Юпа уйӑхӗн 20-мӗшӗнче Чӑваш патшалӑх культурӑпа ӳнер институтӗнче Хореографи ӑсталӑхӗн «Ташӑ эрешӗсем» регионсем хушшинчи III фестиваль-конкурсӗ иртнӗ. Мероприяти Чӑваш Енре паллӑ балетмейстерсен Людмила Нянинапа Владимир Милютин ячӗпе хисепленет
Конкурса Куславккасен ентешлӗхӗпе пӗрле йӗркеленӗ. Фестивале хутшӑнма 90 заявка ҫитнӗ. Пурӗ 900-е яхӑн ташӑҫӑ хӑйӗн ӑсталӑхне кӑтартнӑ. Конкурса Чӑваш Енри, Тутарстанри тата Мари Элти коллективсем те хутшӑннӑ. Конкурсра чӑваш, мари, тутар, бурят, таджик, чикан, авар, инди ташшисене кӑтартнӑ.
Юпа уйӑхӗн 16-мӗшӗнче Чӑваш Республикин искусствӑсен тава тивӗҫлӗ ӗҫченӗ Марина Карягина 55 ҫул тултарнӑ. Тепӗр икӗ кунтан, юпа уйӑхӗн 18-мӗшӗнче, Чӑваш Енӗн Наци вулавӑшӗнче унӑн икӗ кӗнекине хӑтлассине Чӑваш халӑх сайчӗ пӗлтернӗччӗ-ха.
Поэта, прозаика, драматурга, тележурналиста саламлама пынисем Марина Карягинӑн «Ачаш ача» тата «Ҫӗн Кун ачи» кӗнекисене пахаланӑ. Вӗсен йышӗнче сумлӑ нумай ҫын пулнӑ. Ҫав шутра — Чӑваш патшалӑх гуманитари ӑслӑлӑхӗсен институчӗн ученӑйӗсем те. Учреждени директорӗ, филологи наукисен докторӗ Юрий Исаев, Виталий Родионов, Альбина Мышкина, Вера Никифорова, Ирина Кириллова литературоведсем тата ыттисем Марина Карягина пултарулӑхне пысӑка хурса хакланӑ.
Ф.П. Павлов ячӗллӗ музыка училищи «Павловские дни» (чӑв. Павлов кунӗсем) юбилей фестивальне ирттерӗ. Ӑна музыка училищи кӑҫал 95 ҫул тултарнине халалланӑ.
Фестиваль юпа уйӑхӗн 28-мӗшӗнчен пуҫласа раштав уйӑхӗн 5-мӗшӗччен иртӗ. Ҫав вӑхӑтра Пысӑк концерт залӗнче отчет концерчӗсен ярӑмне куракансем патне тӳлевсӗр ҫитерӗҫ. Концерта преподавательсем, студентсем, пултарулӑх коллективӗсем хутшӑнӗҫ.
Музыка училищи 1929 ҫулта Шупашкарти музыка шкулӗнче Чӑваш музыка техникумӗ евӗр ӗҫлесе кайнӑ. 1930–1936 ҫулсенче Чӑваш музыкӑпа театр техникумӗ шутланнӑ, 1936–1941 ҫулсенче — музыка училищи. 1944 ҫулта Шупашкарти музыка училищи пулса тӑнӑ, 2009 ҫулта — Шупашкарти музыка училищи (техникумӗ).
Училище 1954 ҫултанпа чӑваш драматургийӗн тата профессилле музыкин никӗслевҫин, чӑваш поэчӗн, драматургӗн, композиторӗн, дирижёрӗн Фёдор Павловӑн ячӗпе хисепленсе тӑрать.
Чӑваш Енӗн наци библиотекинче Аркадий Русаковӑн ҫӗнӗ романне пахаланӑ.
Автор Пушкӑртстанра ҫуралнӑ. Унӑн ӗҫӗ Чӑваш кӗнеке издательстви тӑван чӗлхепе ҫырнӑ романсен конкурсӗнче ҫӗнтернӗ. «Турхан сӑмахӗ»
— историлле хайлав.
«Чӑваш Ен» ПТРК пӗлтернӗ тӑрӑх, «Чӑваш романӗ» литература ӑмӑртӑвӗнче ҫӗнтернӗ хайлавӑн авторӗ Аркадий Русаков — профессипе тухтӑр, Фёдоровка салинчи район сыватмӑшӗнче невролог пулса ӗҫлет. 35 ҫул Стерлитамакри чӑваш ҫыравҫисен «Шуратӑл» литература пӗрлешӗвӗнче тӑрать», — хыпарланӑ Марина Карягина.
И.Н.Ульянов ячӗллӗ Чӑваш патшалӑх университетӗнче Индирен килнӗ студентсем валли уяв туса панӑ. «Навратри» ятлӑ вӑл.
Уявра 200 яхӑн студент савӑннӑ. Вӗсем юрланӑ, ташланӑ., хӑйне евӗр наци ҫимӗҫӗсемпе хӑналанӑ.
