Ӗнер Чӑваш Республикин Правительство ҫуртӗнче Олег Николаев тӳре-шара канашлу ирттернӗ. Унта вӑл ҫулталӑка пӗтӗмлетмелли вӑхӑт ҫитнине палӑртнӑ май министрсене кӑтартусемпе суймасӑр паллаштарма чӗнсе каланӑ.
«Эпир пӗтӗмлетӳсем тӑватпӑр. Ирттерекен мероприятисенче ҫынсене мӗн туса ирттерме пултарнипе паллаштарнипе пӗрлех тата, паллах, хамӑр татса парайманни, мӗншӗн ҫавӑн пек пулса тухни ҫинчен те каласа кӑтартмалла. Мӗнле йышӑнусем туни, епле укҫа уйӑрни пирки пӗлтермелле», – тенӗ республика ертӳҫи.
Шупашкарти Гагарин урамӗнче Чӑваш Енӗн экс-премьер-министрне Иван Моторина ҫул-йӗр инспекторӗсем тытса чарнӑ. Вӑл руль умне ӳсӗрле ларни тӑрӑ шыв ҫине тухнӑ.
«Город Грехов» сайт пӗлтернӗ тӑрӑх, «Ниссан» водителӗ ҫуран ҫӳрекенсене ҫул паман. Ҫакна инспекторсем курнӑ. Алкотестер Иван Моторин урӑ тесе кӑтартнӑ. Ачах темшӗн унӑн пӑрӑхӗ кӗтмен ҫӗртен татӑлса ӳкнӗ. Инспекторсем иккӗленнипе Моторина наркологие илсе кайнӑ.
0,325 мг/л – ҫапла кӑтарту пулнӑ наркологире. Экс-премье-министр тӳрре тухнӑ – вӑл темӗнле эмел ӗҫнӗ-мӗн, анчах ятне астумасть.
Шупашкарта «Магистраль» строительство организацийӗн ертӳҫи суя хутсем хатӗрленӗ тата улталанӑ. Ун тӗлӗшпе пуҫарнӑ ӗҫе Шупашкарти Ленин район сучӗ пӑхса тухӗ.
2019 ҫулхи чӳк-раштав уйӑхӗсенче стройорганизаци «Чувашупрдор» учрежденийӗпе контракт тунӑ. Унӑн Вӑрмар тата Шупашкар районӗсенчи ҫулсене юсамалла пулнӑ. Суя документсене хатӗрлесе вӑл ӗҫе вӗҫленӗ пек туса кӑтартнӑ. «Чувашупрдор» предприятире тӗрӗслемесӗрех алӑ пусса панӑ, «Магистраль» стройорганизаци 8 миллиона яхӑн тенкӗ куҫарса панӑ.
Кӑҫалхи раштав уйӑхӗн 31-мӗшӗнче канасси пирки Чӑваш халӑх сайчӗ пӗлтернӗччӗ. Аса илтерер: кун пирки республика Элтеперӗ Олег Николаев Инстаграма хыпарланӑччӗ. «Раштав уйӑхӗн 31-мӗшӗнче канӑпӑр», — ҫапла ҫырнӑччӗ вӑл раштав уйӑхӗн 7-мӗшӗнче Инстаграмри хӑйӗн страницинче.
Кану кунӗ туса хурасси ҫинчен Олег Николаев ҫав кунах хушу кӑларнӑччӗ. Анчах унта сӑмах патшалӑх служащийӗсем пирки пырать. Ҫапах та Элтепер республикӑри ытти организаци ертӳҫисене раштавӑн 31-мӗшӗнче ӗҫченсене кантарма сӗннӗ. Ун вырӑнне раштав уйӑхӗн 26-мӗшӗнче, шӑматкун, ӗҫлеттерсе.
Раҫҫей правительстви Чӑваш Енри васкавлӑ медпулӑшу паркне ҫӗнетме пулӑшӗ. Ытти региона та машинӑсем уйӑрса парӗҫ.
ТАСС пӗлтернӗ тӑрӑх, Киров, Псков, Тула облаҫӗнчи, Чӑваш Енри тата Краснодар крайӗнчи парксем ҫӗнелӗҫ, унта вӗр ҫӗнӗ васкавлӑ медпулӑшу машинисем килӗҫ. Пӗтӗмпе 180 ытла машина уйӑрӗҫ.
РФ премьер-министрӗ Михаил Мишустин кӑшӑлвирус тапхӑрӗнче тухтӑрсене йывӑр килнине палӑртнӑ. Вӑл каланӑ тӑрӑх, хӑш-пӗр регионта машинӑсем ҫителӗксӗр. Премьер-министр правительство регионсене президент хушнипе килӗшӳллӗн пулӑшать. Владимир Путин регионсене машинӑсем ҫулталӑк вӗҫлениччен тивӗҫтерме хушнӑ.
Эрнекун кӑшӑлвируспа кӗрешессипе ӗҫлекен оперативлӑ штаб ларӑвӗ иртнӗ. Унта ЧР сывлӑх сыхлавӗн министрӗ Владимир Степанов статистикӑпа паллаштарнӑ.
Министр каланӑ тӑрӑх, Чӑваш Енре килте амбулатори мелӗпе 3600 ытла пациент сипленет. Вӗсене 754 тухтӑр пӑхса тӑрать.
