Ҫӗнӗ Шупашкарта автомастерской ӗҫченӗ маршруткӑсемпе ҫӑмӑл автомобильсен салонӗсене уҫса кӗнӗ, унти япаласене вӑрланӑ. Вӑл е ҫӑрана ватнӑ, е чӳречене.
Ака уйӑхӗн 16-мӗшӗнче Ҫӗнӗ Шупашкарти Восточнӑй урамри автомастерской территорийӗнче тата унтан инҫех мар вырӑнта виҫӗ маршруткӑна кӗнӗ. Салонсенчен темиҫе пин тенкӗ укҫа, видеорегистратор, автомагнитола, инструментсем тата водительсен япалисем ҫухалнӑ.
Йӗрке хуралҫисем пӑтӑрмаха тӗрӗслеме тытӑнсан территорири йытӑ сасӑ паманнине ӑнланса илнӗ. Ҫавна май пакунлисем унччен пуҫиле ӗҫпе аппаланнӑ пӗр ӗҫчен пирки шухӑшланӑ. Чӑн та, 34-ри арҫын вӑрӑ ӗҫӗпе ӳсӗрле хӑтланнӑ иккен. Видеорегистратора ӑҫта хунине те вӑл манса кайнӑ. Ӑна ҫывӑхри чӑрӑш патне чавса чикнине аран-аран аса илнӗ.
Пуш уйӑхӗн 25-мӗшӗнчен пуҫласа акан 9-мӗшӗччен Шупашкарта полицие автомобильти видеорегистраторсем ҫухални пирки тӑхӑр заявлени килсе выртнӑ. Преступлени йӗрӗ пӗр евӗрлех пулнӑ, урамсен ячӗсем ҫеҫ улшӑнса пынӑ: Кадыков, Пролетари, Энгельс, Шумилов, стрелоксен 324-мӗш дивизийӗн урамӗ, Эгер бульварӗ.
Йӗрке хуралҫисем вӑрӑ йӗрӗ ҫине часах ӳкнӗ. Ӑна Павлов мичман урамӗнче черетлӗ автомобиле ҫаратнӑ хыҫҫӑн тытса чарнӑ.
Шупашкарта пурӑнакан, унччен судпа пӗрре мар айӑпланнӑ арҫын 10 преступлени туни пирки каласа кӑтартнӑ. Ун тӗлӗшпе пуҫиле ӗҫ пуҫарнӑ. Следстви пынӑ вӑхӑтра арҫын килти арестра пулӗ.
Ака уйӑхӗн 11-мӗшӗнче Шупашкарта пурӑнакан 28 ҫулти хӗрарӑм полицие пынӑ та унӑн банк картти ҫинчен 10 пин ытла тенкӗ ҫухалнине пӗлтернӗ. Полицейскисем ҫак укҫана пӗтернӗ ҫынна часах тупса палӑртнӑ. Вӑл - 55 ҫулти хӗрарӑм.
Хӗрарӑм тунман: вӑл банк карттине тупнӑ та лавккасене кайса унпа 16 хутсен тавар туяннӑ. Ун тӗлӗшпе пуҫиле ӗҫ пуҫарнӑ. Следстви пынӑ вӑхӑтра хӗрарӑмӑн ниҫта та тухса кайма юрамасть
Шӑмӑршӑ районӗнчи 32 ҫулти арҫынна ватӑсене ҫаратнӑшӑн суд тунӑ. Анчах кинемейсем ҫакна кӗтсе илеймен, суд пуличчен вилнӗ.
2020 ҫулхи акан 28-мӗшӗнче ҫӗрле ҫутта сӳнтернӗ те 99 ҫулти кинемей патне кӗнӗ, ватӑскере ҫӗре йӑвантарса кӗсйинчи 5800 тенкине вӑрланӑ. Унччен ҫак арҫын ун патӗнче юсав ӗҫӗсем тунӑ.
Пӗлтӗр ҫу уйӑхӗнче вара Шӑмӑршӑра пурӑнакан хӗрарӑм патне кӗрсе телефон вӑрланӑ. Утӑ уйӑхӗнче 92-ри кинемей патне кӗрсе минтер айӗнчи 5 пин тенке йӑкӑртнӑ. 2020 ҫулхи кӑрлачӑн 2-мӗшӗнче ҫӗрле лавккана кӗрсе тӳлев йышӑнмалли терминалтан 7 пин тенкӗ вӑрланӑ.
