Шупашкар районӗнче ҫулпа пыракан «КамАЗ» машина хыпса илнӗ. Вӑл «М-7» автоҫулпа пынӑ. Инкек утӑ уйӑхӗн 30-мӗшӗнче пулса иртнӗ. Йывӑҫ кӑмрӑкӗ тиенӗ машина ҫунма пуҫласан инкек вырӑнне Инкеклӗ лару-тӑру министерствин ӗҫченӗсем пырса ҫитнӗ. Ҫулӑма вӗсем пилӗк минутра сӳнтерме пултарнӑ.
Инкеклӗ лару-тӑру министерствин Чӑваш Енри управленийӗнче пӗлтернӗ тӑрӑх, водитель шар курман, вӑл таса сывах.
Пушар мӗнле сӑлтавпа тухнине специалистсем палӑртӗҫ.
Шупашкарта правасӑр водителӗн машинине туртса илнӗ.
Хулара пурӑнакан арҫынна водитель прависӗр руль умне ларнишӗн унччен икӗ хутчен явап тыттарнӑ-ха. Апла пулин те вӑл йӗркене пӑснӑ. Ҫул-йӗр хӑрушсӑрлӑхӗн инспекторӗсем виҫҫӗмӗш хутӗнче Шупашкар районӗнчи Хыркасси ялӗ патӗнче тытса чарнӑ. Йӗрке хуралҫисене вӑл ӑнлантарнӑ тӑрӑх, «Haval F7X» машина рулӗ умне арӑмӗ ыйтнӑран ларнӑ, хӗрарӑм хӑйӗн савнӑ упӑшкин водитель удостоверенийӗ ҫуккине (тӗрӗсрех, ӑна туртса илнине) пӗлмен имӗш.
Суд 34 ҫулти арҫыннӑн машине туртса илме йышӑннӑ. Ӑна РФ Пуҫиле кодексӗн 264,3 статйин 1-мӗш пайӗпе явап тыттарса 240 сехет ӗҫлеттерме йышӑннӑ. Унсӑр пуҫне водитель правине тата тепӗр 1 ҫул тата 8 уйӑхсӑр памалла мар тунӑ.
Мӑшӑр пӗрле пулса туяннӑ машинӑна вара конфискацилеме йышӑннӑ. Машина сутса тунӑ укҫа патшалӑх хыснине кайӗ.
Ӗнер, утӑ уйӑхӗн 20-мӗшӗнче, Йӗпреҫ поселокӗнче ГАЗель ҫунса кайнӑ. Вӑл вырӑнти ҫӑкӑр савучӗн машини пулнӑ.
Ҫав вӑхӑтра «ГАЗель Некст» машина ҫӑкӑр савучӗн территорийӗнче пулнӑ. Вӑл – 2024 ҫулта туса кӑларнӑскер. Ҫулӑм машинӑн кабинине тӗп тунӑ. Юрать-ха, ҫынсенчен никам та шар курман.
Малтанлӑха палӑртнӑ тӑрӑх, ҫулӑм капот айӗнчи электроборудовани авариллӗ режимра ӗҫленине пула тухнӑ.
Палӑртса хӑварар: ҫулталӑк пуҫланнӑранпа Чӑваш Республикинче транспортра ҫулӑм тухнӑ 38 тӗслӗхе шута илнӗ.
Чӑваш Енре авторезина пухакан лапамсем уҫасшӑн. Кун пирки Чӑваш Енӗн Правительствин халӑх тетелӗнчи ушкӑнӗсенчен пӗринчи комментарире хыпараланӑ. Комментари авторӗ — республикӑн Ҫутҫанталӑк ресурсӗсен министерстви.
Йӑлари каяша пухса тирпейлессине халалланӑ тӳрӗ эфира анонслани айӗнче тӗрлӗ ыйтӑва хускатнӑ, ҫав шутра усӑ курнӑ шинӑсене вырнаҫтарассине те.
Республикӑн Ҫутҫанталӑк министерстви ӗнентернӗ тӑрӑх, ку енӗпе ӗҫе пуҫӑннӑ-мӗн. Пысӑк операторсенчен пӗринпе пӗрле ҫӗнӗ проект ӗҫлеттерсе ярасшӑн имӗш. Ҫапла вара авторезинӑна тӳлевсӗр пырса хумалли ятарлӑ лапамсем пулӗҫ. Вӗсене хулари кашни управа территорийӗнче вырнаҫтармалла.
Унсӑр пуҫне Шупашкар хулин администрацийӗ «Зеленая покрышка» (чӑв. Симӗс покрышка) акци пуҫарнӑ.
Чӑваш Енӗн Сывлӑх сыхлав министерстви больницӑран бензин вӑрланипе вӑрламаннине тӗрӗслӗ.
Ку пӑтӑрмахла историе «PRO Город» кӑларӑм МАХри каналта ӗнер хыпарланӑччӗ. Унта Шупашкарти 1-мӗш клиника больницинче сипленекен ҫын ӳкерсе илнӗ видеона вырнаҫтарнӑ.
Видеора арҫын канистрпа тем йӑтса тухса ҫӑмӑл машина багажникне лартса хуни курӑнать.
Видеона ӳкерекен арҫын кун пек япалана курсан тӗлӗннӗ. Вӑл патшалӑх сывлӑх сыхлав учрежденийӗсем валли уйӑракан бензина ҫавӑн пек вӑрлаҫҫӗ иккен-ха тесе кӑмӑлсӑрланнӑ.
Видео халӑх тетелне лекнӗ хыҫҫӑн ку пӑтӑрмаха республикӑн Сывлӑх сыхлав министерстви тӗрӗслессине пӗлтернӗ. Енчен чӑнах та вӑрланӑ пулсан яваплисем право тӗлӗшӗнчен те хак парассине шантарнӑ.
