Кӑрлач уйӑхӗн 29-мӗшӗнче Шупашкарти Трактор тӑвакансен культура керменӗнче Анатолий Музыкантовӑн юбилей каҫӗ иртӗ.
«Музыкантов приглашает!» (чӑв. Музыкантов йыхравлать) пултарулӑх каҫне Раҫҫей Федерацийӗн тата Чӑваш Республикин культурӑн тава тивӗҫлӗ ӗҫченӗ, «Сувар» халӑх ташшин ансамблӗн тата «Суварята» халӑх ташшин ача-пӑча ансамблӗн ертӳҫи Анатолий Музыкантов 75 ҫул тултарнине халалланӑ.
Уяв каҫне Мари Элти, Пушкӑртстанри, Тутарстанри коллективсем килсе ҫитмелле. Виталий Адюков, Вячеслав Христофоров тата Ирина Музыкантова юрӑсем шӑрантарӗҫ.
Чӑваш Енри журналистсене Ҫемен Элкер, Николай Никольский, Леонид Ильин ячӗпе хисепленекен премисене ҫулсеренех параҫҫӗ. Кӑҫалхисен ячӗсене эпир «Хыпар» издательство ҫурчӗ хыпарлани тӑрӑх пӗлтӗмӗр.
Ҫемен Элкер ячӗпе хисепленекен преми лауреачӗн ятне Наци телерадиокомпанийӗнче ӗҫлекен Татьяна Молоковӑна тата «Чӑваш Ен» ПТРК ӗҫченне Светлана Поздняковӑна парас тенӗ.
Николай Никольский ячӗпе хисепленекен премие Виктор Чугаров кинорежиссер, фотожурналист тивӗҫнӗ.
Леонид Ильин ячӗпе хисепленекен преми лауреачӗсем: Элӗк тӑрӑхӗнче радиокӑларӑмсем хатӗрлекен, Элӗкре тухса тӑракан «Пурнӑҫ ҫулӗпе» хаҫатра чылай материал пичетлесе кӑларнӑ Юрий Корнилов тата «Хыпар» Издательство ҫурчӗн директорӗн-тӗп редакторӗн ҫумӗ Алина Паймулкина.
Элӗкри ӳнерсен шкулӗ юсаса ҫӗнетнӗ хыҫҫӑн уҫӑлнӑ. Унта, фасадне улӑштарнӑ, электромонтаж ӗҫӗсене пурнӑҫланӑ, стенасене ҫирӗплетнӗ, шалти водопровода лайӑхлатнӑ.
Ӳнер шкулӗнче «Фортепиано», «Халӑх инструменчӗсем», «Музыка фольклорӗ», «Хореографи пултарулӑхӗ», «Театр ӳнерӗ». Пӗтӗмпе – 300 ытла ача. Унта ӗҫлекенсем шкула ҫӗнетнӗ хыҫҫӑн ачасем тата нумайрах ҫӳреме пуҫласа шанаҫҫӗ.
Кӑрлач уйӑхӗн 14-мӗшӗнче Чӑваш Енӗн Наци вулавӑшӗн Виталий Станьял ӑсчах 85 ҫул тултарнӑ ятпа пуҫтарӑнассине эпир унччен пӗлтернӗччӗ-ха.
Виталий Станьял – учёнӑй, педагог, поэт, публицист. Пултарулӑх каҫӗнче юбиляр ячӗпе ӑшӑ сӑмах калакан йышлӑн пулнӑ. Ҫав шутра — вулавӑшӑн директоре Роза Лизакова та, Чӑваш патшалӑх вӗрӗнӳ инстиутчӗн доценчӗ Надежда Иванова та, филологи наукисен доккторӗ Виталий Родионов та, филологи наукисен кандидачӗсем Геннадий Дегтярёв та, Вера Никифорова та, Ирина Софронова та, Евгений Михайлов археолог та.
Елчӗк тӑрӑхӗнчи Тускелти пултарулӑх коллективӗсеӗм кӳршӗллӗ Тутарстанра концертпа тухса кайнӑ.
«Шуҫӑм», «Тускил» пултарулӑх ушкӑнӗсем «В Новый год с новыми мечтами!» (чӑв. Ҫӗнӗ ҫула ҫӗнӗ ӗмӗтпе) концерт программипе Пӑва районӗнчи Кипеккасси ялӗнче пулнӑ.
Маларах асӑннӑ икӗ ушкӑнсӑр пуҫне сцена ҫине Петр Козлов, Николай Карамаликов, Виктория Романова, Вениаминпа Наталья Муллинсем, Татьяна Крылова тата Луиза Доброхотова тухса хӑйсен пултарулӑхӗпе савӑнтарнӑ.
