cap.ru сайтри сӑн

Муркаш округне ертсе пыма ҫӗнӗ ҫынна шаннӑ. Малашне пуҫлӑх пуканне Александр Иванов йышӑнӗ.

Ку должноҫе икӗ претендент пулнӑ: «Пӗрлӗхлӗ Раҫҫей» партин вырӑнти уйрӑмӗн секретарӗ Александр Иванов тата «Муркаш» территори уйрӑмӗн ертӳҫи Алексей Кириллов.

Депутатсем Александр Ивановшӑн сасӑланӑ. Палӑртмалла: вӑл пуш уйӑхӗнченпе Муркаш округӗн пуҫлӑхӗн тивӗҫӗсене пурнӑҫласа пынӑ.

Аса илтерер: унчченхи пуҫлӑх Александр Матросова тӗлӗшпе Мӑн Сӗнтӗрте тӑлӑхсем валли япӑх ҫурт-йӗр туяннӑшӑн явап тыттарма тӑнӑ. Ун хыҫҫӑн вӑл должноҫрен кайнӑ.

cap.ru сайтри сӑн

«Пӗрлӗхлӗ Раҫҫей» партин регионти уйрӑмне малашне ҫӗнӗ ҫын ертсе пырӗ. Ку должноҫе Сергей Артамонов йышӑннӑ.

Паян Шупашкарта Трактор тӑвакансен культура керменӗнче партин конференцийӗ иртнӗ. Унта депутатсем пӑхса тухнӑ тӗп ыйту парти уйрӑмӗн секретарьне суйласси пулнӑ. Депутатсем пӗр саслӑн ЧР Министрсен Кабинечӗн председателӗшӗн Сергей Артамоновшӑн сасӑланӑ.

Аса илтерер: унччен «Пӗрлӗхлӗ Раҫҫей» партин регионти уйрӑмӗн секретарӗ Леонид Черкесов пулнӑ. Пушӑн 31-мӗшӗнче Дмитрий Медведев Сергей Артамоновӑн кандидатурине ырланӑ.

sc.rchuv.ru сайтран илнӗ скриншот

«Чӑваш Енӗн Элтеперӗн лару-тӑру центрӗ» хысна учрежденине Александр Сидоренко ертсе пыма тытӑннӑ. Паянтан. Организаци сайтӗнче хальлӗхе унчченхи директор ячех-ха.

Ҫӗнӗ ҫынна директора лартасси ҫинчен калакан 402-мӗш номерлӗ йышӑнӑва республикӑн Министрсен Кабинечӗн Председателӗ Сергей Артамонов ака уйӑхӗн 17-мӗшӗнче алӑ пуснӑ. Документа ҫав кунах республикӑн влаҫ органӗсен официаллӑ порталӗнче вырнаҫтарнӑ.

«Чӑваш Енӗн Элтеперӗн лару-тӑру центрӗ» (вырӑсла унӑн ячӗ ҫапларах: Ситуационный центр Главы Чувашской Республики) хысна учрежденине 2024 ҫулхи ҫурла уйӑхӗн 28-мӗшӗнче туса хунӑ. Вӑл Элтеперӗн ӗҫ-хӗлне информаципе аналитика енчен пулӑшса пырать. Патшалӑх влаҫ органӗсен тата вырӑнти хӑй тытӑмлӑх органӗсен ӗҫне информаци енчен йӗркелесе пырассишен те вӑлах яваплӑ.

cap.ru сӑнӳкерчӗкӗ

Чӑваш Енӗн финанс министрӗ Михаил Ноздряков хӑйӗн ирӗкӗпе ӗҫрен кайнине Чӑваш халӑх сайчӗ иртнӗ эрне вӗҫӗнче хыпарланӑччӗ-ха. Аса илтерер: Михаил Ноздряков патшалӑх органӗсенче 15 ҫул ытла ӗҫленӗ. Ҫавӑн пекех вӑл банксенче, Севастопольти финанс департаментӗнче вӑй хунӑ.

