Ӗнер Комсомольски округӗнчи Урмаел ялӗнче тӗплӗ юсав хыҫҫӑн культура керменӗ савӑнӑҫлӑ лару-тӑрура уҫӑлнӑ.
Унта округ пуҫлӑхӗ Николай Раськин, ЧР культура министрӗн ҫумӗ Татьяна Казакова, округ депутачӗсем, ял ҫыннисем хутшӑннӑ. Халӗ культура ҫурчӗ хӑтлӑ та тирпейлӗ. Унта кружоксем йӗркелеме пӗтӗм услови пур. Ҫитес вӑхӑтра вара унта кинозал уҫма палӑртнӑ.
Ҫӗнелнӗ культура ҫурчӗ уҫӑлни ял ҫыннисемшӗн кӑна мар, пӗтӗм округшӑн савӑнӑҫ пулнӑ.
Шупашкарти А. Барто ячӗллӗ ача-пӑча вулавӑшне юсаса ҫӗнетнӗ хыҫҫӑн савӑнӑҫлӑ лару-тӑрура уҫнӑ. Тӗслӗхлӗ вулавӑшсенчен вӑл Шупашкарта тӑваттӑмӗш иккен, республикӑра вара — хӗрӗхмӗш.
Юсаса ҫӗнетнӗ вулавӑша уҫма РФ Патшалӑх Думин депутачӗ Алла Салаева, Чӑваш Енри хӗрарӑмсен канашӗн председателӗ Наталья Николаева тата ыттисем пырса ҫитнӗ, вӗсем хавхаланса нумай хитре сӑмах каланӑ.
Иртнӗ эрнере Чӑваш Енӗн Правительство ҫуртӗнче республика Элтеперӗ патшалӑх наградисене тивӗҫнисене чысланӑ. Ҫав йышра икӗ артист пулнӑ.
«Атӑл Опера» театрӑн балет солистне Анна Серёгинӑна «Чӑваш Республикин халӑх артисчӗ» ят панӑ.
Чӑваш патшалӑх ҫамрӑксен театрӗн артистне Владимир Свинцова «театр ӳнерӗнчи тава тивӗҫлӗ ӗҫсемшӗн тата нумай ҫул тухӑҫлӑ ӗҫленӗшӗн» «Чӑваш Республикин тава тивӗҫлӗ артисчӗ» ят пама юпа уйӑхӗн 30-мӗшӗнчи Хушӑвӗпе йышӑннине эпир унччен пӗлтернӗччӗ-ха.
«Ку саманта эпӗ тахҫанах кӗтнӗ. Ӗҫӗме пысӑка хурса хакланӑшӑн калама ҫук телейлӗ», — тенӗ Владимир Свинцов. Вӑл, сӑмах май каласан, Кӳкеҫрен.
Ӗнер, раштавӑн 27-мӗшӗнче, К.В.Иванов ячӗллӗ Чӑваш патшалӑх академи драма театрӗнче Ҫӗнӗ ҫул премьери пулнӑ. Вӑл «Ҫӗнӗ ҫул мыскари» ятлӑ.
Спектакль-концертра режиссер хӑйӗн Ҫӗнӗ ҫул хичӗ валли ҫӑлтӑр шырать. Артистсем вара тӗп рольшӗн кӗрешеҫҫӗ. Куракансем те «кастинга» хутшӑннӑ. Сцена ҫинче юра-ташӑ хуҫаланнӑ.
Сенкер фойере вара хӑнасене Хӗл Мучипе Юр пике кӗтсе илнӗ. «Ҫеҫпӗл» ансамбль солисчӗсем уяв каҫне хӑйсен юррисемпе илемлетнӗ.
Чӑваш Енри 6 театр ЧР Элтепер грантне тивӗҫӗҫ. Вӗсем валли пӗтӗмпе 18 миллион тенкӗ уйӑрӗҫ.
Чӑваш патшалӑх академи юрӑпа ташӑ ансамбльне «Песнь о Земле, что рождала Мужество...» театрализациленӗ концерт программине пурнӑҫлама 5 млн тенкӗ парӗҫ. Вырӑс патшалӑх драма театрӗ те «Маскарад» спектакле лартма ҫавӑн чухлех гранта тивӗҫнӗ.