Нумаях пулмасть республикӑра килте сипленекенсене тӳлевсӗр эмелсем пама тытӑннӑ. Министр республикӑна 31,7 миллион тенкӗлӗх эмел килни пирки пӗлтернӗ. Ку таранччен тухтӑрсем пациентсене 3221 рецепт ҫырса панӑ, 1805 ҫынна кирлӗ эмелсемпе тӳлевсӗрех тивӗҫтернӗ.
«Пӗрремӗш эрнере 250-280 пациента тӳлевсӗр эмел панӑ, паянхи кун тӗлне вара – 1800 ытла ҫынна. Вӗсен шучӗ ӳссех пырать», - тенӗ Владимир Степанов.
Паян, раштав уйӑхӗн 2-мӗшӗнче, Ҫӗнӗ Шупашкар хула администрацийӗн пуҫлӑхне ҫирӗплетнӗ. Ҫӗнӗ Шупашкарти Депутатсен пухӑвӗн паянхи черетсӗр ларӑвне 25 депутатран 23-шӗ хутшӑннӑ. Вӗсем хулан сити-менеджерне суйланӑ. Ку тлхепене Павел Семенова тыттарнӑ.
Патшалӑхӑн влаҫ органӗсенче ӗҫлесе пуян опыт пухнӑ ҫав ҫын 1976 ҫулта Канашра ҫуралнӑ. Экономика ӑслӑлӑхӗсен кандидачӗ. РФ Патшалӑх Думине икӗ хутчен суйланнӑ, РФ ҫут ҫанталӑк ресурсӗсен тата экологи министрӗн ҫумӗ, РФ ял хуҫалӑх министрӗн ҫумӗ, РФ Наци ӗҫӗсен агентствин ертӳҫин ҫумӗ пулнӑ.
Ӗнер, раштав уйӑхӗн 1-мӗшӗнче, республикӑри икӗ пульницӑра ҫӗнӗ тӗп тухтӑрсене ҫирӗплетнине пӗлтернӗ. Кун пирки сывлӑх сыхлав министрӗ Владимир Степанов видеоселектор мелӗпе ирттернӗ канашлу вӑхӑтӗнче каланӑ.
Республикӑн кардиологи диспансерӗн тӗп тухтӑрӗ пулма Вадим Бабокина ҫирӗплетнӗ. Ҫӗнӗ ертӳҫӗпе паллаштарнӑ май министр Вадим Егорович кардиологи тытӑмӗн ӗҫне аван пӗлет, вӑл чӗрепе юн тымарӗсен хирургӗ, унӑн кардиологи центрне ертсе пырас опыт пур тесе палӑртнӑ.
Муркаш районӗнчи тӗп пульницӑн тӗп врачӗ пулма Оксана Поповӑна ҫирӗплетнӗ. Вӑл унччен ҫав пульницӑра тӗп врачӑн ҫумӗ пулнӑ.
Шупашкар хулинчи Эгер бульварӗнче пурӑнакансем 48-мӗш ҫурт ҫумӗнче нумай хваттерлӗ ҫурт хӑпартассине хирӗҫ-мӗн. Хулана ертсе пыракансем ҫынсен шухӑшне пӗлес тесе халӑхпа сӳтсе явнӑ. Кун пирки хула администрацийӗн пуҫлӑхӗ Алексей Ладыков паян Фейсбукра пӗлтернӗ.
«Эпир халӑхпа сӳтсе яврӑмӑр, проектлакансем хӑйсен проекчӗпе паллаштарчӗҫ, строительсем ӗҫ технологийӗ ҫинчен каласа кӑтартрӗҫ», – тесе ҫырнӑ сити-менеджер.
Алексей Ладыков пӗлтернӗ тӑрӑх, сӳтсе явма ҫывӑхри ҫуртсенче пурӑнакансем хастар хутшӑннӑ. Тӗрлӗрен шухӑшлакансем тупӑннӑ, ытларахӑшӗ – хирӗҫ. Апла пулсан хула администрацийӗ ҫынсен шухӑшне тӗпе хурӗ.
Шупашкар хулинче троллейбус маршручӗсене ҫӗнӗрен пӑхса тухас шухӑшлӑ. Анчах ҫав утӑма хула ҫыннисене шухӑшне тӗпе хурса тӑвӗҫ. Ҫакӑн пек ӗнентернӗ хула администрацийӗн пуҫлӑхӗ Алексей Ладыков Инстаграмра.
Сӗнӳсенчен пӗри — хулари 5-мӗш тата 11-мӗш номерлӗ троллейбус маршручӗсене пӗрлештересси. Унӑн тӑршшӗне тӑсма пулать.
14-мӗш троллейбуса Хӗвеллӗ микрорайона ҫитерме сӗннӗ. Асӑннӑ микрорайонта троллейбус линийӗ ҫук, анчах ҫутӑ пӑралукӗсӗр ҫӳреме пултаракан троллейбуссене ҫула кӑларма пулать.
20-мӗш троллейбуса Чапаев савучӗ патне ҫитересшӗн, Ҫӗнӗ хулара ӑна сехет йӗппине хирӗҫ ҫӳретесшӗн.
6-мӗш тата 8-мӗш маршуртсене пӗрлештерме юрать тесе шухӑшлаҫҫӗ.
3-мӗш троллейбуса Мичман Павлов урамӗпе ҫӳретмесен те тесе сӗннӗ.
⠀
-0.7 °C