Питӗрте пурӑнакан чӑвашсем Сурхури уявне паллӑ тунӑ. Вӗсем ку мероприятие «Хамӑрӑн йӑла-йӗркене упратпӑр» проектпа килӗшӳллӗн йӗркеленӗ. Уява вырӑнти чӑвашсен наципе культура автономийӗн хастарӗсем, артистсем, ӳнерҫӗсем хутшӑннӑ.
Пухӑннисем Сурхури уявӗ пирки калаҫнӑ. Ирина Кондакова Сурхури сӑввисемпе паллаштарнӑ. Екатерина Павлова тата «Юрату» фольклор ансамблӗн солисчӗсем вара халӑх юррисемпе савӑнтарнӑ.
Чӑваш Ен Элтеперӗ Олег Николаев МАХри хӑйӗн каналӗнче «Хыпар» хаҫата саламлакан чӑвашла тата вырӑсла пост вырнаҫтарнӑ.
«120 ҫул халӑхпа пӗрле!
Паян эпир «Хыпар» хаҫатӑн – Раҫҫейри чи ватӑ наци хаҫачӗсенчен пӗрин – пирӗн республикӑн кулленхи пурнӑҫне ҫутатса тӑракан кӑларӑмӑн юбилейне паллӑ тӑватпӑр.
Ҫулсем иртнӗҫемӗн хаҫат ячӗ темиҫе те улшӑннӑ, анчах та вӑл Николай Никольский халалне – чӑваш халӑхӗн ырлӑхӗшӗн ӗҫлессине – яланах тӗп вырӑна хунӑ.
Хаклӑ ӗҫтешсем тата хаҫат ветеранӗсем! Сире пархатарлӑ ӗҫӗршӗн, тӳрӗ кӑмӑлӑршӑн тата профессие чунтан юратнӑшӑн тав тӑватӑп. Пултарулӑх ӗҫӗнче вӑй-хал тата вулакансен йышне ӳстерсе пыма сунатӑп. Уявпа!» — тесе ырӑ суннӑ Олег Николаев.
Кӑрлач уйӑхӗн 23-мӗшӗнче Чӑваш Енӗн Наци вулавӑшӗ учрежденин 155 ҫулхине халалланӑ юбилей каҫне ирттерӗ.
«В кругу друзей» (чӑв. Туссемпе пӗрле) ят панӑ мероприятие вулавӑша кӗнеке вулама ҫӳрекенсемпе библиотека ӗҫӗн ветеранӗсене йыхравлӗҫ. Ҫав кунах «Люблю! Читаю! Дарю!» (чӑв. Юратӑп! Вулатӑп! Парнелетӗп!) ыркӑмӑллах кӗнеке марафонӗ пуҫланӗ. Кӗнеке фондне пуянлатма пулӑшнисене тӗрлӗ майпа чыслӗҫ.
Уява «Бард-ковчег» автор юррин клубӗ, «Эхо» пӗрлешӳ, «Эткер» фольклор студийӗ хутшӑнӗҫ.
Мероприяти вулавӑшӑн акт залӗнче 14 сехетре пуҫланӗ.
Кӑрлачӑн 16-мӗшӗнче, Артист кунӗ умӗн, К.В.Иванов ячӗллӗ Чӑваш патшалӑх драма театрӗнче ҫак уява паллӑ тунӑ.
Унта театр, филармони, Чӑваш патшалӑх академи юрӑпа ташӑ ансамблӗн, капелла артисчӗсем пухӑннӑ. Уяв умӗн Театр ӗҫченӗсен пӗрлӗхӗн пайташӗсем театр искусствине халалланӑ артистсене аса илнӗ, Богдан Хмельницкий урамӗнчи Мухтав аллейине ҫитсе вӗсен вилтӑприсем ҫине чечексем хунӑ.
ЧР культура министрӗ Светлана Каликова чи лайӑх артистсене патшалӑх наградисем панӑ. Чӑваш патшалӑх юрӑпа ташӑ ансамблӗн артисчӗсем хаваслӑ юрӑсемпе савӑнтарнӑ.
Шупашкарта пурӑнакан, Корея вӑрҫине хутшӑннӑ Георгий Александров 98 ҫул тултарнӑ.
Ӑна ҫуралнӑ кунпа саламлама Ленин районӗн Патшалӑх хӳтӗлевӗ тата инкеклӗ лару-тӑру енӗпе ӗҫлекен штаб пуҫлӑхӗ Александр Кузнецов килнӗ. Вӑл Георгий Александрова РФ Президенчӗн Владимир Путинӑн саламлӑ открыткине тата асӑнмалӑх парнесем панӑ.
