Утӑ уйӑхӗн 24-мӗшӗнче кӑнтӑрла Кӳкеҫре пурӑнакан 13 ҫулти чикан хӗрачин асламӑшӗ полицие пынӑ. Вӑл пӗлтернӗ тӑрӑх, унӑн мӑнукӗ тӑванӗсем патӗнче Шупашкарта пулнӑ. Ҫав вӑхӑта ӑна палламан ҫын машинӑна лартса кайнӑ.
Полицейскисем палӑртнӑ тӑрӑх, хӗрача машинӑна хӑйӗн ирӗкӗпех ларнӑ. Ҫав каҫах автозапчаҫ лаккин сутуҫи Етӗрне районӗнчи шырав уйрӑмӗн пуҫлӑхне шӑнкӑрлавласа хыпар пӗлтернӗ: хӗрача такама кӗтсе тӑнӑ май телефонпа калаҫнӑ, килтен тарнине, Чӑваш Енрен тухса каяссине пӗлтернӗ.
Ҫывӑхри ҫул-йӗрпе патруль службин ӗҫченӗсем лавккана часах ҫитнӗ. Чӑнах та ҫав хӗрача пулнӑ. Вӑл каласа кӑтартнӑ тӑрӑх, арҫынпа тӗнче тетелӗнче пӗлтӗр паллашнӑ, ун патне урӑх региона хӑнана кайма пуҫтарӑннӑ-мӗн. Водитель вара хӗрачана шыранине пӗлнӗ, ҫавӑнпа ӑна Етӗрне районӗнчи Сӑрҫи ялӗ патӗнче антарса хӑварнӑ.
Паян ир-ирех Шупашкарти «Ярмӑрккӑ» суту-илӳ комплексӗнче полицейскисем, Росгварди ӗҫченӗсем документсене тӗрӗслесе ҫӳреҫҫӗ. Мӗн пулнӑ? Наркотик шыранӑ.
Ӗнер дежурнӑй пульчӗ ҫине пасарта наркотик сарни пирки хыпар ҫитнӗ. Йӗрке хуралҫисем пасара «Мӑкӑнь» оперативлӑ профилактика мероприятийӗпе килӗшӳллӗн тӗрӗслеме палӑртнӑ.
Полицейскисемпе Росгварди ӗҫченӗсем документсене кӑна мар, миграци саккунне мӗнле пӑхӑннине те тӗрӗсленӗ.
Утӑ уйӑхӗн 20-мӗшӗнче полицие хыпар ҫитнӗ: Шупашкарти Ленинград урамӗнчи ҫурт умӗнче пӗр хӗрарӑм машина багажникӗнче автомат илсе ҫӳренине курнӑ. Полицейскисем вырӑна ҫитнӗ. 37 ҫулти хӗрарӑм пневматика пӑшалӗ илсе ҫӳренӗ-мӗн.
Кунашкал пӑшала вара упрама ирӗк илмелле мар, илсе ҫӳреме те юрать. Ҫапах ку тӗслӗх тӗлӗшпе тӗрӗслев иртет.
Хӗрарӑм каланӑ тӑрӑх, пӑшал ӑна ашшӗнчен юлнӑ. Йӗрке хуралҫисем пневматика пӑшалӗпе те асӑрхануллӑ пулмалли пирки аса илтереҫҫӗ.
Канашри ҫӳп-ҫап полигонне полицейскисем, Росгварди ӗҫченӗсем ҫавӑрса илни пирки, унта мина пулма пултарасси ҫинчен пӗлтернӗччӗ. Вара чӑнах та мина тупнӑ-и?
Чӑнах та. Иккӗ таранах пулнӑ. Анчах хӑрамалли ҫук – минӑсем вӗренмеллисем ҫеҫ пулнӑ. Ҫапах вырӑна кинологсем, пушарнӑйсем, тухтӑрсем, полицейскисем, саперсем, ФСБ ӗҫченӗсем ҫитнӗ. Минӑсем вӗренмеллисем ҫеҫ пулнӑран нимӗнле хӑрушлӑх та кӑларса тӑратман.
Палӑртмалла: свалка 2016 ҫултанпа ӗҫлет. Халӗ унта рекультиваци ӗҫӗсем пыраҫҫӗ. Чӳк уйӑхӗ тӗлне 8 гектар ҫӗре ҫӗрпе танлаштарӗҫ, унта йывӑҫсем лартӗҫ.
Паян, утӑ уйӑхӗн 21-мӗшӗнче, 12 сехет ҫурӑра Канашри ҫӳп-ҫап полигонне Росгварди тата полицейскисем ҫавӑрса илнӗ. «Про Город» хаҫата халӑх корреспонденчӗ пӗлтернӗ тӑрӑх, унта мина пулма пултарать тесе шухӑшланӑ.
«Мина тупнӑ теҫҫӗ. Экстреннӑй службӑсем ҫитнӗ. Кунта полици, Росгварди, тухтӑрсем, пушар служби», - пӗлтернӗ халӑх корреспонденчӗ.
Мина тупнӑ-и е ҫук-и – хальлӗхе пӗлтермен.
