Чӑваш Енре электрокардиограммӑна искусство интеллекчӗ тишкерме пуҫлӗ. Ҫӗнӗлӗхе ӗҫлеттерсе ярас ӗмӗтлине республикӑн вице-премьерӗ Владимир Степанов Пӗтӗм тӗнчери «ОргЗдрав – 2025» XIII конгресра тухса калаҫнӑ чухне палӑртса хаварнӑ.
Мускавра ҫӗртме уйӑхӗн 9-10-мӗшӗсенче иртекен мероприятие ҫӗршыври сывлӑх сыхлавӗн отраслӗнче тӑрӑшакансем пуҫтарӑннӑ.
Кӑҫалхи конгресӑн теми — «Тренды российского здравоохранения сквозь призму специальностей и новых технологий». Чӑваш Ен пирки каласан, пирӗн регион сывлӑх сыхлав отрасле цифровизаци енчен малта пыракан регионсен йышӗнче-мӗн.
Чӑваш Енре кӑҫалхи авӑн уйӑхӗн 1-мӗшӗнчен тытӑнса каҫхине эрех сутма чарӑнӗҫ. Кун пек чару каҫхи 10 сехетрен пуҫласа ирхи 9 сехетчен пулӗ.
Суту-илӳ правилине улшӑнусем кӗртесси ҫинчен калакан йышӑнӑва Чӑваш Ен Правительстви ҫу уйӑхӗн 29-мӗшӗнче йышӑннӑ. Документа Министрсен Кабинечӗн пӳлӗмӗн председателӗ Сергей Артамонов алӑ пуснӑ.
Ҫӗнӗлӗх нумай хваттерлӗ ҫуртсенче вырнаҫнӑ, подъезд енчен кӗмелле тунӑ лавккасене тата цокольпе нӳхрепсенчи суту-илӳ залӗсене пырса тивӗ.
«Артек» пӗтӗм тӗнчери ача-пӑча центрне йӗркеленӗренпе 100 ҫул ҫитнине халалласа 3 тенкӗлӗх кӗмӗл укҫа кӑларассине Раҫҫей банкӗ пӗлтернӗ.
«Артек» 1925 ҫулта Аю-Даг тӑвӗ айӗнчи 4 брезент палаткинчен пуҫланнӑ. Унран СССРти пионер лагерӗ пуҫланса кайнӑ.
2026 ҫулхи пуш уйӑхӗн 1-мӗшӗнчен пуҫласа таксире хамӑр ҫӗршывра туса кӑларнӑ машинӑсене ҫеҫ ӗҫлеттересшӗн. Кун пек саккун проектне Раҫҫейӗн Патшалӑх Думи иккӗмӗш тата виҫҫӗмӗш вулавра йышӑннӑ.
Кун пек саккуна йышӑнассине тӗрлӗрен йышӑнакансем пур. Пӗрисем шухӑшланӑ тӑрӑх, АвтоВАЗа пулӑшмалла, теприсем вара ӑна пулӑшса ҫитереймӗн тесе шухӑшлаҫҫӗ.
Искусство интеллекчӗ шӳтлеме те пӗлет, судлашать те, хаҫат та кӑларать.
Китайри пӗр ҫыравҫӑ, ав, ҫав мелпе усӑ курса эротика романӗсем ҫырнӑ та кайран ӑна тӗрмене хупнӑ. Текста ҫыраканни искусство интеллекчӗ пулсан та айӑпли ҫыравҫӑ тесе йышӑннӑ суд.
Нумаях пулмасть «Яндекс» сӑнӳкерчӗксене хатӗрлемелли ҫӗнетнӗ нейросеть ӗҫлеттерсе янӑ — YandexART 2.5 латиницӑпа ҫырнисене лайӑхрах ӑнланать тата мӗн ыйтнине аванрах тӗшмӗртет-мӗн.
Нейросеть ҫынсенчен лайӑхрах шӳтлет. Мемсем валли нейросеть ҫырнине ҫынсем ытларах юратса йышӑнаҫҫӗ иккен. Ҫынпа танлаштарсан нейросеть лайӑхрах шӳтсем шӑрҫалать.
Италире искусство интеллекчӗ хаҫат кӑларса пӑхнӑ. Журналистсем ӑна ыйтусем ҫеҫ панӑ тата хуравсене редакциленӗ.
Искусство интеллекчӗ ҫын шухӑшлавӗ пекрех тесе калаҫҫӗ. Google пуҫ мими тата нейросеть епле ӗҫленине танлаштарнӑ вӗсен хастарлӑхӗ пӗр пекрехне палӑртнӑ.
Чӑваш Енре «Витрина закупок Чувашской Республики» (чӑв. Чӑваш Республикин туянакансен витрини) информаци порталӗ ӗҫлесе кайнӑ. Ӑна республикӑн Конкурентлӑ политикӑпа тариф патшалӑх служби ӗҫлеттерсе янӑ. Унта патшалӑх тата муниципалитет закупкисемпе ҫыхӑннӑ хыпара вырнаҫтараҫҫӗ.
