Сурхури кунӗнче Хӗрлӗ Чутай районӗнче йӑлана кӗнӗ йӗлтӗрҫӗсен ӑмӑртӑвӗ ирттернӗ. Райцентрӑн тӗп стадионӗнче иртнӗ ӑмӑртӑва район пуҫлӑхӗ Александр Степанов, администраци ертӳҫи Александр Башкиров, районти хӑшпӗр ял тӑрӑхӗсен пуҫлӑхӗсем те хаваспах хутшӑннӑ.

Сурхури уявӗ ячӗпе ирттернӗ мероприятире йӗлтӗрҫӗсем 1200 тата 1800 ҫухрӑма парӑнтарнӑ. Чи ҫамрӑк йӗлтӗрҫӗсем Владимир Кондратьевпа Ева Кутузова, ҫулӗсемпе чи аслисем Людмила Михуткинӑпа Валентин Харитонов пулнине районӑн официаллӑ сайчӗ пӗлтерет.

Ҫӗнтерӳҫӗсене Хисеп хучӗпе тата парнепе, 2-мӗшпе 3-мӗш вырӑн йышӑннисене Хисеп хучӗпе чысланӑ.

Юлашки кунсенче республикӑра юр нумай ҫурӗ. Ҫавна май урапасене ҫул ҫинче ҫӳреме йывӑр килчӗ. Юра тасатсах тӑчӗҫ пулин те…

Ҫӗнӗ ҫулхи каникулта ҫулсене мӗнле тасатнине ЧР транспорт министрӗ Владимир Доброхотов хӑй тӗрӗслесе тӑнӑ. Министр «Чӑвашупрдор» тӗлӗшпе темиҫе асӑрхаттару панӑ.

Министр кӑрлачӑн 10-мӗшӗнче те тӗрӗслеве тухнӑ. Вӑл М-7 автоҫула, «Вятка» автоҫула тата республикӑри ҫул-йӗре пӑхса тухнӑ.

Кӑрлачӑн 8–10-мӗшӗсенче, юр уйрӑмах нумай ҫунӑ кунсенче, 56 единица техника федераци ҫулӗсем ҫинче ӗҫленӗ. 80-шӗ вара республика пӗлтерӗшлӗ ҫул-йӗре тасатнӑ.

Министр общество транспорчӗн чарӑнӑвӗсене, ҫул хӗресленнӗ вырӑнсене, яла кӗрекен ҫулсене вӑхӑтра тасатманнине асӑрхаттарнӑ.

Канмалли кунсенче Чӑваш Енре 1 пине яхан мероприяти иртнӗ. Шупашкарта кӑна массӑллӑ мероприятисене 240 пин ытла ҫын хутшӑннӑ. Мӗнпе асра юлнӑ-ха ҫак 11 кун?

Кӑҫал «Асамлӑхӑн Ҫӗнӗ ҫулхи академийӗ» проекта пӗрремӗш хут пурнӑҫа кӗртнӗ. Унта 20 пине яхӑн ҫын ҫитсе курнӑ. Кӑҫал Хӗл Мучи резиденцийӗ рекорд лартнӑ. Каникулта унта 27 пин ҫын ҫитнӗ. Ҫавӑн пекех «Чӑваш Енре канма вӑхӑт» акцие те пӗрремӗш хут йӗркеленӗ. Районсемпе хуласем те мероприятисем тӗлӗшпе пуян пулнӑ. Уйрӑмах Ҫӗнӗ Шупашкарта массӑллӑ мероприятисем ытларах иртнӗ.

Каникул пӑтӑрмахсемсӗр те иртмен. Ҫул-йӗр ҫинче аварисем пулнӑ, пушарсем алхаснӑ, ҫынсем шӑнса вилнӗ… Кӑрлачӑн 1-мӗшӗнче Шупашкарти Шумилов урамӗнче пӑрӑх сиенленнӗ. Ҫавна май 10 пине яхӑн ҫын ӑшӑсӑр тӑрса юлнӑ. Аварие кӗске вӑхӑтрах ҫӗнтернӗ.

Шупашкарта вырӑс кӑҫачӗн фестивалӗ пӗрремӗш хут иртнӗ. Хула администрацийӗн пресс-служби пӗлтернӗ тӑрӑх, тупӑшӑва хутшӑннӑ ҫынсем тӗрлӗ ҫӑматӑ тӑхӑннӑ.

Фестиваль кӑрлач уйӑхӗн 9-мӗшӗнче Лакрей вӑрманӗнче иртнӗ. Унта килнӗ ҫынсен хушшинче тӗрлӗ конкурс йӗркеленӗ. Ҫынсем ҫӑматӑ тӑхӑнса скакалкӑпа та сикнӗ. Арҫынсем вара кӑҫатӑ ывӑтнӑ, чупса ӑмӑртнӑ. Мала тухнисене парнесемпе хавхалантарнӑ.

