Утӑ уйӑхӗн 23-мӗшӗнче Росреестрӑн Чӑваш Енри управленийӗ тӳрӗ лини йӗркелет. Ҫав вӑхӑтра шӑнкӑравлакансем куҫман пурлӑхӑн кадастр хакӗпе ҫыхӑннӑ ыйтӑва уҫӑмлатайӗҫ. Специалистсем хак тивӗҫтермесен мӗн тумаллине ӑнлантарӗҫ, ӑна ҫӗнӗрен пӑхса тухмалли йӗрке ҫинчен каласа кӑтартӗҫ.

Ҫынсен ыйтӑвӗсене Росреестрӑн Чӑваш Енри управленийӗн куҫман пурлӑхӑн кадастр хакӗн пайӗн пуҫлӑхӗ Светлана Андреева уҫӑмлатӗ. Шӑнкӑравсене вӑл ирхи 10 сехетрен пуҫласа кӑнтӑрлахи 12-ччен йышӑнӗ. Ыйтса пӗлмелли телефон номерӗ — 8 (8352) 34-68-07.

Росреестрӑн специалисчӗсем управленире пурлӑхӑн кадастр хакне тишкерекен комисси ӗҫленине аса илтереҫҫӗ. Ӗҫлӗ ушкӑн ял хуҫалӑх тӗллевӗллӗ, ялсен, ятарлӑ хуралламалли ҫӗрсен хакне ҫӗнӗрен пӑхса тухать. Ҫапах та кунта пӗр анчах пур. Кадастр хакне палӑртса Патшалӑхӑн пӗрлехи реестрне ҫырса хунӑ хыҫҫӑн пилӗк ҫул иртсен хака комисси тишкермӗ. Кун пек чух суда тавӑҫпа ҫитме тивӗ.

Чӑваш Енри хыснаран нумай ачаллӑ ҫемьесене пулӑшас тӗллевпе 800 миллион тенкӗ уйӑрнӑ. Кун пирки ТАСС пӗлтерет.

Палӑртмалла: пирӗн республикӑра нумай ачаллӑ 12 пин ытла ҫемье пурӑнать. Ку уйӑхра 3814 кунашкал ҫемье пособи илнӗ. Ку тӗллевпе хыснари 40 миллион ытла тенкӗ тӑкакланнӑ.

Правительство пӗлтернӗ тӑрӑх, кӑҫал виҫҫӗмӗш е ун хыҫҫӑнхи ача ҫуралнӑшӑн пособи тӳлемешкӗн 793,6 миллион тенкӗ уйӑрнӑ. Анчах ӑна пур ҫемье те тивӗҫеймест. Кунашкал пособие илес тесен ҫемье тупӑшӗ Чӑваш Енре пӗр уйӑхра пурӑнма кирлӗ укҫа виҫинчен ытларах пулмалла мар.

Вӑрнар районӗнчи Туҫи Ҫармӑс ялӗнче халӑх шучӗпе ҫул юсанӑ. Тӗрӗсрех каласан, вырӑнти пуҫарулӑх программипе.

820 метр тӑршшӗ ҫула вак чул сарса хытарнӑ. Ӑна савӑнӑҫлӑ лару-тӑрура, хӗрлӗ хӑю касса, шар ҫаксах уҫнӑ. Мероприятие Вӑрнар район администрацийӗн пуҫлӑхӗ Леонид Николаев, Мӑн Явӑш ял тӑрӑхӗн пуҫлӑхӗ Сергей Волков, подряд организацийӗн (вӑл — А.Г. Ефимова усламҫӑ) ӗҫченӗсем, ял ҫыннисем пухӑннӑ.

Ҫула кӗске вӑхӑтра юсанӑ. Ӑна епле сарни ял ҫыннисене тивӗҫтерет. Подряд организацийӗн ӗҫ-хӗлне халӑх сӑнасах тӑнӑ. Вак чул сарнӑ ҫул 5 урама ҫыхӑнтарать.

Тӳре-шара пуҫарулӑх программине хутшӑннӑшӑн ял ҫыннисене тав тунӑ. Вырӑнтисем хӑйсен укҫи-тенкине шеллеменнине кура хыснаран та «нухрат» уйӑрнӑ.

Раҫҫей Федерацийӗнче пурӑнакансем 34,5 пин тенкӗрен сахалтарах ӗҫлесе илеҫҫӗ. Пурте мар. Пирӗн ҫӗршыв ҫыннисенчен ҫурри ытла пӗчӗк шалупа пурӑнать. Ӗҫ укҫине Росстат тишкернӗ.

Уйрӑмах пысӑк укҫа илекенсем — 10 процент. Уйрӑмах пӗчӗк укҫа илекенсем — 10 процент. 13 хут уйрӑлса тӑрать вӗсен тупӑшӗ. Пысӑк тата вӑтам предприятисенче ӗҫлекенсенчен ҫурри ытла 34 335 тенкӗрен сахалтарах ӗҫлесе илет. Ака уйӑхӗнче ҫавӑн чухлӗ тухнӑ пирӗн ҫӗршывра ӗҫлесе пурӑнакансен уйӑхсеренхи шалӑвӗ.

