Ҫурла уйӑхӗн 28-мӗшӗнче 12 сехет тӗлнелле Людмила Гурьевна Михайлова Канашри «ДК ВРЗ» чарӑнура тӑнӑ. Унтанпа ӑна никам та курман.
1952 ҫулта ҫуралнӑ хӗрарӑм ӑҫта кайса кӗнӗ? Ӑна тӑванӗсем, полици шыраҫҫӗ. Людмила Михайлова 165-170 сантиметр ҫӳллӗш, хытканскер. Ҫӳҫӗ тӗттӗм, хулпуҫҫи таран, куҫӗ хӑмӑр. Вӑл тӗттӗм симӗс тӗслӗ кофта, хура юбка, хура колготка тӑхӑннӑ, пуҫне тутӑр ҫыхнӑ.
Хӑйӗн ҫумӗнче хутаҫ пулнӑ, унта вара виҫӗ шампунь, душра ҫӑвӑнмалли гель, пластмасса турилкке, документсем пулнӑ.
Людмила Михайловӑна курнӑ тӑк пӗр тӑхтамасӑр 8 (8353) 3-67-02 е 02 номерпе шӑнкӑравлӑр.
Чӑваш Енри Транспорт полицийӗн ӗҫченӗсем 20 ҫулти икӗ каччӑна тытса чарнӑ. Хайхискерсене Шупашкарти чукун ҫул станцийӗ ҫывӑхӗнче вӑрттӑн вырӑна наркотик хунӑ чухне асӑрханӑ.
Ҫамрӑксем 20 тӗрке хума хӑтланнӑ. Пӗтӗмпе 11 грамм ытла наркотик хуташӗ пулнӑ. Оперативниксем каччӑсем унччен наркотике ӑҫта тӗркесем тунине те тупса палӑртнӑ. Унта вара 390 ытла грамм наркотик тупнӑ.
Ҫак икӗ каччӑ тӗлӗшпе пуҫиле ӗҫ пуҫарнӑ. Пӗрре кӑна мар – иккӗ. Пӗрремӗшӗ – преступлени тума тӑнӑшӑн. Иккӗмӗшӗ – наркотике сарнӑшӑн.
Кӑҫалхи сакӑр уйӑхри статистика лӑплантармасть: Шупашкарти ҫулсем ҫинче 57 ача суранланнӑ. Вӗсенчен 29-шӗ транспортра пассажир пек пынӑ чухне аманнӑ. 7-шне ашшӗ-амӑшӗ машинӑра хӑрушсӑрлӑх пиҫҫихипе ҫыхмасӑр илсе ҫӳренӗ.
Полици даннӑйӗсене ӗненес тӗк, 27 ача ҫул ҫинче ҫуран ҫӳренӗ чухне аманнӑ. 10 авари шӑпӑрлансене пула сиксе тухнӑ. Ачасем юраман вырӑнта ҫул урлӑ каҫнӑ. 9 ача вара «зебра» урлӑ каҫнӑ чухне суранланнӑ. Тепӗр 5 ача ҫуртсен картишӗнче машина кустӑрми айне лекнӗ. Иккӗшӗ тротуар ҫинче тӑнӑ чухнех шар курнӑ.
Суранланнисен йышӗнче велосипедҫӑ та пур. Ӑна машина водителӗ ирттерсе яман.
Ҫӗмӗрле районӗнчи Тури Кӑмаша ялӗнче пурӑнакансем участковӑйран пулӑшу ыйтнӑ. Вӗсене ялти пӗр ҫын килте кашкӑр тытни канӑҫ паман. Лешсем ӳлени таҫта ҫитиех илтӗннӗ.
58 ҫулти арҫын чӑнах та виҫӗ кашкӑр усранӑ-мӗн. Ҫакна полицейски тӗрӗслев ирттерсен те ҫирӗплетнӗ. Кил хуҫин тискер чӗрчунсене тытмашкӑн ирӗк пулман.