Арҫынна ҫирӗп режимлӑ колоние 3 ҫуллӑха ӑсатма йышӑннӑ. Шел, кинемейсем суда кӗтсе илеймен, вилнӗ.
Шупашкарта пурӑнакан каччӑ вӑйӑ приставкине тара илнӗ те ӑна сутса янӑ. Ӑна тупнӑ. Каччӑ тӗлӗшпе вара пуҫиле ӗҫ пуҫарнӑ.
Вӑйӑ приставкин хуҫи полицие каласа кӑтартнӑ тӑрӑх, вӑл ӑна палламан ҫынна тара панӑ. Анчах каччӑ ҫухалнӑ, приставкӑна тавӑрса паман. Ку полицие кайса пулӑшу ыйтнӑ.
Йӗрке хуралҫисем ҫак ӗҫе тунӑ 25 ҫулти арҫынна тытса чарнӑ. Вӑл унччен те судра явап тытнӑ. Хальхинче те хӑйӗн айӑпне йышӑннӑ. Вӑл приставка хуҫине 25 пин тенкӗлӗх тӑкак кӳнӗ.
Тула облаҫӗнче пенсионеркӑран пилӗк килограмм сахӑр туртса илнӗ хӗрарӑма тытса чарнӑ.
Полици 73 ҫулхи ват хӗрарӑм ҫине, лешӗ килелле 5 килограмм сахӑр йӑтса пынӑ чухне, тапӑннӑ тесе шутланакан хӗрарӑма тытса чарни пирки, туртса илнӗ сахӑра тавӑрса пани ҫинчен Тула облаҫӗнчи ШӖМ управленийӗ пӗлтерет.
«Раҫҫей ШӖМӗн муниципалитетсем хушшинчи отделӑн «Алексински» дежурнӑй пайне 73 ҫулти хӗрарӑм хӑйӗн ҫине тапӑнни ҫинчен пӗлтернӗ. Вӑл каласа панӑ тӑрӑх, хӑй пурӑнакан ҫурт подъездӗнче палламан хӗрарӑм унран сахӑр пакетне туртса илнӗ», — тенӗ хыпарта.
Полицейскисем усал шухӑшлӑ хӗрарӑм кам иккенне тата ӑҫта пурӑннине тупса палӑртнӑ. Вӑл ниҫта та ӗҫлемен, унччен пӗрре мар судпа айӑпланнӑ 44 ҫулхи хӗрарӑм пулнӑ, инкеке ленкнӗскерпе пӗр урамрах пурӑнаканскер. Хӗрарӑм усал ӗҫ тунине йышӑннӑ, ҫаратни пирки пуҫиле ӗҫ пуҫарнӑ.
ШӖМ управленийӗн представителӗ журналистсене каласа панӑ май, карчӑкӑн пакетра 5 килограмм сахӑр пулнине, айӑпа кӗнӗскере тытса чарнӑ хыҫҫӑн вӗсене тавӑрса панине пӗлтернӗ.
Шупашкарта пурӑнакан икӗ арҫын пуш уйӑхӗн 8-мӗшӗнче савнийӗсене савӑнтарас тесе лавккаран 50 кӗлчечек вӑрланӑ.
Уявра ҫӗнӗ кӑнтӑр районӗнче вырнаҫнӑ суту-илӳ ҫурчӗн сутуҫисем полицирен пулӑшу ыйтнӑ. Вӗсен лавккинчен икӗ чечек ҫыххи, пӗтӗмпе – 50 чечек, ҫухалнӑ. Вӑл вара 6 пин ытла тенкӗ тӑрать.
Йӗрке хуралҫисем ҫак ӗҫе 27-ри тата 29 ҫулти арҫынсем тунине палӑртнӑ. Вӗсем ӑнлантарнӑ тӑрӑх, чечек ҫыххисене савнийӗсене парнеленӗ.
Унччен те судпа айӑпланнӑ, Шупашкарта пурӑнакан арҫын лампочкӑсем сутса укҫа тӑвасшан пулнӑ. Анчах май килмен.