Паянтан министр тивӗҫне Ольга Метелева пурнӑҫлӗ. Кун пек йышӑнӑва республика Элтеперӗ Олег Николаев эрнекун алӑ пуснӑ, 172-мӗш номерлӗ документа паян республикӑн влаҫ органӗсен официаллӑ порталӗнчи «Законодательство» (чӑв. Саккунсем) ярӑмра вырнаҫтарнӑ.

Ольга Владимировна асӑннӑ министерствӑра ӗҫлекен ҫынах, вӑл республикӑн финанс министрӗн пӗрремӗш ҫумӗ пулса тӑрӑшать. Халӗ вӑл министр тивӗҫне вӑхӑтлӑха пурнӑҫласа пырӗ.

ЧР финанс министрӗ Михаил Ноздряков хӑйӗн ирӗкӗпе ӗҫрен кайнӑ. Кун пирки республика Правительстви телеграм-каналта пӗлтернӗ.

Хушӑва ЧР Элтеперӗ Олег Николаев алӑ пуснӑ. Унта ҫырнӑ тӑрӑх, ЧР Министрсен Кабинечӗн пӗрремӗш председателӗ – финанс министрӗ Михаил Ноздряков хӑйӗн ирӗкӗпе ӗҫрен кайнӑ

Палӑртса хӑварар: Михаил Ноздряков патшалӑх органӗсенче 15 ҫул ытла ӗҫленӗ. Ҫавӑн пекех вӑл банксенче, Севастопольти финанс департаментӗнче вӑй хунӑ.

cap.ru сайтри сӑн

ЧР спорт министрӗн ҫумне Ольга Смирновӑна ӗҫрен кӑларнӑ. Паян ку хушӑва ЧР Министрсен Кабинечӗн председателӗн тивӗҫӗсене пурнӑҫлакан Андрей Макушев алӑ пуснӑ.

Ольга Смирнова ку дожноҫре 4 ҫул ҫурӑ ӗҫленӗ. Спорт министерствине вӑл 2020 ҫулта ӗҫлеме килнӗ. Малтан финанс тата экономика пайӗн пуҫлӑхӗ пулнӑ, 2021 ҫулхи авӑн уйӑхӗнче ӑна министр ҫумӗ пулма ҫирӗплетнӗ.

Палӑртса хӑварар, халӗ спорт министрӗн Василий Петровӑн икӗ ҫум юлнӑ: Татьяна Рябинина (пӗрремӗш ҫум) тата Александр Степанов.

forum.na-svyazi.ru сайтран илнӗ нейросеть сӑнӳкерчӗкӗ

Шупашкар хулин пуҫлӑхӗн Станислав Трофимовӑн МАХри каналӗ ҫухалнӑ. Кун пирки вӑл... Телеграмра пӗлтернӗ.

Станислав Трофимов паян ирхине хыпарланӑ тӑрӑх, унӑн МАХри каналӗ «техника сӑлтавне» пула ҫухалнӑ. Кун пирки «Ҫыхӑнура» форумра хыпарланӑ. Унтисем шухӑшланӑ тӑрӑх, пысӑк пуҫлӑха МАХӑн техника енчен пулӑшакан специалисчӗсем те... пулӑшайман.

Телеграмран пире ҫине тӑрсах пистерме тӑрӑшаҫҫӗ, унта халӗ виҫӗ саспаллирен тӑракан пулӑшупа усӑ курмасӑр кӗрейместӗн. Ҫав вӑхӑтрах хамӑр ҫӗршыври мессенджер паян кун та комментарисем ҫырма май туса паман, историсем те унта вырнаҫтараймастӑн, текста урӑх ҫӗртен илсе лартсан унӑн формачӗ те пӑсӑлса каять. Ку ҫеҫ ҫитмен — «Ҫыхӑнура» форумри хыпара ӗненсен, МАХри канал та ним те мар «техника сӑлтавне» пула ҫухалма пултарать иккен.

https://max.ru/mintrud_21 видеовӗнчен илне скриншот

Чӑваш Ен Элтеперӗ Олег Николаев ака уйӑхӗн 22-мӗшӗнче тӳрӗ эфирта ҫынсен ыйтӑвӗсене хуравлӗ. Халӑхпа ҫыхӑнӑва республика ертӳҫи ирхи 11 сехетре тухӗ.

