Паян ҫӗрле Етӗрне округӗнчи Юманай ялӗнче ҫурт ҫунма пуҫланӑ. Вӑрман урамӗнчи йывӑҫ ҫурта ҫулӑм ярса илнӗ.
Шел те, 66 ҫулти кил хуҫи урама тухса ӗлкӗреймен. Пушар 86 тӑваткал метр ҫинче алхаснӑ, ӑна 7 специалист тата 3 техника сӳнтернӗ.
Халӗ пушар мӗнрен тухнине тӗпчеҫҫӗ. Сӑмах май, иртнӗ талӑкра республикӑра икӗ пушар пулнӑ.
Шупашкарта Ҫӗнҫӗпӗрти арҫын подъездсенчи велосипедсемпе самокатсене вӑрласа ҫӳренӗ. Велосипедсем хулари Новоилларионовски, М.Павлов, Богдан Хмельницкй тата ытти хӑш-пӗр ҫӗрти ҫуртсенчен ҫухалнӑ. Вӑрӑна видеокамера ӳкерсе илнӗ. Ҫын япалине черетлӗ хутчен вӑрласан вӑл велосипеда иртен-ҫӳрене туянма сӗннӗ. Кун пирки ҫынсем йӗрке хуралҫисене пӗлтернӗ.
34 ҫулти арҫын унччен судпа айӑпланнӑскер иккен. Хальлӗхе ӑна 70 пин тенкӗ ытла тенкӗлӗх 5 хутчен вӑрланӑ тесе шухӑшлаҫҫӗ.
Вӑрнар районӗнчи Ярмушка ялӗнче пурӑнакан 61 ҫулти Надежда Лаврентьева тӗнче чемпионки пулса тӑнӑ.
Китайри Тайбэй хулинче ҫу уйӑхӗн 17-30-мӗшӗсенче Ветерансен пӗтӗм тӗнчери вӑййи иртнӗ. Унта 107 ҫӗршыври 25 пин ветеран хутшӑннӑ.
Пирӗн ентешӗмӗр унта икӗ ылтӑн медаль ҫӗнсе илнӗ. Надежда Лаврентьева 5 тата 10 километра утассипе мала тухнӑ. Ӑна 30 градус шӑрӑх та хӑратман.
Ҫӗнӗ Шупашкарти «Химпром» предприятири икӗ пысӑк пуҫлӑха йӗрке хуралҫисем тытса чарнӑ. Кун пирки CHEB.ru портал пӗлтернӗ.
Тытса чарнисенчен пӗри – коммерци директорӗ Алексей Федотов, тепри – предприятин хушма предприятийӗн, «РусХимтрейд» суту-илу ҫурчӗн гендиректорӗ Евгений Герасимов. Вӗсен тӗлӗшпе РФ Пуҫиле кодексӗн 204 статйипе (ку статья коммерци подкупӗ тенине пелтерет) пуҫиле ӗс пуҫарнӑ. Вӗсене ӗс вырӑнӗпе усӑ курнӑ тесе шухӑшлаҫҫӗ.
Ӗҫе малтанласа Чӑваш Енӗн Шалти ӗҫсен министерствин ӗҫченӗсем «Химпромӑн» хӑрушсӑрлӑх службин материалӗсене тӗпе хурса тӗпченӗ.
Евгений Герасимов 2020 ҫулсен варринче Чӑваш Енӗн промышленность тата энергетика министрӗ пулса та ӗҫленӗ.
Атӑла таса мар шыв лекесерен тасатмалли сооруженисем тума уйӑрна укҫана чылай регионта йӗркелле усӑ курманни пирки эпир унччен пӗлтернӗччӗ-ха. Аса илтерер: ҫавӑн пек регионсен хушшинче Чӑваш Ен те пур. Чӑваш Енре Роспироднадзор 50 кӑлтӑк тупса палӑртнӑ. Унран та ытларах — ҫитменлӗхсен шучӗпе пирӗн республикӑмӑр Ярославль тата Самар облаҫӗсем хыҫҫӑн виҫҫӗмӗш вырӑнта.
Пӑтӑрмах пирки ҫӗршыв Президенчӗ Владимир Путин та пӗлет иккен. Вӑл ҫӗршывӑн ҫут ҫанталӑк ресурсӗсен тата экологи министрӗпе Александр Козловпа тӗл пулсан тасатмалли сооруженисемпе ҫыхӑннӑ ыйтӑва сӳтсе явнӑ май ку ытйупа кашни кӗпӗрнаттӑрпа ӗҫленине палӑртса хӑварнӑ.
