Чӑваш Енӗн Раҫҫей Президенчӗ ҫумӗнчи полномочиллӗ представителӗ пулнӑ Леонид Волков тӗлӗшпе хӑй вӑхӑтӗнче пуҫиле ӗҫ пуҫарнӑччӗ. Полпред пуканне вӑл 2012-2016 ҫулсенче йышӑннӑччӗ. Федерацин хӑрушсӑрлӑх службин Чӑваш Енри управленийӗн тӗпчевҫисем ӑна икӗ эпизод тӗлӗшпе айӑплӑ мар тесе йышӑннӑ. Кун пирки «Правда ПФО» тӗнче тетелӗнчи хаҫата Леонид Волковӑн ваккачӗ Евгений Райков пӗлтернӗ. Ҫапла вара экс-полпред кассӑран представительство укҫине (195 пин тенкӗ) тата командировка тӑкакне (48,8 пин тенкӗ) саплаштарни саккуна пӑсни шутланмасть.

Пӗлтӗрхи раштав уйӑхӗнче Леонид Волков пӗтӗм ҫӗршыв шайӗнче иртекен «Раҫҫей лидерӗсем» конкурсӑн финалне лекнине Чӑваш халӑх сайчӗ пӗлтернӗччӗ.

Авӑн уйӑхӗн 11-мӗшӗнче ЧР спорт министрӗ Сергей Шелтуков йывӑр чире пула пурнӑҫран уйрӑлни пирки паян хыпарланӑччӗ. «Правда ПФО» интернет-хаҫат министрпа ӑҫта тата хӑҫан сывпуллашни пирки пӗлтернӗ.

Сергей Шелтуковпа ыран, авӑн уйӑхӗн 13-мӗшӗнче, Шупашкарти маунтинбайк аталанӑвӗн центрӗнче (Олимп резервӗсен В.Ярды ячӗллӗ спорт шкулӗ) сывпуллашӗҫ. Вӑл Мускав проспектӗнчи 38-мӗш «В» ҫуртра вырнаҫнӑ. Траур митингӗ 11 сехетре пуҫланӗ.

Чӑваш Ен влаҫӗн органӗсен порталӗнче хурланса ҫырнисене вырнаҫтарнӑ. Некролог айӗнче республика ертӳлӗхӗн, «Пӗрлӗхлӗ Раҫҫей» депутачӗсен, Шупашкар тата ведомство пуҫлӑхӗсен ячӗсем пур. «Правда ПФО» пӗлтернӗ тӑрӑх, Федераци Канашӗн вице-спикерӗн Николай Федоровӑн тата РФ Патшалӑх Думин депутачӗн Алена Аршиновӑн ячӗсем вара ҫук.

Ватлӑхра чылайӑшӗ канлӗ пурӑнма ӗмӗтленет. Анчах Шупашкарта кун кунлакан 78 ҫулти кинемейӗн ҫак кунсене, ахӑртнех, тӗрмере ирттерме тивӗ. Ӑна ҫынна вӗлернӗшӗн айӑпласшӑн.

Ҫак ватӑ хӗрарӑм упӑшкине, 80 ҫулти арҫынна, вӗлернӗ тесе шухӑшлаҫҫӗ. Следстви палӑртнӑ тӑрӑх, пӗлтӗрхи утӑ уйӑхӗн 1-мӗшӗнче каҫхи 6 сехетре кинемей килте пулнӑ. Вӑл упӑшкипе тем пайлайман – хирӗҫсе кайнӑ. Хайхискер арҫынна аш арманӗпе хӗненӗ: кӗлеткин тӗрлӗ пайӗнчен 16 хутран кая мар ҫапнӑ.

Ватӑскер йывӑр сурансене чӑтаймасӑр ҫавӑнтах сывлама пӑрахнӑ. Халӗ следстви пуҫиле ӗҫе суда ярса панӑ.

Тутарстан Республикинче пурӑнакан виҫӗ арҫын Патӑрьелте пуйма шухӑш тытнӑ. Унтисем пек севок ҫинче тар тӑкса мар. Вӑйӑ салонӗ уҫнипе. Ӑна хайхисем пурӑнмалли мар ҫуртсенчен пӗринче вырнаҫтарнӑ. 2016 ҫулхи раштав уйӑхӗнче уҫнӑ та кӑҫалхи ҫу уйӑхӗччен шик шӑхӑрса пурӑннӑ.

Вӑйӑ выляса пуяс кӑмӑллисем Патӑрьел тупӑнсах тӑнӑ. Вӗсем вӑйӑ салонӗн хуҫисене ҫулталӑк ҫурӑра 2 миллион тенкӗ ытла тупӑш кӳнӗ.