Шупашкарти Граждан урамӗнче пӗр водитель асламӑшӗпе (тен, кукамӑшӗ-тӗр. Вырӑсла хыпарта бабушка тенӗ) мӑнукне таптаса кайнӑ.
Ҫул урлӑ каҫнӑ чухне питех те асӑрхануллӑ пулмалла ҫав. Светофорӑн симӗс ҫутипе каҫнӑ чухне те малтан пӑхса илмелле. Светофор ҫук ҫӗрте пушшех те асӑрханмалла, мӗншӗн тесе тепӗр водитель йӑпӑр-япӑр чарӑнасшӑн мар.
Ҫавӑн пек инкек Шупашкарта пулса иртнӗ. Аслӑ ҫынпа ача Граждан урамӗнчи 20-мӗш ҫурт патӗнче пассажирсене каҫса ҫӳремелли вырӑнтан ҫул урлӑ каҫма тӑнӑ. Ҫав вӑхӑтра вӗсем ҫине пырса кӗнӗ.
«Лада Гранта» автомобиль урапи айне 55 ҫулти хӗрарӑмпа 6 ҫулти арҫын ача пулнӑ. Вӗсене иккӗшне те больницӑна илсе кайнӑ. Малтанласа палӑртнӑ тӑрӑх, вӗсен пуҫ мими чӗтреннӗ.
Инкек сӑлтавне палӑртассипе тӗпчевҫӗсем малалла ӗҫлеҫҫӗ.
Ӗнер, ҫӗртме уйӑхӗн 8-мӗшӗнче, М-7 автоҫул ҫинче пӗр водитель вилмеллех аманнӑ. Инкек 18 сехет те 40 минутра Муркаш районӗнчи Хыркассинчен инҫех мар вырӑнта пулса иртнӗ.
Ҫулпа пыракан Мускав облаҫӗнчи 58 ҫулти водитель йывӑр тиевлӗ «Скания» автомобильпе хирӗҫ килекен ҫул ҫине тухса кайнӑ. Унта вӑл «Вольво» фургонпа айккинчен ҫапӑнса иртсе кайнӑ.
Инкеке пула фургонӑн хӑмисенчен пӗри «Скания» автомобиль кабинине ватнӑ, Мускав облаҫӗнчи водитель вилмеллех аманнӑ. Фургон водителӗ, Псков облаҫӗнчи 64 ҫулти арҫын, урах пулнӑ, вӑл аманман.
Ҫӗнӗ Шупашкарти управляющи компанийӗсенчен пӗрин пуҫлӑхӗ тӗлӗшпе пуҫиле ӗҫ пуҫарнӑ, халӗ ӑна суд явап тыттарнӑ.
Директора РФ Пуҫиле кодексӗн 238-меш статйин 1-мӗш пайӗпе явап тыттарнӑ. РФ Следстви комитечӗн Чӑваш Енри тӗпчевҫисем тата суд ҫав ҫын ертсе пыракан компани пулӑшу кӳнӗ чух ҫынсен хӑрушсӑрлӑхӗпе сывлӑхӗ пирки тивӗҫлипе шухӑшламаннине палӑртнӑ.
Кӑҫалхи нарӑс уйӑхӗнче асӑннӑ управлющи компани тытса тӑракан нумай хваттерлӗ ҫуртсенчен пӗрин ҫивиттийӗ юр айне пулнӑ. Балконсенчен пӗрин карнизӗнчен юрпа пӑр ҫӗре ӳксе машинӑна сиенленӗ.
Суд управляющи компани директорне 100 пин тенкӗ штраф хурса панӑ.
Ӗнер, ҫӗртме уйӑхӗн 2-мӗшӗнче, Шупашкарта каҫхине пӑтӑрмах пулса иртнӗ. Эгер бульварӗпе Шумилов урамӗ хӗресленнӗ вырӑнта икӗ ватта машина ҫапса кайнӑ. Тӗрӗссипе, кайман-ха, инкек хыҫҫӑн вӑл тӳрех чарӑнса ларнӑ.
Каҫхи 8 сехете те 45 минут тӗлӗнче «Гранта» водителӗ сулахаялла пӑрӑннӑ чух хирӗҫ пыракан «Вестӑна» ҫул паман. Машинӑпа ҫапӑннӑ хыҫҫӑн автомобиль малалла кайнӑ, ҫав самантра ҫул урлӑ каҫма тӑнӑ икӗ пенсионер ҫине пырса кӗнӗ.
Ватӑсене больницӑна ӑсатнӑ. Вӗсем 78 ҫулти мучипе 72 ҫулти кинемей пулнӑ.
Сӑмах май каласан, водительсем иккӗшӗ те урах пулнине палӑртнӑ.
Паян, ҫу уйӑхӗн 27-мӗшӗнче, Сӗнтӗрвӑрри районӗнче автобуспа ҫӑмӑл машина ҫапӑннӑ.
Малтанласа палӑртнӑ тӑрӑх, инкекре 1 ҫын вилнӗ, 10-ӑн аманнӑ. Вӗсене пурне те пульницӑна илсе кайнӑ, тӗрӗсленӗ хыҫҫӑн пӗрне килте сипленме янӑ. Инкекре аманнисем хушшинче ачасем ҫук тесе пӗлтернӗ республикӑн Сывлӑх сыхлав министерстви.
«За рулем» (чӑв. Руль умӗнче) форумра хыпарланӑ тӑрӑх,
«Гранта» ҫӑмӑл машина водителӗ хирӗҫ килекен ҫул ҫине тухса кайса ПАЗ автобуспа ҫапӑннӑ. Ҫӑмӑл автомашина водителӗ инкекре вилмеллех аманнӑ.
+15.3 °C