Пысӑк тата вӑтам предприятисене шута илмесен Раҫҫей ҫыннисен ӗҫ укҫийӗ тата пӗчӗкрех ларать тенӗ Экономикӑн аслӑ шкулӗн ӑслӑлӑхпа тӗпчев университечӗн ӗҫ тӗпчевӗсен центрӗн директорӗ Владимир Гимпельсон. Вӑл — социолог.

Чӑваш Республикин тӗп хулинчи масарсенчен пӗринче вӑрӑсем ҫӳренӗ. Явӑшра.

Пӑтӑрмах ҫинчен утӑн 17-мӗшӗнче полицине 61 ҫулти арҫын пӗлтернӗ. «Киа» автомобиль чӳречине палламан ҫынсем ватрӗҫ тенӗ вӑл. Вырӑна полицейскисене чӗнсе илнӗ арҫын.

Палламан ҫынсем сумка тата портфель кӑларса илнӗ. 20 000 тенкӗ ытла тӑкак кӑтартнӑ.

Вӑрлакан арҫынпа хӗрарӑма тытса чарма ҫынсем пулӑшнӑ. Машинӑри сумкӑсене 35 ҫулти арҫынпа 46-ри хӗрарӑм пӗҫертнӗ. Арҫын судпа темиҫе те айӑпланнӑ. Хӗрарӑмӗ унпа пурӑннӑ.

Сумкӑпа портфеле вӑрманта пытарнӑ вӗсем. Вӗсене полицейскисен йытти шыраса тупнӑ.

Вӑрӑсем унччен те хурахла хӑтланман-ши тесе тӗрӗслеҫҫӗ халӗ пакунлисем. Арҫынпа хӗрарӑм пирки пуҫиле ӗҫ пуҫарнӑ.

Леонид Волков экс-полпред Чӑваш Ен хыснинчен укҫа шыраса илмӗ. Хӑйӗн тӗлӗшпе пуҫиле ӗҫ пуҫаричченех, 2015 ҫулта, вӑл хӑйӗн премине тавӑрса панӑ. Ытлашшипех. Ҫакӑн пирки вӑл «Правда ПФО» тӗнче тетелӗнчи хаҫата паян пӗлтернӗ. Экс-полпред преми илсе чӑнах та йӑнӑшрӑм, хыснана тӑкак кӳтӗм пуль тесе шухӑшланӑран ҫапла тунӑ. Хӑйӗнчен шыраса илес тенинчен миллион тенкӗ ытларах куҫарса панӑ.

Ӗнер Леонид Волкова суд тинех ирӗке кӑларнӑ. Экс-полпред тӗлӗшпе пуҫарнӑ пуҫиле ӗҫе вара чарса лартнӑ, Леонид Волкова 40 пин тенкӗ штраф панипе ҫырлахнӑ.

Бюджета ытлашшипех тавӑрса панӑ укҫана экс-полпред шыраса илесшӗн мар. «Эпӗ укҫашӑн ҫунакан ҫын мар. Чӑваш Ен вара дотацилле республика. Следстви вӑхӑтӗнче ҫавна темиҫе те палӑртрӗҫ. Нихҫан сӳнми ҫулӑм палӑк патне хума гвоздика туянса Чӑваш Ен хыснине самай тӑкак кӳнӗ терӗҫ. Ҫавна пулах ӗҫе Мускава парасшӑн марччӗ. Эпӗ ытлашшипех тӳленӗ укҫа республика хыснине пулӑшни пулчӗ тесе шутлӑпӑр», — тенӗ Леонид Волков.

Чӑваш Енре пурӑнакан хӗрарӑма тӗнче тетелӗнче ҫынна улталанӑшӑн суд штрафӗ тӳлеттернӗ. Кун пирки ШӖМ пӗлтерет.

Ҫак хӗрарӑм Шупашкарта кун кунлать, вӑл нумай ачаллӑ амӑшӗ. Хайхискер ҫурт сутни пирки тӗнче тетелӗнче пӗлтерӳ панӑ. Кӗҫех кӳршӗ регионтан шӑнкӑрав ҫитнӗ. Ҫак ҫын ҫурт туянассине пӗлтернӗ, кӑштах укҫа тӳлесе хума шантарнӑ.

Нумай ачаллӑ хӗрарӑм ӑна банкомат патне пыма ыйтнӑ. Тӗрлӗ операци ирттернӗ хыҫҫӑн ҫурт туянма палӑртнӑ ҫыннӑн счечӗ ҫинчен 20 пин тенкӗ ҫухалнӑ.

Хӗрарӑма тытса чарнӑ. Вӑл улталанӑ ҫынна укҫа-тенке парса татнӑ. Хӑйне вара 20 пин тенкӗ штраф тӳлеттернӗ.

