Шупашкарти 20-ри хӗр пӗрле пурӑнакан хӗр тусӗн апачӗ ҫине ҫывӑратакан эмел янӑ та унӑн 5 пин ытла тенкине вӑрланӑ.
Шар курнӑ хӗрарӑм укҫа ҫухалсан полицие кайнӑ. Йӑлтах каласа кӑтартнӑ: 5 пин те 400 пин тенке вӑл хваттер илме пухнӑ, ӑна банкра упранӑ. Кӑшт маларах унран пӗрле пурӑнакан 20 ҫулти хӗр укҫа ыйтнӑ иккен. Ҫавӑнпа полици укҫана вӑл вӑрлама пултарать тесе шухӑшланӑ.
Чӑнах та, кайран ҫакӑ палӑрнӑ: 20-ри хӗр патне ултавҫӑсем шӑнкӑравланӑ, вӗсене ӗненсе вӑл хӑйӗн 700 пин тенкине куҫарса панӑ. Лешсем ӑна тусӗн укҫине те «деклараци» тумаллине ӗнентернӗ, укҫана курьера пама, Чулхулана кайса унта «ФСБ ӗҫченӗсенчен» хушу кӗтме хушнӑ. Хӗр тусӗ нимӗн те ан систӗр тесе вӑл унӑн апачӗ тата чейӗ ҫине ҫывӑратакан эмел янӑ. Лешӗ ҫывӑрнӑ чухне ултавҫӑсем хушнине пурнӑҫланӑ та.
20-ри хӗр тӗлӗшпе пуҫиле ӗҫ пуҫарнӑ.
Паян Шупашкарта Гузовский урамӗнче «Хендай» кроссовер «Ҫутҫанталӑк» чарӑну ҫине пырса кӗнӗ. Ку кӑна мар, павильона витӗр шӑтарса тухнӑ.
Ку 11 сехет тӗлӗнче Маяковский вулавӑшӗ енче пулнӑ. Иномарка хирӗҫ ҫул ҫине тухса кайса чарӑну павильонӗ ҫине пырса тӑрӑннӑ. Малтанлӑха пӗлтернӗ тӑрӑх, аманнисем пур.
Вырӑнта ҪҪХПИ тата васкавлӑ мудпулӑшу ӗҫлеҫҫӗ.
Паян, раштавӑн 15-мӗшӗнчен, Шупашкарта елка пасарӗсем ӗҫлеме тытӑннӑ. Вӗсем раштавӑн 31-мӗшӗччен ӗҫлӗҫ.
Пӗтӗмпе 15 вырӑнта чӑрӑш сутаҫҫӗ: Трактор тӑвакансен проспекчӗ («Шупашкар» суту-илӳ ҫурчӗ ҫывӑхӗнче, 45-мӗш тата 71-мӗш ҫуртсем патӗнче), Гагарин урамӗнчи 29-мӗш ҫурт, Ильбеков урамӗнчи 7/2-мӗш ҫурт, Хузанкай урамӗнчи 22-мӗш ҫурт, К. Маркс урамӗнчи 52-мӗш ҫурт, Павлов мичман урамӗнчи 39-мӗш ҫурт, Энтузиастсен урамӗ (31-мӗш ҫурт ҫывӑхӗнче тата «ДК Салют» чарӑну патӗнче), Эльгер урамӗ (фермерсен мини-пасарӗнче), Афанасьев урамӗ (суту-илӳ картишӗнче), Мускав проспектӗнчи 40-мӗш ҫурта («Ахазов урамӗ») чарӑну патӗнче, М. Горький проспекчӗ («Арктика» лавкка патӗнче).
Раштавӑн 20-мӗшӗнче вара Хӗрлӗ тӳремре Хӗл Мучи резиденцийӗ ӗҫлеме тытӑнӗ. Унта тӳлевсӗрех кӗртеҫҫӗ.
Шупашкар хулинче пурӑнакан икӗ хӗр Ехрем хуҫа купса ячӗллӗ бульвара машинӑпа пырса кӗнӗ. Унта Ҫӗнӗ ҫул умӗн ҫутӑ маччи вырнаҫтарнӑ. Пикесем шӑпах ҫавӑн патӗнче машинӑпа сӑн ӳкерӗнес тенӗ.
Кӗҫех вӗсене йӗрке хуралҫисем чӗнсе илнӗ. 27 ҫулти ҫак пикесене ҫуран ҫӳрекенсем валли туса панӑ урама машинӑпа пырса кӗнӗшӗн административлӑ майпа явап тыттарма йышӑннӑ. Вӗсенчен пӗрне, «БМВ» машинӑн водительне, ют номерпе усӑ курнӑ тесе шухӑшлаҫҫӗ, ҫавна та тӗрӗслӗҫ.
