Алла Салаева РФ Патшалӑх Думин депутатне суйланнӑ хыҫҫӑн пушаннӑ вице-премьер пуканне республикӑн сывлӑх сыхлав министрне Владимир Степанова шанса панӑ. Хушӑва Чӑваш Ен ертӳҫи Олег Николаев паян алӑ пуснӑ.
Малашне Владимир Геннадьевич сывлӑх сыхлавӗшӗн ҫеҫ мар, вӗрентӳ, культура, спорт тата ӗҫ отраслӗсемшӗн те яваплӑ пулӗ.
Республикӑн правительствинче хальхи вӑхӑтра 6 вице-премьер. Пӗрремӗш ҫум, вӑлах финанс министрӗ те – Михаил Ноздряков, премьер-министрӑн заместителӗсен шутӗнче ҫавӑн пекех – ял хуҫалӑх министрӗ Сергей Артамонов, экономика аталанӑвӗн тата пурлӑх хутшӑнӑвӗсен министрӗ Дмитрий Краснов, Чӑваш Енӗн РФ Президенчӗ ҫумӗнчи полпречӗ Пётр Чекмарев, строительство, архитектура тата ҫурт-йӗрпе коммуналлӑ хуҫалӑх министрӗ Павел Данилов тата маларах эпир асӑннӑ Владимир Степанов.
Чӑваш Енӗн вӗренӳ тата ҫамрӑксен политикин министрӗн тивӗҫӗсене пурнӑҫлама Дмитрий Захарова шаннӑ.
Аса илтерер: ку вырӑн паян Алла Салаевӑна министр пуканӗсӗр хӑварнӑ хыҫҫӑн пушаннӑ.
Дмитрий Анатольевич вӗренӳ отраслӗнче ҫӗнӗ ҫын мар. Вӑл Шупашкар хула администрацийӗнче вӗренӳ управленийӗн пуҫлӑхӗнче ӗҫленӗ.
Дмитрий Захаров 1979 ҫулта Шупашкарта ҫуралнӑ. 2001 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. Истори наукисен кандидачӗ. Хӑйӗн пӗлӗвне вӑл РФ Президенчӗ ҫумӗнчи Халӑх хуҫалӑхӗн тата патшалӑх службин Раҫҫей академийӗнче икӗ хутчен те ӳстернӗ. Ӗҫ биографине хула шкулӗсенчен пӗринчи истори учителӗнчен пуҫланӑ.
Паян, авӑн уйӑхӗн 25-мӗшӗнче, Чӑваш Енӗн Министрсен Кабинечӗн Председателӗн ҫумне – вӗренӳ тата ҫамрӑксен политикин министрне Алла Салаевӑна ӗҫрен кӑларнӑ. 150-мӗш номерлӗ хушӑва республика Элтеперӗ Олег Николаев алӑ пуснӑ.
Алла Салаевӑна должноҫран хӑтарни вӑл РФ Патшалӑх Думине депутата суйланнипе ҫыхӑннине тавҫӑрма йывӑр мар. Алла Салаева – «Пӗрлӗхлӗ Раҫҫей» парти пайташӗ.
Алла Леонидовна 1979 ҫулхи авӑн уйӑхӗн 14-мӗшӗнче Шупашкарта ҫуралнӑ. 2000 ҫулта И.Н. Ульянов ячӗллӗ Чӑваш патшалӑх университетӗнчен историка вӗренсе тухнӑ, 2002 ҫулта — Патшалӑх службин Атӑл-Вятска академийӗнчен. Педагогика наукисен кандидачӗ. Чылай ҫул Шупашкар хула администрацийӗнче тӑрӑшнӑ.
