Юпа уйӑхӗн 28-мӗшӗнче Шупашкарти трактор тӑвакансен культура кременӗнче «От сердца к сердцу» (чӑв. Чӗререн чӗре патне) уяв программи кӑтартнӑ. Ӑна кинемисемпе мучисен кунне халалланӑ.
Ҫав кун сцена ҫине вокалӑн «Бэби-шлягер» эстрада студине, «Этуаль» хореографи студине, эстрада ташшин «Солнцеклеш» коллективне, «Суварята» ташӑ ансамбльне ҫӳрекенсем вокал тата хореографи номерӗсемпе тухнӑ.
Унсӑр пуҫне Владимир Егоров, Валентина Телей, «Икӗ аккорд» дуэт, Зоя Кириллова тата Григорий Павлов, Анастасия Власихина, Шупашкар районӗнчи Тутаркассинчи «БеЛаРа» ташӑ ушкӑнӗ куракансене хӑйсен пултарулӑхӗпе савӑнтарнӑ.
Шупашкарти «Рашча» автостанци патӗнче туалет кирли пирки хула ҫыннисем хула администрацине ҫырса янӑ. Анчах унтисем вӑл вырӑн автостанци е автовокзал мар, ахаль чарӑну ҫеҫ тесе хуравланӑ.
«Рашча» чарӑнура маршруткӑсем тӑма пуҫланӑранпа чылай ҫул ӗнтӗ. 2019 ҫулхи ҫу уйӑхӗн 1-мӗшӗнче Ҫӗнӗ салари автостанцие хупнӑ хыҫҫӑн маршруткӑсем ҫавӑнта чарӑнса лараҫҫӗ.
Анчах унта хула ертӳҫисем биотуалет лартасшӑн мар, «Coffeeoke» общество апатланӑвӗн точкинче туалет пур, унта кӗрсе тухма пулать тесе шухӑшлаҫҫӗ.
Шупашкар хула администрацийӗ йытӑ уҫӑлтарса ҫӳремелли вырӑнсене кӑҫал та уҫасшӑн. Пӗлтӗр хулара ун пек виҫӗ вырӑн йӗркеленӗ иккен.
Кӑҫал ун пек вырӑнсене хулан пур районӗнче те туса хурасшӑн:
Калинин районӗнче – Кадыков тата Шумилов урамӗсем пӗрлешекен лаптӑкра;
Ленин районӗнче – Ҫӗнӗ Лапсарти Совхоз урамӗнче;
Мускав районӗнче – Афанасьев урамӗнче.
Йытӑсем ҫӳремелли вырӑнсене карта тытса ҫавӑрӗҫ, унта балансир, дрессировка валли бум, юпасем, урнӑсем, тенкелсем тата ытти ҫавӑн пек япала вырнаҫтарӗҫ.
Палӑртнӑ ӗҫе кӑҫалхи раштав уйӑхӗн 12-мӗшӗччен вӗҫлемелле.
Ҫак кунсенче Шупашкартан 62 контейнер пӑрҫа, пӗтӗмпе 2 пине яхӑн тонна, Горький чукун ҫулӗпе Китая кайма тухнӑ. Кун пекки – пӗрремӗш хут. Унччен Чӑваш Енрен Китая пӑрҫа ӑсатман.
Пуйӑса вырӑнти производительсем туса илнӗ пӑрҫана тиенӗ. Вӑл Китая Казахстанӑн тухӑҫ пайӗ урлӑ кайӗ.
Сӑмах май, пӗлтӗр чӳк уйӑхӗнче республикӑна Китайран пуйӑс килнӗ. Ун чухне пирӗн пата промышленноҫ япаласине кӳрсе килнӗ.
Пӗр сехетре пӗр ҫын 20 сотӑй ҫӗрулми лартма пултарать.
Ку – юмах мар. Кунашкал хатӗре Шупашкарта пурӑнакан Владимир Выйгетов шухӑшласа кӑларнӑ. Чи малтан вӑл алӑ айӗнчи япаласенчен ҫӗрулми кӑлармалли хатӗр ӑсталанӑ, унтан – купаламалли. Халӗ ав ҫӗрулми лартмалли хатӗр шутласа тупнӑ. Ӑна ытти ҫынсем те килӗштернӗ. Ара, вӑл вӑхӑта та, вӑя та перекетлеме май парать.
Шупашкарта пурӑнакан 45 ҫулти хӗрарӑм усламҫӑ ултавҫӑсене 28 млн тенкӗ куҫарса панӑ. Йӑлтах икӗ эрне каялла пуҫланнӑ, ун патне «банк ӗҫченӗ» шӑнкӑравланӑ. Вӑл каланӑ тӑрӑх, банк унӑн счечӗ ҫинчи укҫана Украинӑна куҫарассине чарса лартнӑ. Ӗнентерме транзакци докуменчӗн сӑн ӳкерчӗкне те ярса панӑ. Кайран хӗрарӑмпа «ФСБ ӗҫченӗ» ҫыхӑннӑ: вӑл ӑна кивӗ счета хупса укҫана ҫӗнни ҫине куҫарма хушнӑ. Ҫитменнине, хӑратса пӗтернӗ: хушнине тумасан тӗрмене хупаҫҫӗ, ачине туртса илсе ача ҫуртне ӑсатаҫҫӗ-мӗн.