Укҫа кӗсьене кӗни усламҫӑсене хавхалантарнӑ пулӗ те, анчах кӑҫалхи ҫу уйӑхӗнче вӗсем патне пакунлисем ҫитсе кӗнӗ. Асӑх вӑййа йӗркелеме юраман ҫӗрте салон уҫнӑ ҫынсен тӗлӗшпе кӗҫех пуҫиле ӗҫ пуҫарнӑ. Халӗ айӑплава Патӑрьел районӗнчи прокуратура ҫирӗплетнӗ те пӑхса тухма вырӑнти суда ярса панӑ.

Улатӑрти районсем хушшинчи прокуратура суя диплом сутакансене тупса палӑртнӑ. Тата тӗрӗсерех каласан, ҫавӑн пирки тӗнче тетелӗнче хыпарлакансене.

Вӗренни ҫинчен калакан хута сутса илме юраманнине шута илсе надзор органӗ Шупашкарти Ленин район судне тухнӑ. Тавӑҫра вӑл диплом сутакан сайтӑн страницин ӗҫне чарса лартма ыйтнӑ.

Халӗ суд ларӑвӗ иртнӗ. Унтисем те суя диплом сутаканснее ырламан, диплом сутассине хыпарлакан страницӑна хупмалла тесе йышӑннӑ.

Суд йышӑнӑвӗ хальлӗхӗ саккунлӑ вӑя кӗреймен-ха. Ун валли 10 кун кирлӗ. Ҫав вӑхӑтра тепӗр енӗ аппеляци ҫӑхавӗ шӑрҫаламасан суд йышӑнӑвӗ вӑя кӗрет.

Тӳре йышӑнӑвӗ вӑя кӗрсен прокуратура Роскомнадзора ҫитме палӑртать. Унта вӑл хайхи диплом сутакан сайтри страницӑна хупма ыйтӗ.

Шупашкар районӗнчи Явӑш ялӗнче пурӑнакан 18 ҫулти Феодосия Васильева килтен тухса кайнӑ та ҫухалнӑ. Ҫак йӗркесен авторне пикен амӑшӗ Надежда Геннадьевна пӗлтернӗ тӑрӑх, халӗ Феодосийӑн докуменчӗсем тупӑннӑ. Вӗсене амӑшӗ полицейскисем патне кайса илнӗ. Хутсене Шупашкарти Богдан Хмельницкий урамӗнчи лавккасенчен пӗрин патӗнче тупнӑ.

Тӗнче тетелӗнчи хаҫатсенчен пӗринче хӗре ӗнер, авӑн уйӑхӗн 10-мӗшӗнче, курнӑ тенине Надежда Геннадьевна ҫирӗплетсе каламарӗ. «Кам пӗлет, те чӑн сӑмах вӑл», — терӗ чунне ыраттарса. Хӗрарӑм ӗнентернӗ тӑрӑх, килте пикепе тавлашу пулман.

Ҫухалнӑ хӗр пирки мӗн те пулин пӗлекенсене Надежда Геннадьевна 89871251453 номерпе шӑнкӑравласа систерме ыйтать. Хӑйӗн упӑшкин, Александр Ефферкиевичӑн, номерне те 89877379500 вӑл пӗлтерме ыйтрӗ.

Куславккара пурӑнакан икӗ арҫынна пулӑ тытнӑшӑн суд тенкелӗ ҫине лартнӑ. Вӗсем ӑна пулӑ вӑлча сапнӑ вӑхӑтра тытнӑ.

51 ҫулти икӗ тус пулӑ татма юраман вӑхӑтрах Атӑл хӗррине кайса ларнӑ. Вӑлтапа та мар. Тетӗлпе. Вӗсем 30 метр тӑршшӗ ҫав хатӗре карса хунӑ.

Куславкка ҫыннисем йӗркене пӑснине пакунлисем кӑҫалхи ака уйӑхӗн 30-мӗшӗнче тупса палӑртнӑ.

Арҫынсен тӗлӗшпе РФ Пуҫиле кодексӗн 256-мӗш статйин 3-мӗш пайӗпе ӗҫ пуҫарнӑ. Вӑй питтисене малтан калаҫса татӑлса ушкӑнпа пулӑ тытнӑшӑн явап тыттарма йышӑннӑ. Пӗрремӗш инстанцири суд вӗсене икӗ ҫуллӑха условлӑ майпа айӑпласа 2 ҫуллӑха сӑнав вӑхӑчӗ панӑ. Чӑваш Енӗн прркуратурин пресс-служби паян пӗлтернӗ тӑрӑх, пирвайхи инстанцири суд йышӑнӑвӗ хальлӗхе вӑя кӗмен-ха.