Кӑрлач уйӑхӗн 28-мӗшӗнче ЧР Наци вулавӑшӗ ҫумӗнче йӗркеленнӗ «Варкӑш» литература клубӗнче ҫамрӑк ҫыравҫӑн, журналистӑн Дмитрий Моисеевӑн «Хуҫасӑр ҫуртри сехет сасси» кӗнекине сӳтсе явӗҫ.
Кӗнекене 12 хайлав кӗнӗ: «Хӗл чӗппи», «Наркоз витӗмӗнчи тӗлӗк», «Ӗне вӑррисем», «Хуҫасӑр ҫуртри сехет сасси», «Питбайкер йыхравӗ», «Телефонри ҫыру», «Илемпи, кӗт мана», «Шанма пурте пӑрахсан та…», «Митя», «Инкек кӳнӗ тӗлӗк», «Сивӗ сӑмах», «Урасӑр салтак». Кашнинчех паянхи ҫамрӑксен пурнӑҫне, ҫивӗч ыйтӑвӗсене хускатнӑ.
Мероприяти 18 сехетре пуҫланӗ.
Чӑваш патшалӑх филармонийӗнче Раҫҫейри паллӑ артистсен концерчӗсем иртӗҫ. Нарӑс уйӑхӗн 19-мӗшӗнче унта Раҫҫейӗн тава тивӗҫлӗ артисчӗ, хальхи вӑхӑтри чи пултаруллӑ виолончелистсенчен пӗри Борис Андрианов пултарулӑхӗпе киленме май килӗ. Фортепианӑпа пӗтӗм тӗнчери конкурссен лауреачӗ, пултаруллӑ солист тата концертмейстер Петр Лаул калӗ.
Шупашкар хулинче пурӑнакан хастар ватӑсем паян кивӗ Ҫӗнӗ ҫула уявлама Шупашкарти Трактор тӑвакансен культура керменӗнче пуҫтарӑннӑ.
Унта хулари халӑхӑн социаллӑ ыйтӑвӗсене тивӗҫтерекен комплекслӑ центра ташлама ҫӳрекен ватӑсем те хутшӑннӑ. Вӗсем хаваспах ташланӑ, савӑннӑ, пӗр-пӗринпе калаҫса йӑпаннӑ.
«Ватӑ ҫынсене ташлани питех усӑ кӳрет, вал вӗсен сывлӑхне ҫирӗплетет», — тет Шупашкарти социаллӑ центра ташлама ҫӳрекен тава тивӗҫлӗ канури врач-терапевт Раиса Евсеева.
Кӑрлач уйӑхӗн 17-мӗшӗнче Чӑваш тӗррин музейӗнче «От древности до современности» (чӑв. Аваллӑхран паянхи кунччен) курав уҫӑлӗ. Унта Анастасия Зимина, Ксения Туктарова тата Алёна Ефимова ҫамрӑк художниксен ӗҫӗсемпе паллашма май килӗ.
Вӗсем халӑх пултарулӑхне тӗпе хурса ӗҫлеҫҫӗ. Хӗрсен ӗҫӗсенчи пӗрпеклӗх — мифсемпе легендӑсем, чӑваш халӑхӗн историйӗпе культури. Ҫав вӑхӑтрах кашни авторӑн хӑйӗн стилӗ.
Кураври экспонатсен шутӗнче – шӑрҫаран тата пӑхӑр жетонсенчен хатӗрленӗ капӑрлӑхсем, тӗрлӗ тӗслӗ керамика, графика, фотопичет.
Курав 16 сехетре уҫӑлӗ.
Музей адресӗ: Шупашкар хули, К. Маркс урамӗ, 32-мӗш ҫурт. Ыйтса пӗлмелли телефон номерӗ +7 (8352) 62-03-44.
Ку хыпара эпир самай кая юлса пӗлтӗмӗр пулин те хыпарласах килчӗ. Иртнӗ ҫулхи раштав уйӑхӗн 20-мӗшӗнче Валентин Урташ (Валентин Андреевич Яковлев) ҫуралнӑранпа 100 ҫул ҫитнӗ. Ҫавна асра тытса маттур чӑвашсем унӑн вил тӑпри ҫине чечек хунӑ. Ку хыпара эпир Лидия Филиппова журналист, публицист, поэт халӑх тетелӗнчи хӑйӗн страницинче хыпарланӑ тӑрӑх пӗлтӗмӗр.
Валентин Урташ ӗмӗрлӗх канӑҫне Шупашкарти 2-мӗш масар ҫинче тупнӑ. Валентин Урдаш — поэт, унӑн сӑввисемпе сумлӑ композиторсем юрӑсем кӗвӗленӗ. Унсӑр пуҫне вӑл тӑлмачӑ, прозаик пулнӑ.
Раштав уйӑхӗн 21-мӗшӗнче Чӑваш Ен делегацийӗ поэтӑн тӑван тӑрӑхӗнче, Тутарстанра, пулнӑ.
-1.7 °C