Фестиваль вӑхӑтӗнче концерт пынӑ. Юрӑҫсемпе хӑнасем пухӑннисене иртнӗ Ҫӗнӗ ҫулпа тата Сурхури уявӗпе саламланӑ.

Шупашкартан Мускава кайма тухнӑ автобус кювета чӑмнӑ. Ку карлач уйӑхӗн 9-мӗшӗнче 23 сехетре пулнӑ.

Пӑтӑрмах Чулхула облаҫӗнче сиксе тухнӑ. Автобус кювета чӑмсан, телее, пассажирсем шар курман. Анчах вӗсен тепӗр автобус киличчен ҫул хӗрринче кӗтсе тӑма тивнӗ.

Водитель каланӑ тӑрӑх, малта авари пулнӑ. Ахӑртнех, тормоз япӑх ӗҫленӗ, ҫавӑнпа автобус кювета анса кайнӑ. Пассажирсем кӑштах суранланнӑ тата хӑранӑ ҫеҫ.

Ҫӗрлехи 1 сехетре пассажирсене урӑх автобуса лартнӑ. Ӑна вӗсем патне Чӑваш Енрен янӑ. Кун хыҫҫӑн пассажирсем Мускава чиперех ҫитнӗ.

Хӗллехи каникул хыҫҫӑн Шупашкарти шкулсенче ачасене апатлантарнишӗн ытларах тӳлеме тивессине эпир пӗлтернӗччӗ. Ятарлӑ хушӑва республикӑн тӗп хулин администраци пуҫлӑхӗ Алексей Ладыков иртнӗ ҫулхи раштавӑн 28-мӗшӗнче ҫирӗплетнӗ. Аса илтеретпӗр, 1–4-мӗш классем ирхи апат ҫинишӗн 19 тенкӗ тӳлемелле, кӑнтӑрлахи апатшӑн — 46 тенкӗ. 5–11-мӗш классенче вӗренекенсен ирхи апачӗ пӗчӗккисенчен кӑшт хаклӑрах: ирхишӗн 23 тенкӗ тӳлемелле. Кӑнтӑрлахишӗн вӗсене те, кӗҫӗн класрисене пекех, 46 тенкӗ кирлӗ пулать.

Шупашкар районӗнче те хаксем хӑпарнӑ. Тӗпренчӗксене унти ача пахчисене янишӗн халӗ 100 тенкӗ таран тӳлемелле. Хушӑва район администрацийӗн пуҫлӑхӗ иртнӗ ҫулхи чӳк уйӑхӗнчех кӑларнӑ. Ача пахчинче 3–5 сехет пулнишӗн 54 тенкӗрен ытла тӳлемелле мар, 8–10 сехет пулакансемшӗн — 93 тенкӗ, 12 сехет пулсан — 115 тенкӗ, 24 сехет пулсан — 120 тенкӗ.

Нумай хваттерлӗ ҫуртсенче пурӑнакансене юлашки ҫулсенче тата тепӗр тӳлев хушса пачӗҫ: халӗ вӗсен ҫурта тӗплӗн юсассишӗн укҫа тӳлемелле. Капюсавшӑн укҫа тӳлеттерме тытӑнсан халӑх самаях кӑмӑлсӑрланнине нумайӑшӗ астӑвать ӗнтӗ. Ара пулмасӑр. Ахаль те ҫити-ҫитми укҫана тенкӗн-тенкӗн сыпӑнтарса пыракансемшӗн кашни тӑваткал метршӑн хушма укҫа тӳлесси пӗртте ҫӑмӑл мар. Ҫынсем тӳлеме тытӑнса тӑнине кура иртнӗ ҫулхи юпа уйӑхӗнче пени хушма тытӑнчӗҫ.

Ҫынсен хӑш-пӗр категорине капюсавшӑн тӳлеттерес марри пирки ҫӗршывра саккун проекчӗ хатӗрленине Чӑваш халӑх сайчӗ пӗлтернӗччӗ. Ҫапла вара чӑн та, ун пек саккун тухрӗ. РФ Президенчӗ регионсене 80 ҫултан аслӑраххисене тӳлеттермелле мар тума ирӗк панӑ. I тата II ушкӑн инваличӗсен, сусӑр ачаллӑ ҫемьесен тата 70 ҫултан аслӑраххисене капюсавшӑн йӳнӗрех тӳлеттермелле тумалли пирки те каланӑ.

Капюсав хакӗ кӑҫалтан пӗр тӑваткал метршӑн 5 тенкӗ те 80 пуса ҫитрӗ.

Шупашкарта «финанс пирамидин» ертӳҫин тӗлӗшпе пуҫарнӑ пуҫиле ӗҫе тишкерсе пӗтернӗ.

