Паян, ҫӗртме уйӑхӗн 12-мӗшӗнче, Ҫӗнӗ Шупашкарти Терешкова урамӗнчи 4-мӗш ҫурт ҫывӑхӗнчи ҫӳп-ҫап контейнерӗ хыҫӗнче арҫын виллине тупнӑ. Унӑн кӗлеткине вакласа пӗтернӗ.
Кӗлеткин пайӗсене Терешкова урамӗнчи 8-мӗш ҫурт ҫывӑхӗнче те тупма пултарнӑ. Полици вилене хулари темиҫе урамри контейнерсенче шыранӑ. Ҫакна ӳкернӗ сӑнсене «Про Город» редакцие ҫынсем ярса панӑ.
Хальлӗхе ку пӑтӑрмах пирки урӑх хыпар ҫук. Йӗрке хуралҫисем вырӑнти халӑхран ыйтса тӗпчеҫҫӗ.
Пӗлтӗр ҫуркунне Шупашкарти, Ҫӗнӗ Шупашкарти, Канашри полици уйрӑмӗсене пӗр вӑхӑтра тенӗ пек ҫынсенчен пӗрешкел заявлени килнӗ: пурин те банк счечӗ ҫинчен укҫа ҫухалнӑ.
Иккӗшӗ – 10 пин тенкӗ, тепри 47 пин тенкӗ ҫухатнӑ. Анчах укҫа счет ҫинчен пӗтни пирки вӗсем патне СМС-ҫыру килмен. Полицейскисем ҫак ҫынсен телефонӗсене тӗрӗсленӗ. Кун хыҫҫӑн ҫакӑ палӑрнӑ: мессенджерсене официаллӑ мар сайтсенчен уҫласа илнӗ чухне вирус телефона сиенлетнӗ.
Оперативниксем ку преступление Красноярск тӑрӑхӗнчи ҫын тума пултарнӑ тесе палӑртнӑ. Вӗсем ҫав региона кайса ӑна тытса чарнӑ. 31 ҫулти арҫын тӗлӗшпе пуҫиле ӗҫ пуҫарнӑ.
Ҫу уйӑхӗн 24-мӗшӗнче Шупашкарта пурӑнакан 37 ҫулти хӗрарӑм полицире пулӑшу ыйтма пынӑ. Хайхискер ултавҫӑсен аллине ҫакланнӑ, вӗсене самаях укҫа куҫарса панӑ.
Ун патне палламан арҫын шӑнкӑравланӑ та хӑйӗнпе банкӑн хӑрушсӑрлӑхӗн службин ӗҫченӗ тесе паллаштарнӑ. Хайхискер хӗрарӑма карточка ҫинчен такам укҫа вӑрлама хӑтланни ҫинчен пӗлтернӗ. Анчах хӗрарӑм ку банк карточки ӗҫлеменни пирки, урӑх ҫӗрте счет пурри ҫинчен каланӑ. Лешӗ «кирлӗ банк» ӗҫченӗпе тӳрех ҫыхӑнтарнӑ. Кун хыҫҫӑн вӑл «банк ӗҫченне» карточка реквизичӗсене, СМС-ҫырупа килекен кодсене пӗлтернӗ. Ҫапла майпа Шупашкар ҫынни 300 пин тенкӗсӗр тӑрса юлнӑ.
Халӗ полицейскисем ултавҫӑсем камсем пулнине палӑртас тӗллевпе ӗҫлеҫҫӗ.
Тӗнче тетелӗнче паллашни темле те ҫаврӑнса тухма пултарать. Шупашкарта пурӑнакан 32 ҫулти хӗрарӑм вара паллашу сайтӗнче вӑхӑта ирттермен, ун патне палламан арҫын хӑйех шӑнкӑравланӑ.
Пӗр уйӑх каялла ӑнсӑртран шӑнкӑравланӑ арҫынпа хайхискер тӑтӑшах калаҫма тытӑннӑ. Анчах лешӗ хӑйӗн пирки ытлашши нимӗн те каламан. Ҫакна ҫеҫ пӗлтернӗ: нумаях пулмасть ватӑ амӑшӗ патне килнӗ-мӗн. Хӗрарӑм 18 ҫул тултарман икӗ ачине пӗчченех ура ҫине тӑратнине пӗлсен укҫан пулӑшма шантарнӑ. Кӑштахран арҫын тӗл пулма сӗннӗ, хӗрарӑм килӗшнӗ.
