Cap.ru сӑнӳкерчӗкӗ

Ырантан, ҫул уйӑхӗн 1-мӗшӗнчен, Шупашкарти юханшыв порчӗнчен пӑрахутсем ҫӳреме тытӑнӗҫ. Ҫынсене «Чувашия» (чӑв. Чӑваш Ен) икӗ палубӑллӑ пӑрахут турттарӗ.

Рейссем кашни кун 13.00, 15.00, 17.00 тата 19.00 сехетре пулӗҫ.

Аслисем валли билет хакӗ 270 тенкӗ пулӗ, 5-10 ҫулхи ачасем валли – 150 тенкӗ. 5 ҫултан кӗҫӗнреххисенчен укҫа илмӗҫ. Багаж хакӗ – 40 тенкӗ.

Круиз сезонӗ пирӗн тӑрӑхра ака уйӑхӗн 28-мӗшӗнче уҫӑлнӑ. Ҫав кун Шупашкарти юханшыв портне Дон ҫинчи Ростовран «Волга Стар» пӑрахут килсе чарӑннӑ.

Ҫӗртме уйӑхӗн 1-мӗшӗнчен Шупашкартан Хусана Атӑл тӑрӑх круизсем уҫӑлӗҫ.

"Про Город" сайтӗнчи сӑн

Паян Шупашкарта Куҫ микрохирургийӗ патӗнче пилӗк машина ҫапӑннӑ. "Про Город" хаҫата халӑх корреспонденчӗ пӗлтернӗ тӑрӑх, аваришӗн айӑплӑ ҫын ӳсӗр пулнӑ. Ӑна пульницӑна илсе кайнӑ.

ҪҪХПИ пӗлтернӗ тӑрӑх, машинӑсем сулахай енне ҫаврӑнма тӑнӑ. Ҫав вӑхӑтра вӗсем ҫине ӳсӗр водитель пырса кӗнӗ. Унӑн машини самаях вӑйлӑ сиенленнӗ. Водитель хӑй те суранланнӑ.

Ҫӗнӗ Шупашкарти ҫӳп-ҫап йышӑнакан полигонра ӗҫлекенсем кӑвак тӗслӗ чӑрӑшсене иккӗмӗш пурнӑҫ парнеленӗ. Вӗсем йывӑҫсене, тымарӗпех тӑпӑлтарнӑскерсене, кӳрсе килнӗ ҫӳп-ҫап ӑшӗнче тупнӑ.

Ака уйӑхӗн 27-мӗшӗнче унти ӗҫченсем тӑватӑ чӑрӑша асӑрханӑ. Кашни - 1 метр ытла. Полигон ӗҫченӗсем вӗсене хӑйсем патӗнче лартнӑ. Чӑрӑш турачӗсем йӗркеллех,анчах тӑрри хуҫӑлнӑ. Ҫапах вӗсем кайран ӳсӗҫ. Ҫапла полигонра мини-аллея пулнӑ.

Полигон ӗҫченӗсем ку таранччӗн чӗрчунсене те ҫӑлнӑ. Ҫав шутра - кушак ҫури, чӗрӗп. Хальхинче ав чӑрӑшсене пӗтме паман.

tvoy-bor.ru сайтри сӑн

Умра – вӑрӑма тӑсӑлакан канмалли кунсем. Ҫу уйӑхӗн пуҫламӑшӗнчи уявсенче Шупашкарта массӑллӑ мероприятисем иртекен вырӑнсенче эрех-сӑра сутма чарӗҫ.

Ҫу уйӑхӗн 9-мӗшӗнче иртекен Ҫӗнтерӳ парачӗ иртнӗ чухне те эрех-сӑра туянма май пулмӗ. Ку чару мероприяти иртекен вырӑнсене пырса тивет. Ҫу уйӑхӗн 1-мӗшӗнчи уяв Чапаев скверӗнчен пуҫласа Воробьев композиторсен урамӗ таран иртӗ. Ҫӗнтерӳ кунӗнче мероприятисем Хӗрлӗ лапамра, Республика лапамӗнче, «Ҫӗнтерӳ» асӑну паркӗнче пулӗҫ.

Эрех-сӑрана массӑллӑ мероприяти пуҫланиччен 2 сехет маларах тата ун хыҫҫӑн 1 сехет сутмӗҫ.