Хӗрарӑм кун хыҫҫӑн банка кайнӑ, счечӗ ҫинчи 20 млн тенке илнӗ. Унти ӗҫченсене вара суйнӑ: упӑшкинчен уйрӑлать, ҫавна май укҫана урӑх счет ҫине куҫарать-мӗн.
Кайран ҫак хӗрарӑм тата 8,7 млн тенкӗ кредит илнӗ. Ӑна та палламан ҫынсем каланӑ темӗнле счет ҫине куҫарнӑ. Ултавҫӑсем татах чарӑнман: тепӗр 5 млн тенкӗ ыйтнӑ. Хӗрарӑм тинех хӑйне улталанине ӑнланнӑ та полицие кайнӑ
Ӗнертенпе, юпа уйӑхӗн 26-мӗшӗнченпе, Шупашкарти аэропорт хӗллехи расписанипе ӗҫлеме пуҫланӑ.
«Победа» авиакомпани самолёчӗсем Шупашкартан Мускаври Шереметьево аэропорта кунне икӗ хутчен вӗҫӗҫ: ирхи 8 сехет те 40 минутра тата каҫхи 21 сехет те 40 минутра.
«Аэрофлот» авиакомпани самолёчӗ 19 сехетре ҫула тухма тытӑннӑ.
Санкт-Петербурга тунтикунсерен, ытларикунсерен, кӗҫнерникунсерен тата шӑматкунсерен 12 сехет те 25 минутра «Победа» самолёчӗпе вӗҫсе кайма май килӗ.
«Nordwind» Сочи тунтикунсерен 17 сехет те 15 минутра илсе ҫитерӗ, раштав уйӑхӗн 26-мӗшӗнчен вӑл кӗҫнерникун та ҫав вӑхӑтра вӗҫме пуҫлӗ.
«Азимут» авиакомпани тунтикунсерен Сургута 16 сехет те 20 минутра, Минеральные Воды хулине 20 сехет те 50 минутра илсе кайӗ. Чӳк уйӑхӗнченпе ҫав компани самолечӗсем шӑматкунсерен те Сургутпа Минеральные Воды хулисене вӗҫме пуҫлӗҫ.
Чӑваш ҫыравҫисем вилӗмсӗр вӗрентекенӗмӗре, аслӑран та аслӑ Иван Яковлева асра тытаҫҫӗ. Иртнӗ эрнере, юпа уйӑхӗн 23-мӗшӗнче, вӗсем Чӑваш Енӗн Наци вулавӑшӗ умӗнчи скверти Иван Яковлевӑн палӑке умне чӗре чечек хума пуҫтарӑннӑ.
Аса илтерер: паллӑ педагог, писатель 1848 ҫулхи ака уйӑхӗн 25-мӗшӗнче Тутарстанри Кӑнна Кушки ялӗнче ҫуралнӑ, 1930 ҫулхи юпа уйӑхӗн 23-мӗшӗнче Мускавра пурнӑҫран уйрӑлса кайнӑ.
Чечек хунӑ ҫӗре республикӑн культура министрӗ Светлана Каликова, культура учрежденийӗсенче ӗҫлекенсем, студентсем, преподавательсем, общество хастарӗсем те хутшӑннӑ.
Шупашкарта пурӑнакан пӗр ҫемье ҫулталлӑкри ачана татурировка тунине кӑтартакан видео ӳкернӗ, ӑна халӑх тетелӗнче вырнаҫтарнӑ.
Ҫав ҫемьене йӗрке хуралҫисем тупнӑ. Ҫамрӑк ашшӗ ӑнлантарнӑ тӑрӑх, вӗсем тату туман, тату машинин сассине ҫыртарса илнӗ. Вӑл видеопа темле конкурса хутшӑнса ҫамрӑк ҫемье хваттер щыраса илес тенӗ-мӗн.
Халӗ ку ҫемьене учета илӗҫ, йӗрке хуралҫисем вӗсем мӗнле пурӑннине тӗрӗслесе тӑрӗҫ.
Тивӗҫлӗ канури хӗрарӑм ултавҫӑсене укҫа парас тесе Мускавах самолетпа вӗҫнӗ.
Ку Шупашкарта пурӑнакан 78 ҫулти хӗрарӑмпа пулса иртнӗ. Вӑл ултавҫӑсене 1 млн та 700 пин тенкӗ куҫарса панӑ.
Ун патне домофон улӑштармалла тесе шӑнкӑравланӑ. Хӗрарӑм хӑйӗн даннӑйӗсене пӗлтернӗ, кун хыҫҫӑн унпа темиҫе палламан ҫын ҫыхӑннӑ: опер, юрист... Вӗсем ӑна хӑратса, пӑрахнӑ. Ҫапла вӑл мӗн хушнине пурнӑҫланӑ. Ӑна 75-ри арҫынпа тӗл пулма хушнӑ, унран 1 миллион тенкӗ илме ыйтнӑ. Ҫак арҫын та улталаннӑ. Унтан хӗрарӑма хӑйӗн укҫине хушса курьера парса яма каланӑ. Унӑн укҫа татах пуррине пӗлсен ултавҫӑсем ун валли Мускава самолетпа вӗҫме билет туянса панӑ.
Хайхи «юрист» ҫыхӑнӑва тухма пӑрахсан тин хӗрарӑм хӑйне улталанине ӑнланнӑ.
+7.3 °C