
Ҫак кунсенче Шупашкар хулинчи Президент амӑшлӑх центрӗнче «Амӑшлӑх культури: музыка, сӑпка юрри, тӗрӗ» проектӑн вуннӑмӗш занятийӗ иртнӗ. Тӳрех палӑртса хӑварар: вӑл «Ҫемье» наци проекчӗпе килӗшӳллӗн пурнӑҫланать, ача кӗтекен хӗрарӑмсене наци культурипе ҫывӑхрах паллашма май парать.
Ку занятире хӗрарӑмсемпе Чӑваш патшалӑх культурӑпа искусствӑсен институтӗнче вӑй хуракансем ӗҫленӗ. Пулас амӑшӗсем Анна Савадерова профессорпа пӗрле тӗнче классикин шедеврӗсене итленӗ, вӗсене тишкернӗ, ҫавӑн пекех сӑпка юррисене вӗреннӗ. Халӑх ал ӗҫӗсен ӑсти Раиса Васильева вара чӑваш тӗррин вӑрттӑнлӑхӗсене пӗлме пулӑшнӑ. Вӑл ачасем валли сыхчӑ мӗнле тумаллине те каласа кӑтартнӑ.
Сӑмах май, ку проект Чӑваш Республикинчи Хӗрарӑмсен пӗрлӗхӗн пуҫарӑвӗпе пурнӑҫланать.

Чӑваш Республикин Вӗренӳ институчӗ «Килсе курӑр хӑнана, хапӑл тӑвӑр йыхрава!» видеороликсен конкурсне ирттернӗ.
Конкурс тӗллевӗнчен пӗри — ачасене тӑван халӑхӑмӑра, тӑван тӑрӑха тата тӑван ҫӗршыва юратма вӗрентесси. Кунсӑр пуҫне тата культурӑпа эткерлӗх пуянлӑхне асра тытасси. Ҫакна ачасен видеопултарулӑх урлӑ кӑтартса памалла пулнӑ.
Конкурса 7-8-мӗш классенче вӗренекен ачасем хутшӑннӑ. Пурӗ 62 ача. Вӗсем Чӑваш Енри 18 муниципаллӑ районтан тата 2 хуларан пулнӑ, кунсӑр пуҫне Тутарстанри 5 районтан (Аксу, Пӑва, Нурлат, Ҫарӑмсан, Альметево) хутшӑннӑ.
Видеоконкурса хутшӑннӑ маттур ачасене Чӑваш Республикин Вӗренӳ институчӗ хавхалантарма палӑртнӑ. Вӗсене асӑнмалӑх-савӑнмалӑх сертификат панӑ.

Улькка Эльмен ҫыравҫӑ «Тӑван Атӑл» журнал редакторӗ пулӗ. Кун пирки МАХри «Хыпар - Вести Чувашии» каналта паян пӗлтернӗ.
Ольга Куликова 1961 ҫулта Вӑрнар районӗнчи Авшак Элмен ялӗнче ҫуралнӑ. Нурӑсри вӑтам шкулта ачасене чӑваш чӗлхипе литератури вӗрентнӗ, Санарпуҫӗнчи вӑтам шкулта директор ҫумӗ пулнӑ, «Ҫӗнтерӳ ҫулӗ» хаҫатра, район администрацийӗнче, «Капкӑн» журнал редакцийӗнче ӗҫленӗ. «Вурнарыдорстрой» акционерсен уҫӑ пӗрлешӗвӗн генеральнӑй директорӗ пулнӑ.
«Ма инҫе-ши ҫӑлтӑрӑм?», «Кая юлнӑ ӳкӗнӳ», «Ҫирӗп чунлисем телейлӗ», «Упраймарӑм сана…», «Сарӑ кӗпе» кӗнекисене нумайӑшӗ вуланӑ-тӑр.
«Ольга Геннадьевнӑн ертӳҫӗ пултарулӑхӗ те питӗ пысӑк. Вӑл паянхи вулакана мӗн кирлине туйнӑран «Тӑван Атӑл» журнала ҫӗнӗ шая ҫӗклесси пирки иккӗленместӗп», — тенӗ «Хыпар» издательство ҫурчӗн директорӗ - тӗп редакторӗ Дмитрий Моисеев.

Элтияр Александровӑн ҫӗнӗ кӗнекин хӑтлавӗ иртӗ. Нумаях пулмасть унӑн «Вуникӗ утӑм» кӗнеки пичетленсе тухни пирки сайтра пӗлтернӗччӗ.
Ҫамрӑк ҫыравҫӑн, журналистӑн тата ӑсчахӑн иккӗмӗш кӗнеки ку. «Вуникӗ утӑм» кӑларӑма прозӑллӑ сӑвӑсем кӗнӗ.
Аса илтерер: 2023 ҫулта унӑн пӗрремӗш кӗнеки, кун ҫути курнӑ, вӑл «Чувашские мифы: от озера Аль и праздника Сурхури до бога зла Шуйттана и хана волков» ятлӑ. Кӗнеке Мускав хулинче кун ҫути курнӑ.
«Вуникӗ утӑм» кӗнеке хӑтлавӗ ыран, юпа уйӑхӗн 23-мӗшӗнче, ЧР Наци вулавӑшӗн акт залӗнче иртӗ: 4-мӗш хут, 409-мӗш пӳлӗм. Мероприяти 16 сехетре пуҫланать.