Шупашкарта пурӑнакан 54 ҫулти хӗрарӑм упӑшкинчен юлнӑ 4 миллион тенке ултавҫӑсене куҫарса панӑ. Ку кӑна мар, вӑл тепӗр 3,5 милллион кредит илсе каллех ултавҫа панӑ. Ҫапла вӑл 7,5 миллион тенкӗсӗр юлнӑ.
Ун патне палламан ҫын шӑнкӑравланӑ та такам ун ячӗпе кредит илме хӑтланни пирки пӗлтернӗ. Ку ӗненнӗ, часрах банка чупнӑ, 4 млн тенке илнӗ. Банк ӗҫченӗ иккӗленнӗ, хӗрарӑм хӗрӗ валли хваттер илетӗп тесе улталанӑ. Банк ӗҫченӗ пурпӗрех ултавҫӑсем пирки асӑрхаттарнӑ, кун пирки полицие те пӗлтернӗ. Вӗсем унпа калаҫсан та хӗрарӑм укҫана куҫарса панӑ. Кайран вӑл тепӗр 3,5 миллион тенкӗ кредит илсе ултавҫӑсене куҫарса панӑ.
Патӑрьел районӗнче Ыхракасси тата Шӑнкӑртам ҫамрӑкӗсем ҫапӑҫма тухнӑ. Кун пирки ШӖМ пӗлтерет.
Утӑ уйӑхӗн 14-мӗшӗнче Ыхракассинчи 3 ҫамрӑк Шӑнкӑртамри икӗ ҫамрӑка хӗненӗ. Лешсем полицие пӗлтермен.
Утӑ уйӑхӗн 16-мӗшӗнче ҫӗрле каччӑсем Патӗрьелте пухӑннӑ. Вӗсем Шӑнкӑртам еннелле утнӑ. Анчах полицейскисене курсан саланнӑ.
Кайран ҫав 21 ҫамрӑк пурпӗрех тӗл пулнӑ. Полицейскисем 8 ҫын тӗлӗшпе административлӑ ӗҫ пуҫарнӑ.
Патӑрьел районӗнче 8 ҫулти арҫын ачасен ашшӗ-амӑшне административлӑ майпа явап тыттарӗҫ. Шӑпӑрлансем стелӑн ҫутатмалли вырӑнӗсене кирпӗчпе персе ҫӗмӗрнӗ.
Патӑрьеле кӗнӗ ҫӗрте вырнаҫнӑ стела ҫутисене ҫӗмӗрни пирки пӗр хӗрарӑм полицие пӗлтернӗ. Полицейскисем ҫак ӗҫе 8 ҫулти икӗ ача тунине палӑртнӑ. Пӗри Ҫӗнӗ Шупашкартан ҫуллахи каникула канма килнӗ.
Ачасем ӑнлантарнӑ тӑрӑх, вӗсем пӗр-пӗрне кирпӗчпе пеме тытӑннӑ. Ҫав вӑхӑтра стелӑна лектернӗ-мӗн. Кун пирки вӗсем аслисене каласа кӑтартман.
Ку ӗҫе ҫул ҫитменнисемпе ӗҫлекен комисси пӑхса тухӗ. Ашшӗ-амӑшне вара явап тыттарӗҫ.
Ҫӗртме уйӑхӗн 12-мӗшӗнче Шупашкарти ломбардран ылтӑн сӑнчӑр варлани пирки пӗлтернӗ. Палламан арҫын ӑна тӑхӑнса пӑхас тесе илнӗ те йӑтса тарнӑ.
Ҫак ӗҫе Ижевск хулинче пурӑнакан арҫын тунине палӑртнӑ. Вӑл кӑҫалхи кӑрлач уйӑхӗнче ҫеҫ тӗрмерен тухнӑ. Ижевскри полицейскисем те ҫак арҫын унти ламбардран вӑрланӑ тесе шухӑшлаҫҫӗ.
Арҫынна тытса чарнӑ. Хӑй каласа кӑтартнӑ тӑрӑх, вӑл Ижевскран таксипе килнӗ, Шупашкарта сӑнчӑра вӑрласан Хусана кайнӑ, ӑна унти ломбарда панӑ. Кайран киле таврӑннӑ.
Халӗ йӗрке хуралҫисем вӑл ҫакнашкал ытти преступление тунипе туманнине тӗрӗслеҫҫӗ.
Вӑрмар районӗнчи Кӗтеснер ялӗнче ҫӗртмен 16-мӗшӗнче Ленин урамӗнчи ҫуртӑн тӑрри ҫунма пуҫланӑ. 22 сехет ҫурӑра пушар тухнине Владимир Димитриев полицейски асӑрханӑ. Вӑл ун чухне кӳршӗ ялтан таврӑннӑ.
Пушар пирки тӳрех ҫӑлавҫӑсене пӗлтернӗ. Пӗр тӑхтамасӑр вӑл алӑкран шаккама тытӑннӑ. Пӳртре отпуска килнӗ мӑшӑр, вӗсен 4-ри хӗрӗ тата 9 ҫулти тӑванӗ ҫывӑрнӑ. Шакканине илтсе вӗсем вӑраннӑ, урама тухса ӗлкӗрнӗ. Полицейски ирчченех унта пулнӑ, пушара сӳнтерме пулӑшнӑ. Кайран вӑл ӗҫе кайнӑ.
+15.3 °C