӳк уйӑхӗн 22-мӗшӗнче арҫын пулла кайнӑ. Пӑр ҫӳхе пулнӑ, ун йывӑрӑшне чӑтайман. Пулӑҫ пӑр айне анса кайсан каялла тухайман.
Ҫӑлавҫӑсене кун пирки чӳк уйӑхӗн 23-мӗшӗнче 10 сехетре пӗлтернӗ. Вырӑна 5 ҫӑлавҫӑ ҫитнӗ. Вӗсем 63 ҫулти арҫыннӑн виллине шыв тӗпӗнче тупса кӑларнӑ.
Аса илтетер: нумаях пулмасть Йӗпреҫ районӗнче пулӑҫ пӑр айне кайса вилнӗччӗ.
Кӳкеҫре пурӑнакан 29 ҫулти арҫынна тытса чарнӑ. Вӑл пӗлӗшне вӗлернӗ тесе шутлаҫҫӗ.
Следстви версийӗ тӑрӑх, чӳк уйӑхӗн 19-мӗшӗнче вӑл Шупашкарти пӗр общежитире 37 ҫулти пӗлӗшӗ патне хӑнана кайнӑ, хӑй ӳсӗр пулнӑ. Унпа пӗрле савнийӗ те пынӑ.
Хӑна кил хуҫине савнийӗ ҫумне кӗвӗҫнӗ. Вӗсем хирӗҫсе кайнӑ. Хӑна ҫӗҫӗ ярса тытнӑ та 37 ҫулти арҫынна кӑкӑрӗ тӗлӗнчен чикнӗ. Лешӗ ҫавӑнтах вилнӗ. 29 ҫулти арҫынна тытса чарнӑ.
Чӳк уйӑхӗн 21-мӗшӗнче «Элӗк – Ишек» ҫулӑн 20-мӗш ҫухрӑмӗнче «Киа Рио» машина хирӗҫ килекен «Форд Фокус» ҫине пырса кӗнӗ. «Киа» ҫапӑннӑ хыҫҫӑн кювета чӑмнӑ.
«Киа Рио» машинӑра 7 ҫулти ача пулнӑ. Ӑна, суранланнӑскере, пульницӑна илсе ҫитернӗ.
Аса илтерер: нумаях пулмасть машина хыҫне пӳремеч кӑкарса пӗлӗшӗсене ярӑнтарнӑ водителе тытса чарнӑ. Хӗрарӑмӑн водитель прави те пулман.
Владимир облаҫӗнче Мускав ҫывӑхӗнче паян машинӑсене ҫӳреме чарнӑ. Ку ҫӗр ҫийӗн каҫмалли каҫӑ йӑтӑнса аннипе ҫыхӑннӑ.
«Про Город» хаҫата халӑх корреспонденчӗ пӗлтернӗ тӑрӑх, паян 13 сехет ҫурӑра Владимир облаҫӗнчи Лакинск патӗнче машинӑсене ҫӳреме чарнӑ. Йывӑр тивелӗ машина ҫӗр ҫийӗн каҫмалли каҫҫа йӑтса антарнӑ.
Аманнисем пулман. Вырӑнта полицейскисем ӗҫленӗ. Ҫав вӑхӑтра машинӑсене икӗ еннелле те яман.
Шупашкар хулинче пурӑнакан икӗ ҫын йытта пула вӑрҫса пӗтнӗ. Вӗсем иккӗшӗ те йытӑ усраҫҫӗ иккен, хӑйсен тӑватӑ ураллӑ тусӗсемпе иккӗшӗ те хулари «Дорисс паркра» уҫӑлса ҫӳреме юратаҫҫӗ.
Кӑҫалхи ҫурла уйӑхӗн 8-мӗшӗнче каҫхи 9 сехет хыҫҫӑн Шупашкарта пурӑнакан хӗрарӑм тата 45 ҫулти арҫын йытӑсемпе уҫӑлма тухнӑ. Икӗ йытӑ пӗр-пӗрне килӗштерменрен вӗсен хуҫисем ятлаҫса кайнӑ. Арҫын хӗрарӑма усал сӑмахсемпе кӳрентерсе пӗтернӗ, ҫийӗнчен вӑл ӑна питӗнчен лачлаттарса сурса хунӑ.
Тавлашӑва хӗрарӑм телефон ҫине ҫырса илнӗ. Шар курнӑ хӗрарӑм пулӑшу ыйтса прокуратурӑна кайнӑ. Лингвистика экспертиза хӗрарӑма, чӑн та, кӳрентернине палӑртнӑ. Арҫынна административлӑ майпа 3 пин тенкӗлӗх штрафланӑ.