«Вӑл питӗ ырӑ уяв. Вӑл тӗрӗслӗхе, ырӑ усала ҫӗнтернине кӑтартать», - палӑртнӑ Индирен Шупашкара вӗренме килнӗ студент Датта Акшат.
Шупашкарти шкул ачине Илья Павлова Сочире иртнӗ BRICS олимпиадӑра Раҫҫей гимнне юрлама шаннӑ. Ку тивӗҫе вӑл питӗ аван пурнӑҫланӑ.
Илья вокала 5 ҫул вӗренет. Унӑн ертӳҫи - Светлана Куликова. Илья Шупашкарти 3-мӗш ӳнер шкулӗнче ӑс пухать. Вӑл ытларах патриотлӑх юррисене юрлама кӑмӑллать.
2023-2024 ҫулсенчи пултарулӑх сезонӗнче Чӑваш Енри патшалӑх театрӗсемпе концерт учрежденийӗсем 58 премьера лартнӑ. Ҫав учрежденисене 821,6 пин ҫын пырса курнӑ.
Чӑваш Енӗн Культура министерствинче пӗлтернӗ тӑрӑх, куракансем Чӑваш Енӗн Элтеперӗн гранчӗпе лартнӑ спектакльсемпе концертсене, Борис Полевойӑн «Повесть о настоящем человеке», Марина Карягинӑн «Ҫӗн Кун Ачи» ӗҫӗсемпе лартнӑ спектакльсене, Юрӑпа ташӑ ансамблӗн «Ҫул хыҫҫӑн ҫул, 100 ҫул ӑнӑҫлӑ иртнӗ» программӑна уйрӑмах килӗштенӗ.
Чӑваш патшалӑх академи драма театрӗнче юпа уйӑхӗн 18-мӗшӗнче «Василисса» юмах кӑтартнӑ. Ӳнер учрежденийӗнче пӗлтернӗ тӑрӑх, ӑна Алена Савельева пултаруллӑ ҫамрӑк режиссёр лартнӑ.
Спектакле Культура пуҫарӑвӗсен президент фончӗн гранчӗпе куракан патне ҫитернӗ. Театрта ӗнентернӗ тӑрӑх, спектакль пӗчӗк куракансемпе вӗсен ашшӗ-амӑшне тӳрех килӗшнӗ.
Юмахри тӗп сӑнар Василисса: «Кам эпӗ? Ӑҫтан килнӗ?» – тесе пуҫ ватать-мӗн.
Питӗрти чӑвашсем юпа уйӑхӗн 19-мӗшӗнче Илем фестивальне хутшӑннӑ.
«St. Petersburg Beauty 2024» Илем, мода тата пултарулӑх фестивалӗнчи Пултаруллисен конкурсне Питӗрти чӑваш культура обществин дизайнерӗсемпе модельерӗсен ушкӑнӗ пулнӑ. Вӗсем – тӗрлӗ конкурс ҫӗнтерӳҫисемпе лауреачӗсем Алиса Шарпаева тата Фаина Антонова. Чӑваш тумӗн илемне Алиса Семёновна кӑтартнӑ.
Чӑваш патшалӑх ӳнер музейӗнче В.Н. Яковлевӑн «В поисках Яндовы/ Оппукасси тӑрӑхӗнче» куравӗ уҫӑлнӑ.
– Виталий Николаевич кӗҫех 75 ҫул тултарать. Анчах ӑна вӑйпитти авторсен шутне кӗртес килет, – терӗ музей директорӗ Г.В. Козлов курава уҫнӑ май. – Кунта кӑтартакан пейзажсемпе портретсене пӑхса ҫаврӑнтӑм та ман ҫине вӗсен авторӗ кӑмӑллӑн кулса пӑхса тӑнине туйса илтӗм. Вӑл педагог, нумай ҫул хушши ачасене илемлӗх вӑрттӑнлӑхӗсене асӑрхаса вӗсене ӑша хывма вӗрентет. Тата вӑл кулӑш жанрне алла илнӗ, паллӑ график, нумай ҫул хушши «Капкӑн» журналпа ҫыхӑну тытнӑ.
– Мана ытларах портретсем тыткӑнларӗҫ, – пӗлтерчӗ Чӑваш халӑх художникӗ Н.А. Енилин. – Хӑйӗн геройӗсене сӑнарланӑ чух автор вӗсен «пысӑк талантне» анчах мар, ҫынлӑхне те тарӑннӑн уҫса пама пултарнӑ.
– Ҫӗнӗ Шупашкарти ӳнер музейӗн директорӗ В.А. Ильин тата Н.А. Алимасова художник шухӑшӗпе куравра кӑтартакан картинӑсенче пысӑк тӗнчен пӗр пӗчӗк пайӗ хӑй вырӑнне тупнӑ, ку эпир пӗлнӗ, эпир ҫитӗннӗ кӗтес, автор ӑна куракан кӑмӑлне ҫӗклемелле ӳкерсе кӑтартнӑ.
Курава пынисене Шупашкарти «Классика» капелла солисчӗсем илемлӗ юрӑ-кӗвӗпе «сӑйларӗҫ».
-1.7 °C