Кӑрлач уйӑхӗн 29-мӗшӗнче Шупашкарта вӑйӑ салонӗ ӗҫленине тупса палӑртнӑ. Вокзал ҫумӗнче ӗҫленӗскерӗн нимӗнле вывеска та пулман.
Унта пули-пулми ҫын кӗреймен, хӑш-пӗри ҫеҫ, хӑйсеннисем, лекейнӗ. Астармӑш вӑйӑсене юратакансем валли унта 11 компьютер пулнӑ.
Полицейскисем салона ухтарсан пӗтӗм техникӑна туртса илнӗ. Кунсӑр пуҫне унта укҫа пулнӑ: 55 пин тенкӗ. Халӗ Шалти ӗҫсен министерствинче кун тӗлӗшпе тӗрӗслев ирттереҫҫӗ.
Кӑрлач уйӑхӗн 20-мӗшӗнче 38 ҫулти хӗрарӑм хӗрӗпе пӗрле машинӑпа Шупашкар районӗнчи Миснер ялне кайнӑ чухне ҫул ҫинче кӗрсе ларнӑ. Водитель хӑй тӗллӗн тухма хӑтланнӑ, анчах пулӑшу кирлине ӑнланса экстреннӑй службӑна шӑнкӑравланӑ.
Диспетчер хӗрарӑм пӑтӑрмаха ҫакланни пирки полици нарядне пӗлтернӗ. Полици лейтенанчӗ Александр Сергеев тата Дмитрий Ирбитский аслӑ сержант вырӑна ҫитсе хӗрарӑмӑн иномаркине кӗрт ӑшӗнчен туртса кӑларнӑ.
Яла илсе ҫитерекен ҫула юртан тасатман, ҫавна май хӗрарӑм каллех кӗрсе ларасран шикленнӗ. Александр Сергеев инспектор хӑй руль умне ларса амӑшӗпе хӗрне киле ҫитерсе янӑ.
2021 ҫулхи раштав уйӑхӗнче Тӑвай районӗнчи Вӑрманхӗрри ялӗ ҫывӑхӗнче полицейскисем ӗне виллине тупнӑ. Пакунлисем кун пирки Россельхознадзора пӗлтернӗ.
Ҫакӑ палӑрнӑ: вилнӗ ӗне «Дружба» ЯХПКн пулнӑ. Вӑл Вӑрманхӗрринчен инҫех мар вырнаҫнӑ.
Россельхознадзор ял-хуҫалӑх производство кооперативӗн должноҫри ҫынни тӗлӗшпе административлӑ ӗҫ пуҫарнӑ. Суд айӑплӑ ҫынна 20 пин тенкӗ штраф тӳлеттерме йышӑннӑ.
Шупашкарта арҫыннӑн питӗ эрех ӗҫес килсе кайнӑ та вӑл лавкка алӑкне ҫӗмӗрсе кӗнӗ. Унтан вӑл икӗ кӗленче йӑтса тухнӑ.
Супермаркетра сигнализаци ӗҫлесе кайни пирки ҫур ҫӗр иртни 2 сехет те 45 минутра полицие пӗлтернӗ. Пакунлисем вырӑна ҫийӗнчех ҫитнӗ. Вӗсем юр ҫинче ура йӗррисем пулнине асӑрханӑ. Ун тӑрӑх кайнӑ та – ҫывӑхри ҫурт патне, Николаев урамне, илсе ҫитернӗ.
Подъзда кӗрсен йӗпе йӗрсем хваттер патнех илсе ҫитернӗ. 42 ҫулти арҫын эрех вӑрланине тунман та, сӗтелӗ ҫинче ҫав ике кӗленче ларнӑ, пӗрне уҫса ӗҫме ӗлкӗрнӗ. Ӑна полици уйрӑмне илсе ҫитернӗ, ӗҫ-пуҫа уҫӑмлатаҫҫӗ.
Раштав уйӑхӗн 31-мӗшӗнче арҫын лавккаран эрех вӑрлама пуҫланӑ. Ҫакна унта апат-ҫимӗҫ туянма кӗнӗ полицейскисем курнӑ.
19 сехет те 31 минутра полици ӗҫченӗсем Ирина Москирякова тата Анжелика Иванова Совет урамӗнче вырнаҫнӑ лавккана апат-ҫимӗҫ туянма кӗнӗ. Вӗсен ун чухне канмалли кун пулнӑ.
Тавар туяннӑ май полицейскисем пӗр арҫын эрех кӗленчине йӑтса тахма хӑланнине асӑрханӑ. Лешӗ тухса тарма пуҫтарӑннӑ, кусем вара ун хыҫҫӑн чупнӑ.
Пӗр полицейски тӳрех полицие шӑнкӑравланӑ. Полици нарячӗ ҫитиччен вӗсем арҫынна хӑваласа ҫитсе тытса чарнӑ.
46 ҫулти арҫын унччен те судпа айӑпланнӑ. Хальхинче те ун тӗлӗшпе пуҫиле ӗҫ пуҫарнӑ.