Чӑваш патшалӑх пукане театрӗ «Интерактивный петрушечный театр «Легенды народов России» проекта пурнӑҫлама 3 млн тенке тивӗҫнӗ. Чӑваш патшалӑх филармонийӗ те «Звучащая древность Чувашии» концерт-спектакль лартма 3 млн тенкӗ илӗ.
Чӑваш патшалӑх сӑнав театрӗ «Что такое хорошо и что такое плохо» спектакле сцена ҫине кӑларма 1 млн тенке тивӗҫнӗ. Ҫамрӑксен театрӗ те ҫавӑн чухлех грант илӗ, унпа «Юнпа пӗвеннӗ хӗвел» спектакль лартӗҫ.
«Контактра» халӑх тетелӗнче Николай Васильев-Сувар икӗ кун каярах вырнаҫтарнӑ поста ҫак йӗркесен авторӗ паян ирпе асӑрхарӗ.
«Тӑван Шупашкара пырса кӗнӗ чухне эпӗ хама кунти ҫын пек туймастӑп, наци мӑнаҫлӑхне те туйматӑп», — тесе пуҫланӑ Николай Васильев-Сувар хӑйӗн постне.
Чӑваш тӗррин пӗчӗк касӑкӗсӗр тата «Шупашкар» тесе ҫырнисӗр нимӗн те ҫук тесе палӑртнӑ вӑл. «ЭПИР ПУЛНӐ, ПУР, ПУЛАТПӐР» ҫуккишӗн те, «ЧӐВАШЛА КАЛАҪӐР, ЧӐВАШСЕМ!» йыхрава курманнишӗн те пӑшӑрханнӑ.
«ЧЕЧЕК, ШЕВЛЕ, ПУКАНЕ, ПЕХИЛ, ХАЛАЛ...» йышши ятсемлӗ центрсем, лавккасем, кинотеатрсем ҫукки пирки те сӑмах хускатнӑ май республикӑн Культура министерствине сӑмах тӗксе илнӗ.
«Элтепер ӑҫта пӑхать? Намӑс мана сирӗншӗн! НАМӐС, НАМӐС, НАМӐС!», — тесе ҫырнӑ вӑл.
Шӑмӑршӑра пурӑнакансем халӗ пысӑк экран ҫинче кино курма пултараҫҫӗ. Ҫак кунсенче унта кинозал уҫӑлнӑ.
Вӑл Шӑмӑршӑри культура керменӗнче вырнаҫнӑ. Ӑна уҫнӑ кун «Август» ятлӑ кино кӑтартнӑ.
Палӑртмалла: шкул ачисем тата студентсем унта фильмсене «Пушкин карттипе» пӑхма пултараҫҫӗ.<s></s>
Ираида Вдовинӑна, чӑваш юррисене пухакана тата юрлакана, вулакансенчен чылайӑшӗ ҫак сӑнӳкерчӗкре палласа илчӗ пулӗ. Мускаври "Мелодия" фирма кӑларнӑ виҫӗ пластинкӑна иртнӗ ӗмӗрӗн 70-мӗш ҫулӗсенче кашни килте тенӗ пекех ҫавӑрттаратчӗҫ, юрӑҫ сасси Чӑвашрадиопа кун сиктерсе тенӗ пек янӑратчӗ. 1985 ҫулта вӑл пухнӑ 222 юрра уйрӑм кӗнекен те пичетлесе кӑларнӑччӗ.