Тӗлпулу кунӗнче «савни» ун патне килме тухсан инкеке лекнине шӑнкӑравласа пӗлтернӗ. ҪҪХПИ ӗҫченӗсенчен хӑтӑлма 5 пин тенкӗ кирлӗ имӗш. Тӗлпулӑва хатӗрленнӗ хӗрарӑм йӑлтах ӗненнӗ, укҫа куҫарса пама хӗрхенмен. Унтан арҫынна каллех укҫа кирлӗ пулнӑ, тепӗртакран – татах… Ҫапла икӗ ача амӑшӗ пӗр кунра палламанскере 31400 тенкӗ куҫарса панӑ.
Арҫын телефона тытма пӑрахсан тин хӗрарӑм шӑнман пӑр ҫине ларса юлнине ӑнланнӑ, полицие кайса пӗлтернӗ. Пакунлисем палӑртнӑ тӑрӑх, телефон номерне Ӗренпур облаҫӗнче регистрациленӗ.
Чӑваш Енри полицейскисем ытти хулари ӗҫтешӗсемпе ултавҫӑсен хура ӗҫне тӑрӑ шыв ҫине кӑларнӑ. Хайхискерсем медицина пулӑшӑвӗ паракан клиникӑсем уҫнӑ, «Мед-клиник» ятлӑ вӑл.
Клиникӑра ӗҫлекенсем ҫынсене хӑйсем патне илӗртсе сывлӑхне тӗрӗсленӗ, ҫук чирсем тупса палӑртнӑ та сипленмешкӗн кредит илме сӗннӗ. Кунашкалли Шупашкарти Ярославль урамӗнче те пулнӑ. Унта вӑй хуракансем ятарлӑ медицина пӗлӗвӗ те пулман.
Ҫак «тухтӑрсем» уйрӑмах ватӑ ҫынсене улталанӑ, тӗрӗслев ирттернӗ хыҫҫӑн чирсем шутласа тупнӑ, ӑна пӗр тӑхтамасӑр сиплемелли пирки каланӑ. Анчах йӳнӗ мар, ҫавӑнпа кредит илме сӗннӗ. Хӑшӗ-пӗрине 500 пин тенкӗ таранах илтернӗ.
Кунашкал ухтарусене Мускавра, Питӗрте, Владимир, Калуга, Рязань, Ярославль облаҫӗсенче те ирттернӗ.
Ҫӗнӗ Шупашкарта пурӑнакан 35 ҫулти хӗрарӑм тӗнче тетелӗнче телевизор сутни пирки пӗлтерӳ лартнӑ. Кӗҫех ун патне техникӑна туянма хатӗр арҫын шӑнкӑравланӑ. Хайхискер таваршӑн кӑштах укҫа тӳлесе хума сӗннӗ.
Хӗрарӑм килӗшнӗ. Кун хыҫҫӑн вӑл банк карттин рекизичӗсене ҫӑв арҫынна пӗлтернӗ. 35 ҫултискер ултавҫӑ аллине лекнине тавҫӑрман. Кӗҫех банк картти ҫинчен 195 пин тенкӗ ҫухалнӑ.
Ӗнер, ҫу уйӑхӗн 18-мӗшӗнче, хӗрарӑм полицие килсе йӑлтах каласа кӑтартнӑ. Халӗ кун тӗлӗшпе пуҫиле ӗҫ пуҫарасси пирки шутлаҫҫӗ.
Елчӗкре хӗрача ҫухални пирки сайтра ӗнер хыпарланӑччӗ. Шел те, паян «Контактра» «Подслушано Яльчики» (чӑв. «Елчӗкре итленӗ») ушкӑнра хурӑхлӑ хыпар пӗлтернӗ: Дана Сергеевна Черневӑн виллине тупнӑ.
Аса илтерер: Дана 2003 ҫулта Елчӗкре ҫухалнӑ. Вӑл ҫу уйӑхӗн 13-мӗшӗнче 16 сехет ҫурӑра килтен тухса кайнӑ, унтанпа ӑна тек никам та курман. Дана ун чухне хура сӑран куртка, хура футболка, хура джинс шӑлавар тӑхӑннӑ пулнӑ.
Дана Черневӑна тӑванӗсем, тусӗсем, полици шыранӑ. Паян унӑн виллине тупнӑ. Хӗрача мӗншӗн вилнине хальлӗхе пӗлтермен, следовательсем ӗҫлеҫҫӗ, экспертизӑсем ирттереҫҫӗ. Ҫӳлерех асӑннӑ ушкӑнра ҫынсем тӑванӗсемпе пӗрле хурланнине пӗлтерсе ҫыраҫҫӗ. «Мӗн пулнӑ?» - тесе ыйтакансем пур, анчах хальлӗхе татӑклӑ хурав никам та параймасть.