Шупашкарти маркетплейс ӗҫченӗ тавар вӑрланӑ. Раштав пуҫламӑшӗнче Шупашкарти тавар паракан пунктран маркетплейс складне пушӑ темиҫе курупка таврӑннӑ. Хӑрушсӑрлӑх службин ӗҫченӗсем йӗрке хуралҫисенчен пулӑшу ыйтнӑ. Вӗсем тавар паракан пунктра ӗҫлекен 21 ҫулти хӗр йӗрӗ ҫине часах тухнӑ.
Вӑл хӑйӗн тата тӑванӗсен ячӗпе тавар саккас панӑ, ҫав шутра ылтӑн вӑчӑра, хаклӑ гаджетсем пулнӑ. Хӗр вӗсене илсе юлса тавара каялла ӑсатанҫи тунӑ. Ҫапла майпа 300 пин тенкӗ ытла тенкӗлӗх япала вӑрланӑ.
Шупашкар хулинчи ватӑсем ӳкерме вӗренеҫҫӗ. Кун пек заняти хулари халӑхӑн социаллӑ ыйтӑвӗсене тивӗҫтерекен комплекслӑ центрта иртет.
Учрежденин «Манӑн социаллӑ центрӗ» клубне ҫӳрекенсем валли «Рисование с нуля» (чӑв. Ӳкерме вӗренетпӗр) ӑсталӑх лаҫҫи ӗҫлеме тытӑннӑ. Занятие Елена Шапошникова педагог тата хальхи вӑхӑтра ӗҫлекен художник, ӳкерекенсен онлайн-шкулӗн преподавателӗ ертсе пырать. Ӑсталӑх лаҫҫи эрнере пӗрре, кӗҫнерникунсерен, ӗҫлӗ.
Ҫӗнӗ ҫулти уявсенче тата канмалли кунсенче Шупашкарта пиротехникӑпа усӑ курассине чикӗлӗҫ. Кун пирки Инкеклӗ лару-тӑрӑва асӑрхаттарас тата пӗтерес енӗпе ӗҫлекен комисси ларӑвӗнче пӗлтернӗ.
Шупашкарта тата Ҫӗнӗ Шупашкарта раштавӑн 25-мӗшӗнчен пуҫласа кӑрлачӑн 11-мӗшӗччен пушара хирӗҫ режим вӑйра пулӗ. Ҫавна май уявсенче пиротехникӑпа ирӗклӗн усӑ курма чарӗҫ. Хальлӗхе ӑҫта тата мӗнле усӑ курма юраманни пирки пӗлтермен.
Иртнӗ ҫулсенче вара ҫак икӗ хулара пиротехникӑпа усӑ курмалли ятарлӑ лапамсем пулнӑ.
Ӗнер Шупашкар хулинчи Депутатсен пухӑвӗн черетсӗр ларӑвӗнче хула пуҫлӑхне суйланӑ. Ку тилхепене Станислав Трофимова шаннӑ.
«Станислав Трофимов — ҫамрӑк та тухӑҫлӑ ӗслеме пӗлекен ертӳҫӗ. Вӑл Етӗрне тӑрӑхне ертсе пынӑ чухне хӑйне тивӗҫлипе кӑтартса пачӗ. Вӑл вӑхӑтра унта сахал мар ҫул юсанӑ; музейсене, ача пахчисемпе шкулсене, халӑх ҫӳрекен вырӑнсене ҫӗнетнӗ», — ырланӑ республика Элтеперӗ Станислав Трофимова.
Пирӗн ентеш Адель Редькова Мускаври илем конкурсӗнче ҫӗнтернӗ. Унта пирӗн Чӑваш Ен чысне Шупашкарти тата Ҫӗнӗ Шупашкарти чиперккесем хӳтӗленӗ.
Ҫӗнӗ Шупашкарти Адель Редькова «Чи пӗчӗк принцесса» тата «Чи пӗчӗк МартинМедиа мисӗ» ята тивӗҫнӗ. Ӑна Турцире канмалли путевка парса хавхалантарнӑ.
Адель халӗ ҫӗршыв чысне Грузире иртекен Пӗтӗм тӗнчери илем конкурсӗнче хӳтӗлме хатӗрленет.
Муркаш округӗнчи Оринин ялӗнче пурӑнакан Васильевсем пӗрлешнӗренпе 55 ҫул ҫитнӗ. Вӗсем 3 хӗр те 2 ывӑл ҫуратса ӳстернӗ. Халӗ вӗсен 7 мӑнук тата 2 кӗҫӗн мӑнук пур.
Вячеслав Прохорович салтакра чухне «1-мӗш класлӑ радист» палла тата Морзе азбукине йышӑнассипе пӗрремӗш разряд илнӗ. Ҫартан таврӑнсан культура тытӑмӗнче ӗҫленӗ, Орининти культура ҫурчӗн директорӗ, киномеханикӗ пулнӑ. Халӗ вара халӑх театрне выляма ҫӳрет. Вӑл – ЧР культурӑн тава тивӗҫлӗ ӗҫченӗ.
Галина Ивановна Шупашкарти кулинари училищинчен вӗренсе тухсан поварта 37 ҫул ӗҫленӗ.
+21.3 °C