Кӑҫалхи кӑрлачӑн 22-мӗшӗнче Чӑваш халӑх поэчӗ, Ҫеҫпӗл Мишши ячӗллӗ премин малтанхи лауреачӗсенчен пӗри Петӗр Хусанкай (1907-1970) ҫуралнӑранпа 119 ҫул ҫитрӗ. Ҫак ятпа Ҫеҫпӗл Мишши ячӗллӗ преми лауреачӗсем — Раиса Сарпи, Марина Карягина, Юрий Сементер, Валери Туркай, Валерий Гордеев, Олег Цыпленков тата поэзие чунтан юратакан ытти хисеплӗ ҫынсем, ҫанталӑк сивӗ пулнине пӑхмасӑр, манӑҫми поэтӑмӑрӑн Шупашкарти вилтӑприйӗ ҫине чӗрӗ чечексем хунӑ.
Петр Петрович Хусанкая сума суса ҫав кун Богдан Хмельницкий урамӗнчи кивӗ масар ҫумӗнчи пантеон патне пуҫтарӑннисем пурте ун пирки чӗререн тухакан ӑшӑ сӑмахсем каланӑ.
Асӑну митингӗнче Петӗр Хусанкайӑн Чӑваш халӑх поэчӗ Валери Туркай вулакан «Элкере» сӑвви янӑранӑ.
Чӑваш Енре пурӑнакансем Николай Добронравов ячӗллӗ юрӑ поэзийӗн пӗтӗм ҫӗршыври конкурсне хутшӑнма пултараҫҫӗ. Заявкӑсене пуш уйӑхӗн 20-мӗшӗччен йышӑнӗҫ.
Конкурс тӗллевӗ ҫӗршывӑн тӗрлӗ регионӗнчи пултаруллӑ поэтсене тупса палӑртса литература йӑли-йӗркипе юрӑ ӳнерне аталанма пулӑшасси тесе пӗлтернӗ.
Конкурса 8 номинаципе хутшӑнма пулать. Пултарулӑха тӗрӗслесе пӑхас кӑмӑллисен 14 ҫултан кӗҫӗнрех пулмалла.
Тӗп парне — Николай Добронравов ҫуралнӑ кунне халалланӑ концертра ҫӗршыври паллӑ юрӑҫсемпе пӗрле юрлани.
Шупашкарта иртекен Пӗтӗм тӗнчери кинофестивале пысӑк улшӑнусем кӗтеҫҫӗ. Кун пирки ЧР Культура министерстви пӗлтерет.
Ӑна 2008 ҫултанпа ҫӗртме уйӑхӗнче ирттереҫҫӗ. Кӑҫал вара кинофестивале кӗркунне йӗркелӗҫ. Ведомство пӗлтернӗ тӑрӑх, вӑл пӗрремӗш хут ҫӗнӗ форматпа пулӗ, ҫӗршыври культура платформинче «Шупашкарти Пӗтӗм тӗнчери искусство тата кино фестивалӗ» ятпа пулӗ.
Программӑра: кино кӑтартасси, пултарулӑх тӗлпулӑвӗсем, концертсем, ӑсталӑх класӗсем, тематика лекцийӗсем, ҫавра сӗтелсем. Паллӑ кино, театр тата музыка ӗҫченӗсене чӗнме палӑртнӑ.
Чӑваш Енӗн Культура министерстви 2025 ҫулшӑн литературӑпа ӳнер премине илме ӗҫсене малалла йышӑнни ҫинчен хыпарлать.
Литература ӗҫӗсене унччен пичетленсе тухнисене; музыка, ӳнер, театр, хореографи тата эстрада ӳнерӗн, дизайн, кинопа телевидени, халӑх ӳнерӗн тата прикладной ӳнерӗн ӗҫӗсене концертсенче, куравсенче, театрсемпе кинотеатрсенче, пичетре, телевиденипе радиора кӑтартнисене тӑратма юрать.
Ӗҫсене кӑҫалхи нарӑс уйӑхӗн 1-мӗшӗччен республикӑн Культура министерствинче, 17 ҫуртри 412-2 пӳлӗмре, йышӑнӗҫ. Ыйтса пӗлмелли телефон номерӗ 8(8352) 56-50-48.
Кӑрлач уйӑхӗн 23-мӗшӗнче Чӑваш Енӗн Наци вулавӑшӗ учрежденин 155 ҫулхине халалланӑ юбилей каҫне ирттерӗ.
«В кругу друзей» (чӑв. Туссемпе пӗрле) ят панӑ мероприятие вулавӑша кӗнеке вулама ҫӳрекенсемпе библиотека ӗҫӗн ветеранӗсене йыхравлӗҫ. Ҫав кунах «Люблю! Читаю! Дарю!» (чӑв. Юратӑп! Вулатӑп! Парнелетӗп!) ыркӑмӑллах кӗнеке марафонӗ пуҫланӗ. Кӗнеке фондне пуянлатма пулӑшнисене тӗрлӗ майпа чыслӗҫ.
