forum.na-svyazi.ru сӑнӳкерчӗкӗ

Чӑваш Енри тӳре-шарана вӗрентме республика Правительствин резерв фондӗнчен 11,5 миллион тенкӗ укҫа уйӑрнӑ. Кун пек йышӑнӑва Сергей Артамонов премьер-министр кӑрлач уйӑхӗн 23-мӗшӗнче алӑ пуснӑ.

Укҫана Чӑваш Республикин Вӗренӳ институтне уйӑрса парӗҫ. Вӑл тупрана «Социаллӑ архитектура тата политика управленийӗ» программа валли тӑкаклӗҫ.

Патшалӑх службинче ӗҫлекенсене вӗрентсе кӑларма тата вӗсен квалификацине ӳстерме ҫав шутран 7 миллион тенкӗ уйӑрӗҫ, муниципалитетсенче тӑрӑшакансене вӗрентме — 4,5 миллиона яхӑн тенкӗ.

cap.ru сайтри сӑн

ЧР ял хуҫалӑх министрӗн ҫумне Ленар Балтаева ӗҫрен кӑларнӑ. Хушӑва Сергей Артамонов премьер-министр алӑ пуснӑ.

Ку дожноҫре вӑл пӗлтӗрхи ака уйӑхӗнченпе ӗҫленӗ. Унччен Мари Элте патшалӑх службин тытӑмӗнче вӑй хунӑ.

Халӗ ял хуҫалӑх министрӗн Андрей Макушевӑн икӗ ҫум юлнӑ: Инна Волкова тата Ольга Кудрявцева.

pravdapfo.ru сӑнӳкерчӗкӗ

Чӑваш Ен Элтеперӗн Администрацийӗнче ӗҫлекенсен йышӗ кӑҫал 202 ҫынна ҫитнӗ.

«Правда ПФО» тӗнче тетелӗнчи хаҫатра хыпарланӑ тӑрӑх, Олег Николаев республикӑна ертсе пынӑ вӑхӑтра администарцире ӗҫлекенсен йышӗ икӗ хута яхӑн ӳснӗ. 2020 ҫулта Элтепер аппаратӗнче 110 ҫун шутланса тӑнӑ пулсан, 2026 ҫулта ку йыш 202 ҫынпа танлашнӑ. Унсӑр пуҫне «патшалӑхӑн ытти ыйтӑвне» татса паракан тепӗр 9 ҫын пур-мӗн.

cap.ru сайтри сӑн

ЧР промышленноҫ министрӗн ҫумӗ Евгений Теллин ӗҫрен кайнӑ. Хушӑва Сергей Артамонов премьер-министр алӑ пуснӑ.

Вӑл ку должноҫре ҫур ҫул ытла кӑна ӗҫленӗ – пӗлтӗр ҫӗртмен 6-мӗшӗнче министр ҫумӗ пулса тӑнӑ. Унччен «Чӑваш Республикинчи промышленноҫ тата инвестици ӗҫӗн аталанӑвӗн фончӗн» ертӳҫи пулнӑ. «Чеб.ру» пӗлтернӗ тӑрӑх, вӑл ҫав должноҫех таврӑнма пултарать.

Халӗ промышленноҫ министрӗн Марат Якушевӑн пӗр ҫум юлнӑ: Дмитрий Гринев.

forum.na-svyazi.ru сӑнӳкерчӗкӗ

Ҫӗнӗ Шупашкар хулин пуҫлӑхне Александр Алексеева оклад ҫумне уйӑхсерен 245 процент хушса тӳлӗҫ. Кун пек йышӑнӑва вырӑнти Депутатсен пухӑвӗн раштавӑн 158-мӗшӗнче иртнӗ ларӑвӗнче палӑртса хӑварнӑ.

Алексеева уйрӑм ӗҫ условийӗшӗн уйӑхсерен оклад ҫумне 200 процент хушса тӳлӗҫ, нумай ҫул ӗҫленӗшӗн — 30 процент, патшалӑх вӑрттӑнлӑхе шутланакан хутсемпе ӗҫленӗшӗн — 15 процент.