Кашкӑрсем арҫын патне мӗнле лекнӗ-ха? Пӗлтӗрхи раштав уйӑхӗнче вӑл вӑрманта виҫӗ кашкӑр ҫурине асӑрханӑ. Хайхискер вӗсене киле илсе килнӗ, кайран сутма ӗмӗтленнӗ.
Ҫапла майпа арҫын саккуна пӑснӑ. Ун тӗлӗшпе протокол ҫырнӑ, куншӑн 1 пин тенкӗ таран штраф тӳлеттерме пултараҫҫӗ.
Кашкӑрсен шӑпине хальлӗхе татса паман-ха. Вӗсене е вӑрмана ярӗҫ, е питомнике вырнаҫтарӗҫ.
Ҫӗмӗрле районӗнче полицейскисене тата вӗсен машинина ҫӑмӑртапа пенӗ. Йӗркене пӑснӑ ҫынна ҫийӗнчех тытса чарнӑ.
Арҫын кил картишӗнчен полици машинине ҫӑмартапа пӗнӗ. Вӑл полицейскисене тӗллесе ывӑтнӑ. Ҫӑмартасем иртен-ҫӳрене, ытти автомобиле те лекнӗ.
Полици ӗҫченӗсем ӑна лӑплантарасшан пулнӑ, анчах лешӗ хӑлхана та чикмен, тарӑха-тарӑха пенӗ. Вӑл ӳсӗр пулнӑ.
Киревсӗр хӑтланнӑшӑн арҫыннӑн суд сакки ҫине ларма тивнӗ. Суд вӑл ниҫта та ӗҫлеменнине, унччен явап тытманнине шута илнӗ. Арҫын хӑйӗн айӑпне йышӑннӑ. Ҫавна май ӑна 2 пин тенкӗ штраф тӳлеттермелле тунӑ.
Мускавра Чӑваш Енре ҫуралнӑ ҫамрӑк хӗрарӑм хӑрушла вилӗмпе пурнӑҫпа сывпуллашнӑ. 30 ҫултискере чӗрӗллех чӗртсе ҫунтарнӑ.
Ку пӑтӑрмах утӑ уйӑхӗн 10-мӗшӗнче пулнӑ. Хӗрарӑма Ленинград проспектӗнчен пульницӑна илсе ҫитернӗ. «Москва» хула хыпарӗсен агентствин порталӗнче пӗлтернӗ тӑрӑх, ҫамрӑкскер эрех-сӑрапа айкашнӑ. Ку инкек юлташӗсемпе пӗрле эрех ӗҫнӗ чухне пулнӑ. Тахӑш самантра пирӗн ентеш хальлӗхе палӑртман сӑлтава пула ҫунма тытӑннӑ. Вӑл утӑ уйӑхӗн 23-мӗшӗнче пульницӑра вилнӗ.
Пӗлӗшӗсем каланӑ тӑрӑх, вӑл пирус чӗртме тӑнӑ та ҫӳҫне тивертнӗ. Анчах полици пуҫиле ӗҫ пуҫарнӑ. Пакунлисен шухӑшӗпе, хӗрарӑма бензин сапса чӗртсе янӑ. Ҫав ҫынна халӗ шыраҫҫӗ.
Шупашкарти Грасис урамӗнчи общежити ишӗлме тытӑннӑ. Кирпӗч арканма тытӑнсанах вырӑна полици ӗҫченӗсем ҫитнӗ.
Ку общежити кӑнтӑр-хӗвеланӑҫ районӗнче вырнаҫнӑ. Грасис урамӗнчи 4-мӗш ҫуртӑн кирпӗчӗ ута уйӑхӗн 20-мӗшӗнче ишӗлнӗ. Вырӑнта ИӖМ, полици, васкавлӑ медпулӑшу ӗҫченӗсем пулнӑ. Халӗ лару-тӑрӑва уҫӑмлатаҫҫӗ.
Унта пурӑнакансене вӑхӑтлӑха урӑх ҫӗре куҫарма палӑртнӑ. Анчах пурне те мар, йӑтӑнса анма пуҫланӑ стена енчисене ҫеҫ. «Озон» управляющи компанийӗ пӗлтернӗ тӑрӑх, ҫуртӑн стенине пӗлтӗр ҫирӗплетмелле пулнӑ. Анчах конкурс хӗлле иртнӗ, ҫавна май юсава куҫарнӑ.