«Пӗрлехи Раҫҫей» партин Чӑваш Енри уйрӑмӗн президиумӗ Николай Владимирова республикӑн ӗҫ тӑвакан влаҫӗнчен РФ Федераци Канашне сенатор пулма сӗннӗ. Татӑклӑ йышӑнӑва республикӑн Патшалӑх Канашӗн пӗрремӗш сессийӗнче тӑвӗҫ. Лару авӑн уйӑхӗн 29-мӗшӗнче иртмелле. Чӑваш Ен парламентӗнче чылайӑшӗ «Пӗрлӗхлӗ Раҫҫей» парти пайташӗ пулнине шута илсен асӑннӑ кандидата депутатсем ырласси пирки иккӗленме кирлӗ мар.
Конституцире пӑхса хӑварнӑ тӑрӑх, ҫӗршывӑн Федераци Канашӗнче Раҫҫейӗн кашни регионӗнчен икшер кандидат пулмалла. Чӑваш Енӗн тепӗр пайташӗ пулма республика ертӳҫи Олег Николаев Николай Федорова сӗннӗ.
Николай Федорова нумайӑшӗ пӗлет. Вӑл Чӑваш Енӗн пӗрремӗш Элтеперӗ пулнӑ.
Николай Владимиров пирки ҫакна пӗлтермелле: вӑл пӗр вӑхӑт «Чӑваш бройлерӗ» предприятие ертсе пынӑ. Николай Николаевич 1979 ҫулхи чӳк уйӑхӗн 18-мӗшӗнче Шупашкарта ҫуралнӑ. И.Н. Ульянов ячӗллӗ Чӑваш патшалӑх университетӗнче вӗреннӗ.
Суйлава пӗтӗмлетме вӑхӑт. Камсем, хӑш партисем ҫӗнтернӗ-ха унта? Палӑртмалла: суйлава халӑхӑн 58 проценчӗ хутшӑннӑ.
Малтанлӑха пӗлтернӗ тӑрӑх, РФ Патшалӑх Думине пирӗн республикӑран Алла Салаева (39,89%) тата Анатолий Аксаков (41,74%) кайӗҫ. Партисенчен «Пӗрлӗхлӗ Раҫҫей» (37,24%), КПРФ (22,48%), «Тӗрӗслӗхшӗн Раҫҫей» (14,92%), ЛДПР (6,8%), «Ҫӗнӗ ҫынсем» (5,67%) мала тухнӑ.
ЧР Патшалӑх Канашӗн ҫитес созывӗнче ултӑ парти депутачӗсем пулӗҫ: «Пӗрлӗхлӗ Раҫҫей», КПРФ, «Тӗрӗслӗхшӗн Раҫҫей», ЛДПР, Пенсионарсен тӗрӗслӗхшӗн партийӗ, «Ҫӗнӗ ҫынсем». Юлашки виҫҫӗшӗн Паташлӑх Канашӗнче пӗрер вырӑн пулӗ, «Пӗрлӗхлӗ Раҫҫейӗн» - 20 мандат.
Чӑваш Енре суйлав участокӗсем хупӑннӑ. Суйлав виҫӗ куна тӑсӑлнӑ. Халӗ пӗтӗмлетӳ тӑваҫҫӗ.
Тӗп суйлав комиссийӗ пӗлтернӗ тӑрӑх, 18.00 сехет тӗлне Чӑваш Енре пурӑнакансен 53,92 проценчӗ сасӑлава хутшӑннӑ. Хӑш районсем хастартарах пулнӑ? Унчченхи пекех, Елчек районӗ малта. Унта пурӑнакансен 90,39 проценчӗ сасӑланӑ. Иккӗмӗшпе виҫҫӗмӗш вырӑнсене Тӑвай (83,19%) тата Шӑмӑршӑ (80,97%) районӗсем йышӑннӑ. Патӑрьел районӗ те вӗсенчен юласшӑн мар, унта кӑтарту 80,25 процентпа танлашать.
Чӑваш Енӗн физкультура тата спорт министрӗн ҫумӗ пулма паян Ольга Смирновӑна ҫирӗплетнӗ.
