Шупашкарта пурӑнакан арҫын ултавҫӑсене 3 миллион тенкӗ ытла куҫарса панӑ. Полицие вӑл мар, унӑн тӑванӗсем шӑнкӑравласа пулӑшу ыйтнӑ.
50 ҫулти арҫын патне ҫӗртме уйӑхӗнчех пӗр хӗр шӑнкӑравланӑ. Укҫа ӗҫлесе илмелли мел пур тесе сӗннӗ. Арҫын килӗшнӗ те телефонне лешӗ каланӑ сарӑма вырнаҫтарнӑ. Укҫа ӗҫлесе илес тесе 3 миллион та 150 пин тенкӗ инвестици хывнӑ. Ку укҫана вӑл банкран кредит илнӗ. Анчах арҫын кайран укҫана тавӑрас тенӗ — май килмен, счета блокировка тунӑ.
Шупашкарти арҫын ача онлайн-вӑйӑ вылянӑ чухне амӑшӗн картти ҫинчи укҫана куҫарса панӑ. Сахал мар – 230 пин тенкӗ.
Амӑшӗ дебет тата кредит карттисем ҫинче укҫа ҫуккине асӑрханӑ та мӗн пулнине тӗпчеме тытӑннӑ. 3-мӗш класри ывӑлӗ вӑйӑ вылянӑ чухне виртуаллӑ валюта туянма тӑнӑ иккен. Палламан ҫын унпа мессенджер урлӑ ҫыхӑннӑ. Арҫын ача вал каланине итлесе ӑна 230 пин тенкӗ куҫарса панӑ. Ача вара вӑйӑ бонусӗсемсӗрех тӑрса юлнӑ.
Ачан амӑшӗ полицие кайса пулӑшу ыйтнӑ.
Шупашкарти С.М.Максимов ячӗллӗ 1-мӗш музыка шкулӗнче вӗренекен Ирина Степанова «Агутинс» конкурсра гран-при ҫӗнсе илнӗ. Ӑна пултарулӑхне аталантарма 100 пин тенкӗлӗх сертификат панӑ. Сертификата Раҫҫейри паллӑ мусӑкҫӑ Леонид Агутин аллинчен тыттарнӑ.
Палӑртса хӑварар: конкурса 15 пин заявка килнӗ. Пирӗн ентешӗн ҫирӗп суйлав витӗр тухма тивнӗ. Вӑл Сочи хулинче иртнӗ гала-концерта ӗнер НТВ телеканалпа кӑтартнӑ.
Шупашкарта пурӑнакан 37 ҫулти хӗрарӑм пӗлтӗрхи чӳк уйӑхӗнче кӗрӗк туянас тенӗ. Халӑх тетелӗнче вӑл йӳнӗ хакпа кӗрӗк сутакан ушкӑна асӑрханӑ. Хӑйне килӗшекен атвар тупсан хӗрарӑм тавар сутаканпа ҫыхӑннӑ. Вӑл ӑна кӗрӗк хакне, 11 пин те 200 тенке, куҫарса панӑ. Анчах кӗрӗк килмен.
Пӑтӑрмах пирки хӗрарӑм йӗрке хуралҫисене пӗлтернӗ. Лешсем улталанӑ тӗслӗхпе пуҫиле ӗҫ пуҫарнӑ. Улталаканни Мускав облаҫӗнче пурӑнакан 33-ри хӗрарӑм пулнӑ.
Шупашкарта пурӑнакан Фроловсем ылтӑн туйӗнче наци тумне тӑхӑннӑ.
Мӑшӑр 1975 ҫулта пӗрлешнӗ, ҫак таранччен ҫемье ӑшшине упраса хӑварнӑ. Вӗсем паянхи кун та общество ӗҫӗсене хастар хутшӑнаҫҫӗ.
Екатерина Сильвестровна пир-авӑр комбинатӗнче чылай ҫул ӗҫленӗ, халӗ ятарлӑ ҫар операцийӗнчи салтаксем валли нуски ҫыхать. Николай Николаевич — ӗҫ ветеранӗ, Трактор заводӗнче токарьте 43 ҫул ӗҫленӗ.
Ылтӑн туй кунӗнче мӑшӑр, 50 ҫул каяллахи пекех, пӗр-пӗрне ҫӗрӗ тӑхӑнтартнӑ.