Ҫӗнӗ Шупашкарти Ҫамрӑксен урамӗнче вырнаҫнӑ вулавӑша арҫын ачана питӗрсе лартнӑ. Кӑштахран шкул ачи пӑлханма пуҫланӑ. Ара, пулӑшу ыйтмасан вулавӑшра ирчченех ларма тивӗ-ҫке-ха.
9 ҫулти арҫын ачан чӳречене уҫса пулӑшу ыйтма тытӑннӑ. Иртен-ҫӳрен ӑна илтсе полици чӗннӗ. 25–30 минутран йӗрке хуралҫисем ҫитнӗ, унтан вулавӑш ӗҫченӗсем килнӗ.
Ача каланӑ тӑрӑх, вӑл вулавӑшра туалета кайнӑ. Унтан тухсан никам та ҫуккине курнӑ, вулавӑш хупӑннине ӑнланнӑ.
Вулавӑш ӗҫченӗ Наталья Гусева ӑнлантарнӑ тӑрӑх, ача хӑй пытаннӑ. Вӗсем алӑка питӗрес умӗн пур пӳлӗме те тӗрӗсленӗ. Вӗсен шухӑшӗпе, арҫын ача вулавӑша кӗнеке илме мар, туалета кӗме пынӑ.
Канашра 16 ҫулти яша шыранине Чӑваш халӑх сайчӗ «Pro город» хаҫат пӗлтерни тӑрӑх ӗнер ҫырнӑччӗ. Ывӑлӗ утӑ уйӑхӗн 14-мӗшӗнче килтен тухса кайнине унӑн амӑшӗ Ольга Игнатьева пӗлтернӗ. Дмитрий ятлӑ каччӑ килтен 2—3 сехетдӗхе уҫӑлма тухнӑ та таврӑнман. Килтисем пӗлтернӗ тӑрӑх, унпа никам та вӑрҫӑнман. Унччен вӑл ун пек ҫухалса ҫӳремен.
Ҫамрӑка хулара та, ун тулашӗнче те шыраҫҫӗ тенӗччӗ Чӑваш халӑх сайчӗ. Икӗ кинолог йытӑпа ӗҫленӗ. Шупашкартан, районсенчен волонтерсем килнӗ.
Халӗ вара тӗнче тетелӗсенче каччӑна тупни, вӑл вилнине пӗлтерекен хыпар сарӑлнӑ. Унта ҫырнӑ тӑрӑх, ача вышка ҫинчен ӳкнӗ. Ҫак самантра кун пирки официаллӑ ҫӑлкуҫем пӗлтернине РФ Шалти ӗҫсен министерствин сайтӗнче те, РФ Следстви комитечӗн следстви управленийӗн сайтӗнче асӑрхамарӑмӑр.
Чӑваш Енре 16 ҫулти ҫамрӑка шыраҫҫӗ. Амӑшӗ Ольга Игнатьева пӗлтернӗ тӑрӑх, Дмитрий килтен уҫӑлма тухна та таврӑнман.
Ку Канаш хулинче утӑ уйӑхӗн 14-мӗшӗнче пулнӑ. Полицейскисем, волонтерсем ӑна виҫӗ кун шыранӑ. Дима килтен 2-3 сехетлӗхе тухатӑп тесе кайнӑ. Унпа ун умӗн никам та вӑрҫӑнман. Унччен вӑл ун пек ҫухалса ҫӳремен.
Ҫамрӑка хулара та, ун тулашӗнче те шыраҫҫӗ. Икӗ кинолог йытӑпа ӗҫлет. Шупашкартан, районсенчен волонтерсем килнӗ. Кӗҫех Мускавран пулӑшу ҫитмелле.
Дмитрий Игнатьева кам та пулин курнӑ тӑк ҫак номерсемпе шӑнкӑравлама ыйтаҫҫӗ: 102 е 8 937 39 8339 (амӑшӗ Ольга Петровна Игнатьева).
+14.3 °C