https://forum.na-svyazi.ru/?showtopic=3068201&st=0&p=19826412#entry19826412

Шупашкарта пурӑнакан Шиловсем Пӗтӗм Раҫҫейри «Ҫулталӑк ҫемйи» конкурсра «Нумай ачаллӑ ҫемье» номинацире ҫӗнтернӗ.

Алексей Алексеевичпа Наталья Валерьевна 22 ҫул пӗрле пурӑнаҫҫӗ, икӗ ывӑлпа тӑватӑ хӗр ҫитӗнтереҫҫӗ. Аслӑ ывӑлӗпе хӗрӗ аслӑ шкулта вӗренеҫҫӗ, тепӗр виҫҫӗшӗ шкула ҫӳреҫҫӗ. Кӗҫӗнни ача пахчинче кӑна-ха.

Алексей Алексеевич - строитель, Наталья Валерьевна - Шупашкарти 93-мӗш ача пахчин воспитателӗ. Шиловсем - туслӑ, вӑхӑта пӗрле ирттерме юратакан ҫемье.

Хӑй вӑхӑтӗнче Чӑваш Енӗн пӗрремӗш президенчӗ Николай Федоров Шупашкарпа Ҫӗнӗ Шупашкара пӗрлештересшӗн пулнӑ. Анчах тӗрлӗ сӑлтава пула ку пурнӑҫа кӗмен.

Хальхи вӑхӑтра тӳре-шара, иккӗмӗш референдума ирттересси пирки шутламаҫҫӗ пулин те, икӗ хулана пӗрлештересси пирки шухӑшлаҫҫӗ. Кун пирки Шупашкар хулин пуҫлӑхӗ Олег Кортунов «Регнум» информаци агентствине пӗлтернӗ. Вӑл каланӑ тӑрӑх, икӗ хула Шупашкар агломерацийӗпе килӗшӳллӗн аталанӗ.

Сӑмах май, ЧР Элтеперӗ Олег Николаев ку ыйтӑва татса парасси халӑхран килнине каланӑччӗ.

cap.ru сӑнӳкерчӗкӗ

Ҫӑлавҫӑсен темле ҫынна та пулӑшма тивет. Пӗрисем пӳрнинчен ҫӗрре хываймаҫҫӗ. Сӑмах май, кун пек тӗслӗх ҫак кунсенче пулнӑ. Хӗрарӑмӑн пӳрни шыҫӑнсах кайнӑ. Ҫӑлавҫӑсем ҫӗрре каснӑ.

Хальхинче вӗсен сӑпса йӑвине пӗтерме тивнӗ. Утӑ уйӑхӗн 19-мӗшӗнче Шупашкарти Тукташ урамӗнчи нумай хваттерлӗ ҫуртра пурӑнакан ҫын ҫӑлавҫӑсем патне шӑнкӑравланӑ. Унӑн балконӗ ҫинче сӑпсасем йӑва ҫавӑрнӑ-мӗн.

Ҫӑлавҫӑсем вырӑна ҫитсе йӑвана илнӗ те ӑна вӑрмана илсе тухнӑ.

cap.ru сӑнӳкерчӗкӗ

Шупашкарти Константин Иванов урамӗнче вырнаҫнӑ следстви изоляторӗнчен федераци пӗлтерӗшлӗ музей тӑвасшӑн. Ҫапла пӗлтерет хула администрацийӗн пуҫлӑхӗ Денис Спирин. Вӑл изолятор ҫуртне хула харпӑрлӑхне памашкӑн федерацин айӑплава пурнӑҫлакан службине ҫырупа тухнӑ.

Шупашкарти следстви изоляторӗ Раҫҫейре ӗҫлекен чи ватӑ тӗрме шутланать. Ӑна 374 ҫул каялла хута янӑ.

Денис Спирин следстви изоляторӗнчен туризм объекчӗ тӑвасшӑн. Лапсар тӑкӑрлӑкӗнче, сӑмах май, ҫӗнӗ следстви изоляторӗ хута каять.

Яндекс.дзен сайтри сӑн

Шупашкарта пурӑнакан 38 ҫулти арҫын хӗрпе киленес тесе тӗнче тетелӗнче телефон номерӗ тупнӑ та шӑнкӑравланӑ. Хайхи хӗр укҫан ҫуррине куҫарса панӑ. Анчах кунпа ҫеҫ ҫырлахман ултавҫӑ.

Кун хыҫҫӑн ун патне администратор шӑнкӑравланӑ, пӗтӗм укҫана куҫарса пама ыйтнӑ. Анчах арҫын ҫакна тума хӗрпе курнӑҫсан ҫеҫ тума килӗшнӗ. Лешӗ вара хӑратма пуҫланӑ: унӑн харпӑр даннайӗсене урӑххисене пӗлтерӗ, ҫывӑх тӑванӗсене хур кӑтартӗ имӗш. Арҫын шикленсе ӳкнӗ, пӗтӗмпе 145 пин тенкӗ куҫарнӑ. Палламан ҫын ҫине тӑрсах кредит илме ыйтсан тин вӑл унпа калаҫма пӑрахса полицие кайнӑ.