Авӑн уйӑхӗн 18-мӗшӗнче Шӑмӑршӑ районӗнчи Пӑчарлӑ Пашьел ялӗнче пурӑнакан хӑш-пӗр ҫын ӗнесӗр тӑрса юлнӑ. Мӑйракаллӑ шултра выльӑх кӗтӳрен килсен урамрах йӑванса кайнӑ. Клевер ҫинче ҫӳренӗскерсем карӑнса кайнӑ-мӗн.

«Ӗнесене ҫӑлма май ҫукчӗ. Кӗтӳҫсем вӗсене лайӑх пӑхман, халӗ ҫур ял ӗнесӗр тӑрса юлчӗ», - ҫапла пӗлтернӗ халӑх корреспонденчӗ «Про Город» хаҫата.

Вырӑнти администраци пӗлтернӗ тӑрӑх, ку каҫхине пулнӑ. Миҫе ӗне вилнине татса калайман: 4-шӗ тӳрех вилнӗ, тепӗр 14-шне пусса какая яма май килнӗ. Темиҫе ӗнене ҫӑлнӑ: ятарлӑ хатӗрпе хырӑмне шӑтарса газне кӑларнӑ.

Ялти ӗнесене ятарласа тытнӑ кӗтӳҫсем пӑхнӑ-мӗн. Вӗсене уйӑхне кашни ӗнешӗн 700 тенкӗ тӳленӗ. Анчах кӗтӳҫсемпе килӗшӳ туман, вӗсенчен нимӗн те ыйтаймастӑн.

Малтан ӗҫнӗ, унтан пӑвнӑ

Ҫӗмӗрле хулинче пурӑнакан 33 ҫулти арҫын тӑван амӑшне пӑвса вӗлернӗ. Вӑй питтине халӗ рФ Пуҫиле кодексӗн 105-мӗш статйин 1-мӗш пайӗпе айӑплӗҫ. РФ Следстви комитечӗн тӗпчевҫисем ӗҫе тӗпчесе пӗтерсе суда ярса панӑ та ӗнтӗ.

Кӑҫалхи ҫӗртме уйӑхӗн 23-мӗшӗнче арҫын 55-ри хӑйӗн амӑшӗ патӗнче виски ӗҫнӗ. Хаяррине амӑшӗпе ывӑлӗ пӗрле сыпнӑ. Киккириксем хӗрсен иккӗшӗн тавлашу сиксе тухнӑ.

Ҫутӑ кун парнеленӗ ҫывӑх ҫыннине ывӑлӗ хыҫалтан пырса кантрапа пӑвса лартнӑ. Хӗрарӑм вилнӗ. Тӗпчевҫӗсем пуҫиле ӗҫ пуҫласан арҫын хай айӑпне ҫийӗнчех йышӑннӑ, эп мар тесе турткалашса тӑман. Амӑшне пӑвса вӗлернӗ этеме ӑслӑ-тӑнлах-и тесе судпа медицина тӗрӗслевӗ те ирттернӗ — пуҫӗ минренине тухтӑрсем тупса палӑртман.

Элӗк районӗнчи пӗр ялта пурӑнакан 55 ҫулти хӗрарӑмпа унӑн 32-ри ывӑлне ҫынна каварлашса ирӗкрен хӑтарнӑшӑн явап тыттарнӑ. Ҫамрӑк арҫынна вӗлерессипе хӑратнишӗн те айӑпланӑ.

Ҫемьери пӑтӑрмах ака уйӑхӗн 14-мӗшӗнче сиксе тухнӑ. Хуҫалӑха тирпейлеме килӗшменшӗн арӑмӗ упӑшкине хытах кӳреннӗ курӑнать. Ӑна вӑл вӗренпе ҫыхса лартнӑ та сӗтел ҫумне туртса ҫыхнӑ. Амӑшне ывӑлӗ пулӑшнӑ. Арҫын хӑйне кӑмӑлпах ҫыхтарманнине кура ывӑлӗ ашшӗн пӳрнине пӑрса лартнӑ, ӑна хуҫса пӑрахнӑ. Тата вӑл ашшӗн куҫне чавса шӑтарассипе, пӗвене кайса путарассипе хӑратнӑ.

Тарӑхнипе усалланнӑ амӑшӗпе ывӑлне суд ирӗкрен хӑтармасӑр айӑпламалла тунӑ. Хӗрарӑма — 3 ҫуллӑха, ывӑлне — 3 ҫул та 3 уйӑхлӑх. Чӑваш Ен прокуратуринче пӗлтернӗ тӑрӑх, тӗрӗслев вӑхӑтне 2 ҫул та 6 уйӑхлӑха палӑртнӑ.