Атӑл ҫинче хӗлле пулӑ тытма юратакансен чемпионачӗ иртнӗ. Унта Раҫҫейри тӗрлӗ регионти 32 ҫын пухӑннӑ.
Уланкӑ, шӑла тата ҫӑрттан тытнине шута илнӗ. Икӗ кунра пӗтӗмпе 140 килограмм пулӑ тытнӑ. Анчах чылай пайне пулӑҫсем киле илсе кайман, тараса ҫинче виҫнӗ хыҫҫӑн каялла шыва янӑ.
Пӗрремӗш вырӑна «Белуга» команда йышӑннӑ, иккӗмӗшне – «ЛИС», виҫҫӗмӗшне – «АКА-21». Харпӑр зачетра малти вырӑнсене Спартак Чумаков /Шупашкар/, Андрей Костерин /Йошкар-Ола/, Павел Разин /Шупашкар/ йышӑннӑ.
Паян 5 арҫын Атӑл ҫинче пулӑ тытнӑ чухне инкеке лекнӗ. Ахӑртнех, хӑйсем те сисмен – пӑр катӑлса вӗсене шыв юххипе илсе кайнӑ.
Вӗсем патне ҫӑлавҫӑсем аэрокимӗпе ҫитнӗ. Юрать-ха, ҫӑлнӑ, ҫыран хӗррине илсе тухнӑ.
«Ҫавӑн пек ҫанталӑк пирӗн. Кун пеккине пӗрремӗш хут куратӑп. Курӑр-ха, Атӑл ҫинче мӗн пулса иртет. 15 градус сивӗ», – тенӗ ҫакна курнӑ ҫын.
Раштав уйӑхӗн 20-мӗшӗнче Сосновка поселокӗ ҫывӑхӗнче каҫхи 5 сехетре ҫӑлавҫӑсем инкеке лекнӗ пулӑҫӑ патне ҫитнӗ.
Мари Элте пурӑнакан 37 ҫулти арҫын Атӑл ҫине пӗчченех пулла кайнӑ. Ҫӳхе пӑр тӗлне лексен вӑл путма пуҫланӑ.
Телее, вӑл пӑр тыткӑнӗнчен хӑйех тухма пултарнӑ, тӳрех ҫӑлавҫӑсене чӗннӗ.
Йӗпеннӗ, халтан кайнӑ пулӑҫа телефонӗ ҫинчи хунар ҫути пулӑшнипе тупнӑ. Ӑшӑннӑ хыҫҫӑн ӑна ҫыран хӗррине илсе тухнӑ.
Шупашкарти юханшыв портне, тӗрӗсрех, пассажирсене турттарас, ыйтӑва Раҫҫейӗн транспорт министрӗпе Роман Старовойтпа сӳтсе явнӑ. Ку хыпара республика Элтеперӗ Олег Николаев Телеграмри хӑйӗн страницинче сӳтсе явнӑ.
Ларӑва видеоконференци мелӗпе «Флот РТ» тата «Водолет» организацисен представителӗсем, Тутарстанпа Чулхула облаҫӗн Правительствин юханшыв флочӗ енӗпе ӗслекен эксперт канашӗн пайташӗсем хутшӑннӑ.
2023 ҫулхи юпа уйӑхӗнче «Юханшыв магистралӗсем» проекта пурнӑҫа кӗртме тытӑннӑ. Вӑл пассажирсене Атӑл тӑрӑх хӑвӑрт турттарассине аталантарассипе ҫыхӑннӑ. Ятарласа йӗркеленӗ комисси Чулухла облаҫӗнчи, Тутарстанри тата Чӑваш Енри субсидилекен 12 маршрута палартса хӑварнӑ. Чӑваш Ене илсе Куславккапа Сӗнтӗрвӑрринче прчиалсем тӑвасшӑн.
Атӑл леш енче упа амипе ҫурине асӑрханӑ. Вӗсене сунар инспекторӗсем ӳкерсе илнӗ.
Упа амипе ҫури, ахӑртнех, ҫимелли шыранӑ е хӗл каҫмалли вырӑн пӑхкаланӑ. Упасем хӗл каҫма кӗркунне вӗҫӗнче е хӗл пуҫламӑшӗнче хатӗрленеҫҫӗ.