ЧР ШӖМӗн пресс-служби пӗлтернӗ тӑрӑх, вӑл 384 ҫынна 93 миллион тенкӗлӗх лартса хӑварнӑ. Ертӳҫӗ потребитель кредичӗсен коопертивӗн пайщикӗсен укҫи-тенкине вӑрлас тесе займсем пама пӑрахасси пирки хушу кӑларнӑ. Ҫапла пӗтӗм укҫа тӳрех ертӳҫӗ патне пынӑ.

Стабильлӗхе кӑтартас тӗллевпе вӑл малтан алӑ пуснӑ договорсемпе килӗшӳллӗн вкладчиксене суммӑна тавӑрса панӑ тата процентсене тӳленӗ. «Финанс пирамиди» ҫак схемӑпа 2014 ҫулхи раштав уйӑхӗччен ӗҫленӗ. Унтан ертӳҫӗ таҫта тарса ҫухалнӑ.

2015 ҫулхи кӑрлач уйӑхӗнче ун тӗлӗшпе пуҫиле ӗҫ пуҫарнӑ, авӑн уйӑхӗнче вара ертӳҫӗ хӑйӗн айӑпне йышӑнса килнӗ. Халӗ пуҫиле ӗҫе Шупашкарти Мускав районӗн судне ярса панӑ.

Пирӗн республикӑри судсенче вӗсен пуҫлӑхӗсене ҫирӗплетнӗ. Кун пек хушӑва республика шайӗнче кӑлармаҫҫӗ. «Федераци судйисене ҫирӗплетесси ҫинчен» ятлӑ хушӑва ҫӗршыв Президенчӗ хӑй кӑларать. Черетлӗ хушӑва Владимир Путин кӑҫалхи кӑрлачӑн 2-мӗшӗнче кӑларнӑ. Президентӑн кӑҫалхи 3-мӗш номерлӗ хушӑвӗнче ҫӗршывӑн тӗрлӗ регионӗнче федераци судйисене ҫирӗплетесси пирки каланӑ. Хушу Чӑваш Енри тӳресене те пырса тивнӗ. Пирӗн республикӑрисене илсен, хушу икӗ районпа ҫыхӑннӑ. Хушусем Елчӗк тата Улатӑр районӗсене пырса тивнӗ.

Раҫҫей Президенчӗн хушӑвӗпе Елчӗк район сучӗн ертӳҫи пулма Александр Викторова шаннӑ, Улатӑр район судне ертсе пыма Надежда Назарована ҫирӗплетнӗ.

Сылтӑмран иккӗмӗшӗ — «Акконд» тӗп директорӗ Валерий Иванов

Иртнӗ ҫул вӗҫӗнче, раштавӑн 25-мӗшӗнче, «Акконд» кондитер хапрӑкӗнче бисквитпа розница цехӗнче ҫӗнӗ лини уҫни, ҫав ятпа унта Чӑваш Ен Элтеперӗ Михаил Игнатьев тата министрсемпе шкул ачисем пулни пирки Чӑваш халӑх сайчӗ пӗлтернӗччӗ.

Хапрӑкра пулнӑ чух Элтепер ҫав предприятипе мӑнаҫланнине пӗлтернӗччӗ.

«Акконд»-ра пысӑк пуҫлӑхсем пулни аван-ха. Анчах хӑшпӗр сӑнавҫӑ унта улшӑнусем пулса иртмен-ши тесе пуҫ ватать. Ҫакна Андрей Иванов журналист, сӑмахран, иртнӗ ҫул вӗҫӗнче хапрӑк хӑйӗн йӗркелӳпе право хурмине публикӑлла мар акционерсен обществи тесе ылмаштарнипе сӑлтавлать теме пулать. Ҫакӑн пек хурмӑпа ӗҫлеме тытӑннӑ хыҫҫӑн харпӑрлӑхҫӑсем кам иккенне кӑтартмасан та юрать. Унччен хапрӑкӑн акцийӗсен 55 проценчӗ «Акконд-Торг» обществӑра шутланнӑ (унӑн хуҫи предприятин гендиреткорӗн хӗрӗ Татьяна-мӗн). Халӗ вара камра мӗн чухлӗ процент акци пулни уҫӑмлӑ мар. Кӗркунне Спарк-Интерфакс тытӑм Росстат пӗлтерни ҫине таянса «Акконд-Торг» тӳпи 20% кӑна тесе хыпарланӑ, компанин 57% Раҫҫей гражданӗсен аллинче тенӗ. Тепӗр тесен, Раҫҫей гражданӗсем хапрӑкӑн тӗп директорӗ Валерий Иванов та, унӑн хӗрӗ Татьяна та пулма пултарать.

Малалла...