Платформа тӗллевӗ – туянса илнине усӑмлатасси.
Пирӗн республикӑри патшалӑх служащийӗсем валли ҫӗнӗ вӗренӳ порталӗ ӗҫлеме тытӑннӑ. Унта тӳре-шара хӑйӗн професси шайне ӳстерме пултарӗ.
Чӑваш Ен Элтеперӗ Олег Николаев Правительство ҫуртӗнчи тунтикунхи канашлура палӑртса хӑварнӑ тӑрӑх, ӗҫ вырӑнӗсене хамӑр ҫӗршыври программӑсем ҫине куҫараҫҫӗ. Ку вӑл патшалӑх тата муниципалитет шайӗнче ӗҫлекен 4700 ытла ҫынна пырса тивӗ.
Кӑрлач уйӑхӗ тӗлне республикӑри 1271 ӗҫ вырӑнӗнчен 641-шне «Windows» операци тытӑмӗнчен хамӑр ҫӗршыври программистсем шухӑшласа кӑларнӑ «Astra Linux» программа ҫине куҫарнӑ.
Ҫӗнӗ вӗренӳ порталӗ «Astra Linux» тата «P7-Офис» программӑсемпе ӗҫлеме вӗрентет.
«Электронлӑ сӑмахсар» сайт паян ҫӗнӗ словарьпе пуянланчӗ. Сӑмах 1982 ҫулта Мефодий Чернов хатӗрлесе кӑларнӑ «Чӑвашла-вырӑсла фразеологи словарӗ» пирки пырать. Ку сӑмахсарта эсир глаголпа ят сӑмах фразеологизмӗсене тупма пултаратӑр. Словарьти чылай статьяна тӗслӗхсемпе ҫирӗплетсе панӑ.
Ку ӗҫе Чӑваш чӗлхин кунӗ ҫывхарса пынӑ май пурнӑҫланӑ. Электронлӑ варианта вырнаҫтарас ӗҫе пурнӑҫлакансем: Николай Плотников (словаре сканерлани, саспаллани, сайта вырнаҫтарни), Алина Иванова (текста саспалланӑ хыҫҫӑн тӳрлетсе тухни).
Аса илтеретпӗр, «Чӑваш чӗлхи лабораторийӗ» тӑрӑшнипе тытса тӑракан «Электронлӑ сӑмахсар» сайтра паянхи куна илес пулсан тӗрлӗ словарьсемпе паллашма пулать: чӑвашла-вырӑсла словарьсем, вырӑсла-чӑвашлисем, ҫавӑн пекех кунта чӑвашла-эсперанто, чӑвашла-нимӗҫле, чӑвашла-тутарла тата ытти куҫару словарӗсем пур. Унсӑр пуҫне сайтра этимологи тата ытти йышши сӑмахсарсене вырнаҫтарнӑ. Паян, тӗслӗхрен, сайт фразеологи словарӗпе пуянланчӗ.
Чӑваш Енре Лару-тӑру центрӗ (вырӑсла ӑна Ситуационный центр тенӗ) уҫӑлнӑ. Хушӑва регион ертӳҫи Олег Николаев алӑ пусса ҫирӗплетнӗ.
Центр ертсе пырассипе, лару-тӑрӑва сӑнаса тӑрассипе, ыйтуллӑ самантсене палӑртассипе тата тишкерессипе паха йышӑнусем хатӗрлеме кирлӗ-мӗн. Унсӑр пуҫне центр инкеклӗ лару-тӑруран асӑрханассипе тата ӑна сирессипе ӗҫлӗ.
Вырӑнти хӑйтытӑмлӑх органӗсенчи лару-тӑрӑва пӗр ҫӗре пухса хатӗрлеме пӗрлехи платформа ӗҫлесе кайӗ.
Центр ӗҫӗшӗн Чӑваш Ен Элтеперӗн Администрацийӗ тата Цифра аталанӑвӗн министерстви яваплӑ пулӗҫ.
Элӗк районӗнче роботлӑ ферма уҫӑлнӑ. Вӑл — «Новый путь» хуҫалӑхра. 200 пуҫ ӗне тытмалли фермӑна пӗлтӗрхи юпа уйӑхӗнче тума тытӑннӑ. Проект 60 миллион тенке кайса ларнӑ, ҫав шутран ҫурри оборудовани туянма тухса кайнӑ. Хуҫалӑх федераци тата республика хыснинчен 18,2 млн тенкӗ илнӗ.
Ҫӗнӗ фермӑра йӑлтах автомат. Ӑслӑ аппарат шӑварать те, тислӗк те кӑларать. Сӗт сумалли тытӑм та ӑслӑскер. Сунӑ чухнех сӗт пахалӑхне тӗрӗслесе тӑрать, япӑх пулсан оператора систерет.
+8.1 °C