Ҫапла майпа вӑл уйӑхсерен 172 пин тенке илсе пырӗ. Унсӑр пуҫне пуҫлӑхсем ытти тӗрле тӳлевпе преми илме пултараҫҫӗ.

cap.ru сайтри сӑн

ФСБн Чӑваш Республикинчи управленине ҫӗнӗ ҫын ертсе пыма тытӑннӑ. Ку должноҫе Сергей Бобровников генерал-майора шанса панӑ.

Вӑл Красноярск крайӗнче ҫуралса ӳснӗ. 2020 ҫулхи чӳк уйӑхӗнченпе ФСБн Саха (Якути) Республикинчи управленине ертсе пынӑ.

Палӑртмалла: ФСБн Чӑваш Республикинчи управленине 2021 ҫулхи кӑрлачран пуҫласа хальччен Альберт Савинцев ертсе пынӑ. Ӑна Раҫҫей хӑрушсӑрлӑх органӗсен структуринчи урӑх должноҫе куҫарнӑ.

Раштавӑн 15-мӗшӗ тӗлне «Владимир Путинпа — ҫулталӑк пӗтӗмлетӗвӗсем» кӑларӑма 1,3 пин ытла ыйту килнӗ. 556 пин ҫын шӑнкӑравланӑ, 221 пин смс-ҫыру килнӗ. 300 пине яхӑн ҫын ыйтӑва MAX мессенджер урлӑ панӑ. Халӑх тетелӗсенче вара 156 пин ытла ыйту ҫырнӑ. Ыйтусем официаллӑ сайта та, сарӑма та, ММСпа та килнӗ.

Аса илтерер: РФ Президенчӗ Владимир Путин раштавӑн 19-мӗшӗнче тӳрӗ лини тата пысӑк пресс-конференци ирттерет. Ыйтусене кӑларӑм вӗҫленичченех йышӑнаҫҫӗ.

www.cap.ru сӑнӳкерчӗкӗ

Паян Чӑваш Енӗн Ҫут ҫанталӑк ресурсӗсен тата экологи министрӗн пӗрремӗш ҫумӗ пулма Ольга Александровӑна шаннӑ.

Унччен Ольга Сергеевна Экологин ӑслӑлӑхпа тӗпчев институчӗн директорӗнче ӗҫленӗ. Паян ӑна ҫав должноҫрен хӑтарса министр ҫумӗ пулма шаннӑ. Министр ҫумӗ пулса вӑл ырантан, раштавӑн 16-мӗшӗнчен, ӗҫлеме тытӑнӗ.

Халӑх тетелӗсенче ЧР Элтеперӗпе Олег Николаевпа ҫыхӑннӑ суя видео сарӑлма тытӑннӑ. Олег Алексеевич ӑна такамсем нейросетьпе тунине, калаҫӑва чӑн мар ӑс-хакӑлпа ҫыртарнине пӗлтернӗ.

Видеора Элтепер тӳлевсене пӗчӗклетнӗ хыҫҫӑн ҫынсем ятарлӑ ҫар операцине кайманшӑн пӑшӑрханнине калать-мӗн. Олег Николаев ку хыпара ӗненмелле маррине пӗлтернӗ, официаллӑ ҫӑлкуҫсене кӑна шанмаллине каланӑ. Вӑл пӗлтернӗ тӑрӑх, ку тӗслӗх тӗлӗшпе йӗрке хуралҫисем ӗҫлеҫҫӗ — видеоролике хатӗрленӗ ҫынна тупсан явап тыттарӗҫ.

chuvashia.media сӑнӳкерчӗкӗ

Ӗнер Шупашкар хулинчи Депутатсен пухӑвӗн черетсӗр ларӑвӗнче хула пуҫлӑхне суйланӑ. Ку тилхепене Станислав Трофимова шаннӑ.

«Станислав Трофимов — ҫамрӑк та тухӑҫлӑ ӗслеме пӗлекен ертӳҫӗ. Вӑл Етӗрне тӑрӑхне ертсе пынӑ чухне хӑйне тивӗҫлипе кӑтартса пачӗ. Вӑл вӑхӑтра унта сахал мар ҫул юсанӑ; музейсене, ача пахчисемпе шкулсене, халӑх ҫӳрекен вырӑнсене ҫӗнетнӗ», — ырланӑ республика Элтеперӗ Станислав Трофимова.