Шупашкарти Хӗвелтухӑҫ урамӗнчи 13-мӗш ҫурт тӑррин парапечӗ йӑтӑнса аннӑ. Ку инкек ӗнер кӑнтӑрла иртнӗ хыҫҫӑн пулнӑ. Ӗнер ҫил те вӑйлӑ пулнӑ. Ку унпа ҫыхӑннӑ-и е ҫук-и - специалистсем уҫӑмлатӗҫ.
Парапет подъезд умӗнче ларакан икӗ машина ҫине ӳкнӗ. Иккӗшӗ те вӑйлах сиенленнӗ. Ҫав вӑхӑтра ҫын утса пынӑ, вӑл чутах инкеке лекмен.
Халӗ прокуратура тӗрӗслев ирттерет.
Шупашкарта пурӑнакан 33 ҫулти хӗрарӑм Атӑл урлӑ ишсе каҫас тенӗ. Анчах вӑл ним мар инкеке лекме пултарнӑ. Хӗрарӑм тӗрлӗ пӑрахут ҫӳрекен вырӑнта ишсе каҫма хӑтланнӑ.
Хӑйне хӗрхенмен тата упрама пӗлмен ҫынна Республикӑн Шыравпа ҫӑлав службин ӗҫченӗсем асӑрханӑ. Катерпа пыраканскерсем хӗрарӑм патне васкаса ҫитнӗ, ӑна ҫыран хӗрне илсе тухнӑ, апла хӑтланма юраманни пирки ҫирӗп асӑрхаттарнӑ.
Ҫӗнӗ Шупашкарта пурӑнакан 67 ҫулти арҫын ултавҫӑсене 60 миллион тенкӗ куҫарса панӑ.
Пӑтӑрмах ҫу уйӑхӗн 23-мӗшӗнче пуҫланнӑ. Ҫавӑн чухне ун патне домофонсене пӑхса тӑракан организаци ҫынни текен этем шӑнкӑравланӑ. Ҫӗнӗ уҫӑ илме смс-ҫырури кода ыйтнӑ. Арҫын кода каланӑ.
Унтан хайхипе Росфинансмониторингпа Федерацин хӑрушсӑрлӑх службин ӗҫченӗ текенсем ҫыхӑннӑ. Унпа форма тӑхӑннӑ улитавҫӑсем те видеооҫыхӑнупа калаҫнӑ, вӗсем арҫын укҫа ҫухатасран пӑшӑрханнине пӗлтернӗ. Ятарлӑ службӑсемпе калаҫма урӑх телефон та туянма сӗннӗ.
Арҫын темиҫе кунта 60 миллион тенкӗ ытла такамсене куҫарса пана, лешсем укҫа Тӗп банкри ятарлӑ счет ҫинче упранать тесе суя справка та ярса панӑ.
Ҫӗртме уйӑхӗн 1-мӗшӗнче Муркаш районӗнче Владимир облаҫӗнчи вӑрра тытса чарнӑ.
Вырӑнти йӗрке хуралҫисене ял хуҫалӑх предприятийӗсенчен пӗрин ертӳҫи ферма ҫывӑхӗнчи трактор ҫухални пирки шӑнкӑравласа пӗлтернӗ. Транспортпа ӗҫлекен трактор айкинелле пӑрӑннӑ, ҫав вӑхӑтра вӑл тракторсӑр тӑрса юлнӑ.
Пакунлисем хирпе трактор пынине асӑрханӑ та ун хыҫҫӑн васканӑ. Йӗрке хуралҫисене курсан арҫын трактор салонӗнчен сиксе юлса тарма тытӑннӑ.
Владимир хулинчи 35 ҫулти арҫын пӗлтернӗ тӑрӑх, вӑл М-7 автоҫулпа хӑйӗн «ГАЗелӗпе» пынӑ, бензин пӗтсен ҫывӑхри фермӑна ҫул тытнӑ. Унти трактора мӗншӗн чӗртсе кайнине вӑл ӑнлантарса пама пултарайман.
Улатӑр тӑрӑхӗнче Сӑр юханшывӗнче 12 ҫулти хӗрача путса вилнӗ. Ку инкек ҫӗртме уйӑхӗн 1-мӗшӗнче пулнӑ. Унӑн виллине халӗ те тупайман, шыраҫҫӗ.
Аса илтерер: нумаях пулмасть Канаш округӗнчи Сухайкасси пӗвинче 17 ҫулти ҫамрӑк путса вилнӗччӗ. Унччен маларах Атӑлта ГЭС ҫывӑхӗнче 49 ҫулти арҫыннӑн пурнӑҫӗ татӑлнӑ. Вӑл Ҫӗнӗ Шупашкартан пулнӑ.
+22.3 °C