zvezdagukovo.ru сӑнӳкерчӗкӗ

Ку пӑтӑрмах пирки йӗрке хуралҫисене ҫурла уйӑхӗн 18-мӗшӗнче пӗлтернӗ. Тӗрӗссипе, ним ҫӗнни те ҫук. Черетлӗ ҫын каллех ултавҫӑсен капкӑнне ҫакланнӑ. Укҫана вӑл вӗсене пӗр кунра мар, уйӑх хушши куҫарса парса пурӑннӑ. Тӗрлӗшер сумма.

Улталанаканни — Шупашкарӑн кӑнтӑр-хӗвеланӑҫ районӗнче пурӑнакан 43 ҫулти хӗрарӑм. Утӑ уйӑхӗн вӗҫӗнче ун патне палламан арҫын шӑнкӑравланӑ, хӑйӗнпе банкӑн хӑрушсӑрлӑх службин ӗҫченӗ тесе паллаштарнӑ. Хӗрарӑма ют ҫын такам ун ячӗпе кредит илесшӗн, ултавҫӑсем иличчен маларах хӑв ил тесе ӗнентернӗ.

Хӗрарӑм банкран 168 пин ытларах тенкӗ кредит илнӗ. Ҫав вӑхӑтра ултавҫӑсем айван хӗрарӑм патне шӑнкӑравласах тӑнӑ. Укҫана ӑна ятарлӑ счётсем ҫине куҫарма ыйтнӑ. Хӗрарӑм уйӑх хушшинче 900 пин ытла тенкӗ кредит илсе тултарнӑ, ҫав укҫана ют ҫынсен счёчӗ ҫине куҫарса панӑ.

#банксем, #ултавҫӑсем, #укҫа-тенкӗ, #пӑтӑрмахсем, #кредитсем, #Шупашкар