Ҫурла уйӑхӗн 13-мӗшӗнче Шупашкар хулин Кӑнтӑр-хӗвеланӑҫ районӗнче виҫӗ арҫын ҫапӑҫнӑ. Ҫавна видео ӳкерсе илекенсем пулнӑ. Ӑна тӗнче тетелӗнчи халӑх ушкӑнӗсенче вырнаҫтарнӑ.
Эльмен урамӗнчи харкашӑва патрульпе пост службин нарячӗ асӑрханӑ. Пакунлисем самантрах хушша-хуппа кӗнӗ.
Полицие ҫапӑҫакансенчен иккӗшне лартса кайнӑ, вӗсен тӗлӗшпе административлӑ протокол ҫырнӑ. Ҫав арҫынсем йӗрке хуралҫисем лӑпланма, обществӑри лӑпкӑлӑха упрама ыйтнине итлемен.
Ҫапӑҫӑва хутшӑннӑ виҫҫӗмӗш ҫынна та ҫывӑх вӑхӑтра шыраса тупӗҫ.
Паян ирхи 6 сехет те 40 минутра Шупашкарти Гастелло урамӗ патӗнчи чарӑнура Ҫӗнӗ Шупашкара каякан 220-мӗш маршрутка ҫул хӗрринче ларакан фура ҫине пырса кӗнӗ. Салонра пассажирсем пулнӑ: пӗтӗмпе 10. 11-мӗшӗ – водитель. Юрать-ха, вӗсен йышӗнче ачасем пулман.
Водитель аманман. Пӗтӗм пассажира пульницӑна илсе ҫитернӗ. 4 ҫынна тухтӑрсен пулӑшӑвӗ кирлӗ пулнӑ. Ҫул хӗрринче ларакан фурӑна вара 1500 тенкӗлӗх штрафланӑ.
Шупашкарта тӑнне ҫухатнӑ арҫын патне васкавлӑ медпулӑшу сирена ҫутса хӑвӑрт ҫитнӗ.Сергей Васильев фельдшер тата Кирилл Мясников медбрат арҫын тӑнне кӑна ҫухатманнине, темле япалапа наркӑмӑшланнӑран комӑна кӗрсе ӳкнине ӑнланнӑ. Вӗсем реанимаци тума пуҫланӑ.
Пациент 5-10 минутлӑха сывлама пӑрахнине кура тухтӑрсем унӑн сывлав ҫулне аспираторпа тасатнӑ, сывлама пулӑшакан укол тунӑ. Ҫапах арҫын комӑран тахман. Анчах фельдшерпа медбрат сывлӑх кӑтартӑвӗсене йӗркене кӗртнӗ, унтан пульницӑна илсе кайнӑ. Лере пациента комӑран кӑларнӑ.
Ҫурла уйӑхӗн 12-мӗшӗнче Шупашкар хулинчи Дементьев урамӗнчи 15-мӗш ҫуртӑн 2-мӗш ҫуртӑн подьезчӗ умӗнче ҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.
Малтанлӑха пӗлтернӗ тӑрӑх, вӑл 8-мӗш хутран ӳкнӗ. Хӑй 50-55 ҫулсенчи пек курӑнать. Васкавлӑ медпулӑшу киличчен арҫын вилнӗ.
Следстви комитечӗ пӗлтернӗ тӑрӑх, халӗ ӗҫ-пуҫа уҫӑмлатаҫҫӗ.
Шупашкарта Раҫсейре халиччен пулман ӑшӑпа тивӗҫтерекен мультимеди центрӗ ӗҫлӗ. Вӑл ҫынсене ҫурла уйӑхӗн 24-мӗшӗнчен пуҫласа авӑн уйӑхӗн 6-мӗшӗччен йышӑнӗ.
Ӑшӑ энергетикин музейӗ — мультимеди комплексӗ. Ӑшӑ электричество станцийӗ епле ӗҫленине, хӑш топливо энергие пуринчен ытла упрани ҫинчен, хӗлле хватерте ытла пӑчӑ е ытла сивӗ пулсн камран пулӑшу ыйтмалли таранах ҫынсем унта пӗлейӗҫ.
Стратеги коммуникацийӗсен регионти центрӗн ертӳҫи Олег Сидоров пӗлтернӗ тӑрӑх, кмоплексра ачасем валли интерактивлӑ вӑйӑсем йӗркеленӗ.
Мультимеди центрне тӳлевсӗр кӗртӗҫ. Унта пулса курас тесен +7 908 840 84 04 телефонпа ирхи 10:00 сехетрен 19:00 сехетчен шӑнкӑравламалла е teplomuseum.ru сайта кӗмелле. Экскурсие ҫырӑнма 3 минутран ытла вӑхӑт иртмӗ.
Интерактивлӑ курав «МегаМолл» суту-илӳ центрӗн аялти парковкинче (Шупашкар хулин, Калинин урамӗ, 105 А ҫурт) вырнаҫнӑ. Музей ҫурла уйӑхӗн 24-мӗшӗнче 12 сехетре уҫӑлӗ.