Куславккара пурӑнакан ватӑ хӗрарӑм ултавҫӑ аллине лекнӗ. 78 ҫулти кинемей халӑх тетелӗнче пӗлӗшӗпе ҫырӑнса ларнӑ.
ЧР ШӖМӗн пресс-служби пӗлтернӗ тӑрӑх, пӗлӗшӗ Ҫӗнтерӳ кунӗ тӗлне тивӗҫлӗ канури ҫынсене хушма тӳлев парассине хыпарланӑ. Лешӗ патшалӑх паракан 2 пин тенке илнӗ иккен. 78-ти кинемее те кирлӗ документсене хатӗрлеме пулӑшма шантарнӑ. Кун валли банк карттин реквизичӗсем кирлӗ-мӗн.
Унтан хайхискер пароль килессине пӗлтернӗ. 78 ҫулти кинемей, тӗлӗнмелле те, тӗнче тетелӗпе хӑй тӗллӗн ҫӑмӑллӑнах усӑ курнӑ. Пароле тата банк карттин реквизичӗсене пӗлтерсен карточка ҫинчен 2600 тенкӗ ҫухалнӑ. Ватӑскер пӗлӗшӗпе мар, ултавҫӑпа ҫырӑннине тинех ӑнланнӑ. Вара вӑл карточкӑна блокировка тунӑ, полицие кайса йӑлтах каласа кӑтартнӑ.
Шупашкарта пурӑнакан 53 ҫулти хӗрарӑм паллашу сайтӗнче ют ҫӗршыв арҫыннипе паллашнӑ. Хайхискер генерал-майор имӗш.
Хӗрарам арҫынпа тӗнче тетелӗ урлӑ темиҫе уйӑх калаҫнӑ. Кайран хайхи савни Раҫҫее килессине пӗлтернӗ. Малтанах партнер программипе пирӗн ҫӗршыва багаж ҫитермелле пулнӑ, кайран савнийӗ те килме шантарнӑ.
Анчах генерал-майорӑн укҫа ҫук иккен. Вӑл хӗрарӑмран укҫа ыйтнӑ, ун патне ҫитсен йӑлтах парса татма шантарнӑ. Хӗрарӑм савнине шутсӑр кӗтнӗ пулмалла: багажшӑн, авиабилетшӑн, визӑшӑн укҫа куҫарса панӑ. Пӗтӗмпе – 11 пин доллар. Хӗрарӑмӑн хӑйӗн ун чухлӗ укҫа пулман, банкран кредит илнӗ.
Арҫын ҫыхӑнӑва тухма пӑрахсан тин хӗрарӑм тӑна кӗнӗ, полицие кайса йӑлтах каласа кӑтартнӑ. Кун тӗлӗшпе пуҫиле ӗҫ пуҫарнӑ.
Шупашкарта пурӑнакан 84 ҫулти хӗрарӑм нумаях пулмасть тӗрмерен таврӑннӑ кӳрши кӗрсе тухса кайнӑ хыҫҫӑн шалт аптӑраса ӳкнӗ — килте упраннӑ XIX ӗмӗрти турӑш ҫухалнӑ. Кинемей нумай шухӑшласа тӑман — тӳрех пакунлисем патне вӗҫтернӗ. Кун пирки Чӑваш Республикин Шалти ӗҫсен министерствин пресс-служби хыпарлать.
Хайхи ҫӑлкуҫ пӗлтернӗ тӑрӑх, полици ӗҫченӗсем турӑш вӑрлама пултарнӑ ҫынна ҫийӗнчех шырама пуҫланӑ. Арҫынна тупса палӑртнӑ, вӑл хӑйӗн айӑпне йышӑннӑ. Анчах ун ҫумӗнче нимӗнле турӑш та пулман. Вӑл хаклӑ тупрана ҫав кунхинех палламан-пӗлмен ҫынна сутса янӑ.
Палӑртса хӑварни вырӑнлӑ пулмалла, арҫын тӗлӗшпе пуҫиле ӗҫ пуҫарнӑ. Халӗ полицейскисем авалхи турӑша тупса палӑртас енӗпе ҫине тӑрса ӗҫлеҫҫӗ.
-4.7 °C