Кӑшт маларах Чӑваш телевиденийӗ Ираида Вдовина пурнӑҫӗпе пултарулӑхӗ ҫинчен киноочерк ӳкерме пуҫланӑччӗ. Сценари авторӗ пулнӑ май Ҫӗрпӳ районӗнчи Иккӗмӗш Туҫа ялне ҫитсе килтӗм. Ку вӑхӑт тӗлнелле Ираида Григорьевна вырӑнти ӑстасенчен ҫырса илнӗ юрӑ тетрачӗсене Шупашкарти архивсене панӑччӗ ӗнтӗ. Анчах халӑхра анлӑ сарӑлнӑ юрӑсемпе такмаксене хӑҫан тата камран ҫырса илнине лайӑх ас тӑватчӗ. Хӑй Сӗнтӗрвӑрри районӗнчи Кӗчкей салинче ҫуралса ӳснӗ май кунти ватӑ ҫынсенчен илтнӗ юрӑсене уйрӑмах хаклатчӗ, вӗсене мӗнле илемлетни пирки каласа пани пухнӑ материала самай пуянлатрӗ.
Киноушкӑнпа яла килсен хӗрарӑмсене пуҫтарса вӑл вӑйӑ карти туса кӑтартрӗ, "Чечек те татас килет ман", "Кумма, кумма, ӑсатса яр", "Чей ӗҫесчӗ пылпала" тата ытти юрӑсене кинокамера умӗнче шӑрантарчӗ, юрра-ташша пултарасси ӑратран-ӑрата куҫса пыни пирки каласа пачӗ.
Красноармейски тӑрӑхӗнчи чӑваш хастарӗсем Нестер Янкас музейне уҫма ӗмӗтленеҫҫӗ. Анчах ку енӗпе хӑш-пӗр чӑрмав пур иккен.
Красноармейскинчи культура ҫуртӗнче нумаях пулмасть Нестер Янкас ячӗллӗ культурӑпа искусство тата литература пӗрлӗхӗн пӗтӗмлетӳллӗ ларӑвӗ иртнӗ. Унта пӗрлӗх ертӳҫи Иван Прокопьев 2025 ҫулта туса ирттернӗ ӗҫсем ҫинчен каласа кӑтартнӑ.
Янкасри ача сачӗ пулнӑ ҫурт (халӗ унта вулавӑш иккен) ҫумӗнче Нестер Янкас поэтӑн музейне йӗркелесси пирки сӑмах хускатнӑ май вӑл поэт ҫуралнӑ кун тӗлне (вӑл 1909 ҫулхи нарӑс уйӑхӗн 20-мӗшӗнче ҫуралнӑ) ҫак музее уҫма ӗмӗтленнине пӗлтернӗ. Ӑна тума материалсем ҫитменни чарса тӑрать-мӗн.
Нестер Янкас ячӗллӗ пӗрлӗх 2025 ҫулшӑн литературӑпа искусство тата культура аталанӑвӗнче палӑрнисене Красноармейски муниципалитет округӗн Нестер Янкас ячӗллӗ преми лауреачӗн ятне парассипе ҫыхӑннӑ сӗнӳсене йышӑнма тытӑнать. ҫакӑн пек пӗлтернӗ пӗрлӗх ертӳҫин ҫумӗ Виталий Михайлов халӑх тетелӗнчи хӑйӗн страницинче.
Ӗҫсене 2026 ҫулхи нарӑс уйӑхӗн 20-мӗшӗччен йышӑнӗҫ. Сӑмах май каласан, Нестер Янкас поэт ҫуралнӑранпа 117 ҫул ҫитет. Уяв ячӗпе Красноармейски Культура ҫуртӗнче лауреатсен пысӑк концерчӗ пулӗ тата ҫӗнӗ лауреатсене чыслӗҫ.
«Кашни ырӑ япала, пултарулӑх хӑйӗн хакне тивӗҫлех. Конкурса иртсе каякан ҫулта литературӑпа искусство тата культура шайӗнче Трак тӑрӑхӗшӗн ырми-канми ӗҫленӗ, вулакансемшӗн, куракансемшӗн уҫӑмлӑ, чун-чӗрене ҫывӑх та пысӑк пӗлтерӗшлӗ сцена ӗҫӗсемпе, юрӑ-кӗвӗсемпе, куравсемпе, кӗнекесемпе, ытти пултарулӑх ӗҫӗсемпе савӑнтарнӑ ентешӗмӗрсем хутшӑнасса шанатпӑр эпир», — тесе хыпарланӑ эпир маларах Виталий Михайлов.
-8.7 °C