Арҫын вӗсене «Ясная поляна» микрорайонти Таллеров урамӗнче вырнаҫнӑ 16 хутлӑ ҫуртран йӑкӑртнӑ. Вӑл подъездри пӗтӗм лампочкӑна тенӗ пек илсе тухнӑ. Ҫакна унта пурӑнакансем пуш уйӑхӗн 26-мӗшӗнче асӑрханӑ.
Полицейскисем ҫакна тума пултарнӑ ҫын йӗрӗ ҫине ӳкнӗ. Вӑл – 36 ҫулти арҫын. Хайхискер ӑнлантарнӑ тӑрӑх, ҫав вӑхӑтра вӑл ӳсӗр пулнӑ, подъездран 20 яхӑн лампочка пӑрса тухнӑ. Анчах киле кайнӑ чухне ӳкнӗ те вӗсене ҫухатса пӗтернӗ.
Арҫын тӗлӗшпе пуҫиле ӗҫ пуҫарнӑ.
Шупашкарта 88 ҫулти кинемейӗн укҫине вӑрланӑ. Хӑй каланӑ тӑрӑх, унӑн хваттерне палламан арҫын кӗнӗ те нухратне йӑтса тухса кайнӑ. Ватӑскер хӑй тӗллӗн утаймасть.
Арҫын 200 пин тенкӗ вӑрласа тухнӑ. Ӑҫтан тупӑннӑ-ха палламан ҫын? Ҫак ҫын, унччен те судпа айӑпланнӑ 38 ҫулти арҫын, малтан ҫак хваттере кинемейӗн мӑнукӗпе килсе курнӑ. Хайхискер ватӑ хӗрарӑмӑн укҫи ӑҫта упраннине астуса юлнӑ.
Тепӗртакран ҫак арҫын кинемейӗн мӑнукӗпе пӗр ушкӑнра пулнӑ. Ҫавӑн чухне вӑл унӑн кӗсйинчен хваттер уҫҫине кӑларса илнӗ. Арҫын вӑрланӑ укҫана тӑкаклама ӗлкӗрнӗ. Ун тӗлӗшпе пуҫиле ӗҫ пуҫарнӑ.
Пуш уйӑхӗн 18-мӗшӗнче ҫур ҫӗр иртни 3 сехетре Шупашкарти Октябрь: 50 ҫул урамра вырнаҫнӑ лавккана 42 ҫулти арҫын кӗрсе эрех, улма-ҫырла, шӑккалат йӑкӑртса тухнӑ. Вӑрра тупса палӑртма видеокамера пулӑшнӑ.
Ҫак арҫын унччен те судпа айӑпланнӑ пулнӑ. Кӑҫал нарӑс уйӑхӗнче ӑна раштавӑн 31-мӗшӗнче тата нарӑсӑн 2-мӗшӗнче лавккаран тавар вӑрланӑшӑн 360 сехет ӗҫлеттерме йышӑннӑ.
Хальхинче те лавккана кӗрсе вӑрланине вӑл тунман. Ҫав каҫ арҫын алӑка ҫӗмӗрсе кӗнӗ, унтан пӗр ывӑҫ иҫӗм ҫырли, икӗ мандарин, икӗ шӑккалат тата виҫӗ кӗленче эрех йӑкӑртса тухнӑ. Вӗсене кайран йӗрке хуралҫисем унӑн килӗнче тупнӑ.
Шупашкарта ҫывӑх вӑхӑтра (01.05.2024 15:00) тӗтреллӗ ҫанталӑк, атмосфера пусӑмӗ 752 - 754 мм, 9 - 11 градус ӑшӑ пулӗ, ҫил 4-6 м/ҫ хӑвӑртлӑхпа ҫурҫӗр-хӗвеланӑҫ енчен вӗрӗ.
| Ҫемен Элкер, чӑваш сӑвӑҫи, ҫыравҫи ҫуралнӑ. | ||
| Шорникова Елена Васильевна, чӑваш актриси ҫуралнӑ. | ||
| Сергеев Алексей Сергеевич, чӑваш актёрӗ, тава тивӗҫлӗ культура ӗҫченӗ ҫут тӗнчерен уйрӑлса кайнӑ. | ||
Пулӑм хуш... |