Каҫал ял тӑрӑхӗн пуҫлӑхне Завод урамӗнчи ҫул япӑххишӗн сӑмах лекнӗ. Комсомольски ял администрацине суд ҫула юсама хушнӑ. Укҫана тӳре-шара ҫав тӗллевпе 2022 ҫулта уйӑрма палӑртнӑ.
Завод урамӗнчи ҫул шӑтӑк-путӑкланса пӗтнӗ. Хӑш-пӗр вырӑнта путӑк 14 сантиметр тарӑнӑш, 60 сантиметр тӑршшӗ.
Район центрӗн адмнистрацийӗн пуҫлӑхӗ ячӗпе надзор органӗ асӑрхаттару хучӗ шӑрҫаланӑ хыҫҫӑн шӑтӑк-путӑка кӑштах саплакаланӑ-ха, анчах ӗҫе йӗркеллӗ туса пӗтермен. Ҫавӑн хыҫҫӑн ял тӑрӑхӗн администрацийӗн пуҫлӑхӗ тӗлӗшпе административлӑ ӗҫ пуҫарнӑ. Ӑна 20 пин тенкӗ штраф хурса панӑ.
Чӳк уйӑхӗн 18-мӗшӗнче Мускавра Чӑваш Ен хӗрарӑмӗпе арҫынни сарӑмсӑр вилнӗ. Ку Красноказарма урамӗнчи строительство объектӗнче пулнӑ.
Мускаври прокуратура пресс-служби пӗлтернӗ тӑрӑх, бытовкӑсене демонтаж тунӑ чухне ун ҫине бетон стена йӑтӑнса аннӑ. Шалта вара рабочисем пулнӑ.
Инкекре 35 ҫулти арҫын тата 57-ри хӗрарӑм вилнӗ. Хӗрарӑмӗ – поварта ӗҫленӗ, арҫын строитель пулнӑ. "Про Город" хаҫата халӑх корреспонденчӗ пӗлтернӗ тӑрӑх, арҫын Елчӗк районӗнчен пулнӑ. Следстви комитечӗ кун тӗлӗшпе пуҫиле ӗҫ пуҫарнӑ. Мускаври прокуратура тӗрӗслев ирттерет.
Шупашкар хулинчи Р. Зорге урамӗнче пурӑнакан пӗрремӗш ушкӑн инваличӗсене почтальонсем иккӗмӗш уйӑх ӗнтӗ пенси киле пырса памаҫҫӗ. Ҫапларах хыпарланӑ «Контактра» халӑх ушкӑнӗнчи «Подслушано Чебоксары» (чӑв. Шупашкарта итленӗ) халӑх ушкӑнӗнче.
Почта уйрӑмӗнче ӗҫлекенсем вӑл адреспа кайма почтальон ҫук тесе калаҫҫӗ-мӗн. Куҫ курманран инвалида тухнисем те килте пенси илеймеҫҫӗ-имӗш. Вӗсен Кӑнтӑр поселокӗнчи пасар ҫумӗнчи почта уйрӑмне кайма тивет. «Ку вӑл сусӑрсемпе пенсионерсенчен тӑрӑхлани мар-и?», — тесе ҫырнӑ эпир маларах асӑннӑ ушкӑнра.
ХУШСА КАЛАНИ
Ҫак материала сайтра пичетленӗ хыҫҫӑн РФ Пенси фончӗн республикӑри уйрӑмӗнчен Ирина Павлова пресс-секретарь шӑрҫаланӑ хурава илтӗмӗр.
Унта пӗлтернӗ тӑрӑх, асӑннӑ тӗслӗхре пенсие вӑхӑтра ҫитерессишӗн почта яваплӑ, графика епле пурнӑҫланине Пенси фончӗ тӗрӗслеме пултарать. Паян планпа пӑхман ҫавӑн пек тӗрӗслев ирттернӗ. Почта уйрамӗнче пенси парас вӑхӑта пӑсман.
Ыйту пулсан пенсионерсене РФ Пенси фончӗн хӗрӳ линийӗпе 88006000485 телефонпа ҫыхӑнма сӗннӗ.
Йӗпреҫ районӗнче пулӑҫ сарӑмсӑр вилнӗ. Кун пирки ЧР Инкеклӗ лару-тӑру министерстви хыпарлать.
Чӳк уйӑхӗн 18-мӗшӗнче, паян, Буинск поселокӗнче пурӑннӑ 43 ҫулти арҫын пӗве пуҫне пулла кайнӑ. Анчах халӗ пӑр хулӑн мар, ҫакна шута илмен ӗнтӗ вӑл. Арҫын пӑр айне анса кайса вилнӗ.
Унӑн виллине водолазсем тупнӑ. Вӑл пӗве тӗпӗнче выртнӑ.
-0.7 °C