Раштав уйӑхӗн 29-мӗшӗнче Етӗрне районӗнчи Вӑрманкас Асламас ялӗнче арҫын кӳршин пахчинчи чӑрӑша каснӑ. Хӑй ӑнлантарнӑ тӑрӑх, вӑл ҫакна лайӑххипе кӑна тунӑ, урама илем кӳресшӗн пулнӑ-мӗн.
ШӖМ пӗлтернӗ тӑрӑх, 50 ҫулти арҫын 60-ти куршин анкартинчи 2 метр ҫӳллӗш кӑвак чӑрӑша каснӑ. Ҫухалнӑ йывӑҫа полицейскисем урамра тупнӑ. Ҫав арҫын ӑна килӗ умне кӳршисене савӑнтарас тесе лартнӑ-мӗн.
Палӑртмалла: вӑл унччен те судпа айӑпланнӑ. Халӗ ун тӗлӗшпе пуҫиле ӗҫ пуҫарасси пирки шутлаҫҫӗ.
Мускав облаҫӗнчн Чӗмпӗр тӑрӑхне кайма тухнӑ ҫемьене Чӑваш Ен полицейскийӗ пулӑшнӑ. Ҫул ҫинче вӗсен хӗрне япӑх пулса кайнӑ. Ют тӑрӑхри ҫынсем вара Шупашкарти ҫулсене лайӑх пӗлмен, йӗрке хуралҫисенчен пулӑшу ыйтнӑ.
Раштавӑн 23-мӗшӗнче ҫул-йӗрпе патруль службин ӗҫченӗ Сергей Салмин умӗнче «Мазда» чарӑннӑ. Водитель пӗчӗк хӗрне япӑх пулнине, вӑл сывлӑш ҫитменнипе аптӑраса ӳнине пӗлтернӗ. Ачан шӑнӑр туртма пуҫланӑ.
Полицейски вӗсене Шупашкарти пульница таран леҫсе янӑ. Унта 1 ҫул та 9 уйӑхри хӗрачана тухтӑрсем пулӑшнӑ. Шурӑ халатлисем ӑнлантарнӑ тӑрӑх, ачан ӳт температури пысӑк пулнипе шӑнӑр туртнӑ.
Ҫӗрпӳ районӗнче ҫул-йӗрпе патруль службин ӗҫченӗсем сӑмавар вӑрлакансене тытса чарнӑ. Вӗсем пӗр машинӑра вӑрланӑ япаласем пулма пултарни пирки вӗсене пӗлтернӗ.
Кӗҫех полицейскисем Ҫӗрпӳ районӗнче ВАЗ-2111 машинӑна чарнӑ. Унта тимӗр-тӑмӑр тултарса лартнӑ. Тимӗр-тӑмӑр ӑшӗнче ҫав икӗ ҫын вӑрланӑ икӗ сӑмар пытарнӑ.
Ҫак ҫынсене вырӑнти полици уйрӑмне илсе ҫитернӗ. Халӗ ӗҫ-пуҫа уҫӑмлатаҫҫӗ.
Раштавӑн 12-мӗшӗнче Шупашкарти полици уйрӑмне Тула облаҫӗнче пурӑнакан хӗрарӑм пулӑшу ыйтма пынӑ. Хӑй каланӑ тӑрӑх, вӑл Шупашкар курма килнӗ, хостелта чарӑннӑ. Ҫӗрле вара сумки тата енчӗке таҫта «ураланнине» асӑрханӑ. Енчӗкре 10 пин тенкӗ пулнӑ.
Йӗрке хуралҫисем видеокамерӑсене пӑхнӑ та ҫав арҫынна палласа илнӗ. Икӗ кун каялла вӑл телефон вӑрланӑ-мӗн, ун тӗлӗшпе пуҫиле ӗҫ пуҫарнӑ.
ШӖМ пӗлтернӗ тӑрӑх, ҫав арҫын Мускав облаҫӗнчен, хостела темиҫе уйӑх каялла вырнаҫнӑ. Полицейскисем ӑна савӑнмалли пӗр заведенире тытса чарнӑ.
Чӳк уйӑхӗн 28-мӗшӗнче сӗм тӗттӗмре Куславкка районӗнче кинемей ҫулпа утнӑ. Иртсе каякан водительсем кун пирки полицие пӗлтернӗ.
Сергей Моисеев аслӑ инспектор тата Михаил Кучков инспектор вырӑна ҫитнӗ, тӗттӗм тум тӑхӑннӑ кинемее шыраса тупнӑ. Ватӑскер тӗттӗмпе лайӑх курӑнман та.
Хӗрарӑм хӑй ӑҫта пулнине, хӑйӗн пирки нимӗн те калайман. Полицейскисем васкавлӑ медпулӑшу чӗннӗ, водительсенчен ку кам пулма пултарни пирки ыйтса пӗлнӗ. Пӗри Куславкка районӗнчи хӗрарӑма палласа илнӗ. Вӑл ӑс-тӑнӗпе арпашӑнать-мӗн. Йӗрке хуралҫисем ватӑскере тӑванӗсем патне илсе кайнӑ.
+0.3 °C