Каҫал тӑрӑхӗнчи усламҫӑ ҫамрӑксене килӗштерет. Чӑваш Енӗн прокуратуринче пӗлтернӗ тӑрӑх, арҫын-усламҫӑ кафере ӗҫлеме поварсене тата кассир-официантсене шыранине хыпарланӑ. Пӗлтерӗве кӑҫалхи ака тата ҫу уйӑхӗсенче тӗнче тетелне вырнаҫтарнӑ.

Арҫын ҫамрӑксене ҫеҫ ӗҫе илес кӑмӑллине пӗлтернӗ. Усламҫӑна юрӑхлӑ поварсен, кассирсемпе официантсен 35 ҫултан аслӑ пулмалла мар иккен. Ҫав пӗлтерӗве прокуратура ӗҫченӗсем асӑрханӑ. «Мӗнле-ха капла? Ку вӑл ҫула кура хӗсӗрлени пулать вӗт» — тӗлӗннӗ пакунлисем. Тата ҫын 35-рен аслӑраххи ӗҫлеме пултараймассине пӗлтермест-ҫке.

Усламҫӑна ӗҫ вырӑнӗсем пуррине Ӗҫлӗх центрне пӗлтерменшӗн те явап тыттарас тенӗ.

Ҫапла вара суд арҫынна 3 пин тенкӗ штраф хурса панӑ. Суд йышӑнӑвӗ хальлӗхе саккунлӑ вӑя кӗреймен-ха.

Красноармейски районӗн «Ял пурнӑҫӗ» хаҫатӗнче тӗп бухгалтерта ӗҫленӗ хӗрарӑма суд тунӑ. Ӑна ӗҫ вырӑнӗпе усӑ курса предприяти укҫине кӗсьене чикнӗшӗн айӑпланӑ.

Чӑваш Енӗн Информаци политикин министерствин пысӑках мар кӑларӑмӗнче тӑрӑшнӑ хӗрарӑм тӗлӗшпе РФ Пуҫиле кодексӗн 159-мӗш статйин 3-мӗш пайӗпе (ӗҫ вырӑнӗпе усӑ курса улталанӑшӑн) тата 160-мӗш статйин 3-мӗш пайӗпе (ӗҫ вырӑнӗпе усӑ курса ют пурлӑха вӑрланӑшӑн) ӗҫсем пуҫарнӑ. Кӑлтӑка прокуратура палӑртнӑ.

РФ Следстви комитечӗн Чӑваш Енри управленийӗнче пӗлтернӗ тӑрӑх, 2018 ҫулта хӗрарӑм банкри хӑйӗн счечӗ ҫине 256 пин тенкӗ куҫарнӑ. Шалу тесе. Унсӑр пуҫне вӑл организаци кассинчи 46 пине яхӑн тенке хӑйӗн тунӑ.

Ултав ҫиеле тухсан хӗрарӑм тӑкака саплаштарнӑ. Суд ӑна тӗрмене хупмасӑр 3 ҫуллӑха айӑплама йышӑннӑ. Сӑнав вӑхӑтне 2 ҫуллӑха палӑртнӑ.

Чӑваш Енри темиҫе артистпа преподавателе, художникпа композитора патшалӑх стипендине пама йышӑннӑ. Хушӑва Чӑваш Ен Элтеперӗ Михаил Игнатьев ӗнер, утӑ уйӑхӗн 9-мӗшӗнче, алӑ пуснӑ.

Ӑслӑлӑхра, литературӑра тата ӳнерте тунӑ ҫитӗнӳсемшӗн уйӑракан патшалӑх стипенди республикӑри 14 ҫынна тивӗҫнӗ. Вӗсен йышӗнче — Чӑваш патшалӑх академи драма театрӗн артисчӗсем Вячеслав Александров тата Петр Садовников; Вырӑс драма театрӗн артисчӗ Борис Кукин; Чӑваш патшалӑх оперӑпа балет театрӗн артисчӗ-вокалисчӗ Михаил Мокшанов; Чӑваш патшалӑх филармонийӗн «Ҫавал» эстрадӑпа фольклор ансамблӗн артисчӗ-вокалисчӗ (солисчӗ) Любовь Ильина; Чӑваш патшалӑх академи симфони капеллин артисчӗ Андрей Макаров; Ф.П. Павлов ячӗллӗ музыка училищин преподавателӗ Назыр Гараев; И.Я. Яковлев ячӗллӗ ЧППУн тӑван ҫӗршыв тата пӗтӗмӗшле истори кафедрин преподавателӗ, истори ӑслӑлӑхӗсен докторӗ Валерий Григорьев; И.Н. Ульянов ячӗллӗ ЧПУн патшалӑх тата муниципалитет управленийӗн кафедрин профессорӗ, экономика наукисен кандидачӗ Иван Данилов; И.Н. Ульянов ячӗллӗ ЧПУн электричество тата электрон аппаратсен кафедрин заведующийӗ Евгений Егоров; И.

Малалла...