"Про Город" сайтӗнчи сӑн

Паян 17 сехетре Шупашкарта вӑйлӑ ҫумӑр ҫунӑ. Хӑш пӗр урамра шыв тулсах кайнӑ.

«Солнечнӑй» микрорайонта Сергей Бутяков урамӗнче тата «Ҫӗнӗ хула» микрорайонта хӑш-пӗр вырӑнта ҫул шыв айне пулнӑ. Водительсем аран-аран иртсе кайнӑ. Хӑшӗ-пӗри шыв кӳлленчӗкӗнчех чарӑнса ларнӑ.

«Ҫӗнӗ хула» микрорайона троллейбуссем кӗреймен те. Ҫакна видео ӳкернӗ.

Екатерина Барышовӑпа Алишер Юлдашев — кинемее ҫӑлакансем

Утӑ уйӑхӗн 14-мӗшӗнче каҫхине Шупашкарта кӳршисем сисчӗвленме тытӑннӑ: кинемей ахаль чухне уҫӑлма тухкаланӑ, ҫав кун вара курӑнман. Хайхискерсем ун патне кайса пӑхма шутланӑ.

Алӑка уҫнӑ та кинемей урайӗнче тӑнсӑр выртнине курнӑ. Вӗсем ҫийӗнчех васкавлӑ медпулӑшу чӗннӗ.

Тухтӑрсем вырӑна ҫитсен кинемей кӑшӑлвируспа чирлесе ирттернӗ хыҫҫӑн юлнӑ чир-чӗре пула тӑнне ҫухатнине палӑртнӑ. Екатерина Барышова тата Алишер Юлдашев 72 ҫулти хӗрарӑмӑн пурнӑҫӗшӗн икӗ сехет кӗршнӗ. Телее, вӗсем ӑна ҫӑлма пултарнӑ.

Халӗ ватӑ пациентка пульницӑра выртать. Унӑн сывлӑхӗ йӗркеленнӗ.

cheb.ru сӑнӳкерчӗкӗ

Шупашкар хулин Ҫурҫӗр-Хӗвеланӑҫ районӗнчи урама Варнава митрополит ятне парасшӑн. Турра ӗненекенсем Водопроводнӑй урам ятне улӑштарасшӑн.

Асӑннӑ урамра совет саманинче Шупашкарти епархи управленийӗ вырнаҫнӑ.

Урам ятне улӑштарма шухӑш тытнисем Денис Спирин сити-менеджер ячӗпе ҫыру шӑрҫаланӑ. Вӗсем Варнавӑн ырӑ ӗҫӗсене палӑртнӑ май вӑл митрополие 44 ҫул ертсе пынӑ вӑхӑтра (1976-2020 ҫулсенче) самай ырӑ ӗҫ пурнӑҫланине, ҫав шутра 200 ытла прихутпа 7 мӑнастир уҫнине, Шупашкарта тӗн училищи ӗҫлесе кайнине, Библие чӑвашла куҫарнине палӑртса хӑварнӑ.

"Про Город" сайтӗнчи сӑн

Ҫӗнӗ Шупашкарта хӗр кӗпер ҫинчен ӳкнӗ те... Тавах Турра, чӗрӗ юлнӑ. Ку хыпара «Про Город» хаҫата халӑх корреспонденчӗ пӗлтернӗ.

Ку пӑтӑрмах паян 10 сехет те 55 минутра пулнӑ. Хӗр ҫыран хӗрринчи алӑк хапрӑкӗ патӗнчи кӗпертен ӳкнӗ.

Вырӑна васкавлӑ медпулӑшу тухтӑрӗсем часах ҫитнӗ. Хӗре пульницӑна илсе кайнӑ. Шурӑ халатлисем пӗлтернӗ тӑрӑх, унӑн сывлӑхӗ йывӑр.

"ДТП Чувашии Аварком21" сӑнӳкерчӗкӗ

Шупашкарти Хусанкай урамӗнчи 11-мӗш ҫуртра чи ҫӳлти хутра пурӑнакан арҫын пирус тӗпне сӳнтермесӗрех ҫывӑрса кайнӑ. Ку чутах инкекпе вӗҫленмен.

Ҫак пӑтӑрмах паян кӑнтӑрла пулнӑ. Юрать, кӳршисем сисчӗвленнӗ. Вӗсемех пушарнӑйсене чӗннӗ.

Сӳнтермен пирус тӗпне пула матрас хыпса илнӗ. Кил хуҫи тухтӑрсем пульницӑна кайма сӗнсен килӗшмен. Вӑл ӳсӗр пулни паллӑ.