Йӑлӑмри ҫивиттийӗ йӑтӑнса аннӑ ҫурта юсама пуҫланӑ.
Хула ертӳҫисем лару-тӑрӑва тӗрӗслесе тӑраҫҫӗ-мӗн.
Халӗ территорие юртан хырса тасатнӑ, подрядчик кивӗ ҫивиттие сӳтме пуҫланӑ. Юсама кирлӗ валли стройматериала кӳрсе пынӑ.
Ӗҫе хӑвӑртлатма рабочисен йышне ӳстерме палӑртнӑ.
Чӑваш Енре 36 ҫулти арҫынна нумаях пулмасть суд тенкелӗ ҫине лартнӑ.
Ҫӗнӗ Шупашкарти ҫав этем, тӗпрен илсен, ача укҫипе пурӑннӑ. Ниҫта та ӗҫлеменскер, ӗҫме юратаканскер 9 тата 11 ҫулти тӑван мар ачасене пластик пӑрӑхпа хӗненӗ. Ачасене 5 минут кая юлса киле килнӗшӗн те, тӑван асламӑшӗпе (тен, кукамӑшӗ-тӗр. Вырӑсла хыпарта бабушка тенӗ) телефонпа калаҫнӑшӑн та алӑ ҫӗкленӗ.
Арӑмӗпе хӑйӗн 4 ҫулти тӑван ывӑлне те патак ҫитернӗ.
Арҫынна суд 5 ҫул ҫурӑлӑха пӗтӗмӗшле режимлӑ колоние ӑсатнӑ.
Шӑмӑршӑ районӗнчи Васан ялӗнче 63 ҫулти арҫын хӑйӗнчен икӗ ҫул кӗҫӗнрех арҫын ҫине пырса кӗнӗ.
«Киа Рио» водителӗ ҫул варрипе машинӑна хирӗҫ утса пыракан арҫынна таптанӑ. Лешӗ ӳсӗр пулнӑ.
Шар курнин пуҫ мими чӗтреннӗ. Аманнӑскере пульницӑна илсе кайнӑ.
Паян кӑнтӑрла Комсомольски округӗнчи авари пулнӑ, инкекре 2 ҫын пурнӑҫӗ татӑлнӑ.
Малтанлӑха палӑртнӑ тӑрӑх, «Киа» машина рулӗ умӗнче ларнӑ 32 ҫулти арҫын фурӑран иртсе кайма тӑнӑ, хирӗҫ ҫул ҫине тухнӑ. Анчах фура хыҫӗнче вӗҫекен юра пула вӑл хирӗҫ килекен машинӑна курман – унпа ҫапӑннӑ. «Ниссан» рулӗ умӗнче 65-ри арҫын пулнӑ.
Икӗ водитель те вилнӗ. «Киа» машинӑра пулнӑ 44-ри хӗрарӑм аманнӑ, ӑна больницӑна илсе ҫитернӗ.
Ҫӗмӗрлере хула варринче, хӗл варринче, нарӑс уйӑхӗнче, машина путнӑ. Кун пирки «Провинцивиль» телеграм-канал пӗлтерет.
Ку Кооператив урамӗнче, Ҫӗмӗрлери ҫӑкӑр комбиначӗ патӗнче, пулнӑ. «Фольксваген» машина тарӑн шӑтӑка путнӑ.
Халӗ прокуратура ку тӗслӗх тӗлӗшпе тӗрӗслев ирттерет.
Шупашкарти общежитире кӗҫӗр пушар алхаснӑ. Инкек Ильбеков урамӗнчи общежитире пулнӑ.
Ҫӗрле подъездра упранакан япаласем ҫунма тытӑннӑ. Тӗтӗм-сӗрӗм хӑвӑрт сарӑлнӑран ҫынсем урама тухса ӗлкӗреймен.
Вырӑна ҫӑлавҫӑсем ҫитнӗ. Вӗсем 10 ҫынна урама тухма пулӑшнӑ. Телее, никам та шар курман.
Пушара ҫур сехетрен сӳнтернӗ. Ҫулӑм 7 тӑваткал метр лаптӑк ҫинче алхаснӑ.
Республикӑра юр йывӑрӑшне пула каллех ҫурт тӑрри ишӗлнӗ. Хальхинче – Сӗнтӗрвӑрри хулинче.
Ку паян Курчатов урамӗнчи 7-мӗш ҫуртра пулнӑ. Унта пӗтӗмпе – 19 хваттер. Вӗсем сиенленмен.
Халӗ ҫурт тӑрринче юртан тасатаҫҫӗ, ун хыҫҫӑн юсав ӗҫӗсене пуҫӑнмалла – ҫапла пӗлтерет Чӑваш Ен прокуратури. Ку тӗслӗх тӗлӗшпе тӗрӗслев иртӗ – ҫурт тӑрринче камӑн тасатмалла пулнине тупса палӑртӗҫ, явап тыттарӗҫ.
Ӗнер каҫ енне асар-писер тӑман тапранса кайнине пула Шупашкартан самолётсем те вӗҫсе каяйман. Ҫак йӗркесен авторӗ пӗлнӗ тӑрӑх, Мускава каймалли икӗ рейс та ҫула тухайман.
Сургутран Шупашкара вӗҫсе килсе Минеральные Воды хулине 20 сехет те 50 минутра каяканнине темиҫе хутчен те урӑх вӑхӑта куҫарнӑ. Кайран вара паян ирхине 8 сехетре ҫула тухассине пӗлтернӗ.
Авиакомпани ҫынсене каҫхи апатпа (бургерпа) тивӗҫтернӗ, хулари хӑна ҫурчӗсене вырнаҫтарса тухнӑ. Унта трансфер йӗркеленӗ. Самолет паян кӑнтӑрла иртсен ҫеҫ ҫула тухнӑ.
Вӑрнар округӗнчи Нурӑсри психоневрологи интернатӗнче сипленнӗ хӗрарӑм унти пациенткӑна чейникпе ҫапса вӗлернӗшӗн судра явап тытӗ.
Ку пӗлтӗр чӳкӗн 8-мӗшӗнче пулнӑ. 22 сехетре интернатра сипленнӗ 48 ҫулти хӗрарӑм кӳршине тимӗр чейникпе пуҫӗнчен, кӗлеткин ытти пайӗнчен нумай хутчен ҫапнӑ. Лешӗ сурансене пула ҫавӑнтах вилнӗ.
Суд-психиатри экспертизи хӗрарӑм психика чирӗпе аптӑранине, преступлени вӑхӑтӗнче хӑй мӗн тунине ӑнланманнине палӑртнӑ. Ҫавна май прокуратура суда ӑна сипленме ямашкӑн ыйтса ходатайство ҫырнӑ.
Шупашкарта 35 ҫулти арҫын ҫухалнӑ. Вӑл ӑҫтине нарӑс уйӑхӗн 11-мӗшӗнченпе пӗлмеҫҫӗ.
«Лиза Алерт» шыравпа ҫӑлав отрячӗ Константин Ярисова шырать. Константин Андреевич 176 см ҫуллӗш, вӑтам пӳ-силлӗ, ҫырӑ ҫӳҫлӗ, куҫӗ симӗс. Хӑй хура курткӑпа, тӗксӗм кӑвак джинс шӑлаварпа, хура кроссовкипе, хура рюкзакпа, хура кепкӑпа, пулнӑ.
+2.3 °C