Шупашкарти Рспублика тӳремӗнче вырнаҫтарнӑ тӗп ёлка Пӗтӗм Раҫҫейри «Раҫҫей ёлкисем» конкурса хутшӑнать.
Конкурс раштавӑн 25-мӗшӗнче пуҫланнӑ. Кӑҫал Шупашкарти тӗп ёлка ҫине 500 тетте ҫакнӑ, вӗсенчен 70-шӗ ҫутатать.
Шупашкарти ёлкӑшӑн кӑрлачӑн 9-13-мӗшӗсенче сасӑлама май пур. Ҫак каҫӑ ҫине кӑна пусмалла: vk.com/art.goroda_rossii. Пирӗн ёлкӑна ҫӗнтерме пулӑшӑр!
Паян Раштав кӗлли Шупашкарти Введени кафедра соборӗнче пулӗ. Ӑна Шупашкар тата Чӑваш митрополичӗ Савватий ирттерӗ. Ӑна 22:00 сехетре Наци телекуравӗпе тӳрӗ эфирта курма май пулӗ. Комментаторӗ Введени соборӗн клирикӗ, вырсарни шкулӗн преподавателӗ Александр Михайлов иерей пулӗ.
Наци телекуравӗ ҫавӑн пекех Муркаш округӗнчи арҫынсен Александр Невский храмӗнче иртекен кӗлле те кӑтартӗ.
Шупашкар районӗнчи Вӑрманкасси ялӗнче пурӑнакан Селедкинсем пирки Пӗрремӗш каналпа каласа кӑтартнӑ.
Ҫак ҫемье кашни ҫулах Ҫӗнӗ ҫул умӗн хӑйсен кил-ҫуртне тӗлӗнсе каймалла илемлӗ капӑрлатать иккен. Тата тӗрӗсрех каласан, 12 ҫул ҫапла тӑвать-мӗн. Тӗрле кӳлепе ӑсталама та юратать ҫемье.
Раштав уйӑхӗн 29-мӗшӗнче ку ҫемье ҫинчен Пӗрремӗш канал сюжет кӑтартнӑ.
Кил хуҫи, электрик пулса ӗҫлекен Александр, кашни ҫулах ҫак вӑхӑтра виҫӗ эрнелӗх отпуск илет. Мӑшӑрӗпе пӗр шухӑшлӑ пулса вӗсем кил-ҫурта капӑрлатаҫҫӗ. Кӑҫал 600 метр гирлянда кирлӗ пулнӑ.
Ҫӗнӗ Шупашкарта та Хӗл Мучин резиденцийӗ ӗҫлеме пуҫланӑ. Вӑл ачасене ӗнертенпе йышӑнать.
Резиденци Тӗкӗрҫ рашчинче вырнаҫнӑ. Вӑл раштав уйӑхӗн 31-мӗшӗччен 11 сехетрен пуҫласа 18 сехетчен ӗҫлет. Кӑрлачӑн 1-мӗшӗнче ачасене 14:00-18:00 сехетсенче йышӑнать. Кӑрлач уйӑхӗн 2-11-мӗшӗсенче вара 11 сехетре уҫӑлать те 18 сехетчен ӗҫлет.
Аса илтерер: Шупашкарта та Хӗл Мучи резиденцийӗ ӗҫлет. Вӑл кӳлмекре вырнаҫнӑ.
ЧР Элтеперӗ Олег Николаев Пӗтӗм Раҫҫейри «Ӗмӗтсен ёлки» акцие хутшӑннӑ. Вӑл чӑрӑш ҫинчен виҫӗ тетте илнӗ, вӗсенче – ачасен ӗмӗчӗсем.
Олег Алексеевич 13 ҫулти Федора телескоп парнелӗ, Аринӑна – балансборд. 15 ҫулти Никитӑна вара кӗтмен парнепе савӑнтарӗ.
Чӑваш Енри хӗрарӑмсен пӗрлӗхӗн председателӗ Наталья Николаева Шупашкарти 5-ри Ульянӑн, Ҫӗнӗ Шупашкарти Кирӑн тата Шупашкар округӗнчи Чӗркаш ялӗнчи Дарьйӑн ӗмӗчӗсене пурнӑҫлӗ.
+2.3 °C