Ольга Владиславовна асӑннӑ ведомствӑра ҫӗнӗ ҫын, ӑна унта пурте пӗлеҫҫӗ. Маларах ҫав хӗрарӑм финанспа экономика пайӗн пуҫлӑхӗ пулса ӗҫленӗ.
Сӑмах май, министертствӑн структурине тишкерсен ҫакӑ палӑрать: Ольга Смирнова пай пуҫлӑхӗн тивӗҫне те пурнӑҫлӗ. Унта ҫырнӑ тӑрӑх, вӑл министр ҫумӗ — финанспа экономика пайӗн пуҫлӑхӗ.
Чӑваш Енӗн Физкультурӑпа спорт министерствине Василий Петров ертсе пырать. Унӑн заместителӗсем виҫҫӗн: Татьяна Рябинина (пӗрремӗш ҫум), Ольга Букина тата Ольга Смирнова.
Чӑваш Енӗн Сывлӑх сыхлав министерствинче кадр улшӑнӑвӗ пулса иртнӗ. Паян министр ҫумне Ирина Лисенковӑна ӗҫрен кӑларма йышӑннӑ. Республика ертӳҫи Олег Николаев алӑ пуснӑ документа Чӑваш Енӗн влаҫ органӗсен официаллӑ порталӗнче вырнаҫтарнӑ.
Министр ҫумӗн пуканне Ирина Лисенкова шӑп та лӑп ҫулталӑк каялла йышӑннӑччӗ. 1985 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. «Чӑваш Республикин тава тивӗҫлӗ врачӗ» ята тивӗҫнӗ. 2004-2009 ҫулсенче вӑл сывлӑх сыхлав тата социаллӑ аталану министрӗн ҫумӗнче тӑрӑшнӑ. Сывлӑх сыхлав министерствине куҫиччен Республикӑн стоматологи поликлиникинче оргметодпӳлӗм заведующийӗ пулнӑ.
Паян, авӑн уйӑхӗн 17-мӗшӗнче, пирӗн республикӑра виҫӗ кунлӑх сасӑлав тапхӑрӗ пуҫланчӗ. Сасӑлав правипе усӑ курас кӑмӑллисем унта ирхи 8 сехет хыҫҫӑн суйлава хутшӑнма пултарӗҫ. Суйлав участокӗсем ҫынсене йышӑнма хатӗр. Вӗсем пирӗн республикӑра пурӗ 1108 шутланаҫҫӗ.
Пӗрлехи сасӑлав кунӗнче РФ Патшалӑх Думин саккӑрмӗш созыври депутачӗсене, Чӑваш Ен Патшалӑх Канашӗн ҫиччӗмӗш созыври депутачӗсене, хӑш-пӗр муниципалитетра Депутатсен вырӑнти пухӑвӗсене депутатсене суйлама май пулӗ. Красноармейски тата Ҫӗмӗрле муниципалитет округӗсенче Депутатсен пухӑвӗсен пӗрремӗш созывне депутатсене суйлӗҫ.
Нумаях пулмасть РФ Президенчӗ Владимир Путин самоизоляцие кайнӑ. Ку унӑн таврашӗнчи ҫынсем кӑшӑлвируспа чирленипе ҫыхӑннӑ. Кремльти ҫын каланӑ тӑрӑх, ҫав ҫынсем вӑхӑтра ревакцинаци туманнипе аптӑраса ӳкнӗ.
Чирленӗ ҫынсем вакцинациленнӗ, анчах вӗсен каярахпа антителӑсем сахалланнӑ, ревакцинацие вара вӑхӑтра туман. «Пурте чире нимӗнле паллӑсӑр, ҫӑмӑллӑн чӑтса ирттереҫҫӗ. Йывӑр пӗр тӗслӗх те ҫук», - тенӗ Президент пресс-секретарӗ Дмитрий Песков.
Владимир Путин самоизоляцире сахалтан та пӗр эрне пулӗ. Ҫапах вӑл унчченхи пекех ӗҫлет.
-6.7 °C