Кӗҫнерникун, ҫурла уйӑхӗн 11-мӗшӗнче, Шупашкарти нумай хваттерлӗ ҫуртсенчен пӗринче пушар тухнӑ. Инкек Чернышевский урамӗнчи 23-мӗш ҫуртра пулса иртнӗ.
Нумай хваттерлӗ тӑхӑр хутлӑ ҫуртри пӗр пӳлӗмлӗ хваттер кӑнтӑрла иртни 2 сехет тӗлӗнче ҫунма тытӑннӑ. Пушар кухньӑра тухнӑ. Унти япаласем тата сӗтел-пукан ҫунса кайнӑ.
Инкекре 31 ҫулти хӗрарӑм шар курнӑ — ӑна сӗрӗм тивнӗ. Хӗрарӑма тухтӑрсем пулӑшнӑ. Пушарпа кӗрешекенсем вут-ҫулӑма 20 минутра сӳнтернӗ.
Ӗнер «ЮВИ Аэро» авиакомпани ҫӗнӗ рейссем тунӑ. Сӑмах – Шупашкартан Сургута вӗҫесси. Кун пирки сайтра пӗлтернӗччӗ.
Пӗрремӗш рейспа Шупашкартан Ханты-Манси автономи округне 30 ҫын вӗҫнӗ. Сургутран Шупашкара вара 8 пассажир килнӗ. Борта пӗтӗмпе 50 ҫын вырнаҫать. Самолет пирӗн хулара 19 сехет те 10 минутра анса ларнӑ.
Ҫул ҫинче 2 сехет те 50 минут иртет. Шупашкартан Сургута эрнере икӗ хутчен вӗҫӗ: кӗҫнерникун тата шӑматкун. Аэропортран самолет 20 сехетре ҫӗкленӗ.
Ҫурла уйӑхӗн иккӗмӗш вырсарникунӗнче пирӗн ҫӗршывра Строительсен кунне уявлаҫҫӗ. Ҫавӑн умӗн республика шайӗнче уяв ирттереҫҫӗ. Унта Чӑваш Енри ятлӑ-сумлӑ строительсене — организацисене ертсе пыракансенчен пуҫласа палтниксене таранах — чыслаҫҫӗ.
Ҫурла уйӑхӗн 11-мӗшӗнче республика Элтеперӗ Олег Николаев темиҫе ҫынна патшалӑх наградисемпе чыслама йышӑннӑ. «Отделфинстрой» специализациленнӗ застройщикӑн директорне Александр Черкунова Чӑваш Республикин Хисеп грамотине пама палӑртнӑ. 15 ҫын «Чӑваш Республикин тава тивӗҫлӗ строителӗ» ята тивӗҫнӗ. Вӗсен йышӗнче — Шупашкарти 29-мӗш строительство управленийӗнчи Николай Рыбаков тата Шупашкарти 7-мӗш стройтрестри Сергей Скворцов платниксем.
Васкавлӑ межпулӑшу службинче ӗҫлекен ҫамрӑк фельдшерсем Шупашкарти арҫыннӑн пурнӑҫне ҫӑлнӑ. Вӑл эмел ӗҫнӗ те унӑн аллерги пуҫланнӑ. Арӑмӗ часрах тухтӑрсене чӗннӗ.
Сергей Васильев фельдшерпа Анна Павлова медсестра васкавлӑ медпулӑшура нумай вӑхӑт ӗҫлемеҫҫӗ пулин те опыт пухма ӗлкӗрнӗ. Анафилактика шокӗпе вара пӗрремӗш хут тӗл пулнӑ.
Арҫыннӑн пырӗ шыҫӑнса кайнӑ, ҫавӑнпа ӑна сывлама йывӑрланнӑ, чӗре таппи чакнӑ, чӗре ӗҫӗ пӑсӑлнӑ. Фельдшерпа медсестра арҫынна шокпа кӗрешмелли процедурӑсем тунӑ. Кӗҫех унӑн сывлӑхӗ йӗркеленнӗ те ӑна пульницӑна илсе кайнӑ.
Паян – Совет Союзӗн икӗ хут Паттӑрӗ Андриян Григорьевич Николаев космоса пӗрремӗш хут вӗҫнӗ кун. Вӑл унта 1962 ҫулхи ҫурлан 11-мӗшӗнче ҫӗкленнӗ. Унтанпа 60 ҫул ҫитнӗ.
Ҫак пулӑма халалласа республикӑра меропряитисем иртӗҫ. Вӗсем Шупашкарта тата Сӗнтӗрвӑрри районӗнчи Шуршӑл ялӗнче пулӗҫ. Митинг, велочупу, курав тата ытти мероприяти иртӗ.
Паян республикӑра сумлӑ хӑнасем пулӗҫ: РФ Паттӑрӗ, летчик-космонавт Юрий Маленченко, РФ Паттӑрӗ, летчки-космонавт Олег Скрипочка, Мускаври чӑваш наци культурин автономийӗн председателӗ Анатолий Григорьев, Павел Попович космонавтӑн хӗрӗ Наталия Березная, ҫар ӑслӑлӑхӗсен докторӗ Иван Николаев.
+7.3 °C