Шупашкарти 15-ри арҫын ача шкулта кӑна вӗренет-ха, анчах вӑл халех юрӑ-кӗвӗ ҫырма хӑнӑхнӑ, вӗсене BLOODTHXRN псевдонимпа хатӗрлет.
Алексей Егоров электронлӑ музыкӑпа 14-ра чухне кӑсӑкланма тытӑннӑ. Компьютерпа тата интернетпа усӑ курса трексем хатӗрлеме вӗреннӗ. Унӑн юррисене уйӑхра 2 миллион ҫын итлет. «Яндекс. Музыка» вара ӑна платина дискпа чысланӑ.
Унӑн трекӗсем «Тик-Тока» та лекнӗ. Вӗсемпе 13 пин ҫын видео ӳкернӗ.
Шупашкар хула администрацийӗ Граждан урамӗнчи 92-мӗш ҫуртри муниципалл а пӗр хваттерте пурӑнакан арҫынна хваттертен кӑларса яма ыйтса суда тавӑҫпа тухнӑ.
Хваттерте пурӑнакан арҫын хваттере йӑлари тӗрлӗ каяшпа тултарса лартнӑ, унта тирпейсӗр пулнӑ, обойсем ҫӗтелсе пӗтнӗ, таракансем ӗрчесе кайнӑ. Аялти хутра пурӑнакан кӳршисем те ӑна пула шар курнӑ — ун хваттерӗнчен юхса тухнӑ шыв вӗсене сиен кӳнӗ.
Арҫынна шавланӑшӑн, кӳршисене лӑпкӑ пурӑнма кансӗрленӗшӗн пурӗ 320 хутчен административлӑ майпа явап тыттарнӑ. Ҫынсене вӑл вӗлерессипе хӑратнӑ, хваттерӗнче ют ҫӗршыв ҫыннисене регистрациленӗ.
Унта регистрациленне амӑшӗпе хӗре унта пурӑнайман. Ӗҫме юратакан арҫын пррехинче хӗре картлашка ҫинчен сирпӗнтерсе антарса янӑ, пуҫӗпе стенана ҫапнӑ.
Чӑваш Ене РФ ял хуҫалӑх министрӗ Оксана Лут килнӗ. Вӑл пирӗн патра пӗрре мар пулна-ха, анчах министр пек – пӗрремӗш хут.
Оксана Николаевна паян Шупашкарти «Пехет» агромаркета уҫнӑ ҫӗре хутшӑнать. Ҫавӑн пекех вӑл темиҫе агропромышленноҫ комплексне ҫитсе курӗ, инновацисене пурнӑҫа кӗртес ыйтусене сӳтсе явӗ.
Оксана Лут РФ ял хуҫалӑх министрӗнче 2024 ҫулхи ҫу уйӑхӗн 14-мӗшӗнченпе ӗҫлет. Унччен вӑл министрӑн пӗрремӗш ҫумӗ пулнӑ.
Атӑлта ҫӑлавҫӑсем путакан 27 ҫулти арҫынна ҫӑлнӑ.
Утӑн 15-мӗшӗнче 18:10 сехетре ҫӑлавҫӑсем Даниил Бильтяев тата Никита Козлов катерпа Атӑлта рейд ирттернӗ, шыва кӗме юраман вырӑнсене тӗрӗсленӗ.
Тӗп пляжран 200 метр аяккарах вӗсем путакан ҫынна асӑрханӑ. Малтан ӑна ҫӑлав ҫаврашки парса пулӑшма хӑтланнӑ. Анчах арҫын шыв айне кайнӑ. Бильтяев шыва чӑмса арҫынна тупнӑ, Козловпа иккӗшӗ ӑна ҫыран хӗррине илсе тухнӑ та тухтӑрсен аллине панӑ.
Шупашкарти «Хӗвеллӗ» микрорайонта «Хальхи тата иртни» мурала ӳкерсе пӗтернӗпе пӗрех. Ӑна «ФормАРТ» фестивале хутшӑнакан Яна Ежова ӳкерет.
Мурал Хӗвеллӗ бульварти 12-мӗш ҫурт стени ҫинче пулӗ. Яна ӑна пӗр эрне каялла ӳкерме тытӑннӑ. Халӗ ҫӳлти фона туса пӗтересси кӑна юлнӑ.
Палӑртмалла: Яна Чӑваш патшалӑх ӳнер музейӗнче ӗҫлет, И.Я.Яковлев ячӗллӗ Чӑваш патшалӑх педагогика университетӗнче магистратурӑра вӗрент.
-7.7 °C