Ҫанталӑк ӑшӑ чухне не ҫак чӗрчунсем апат шыраҫҫӗ, сивӗсем пуҫлансан вара шӑтӑк тупса хӗл каҫма выртаҫҫӗ.
Ӗнер каҫхине Хусана ҫитиччен Атӑл урлӑ каҫмалли кӗпере хупса хунӑ. Унта икӗ фура ҫапӑнсан пушар пуҫланнӑ.
Пӗр фурӑран газ баллонӗ тухса ӳкнӗ. Кайран ҫулӑм виҫҫӗмӗш фура ҫине куҫнӑ.
Аварие пула ҫула пӳлнӗ. Транспорта урӑх ҫулпа янӑ. Темиҫе сехетрен ҫула уҫнӑ.
Нумаях пулмасть Раҫҫей Правительствинче тасатмалли сооруженисем темӑпа черетлӗ лару иртнӗ. Вӑл малтан палӑртнӑ пек 40 минута мар, 3 сехете пынӑ.
Жанна Рябцева пӗлтернӗ тӑрӑх, регионсене асӑннӑ темӑпа ячӗшӗн ӗҫлемеллине, федераци хыснинчен миллиардшар тенкӗ кӗтсе лармалла маррине асӑрхаттарнӑ.
Атӑла тасатма тесе сооруженисем тума уйӑрнӑ укҫа-тенкӗн пысӑк пайне хӑш-пӗр регионта унталла та кунталла сапаласа (тӗрӗсрех каласан, кӗсьене чиксе) пӗтернӗ.
Федераци шайӗнчи органсемпе хастарсем уйрӑмах асӑрхаса тӑма шантарнӑ регионсем хушшинче – Чӗмпӗр, Кострома, Ярославль, Тверь, Астрахань облаҫӗсем тата Чӑваш Ен. Вӗсенче пуҫиле ӗҫсем те пуҫарнӑ, прокуратура подрядчика/яваплӑ тӳре-шарана тытса чарнӑ-мӗн.
Чӑваш Енри транспорт полицийӗ Мари Элти браконьерсем Атӑлта пулӑ тытнине асӑрханӑ. Вӗсем иккӗн пулнӑ. Пӗри Козьмодемьянск хулинчен 3800 метр аякра, Шупашкарти шыв управӗнче, саккуна пӑсса пулӑ тытнӑ.Тепри кӑшт аяккарах, 1200 метрта, пулнӑ.
Арҫынсенчен пӗри – 40 ҫулта, тепри – 37-ре. Вӗсем тӗрлӗ пулӑ тытнӑ. Ҫапла патшалӑха 20 пин ытла тӑкак кӳнӗ.
Николай пулӑ тытма юратать. Ку – унӑн чун киленӗҫӗ. «Контактра» халӑх тетелӗнчи страницинче те вал кун пирки нумай ҫырса кӑтартать.
Хальхинче Николай Атӑла пулӑ тытма кайсан ҫӑрттанпа кӗрешнӗ. Ӑна туртса кӑларас тесе унӑн самаях тарлама тивнӗ. Ара, 5 килограмм ытларах таякан пулла туртса кӑларма ансат мар вӗт.
Ҫапах тӑрӑшсан-тӑрӑшсан, кӗрешсен-кӗрешсен опытлӑ пулӑҫ ҫӑрттана туртса кӑларнах.
Атӑлта паян 63 ҫyлти арҫын виллине тупнӑ. Кун пирки Телеграмри «Пуринчен малтан» каналта пӗлтернӗ.
Арҫын вӗрсе хӑпартнӑ кимме ларса пулӑ тытнӑ иккен. Кимме Шупашкарти юханшыв порчӗ патӗнче асӑрханӑ, хуҫин виллине – Сосновка поселокӗ ҫывӑхӗнче.
Малтанлӑха шухӑшланӑ тӑрӑх, арҫын кимӗрен тухса ӳкнӗ. Ҫапах та инкек сӑлтавне специалистсем палӑртӗҫ.
+20.3 °C