Кӑҫал Тутарстан Республикипе пӗтӗм тутар халӑхӗ Тутарстан халӑх поэчӗ, Раҫҫей Патшалӑх премийӗн лауреачӗ Ренат Харис 85 ҫул тултарнине паллӑ тӑвать.
Ренат Магсумович Чӗмпӗр облаҫӗнчи Чӑнлӑ районӗнчи Каша ятлӑ ялта ҫуралнӑ. Ку ялта сӗм авалтанпа тутарсемпе чӑвашсем пӗрле пурӑннӑ, халӗ те питӗ килӗштерсе пӗрле пурӑнаҫҫӗ. Пулас поэт пӗчӗк чухнех чӑ?вашла калаҫмА та, ҫырма та пултарнӑ, чӑваш литературине питӗ юратнӑ. Ҫакӑ ӑна кайран чӑваш поэчӗсен хайлавӗсене тутарла куҫарма питӗ? пулӑшнӑ.
Тутар тата чӑваш халӑхӗсен туслӑхне ҫирӗплетес тӗлӗшпе нумай ҫул вӑй-халне шеллемесӗр, питӗ тухӑҫлӑ ӗҫленӗшӗн Ренат Хариса Чӑваш Ен Правительстви «Чӑваш Республикин культура тава тивӗҫлӗ ӗҫченӗ» ят парса чысланӑ. 2009 ҫулта вӑл Халӑхсем хушшинчи Ҫеҫпӗл Мишши ячӗллӗ преми лауреачӗ пулса тӑнӑ.
Кӑҫал вара Ренат Магсумович Хариса Комсомольскисен «Кӗтне» ентешлӗхӗ хӑйӗн Куҫма Турхан ячӗллӗ премийӗпе хавхалантарчӗ. Премие ҫак кунсенче Комсомольскисен ентешлӗхӗн хастарӗсем Валери Туркай, Валерий Гордеев тата Киям Пахалов Хусанти Федерации университетӗнче тутарсен паллӑ поэчӗ тата общество деятелӗ 85 ҫул тултарнине халалласа ирттернӗ Халӑхсем хушшинчи ӑслӑлӑх конференцийӗнче панӑ.

Чӑваш Енри пур муниципалитетра та «Асам» шкул театрӗсен фестивалӗн тӑваттӑмӗш тапхӑрӗ вӗҫленнӗ.
Шупашкар районӗнчи «Тӑван Ен» хаҫатра пӗлтернӗ тӑрӑх, тӗрлӗ округри пӗтӗмӗшле пӗлӳ паракан учрежденисен вӗренекенӗсем сцена ҫине тухма хӗрсе хатӗрленнӗ: репетици тунӑ, декораципе тум ӑсталанӑ, музыка суйланӑ. Конкурса Шупашкар округӗнчи 22 шкулӑн 166 вӗренекенӗ хутшӑннӑ.
Муниципалитетсенче фестиваль икӗ тапхӑрпа иртнӗ. Малтан жюри ача-пӑча хатӗрленӗ видеона онлайн мелпе хакланӑ. Суйласа илнӗ чи лайӑх 7 спектакле юпа уйӑхӗн 13-мӗшӗнче Кӳкеҫри культура ҫурчӗн сцени ҫинче кӑтартнӑ.
Ишлей шкулӗн команди пӗрремӗш вырӑн ҫӗнсе илнӗ. Иккӗмӗш вырӑна Атайкасси пӗлӳ ҫурчӗпе М.Игнатьев ячӗллӗ Янӑш шкулӗ тухнӑ. Виҫҫӗмӗш вырӑна Толик Хураски шкулӗ тивӗҫнӗ.