Уява «Бард-ковчег» автор юррин клубӗ, «Эхо» пӗрлешӳ, «Эткер» фольклор студийӗ хутшӑнӗҫ.
Мероприяти вулавӑшӑн акт залӗнче 14 сехетре пуҫланӗ.
Кӑрлачӑн 16-мӗшӗнче, Артист кунӗ умӗн, К.В.Иванов ячӗллӗ Чӑваш патшалӑх драма театрӗнче ҫак уява паллӑ тунӑ.
Унта театр, филармони, Чӑваш патшалӑх академи юрӑпа ташӑ ансамблӗн, капелла артисчӗсем пухӑннӑ. Уяв умӗн Театр ӗҫченӗсен пӗрлӗхӗн пайташӗсем театр искусствине халалланӑ артистсене аса илнӗ, Богдан Хмельницкий урамӗнчи Мухтав аллейине ҫитсе вӗсен вилтӑприсем ҫине чечексем хунӑ.
ЧР культура министрӗ Светлана Каликова чи лайӑх артистсене патшалӑх наградисем панӑ. Чӑваш патшалӑх юрӑпа ташӑ ансамблӗн артисчӗсем хаваслӑ юрӑсемпе савӑнтарнӑ.
Шупашкарта кӑҫал та Чӑваш музыкин фестивалӗ иртессине эпир унччен пӗлтернӗччӗ-ха. Аса илтерер: ӑна кӑҫал 15-мӗш хутчен йӗркелеҫҫӗ.
Фестиваль нарӑс уйӑхӗн 1-мӗшӗнче уҫӑлӗ. Чӑваш патшалӑх оперӑпа балет театрӗ пӗлтернӗ тӑрӑх, репертуарта — чӑваш музыкин ылтӑн фондӗнчи ахах-мерчен: Федоров Павловӑн «Шывармань» тата Георгий Хирпюн «Нарспи» опери таранах. Хальтерехрисенчен Андрей Галкинӑн «Аттила. Рождение легенды» балетне палӑртмалла.
Фестиваль Тутарстанри паллӑ баянист Айдар Гайнуллин хутшӑнакан гала-концертпа вӗҫленӗ.
Чӑваш кӗнеке издательствинче Ирина Трифоновӑн «Письмо Олеси. Олеся панӑ ҫыру» ятлӑ кӗнеки пичетленсе тухнӑ.
Ҫӗнӗ кӑларӑма икӗ чӗлхепе: вырӑсла тата чӑвашла — кун ҫути кӑтартнӑ. Повеҫе вырӑсларан чӑвашла автор хӑй куҫарнӑ иккен. Ирина Трифонова пирки Чӑваш кӗнеке издательствин сайтӗнчи хыпарта ҫыравҫӑ, куҫаруҫӑ, журналист, дизайнер тесе пӗлтернӗ.
Вӑл Тутарстанри Ҫӗпрел районӗнчи Хулаҫырми ялӗнче ҫуралнӑ. 2019 ҫултанпа Хусанти «Сувар» хаҫатӑн тӗп редакторӗнче тӑрӑшать.
«Атӑл Опера» театрта ҫӗнӗ тӗп режиссёр ӗҫе кӳлӗннӗ. Вӑл — Василий Селюков.
Василий Валерьевич — Красноярскри П.И. Иванов-Радкевич ячӗллӗ ӳнер колледжӗнчен тата Раҫҫейри театр ӳнер институтӗнчен — ГИТИСран вӗренсе тухнӑ.
2020 ҫултанпа Красноярскри музыка театрӗнче режиссёр тата ассистент пулса тӑрӑшнӑ. 2023 ҫултанпа Волгоградри музыка театрӗнче режиссёр-постановщикра ӗҫленӗ.
Чӑваш Республикин Вӗренӳ институтӗнче кӑрлач уйӑхӗн 30-мӗшӗнче «Хальхи вӑхӑтра тӑван чӗлхене тӗпчес тата вӗрентес ӗҫ» ҫавра сӗтел иртӗ.
Ӑна чӑваш чӗлхеҫи, филологи ӑслӑлӑхӗсен кандидачӗ, чӑваш чӗлхипе вӗрентӳ пособийӗсен авторӗ Ю.М. Виноградов ҫуралнӑранпа 80 ҫул ҫитнине тата чӑваш чӗлхеҫи, филологи ӑслӑлӑхӗсен кандидачӗ, лексиколог тата диалектолог А.В. Кузнецов ҫуралнӑранпа 50 ҫул ҫитнине халаллӗҫ.
-9.7 °C