«Республика аталанӑвӗ тата пирӗн малашнехи плансем ҫинчен калаҫӑпӑр. Чи кирли – сирӗн ыйтӑвӑрсене хуравлӑп. Сире мӗн пӑшӑрхантарнине сӳтсе явӑпӑр, пӗр ыйту та хуравсӑр юлмӗ», — ҫапла ӗнентерсе каланӑ Элтепер МАХри хӑйӗн каналӗнче.

Ыйтусене маларах та парса хума пулать. Вӗсене патшалӑх пулӑшӑвӗсен порталӗ урлӑ та ӑсатма юрать. Эфир кунӗнче вара трансляци чатӗнче ҫырма май килӗ тата 8 (8352) 565-100 номерпе шӑнкӑравласа ҫыхӑнма май туса парӗҫ.

Тӳрӗ эфира Элтеперӗн «Контактри» странцинче тата «Чувашская Республика» (чӑв. Чӑваш Республики) пабликра, Чӑваш Енӗн Наци телевиденийӗпе тата ЮТВ телеканалсенче курма, Наци радивовӗпе вара итлеме май килӗ. Текст трансляцийӗпе «Чӑвашинформ» тата «Хыпар» хаҫатсем паллаштарӗҫ.

cap.ru сайтри сӑн

Сергей Артамонов «Пӗрлӗхлӗ Раҫҫейӗн» Чӑваш Енри уйрӑмӗн секретарӗ пулӗ. Кандидатурӑна парти председателӗ Дмитрий Медведев ырланӑ.

Дмитрий Медведев партин Чӑваш Енре ҫынсемпе тӳрремӗн хутшӑнассине малалла тӑсмаллине каланӑ. «Ҫынсемпе халӑх тетелӗсенче кӑна мар, ҫӗр ҫинче те ытларах хутшӑнмалла», — тенӗ Дмитрий Анатольевич.

Сергей Артамонов республикӑра «Пӗрлӗхлӗ Раҫҫей» тӗп парти вӑйӗ пулнине каланӑ. Хальхи вӑхӑтра унӑн йышӗнче – 45 пин ҫын, ҫулталӑкра ку кӑтарту лайӑхланнӑ: 4 пин ҫын нумайланнӑ.

cap.ru сӑнӳкерчӗкӗ

Паян, пуш уйӑхӗн 26-мӗшӗнче, Чӑваш Енӗн Патшалӑх Канашӗн сессийӗнче республика Правительстви иртнӗ ҫул епле ӗҫленипе паллаштарнӑ. Ҫулталӑкри отчетпа Министрсен Кабинечӗн Председателӗ Сергей Артамонов тухса калаҫнӑ.

Сергей Артамонов хӑйӗн сӑмахне депутатсене ырласа мухтанинчен тата тав тунинчен пуҫланӑ. Сергей Геннадьевич палӑртса хӑварнӑ тӑрӑх, депутатсем республика Правительствин пуҫарӑвӗсене яланах ырласа йышӑннӑ.

Унтан вӑл республика Правительстви Раҫҫей Президенчӗ тата Чӑваш Ен Элтеперӗ ума лартнӑ тӗллевсене пурнӑҫласа пынине палӑртса хӑварнӑ.

Министрсен Кабинечӗн Председателӗн докладне итленӗ хыҫҫӑн тӗрлӗ фракци депутачӗсем тӗрлӗ темӑна пырса тивекен ыйтусем панӑ, вӑл вӗсене хуравланӑ.