Ӗнер, юпа уйӑхӗн 19-мӗшӗнче, Чӑваш патшалӑх культурӑпа ӳнер институчӗнче «Чӑваш чӗлхине сӑвапласа кӗвӗленӗ кӗлӗ» ятлӑ мероприяти иртнӗ.
Юрий Сементер поэтӑн сӑввинчи йӗркесем Александр Осипов композитора ҫак программӑна хатӗрлеме хавхалантарнӑ. Илемлӗ йӗркесене Раҫҫей тава тивӗҫлӗ артисчӗ, чӑваш халӑх артисчӗ Владимир Семёнов вуланӑ.
«Чӑваш чӗлхине сӑвапласа кӗвӗленӗ кӗлӗ» ярӑмра чӑваш чӗлхи тӗрлӗ тапхарта епле аталанса пынине кӑтартса панӑ, тӗрӗк тымарӗсене упраса хӑварма пултарнӑ чӑваш халахӗпе мӑнаҫланни сисӗнет иккен.
Мероприятие Владимир Семёнов артистпа пӗрле тимлекен Чӑваш академи драма театрӗн артисчӗсем те хутшӑннӑ. Ку йышра театрӑн тӗп режиссёрӗ тата чӑваш халӑх артистки Наталия Сергеева, Чӑваш Республикин тава тивӗҫлӗ артисчӗсем Александра Зайцева тата Николай Сергеев пулнӑ.

Иртнӗ эрнере, юпа уйӑхӗн 16-мӗшӗнче, Ҫӗпӗрти федераци округӗ
«Гордость нации — 2026» (чӑв. Наци мӑнаҫлӑхӗ) пӗтӗм Раҫҫейри VII преми лауреачӗсене чысланӑ. Мероприяти Ҫӗнҫӗпӗр хулинче пулса иртнӗ.
«Эффективный лидер» (чӑв. Тухӑҫлӑ ертӳҫӗ) номинацире III степеньлӗ ларуеат ятне Вероника Тимфоеева тивӗҫнӗ.
Вероника Тимофеева — Иркутск облаҫӗнчи чӑвашсен «Юлташ» автономине чылай ҫул ертсе пырать. Вӑл чӑваш йӑли-йӗркипе ҫыхӑннӑ тӗрлӗ мероприяти (ҫав шутра концерт, ӑсталӑх лаҫҫи, курав) час-часах йӗркелесе ирттерет. Тӑван халӑхӑмӑрӑн йӑли-йӗркине упраса хӑварассишӗн тӑрӑшакан хӗрарӑм ҫине тӑнипе асӑннӑ тӑрӑхра чӑвашсем пирки пӗлме ҫеҫ мар, унӑн пуян культурипе паллашма пултараҫҫӗ.

Иртнӗ эрнере, юпа уйӑхӗн 15-мӗшӗнче, Чӑваш Енӗн Культура, национальноҫсен ӗҫӗсен тата архив ӗҫӗн министерствинче Общество канашӗн йӗркелӳ ларӑвӗ иртнӗ. Унта председатель, председателӗн ҫумне суйлас тата яланхи комиссисен йышне палӑртас ыйтӑва пӑхса тухнӑ.
Общество канашӗн ларӑвне пухӑннисем уҫҫӑн сасӑласа председатель пулма Нина Смирновӑна ҫирӗплетнӗ. Ку хӗрарӑм «Радуга» культурӑпа курав центрне ертсе пырать. Унӑн ҫумӗ пулма Чӑваш Енри Театр ӗҫченӗсен союзӗн председателӗн ҫумне Зоя Яковлевӑна шаннӑ.
Общество канашӗнче пурӗ 11 ҫын иккен. Вӗсен йышӗнче Раҫҫейри писательсен союзӗн регионти уйрӑмӗн председателӗн ҫумӗ Ольга Куликова та пур. Ольга Куликова — хальхи вӑхӑтри паллӑ чӑваш писателӗсенчен пӗри.

Чӑваш Енре культура эткерлӗхӗ шутланакан ҫуртсенчен пӗрне сутаҫҫӗ. Сӑмах май каласан, ун пек ҫуртсем тӗрлӗ тӑрӑхра пур. Вӗсем Сӗнтӗрвӑрринче, Улатӑрта нумай. Анчах чылайӑшне юсаса ҫӗнетмелле.
3 миллион тенкӗпе сутма йышӑннӑ ҫурт — Пӑрачкаври учительсен семинарийӗ.
Ку ҫурт федераци пӗлтерӗшлӗ культура эткерлӗхӗ шутланать. Ӑна сутма ДОМ.РФ йышӑннӑ. Заявкӑсене чӳк уйӑхӗн 16-мӗшӗччен пухӗҫ, кама сутса яни чӳк уйахӗн 20-мӗшӗнче паллӑ пулӗ. Ҫӗнӗ хуҫан ҫуртӑн малтанхи сӑн-сӑпатне упраса хӑвармалла.
Икӗ хутлӑ кирпӗч ҫурта вырӑс классицизмӗн стилӗпе Пӑрачкав вотчинин хуҫи, Петр Салтыков граф пулнӑ. Таврапӗлӳҫӗсем ӗнентернӗ тӑрӑх, 1833 ҫулта унта Александр Пушкин кӗрсе тухнӑ. 1872 ҫулта Илья Ульянов Атӑлҫи тӑрӑхӗнче учительсен чи малтанхи семинарийӗсенчен пӗрне уҫнӑ. Заведени шкул валли кадрсене 1951 ҫулчченех хатӗрленӗ.