Шупашкарта 30 ҫулти хӗрарӑм ҫухалнӑ. Кун пирки "Лиза Алерт" шырав хастарӗсем пӗлтереҫҫӗ. Полици те ку информацие ҫирӗплетет.

Алина Александровна Маркова ака уйӑхӗн 21-мӗшӗнче килтен тухса кайнӑ. Хӑйӗнпе пӗрле унӑн хура рюкзак, кӗрен тӗслӗ сумка пулнӑ.

Хӗрарӑм 160 сантиметр ҫӳллӗш, имшер кӗлеткеллӗ, куҫӗ хӑмӑр, ҫӳҫӗ хура. Ун пирки мӗн те пулин пӗлсен 8 800 700 54 52 е 112 номерпе шӑнкӑравлама ыйтаҫҫӗ.

"На связи" форумри сӑн

Кӑҫал Ҫӗнтерӳ кунӗ йӑлана кӗнӗ пек иртӗ. Тинех. Парад, салют, ытти мероприяти икӗ ҫул ӗнтӗ пулман, онлайн мелпе ҫеҫ иртнӗ.

Ҫу уйӑхӗн 9-мӗшӗнче кӑнтӑрла Шупашкарӑн тӗп урамӗнче парад пулӗ. Унта 1 пине яхӑн ҫын, 500 ытла техника хутшӑнӗ. Сӑмах май, репетицисем пыраҫҫӗ ӗнтӗ.

11 сехет ҫурӑра Наци вулавӑшӗ умӗнче "Вилӗмсӗр полка" хутшӑнакансем пухӑнӗҫ. 12 сехет ҫурӑра вӗсем парада тухӗҫ. Малтанлӑха пӗлтернӗ тӑрӑх, кӑҫал унта 20 пине яхӑн ҫын хутшӑнмалла.

15 сехетре Ухсай ячӗллӗ культура керменӗ умӗнче "Ҫӗнтерӳ вальсӗ" пулӗ.

t.me/nikamran каналтан илнӗ сӑнӳкерчӗк

Чӑваш Енӗн тӗп хулинче роллер йӗлтӗрпе ярӑнма ятарлӑ ҫул тӑвасшӑн.

Ҫав ҫул 4 ҫухрӑма яхӑн тӑршшӗ пулӗ. Хулари тӳре-шара ӗҫе пурнӑҫлама 915 миллион тенкӗ кирлӗ тесе пӗлтернӗ.

Роллер йӗлтӗрпе ярӑнмалли ҫула туса пӗтерсен унта Спортӑн хӗллехи тӗсӗсен центрӗнче вӗренекен ачасемпе ҫамрӑксем ирӗн-каҫӑн чупса хӑнӑхма пултарӗҫ тесе шанаҫҫӗ.

kem.kp.ru сайтри сӑн

Шупашкарта пурӑнакан арҫын киле таврӑннӑ чухне гаражӗ патӗнчен иртсе кайнӑ. Унӑн алӑкӗ уҫӑ пулнине курах кайнӑ. Хайхискер ӑна ҫаратма пуҫланине ӑнланнӑ та вӑрра тытса чарма шутланӑ. Ҫав вӑхӑтрах полицие шӑнкӑравланӑ.

Ку ака уйӑхӗн 22-мӗшӗнче 14 сехет ҫурӑра пулнӑ. Ют ҫын гараж алӑкне уҫса кӗнӗ, велосипеда, электроинструмент тултарнӑ сумкӑна урама кӑларса хурса вӑрлама хатӗрленнӗ.

Ҫак ӗҫе тӑваканӗ- 55 ҫулти арҫын. Йӗрке хуралҫисем ӑна тухса ҫӳреме чарнӑ. Ҫавӑн пекех унӑн кунӗ тӑкакшӑн 17 пин тенкӗ тӳлеме тивӗ.

hвести35.рф сайтри сӑн

Шупашкарта пурӑнакан хӗрарӑм ултавҫӑсен аллине лекнӗ. Вӑл полицие пырса пулӑшу ыйтнӑ.

Хӗрарӑм каласа кӑтартнӑ тӑрӑх, вӑл вӑйӑ вылямалли укҫасем илес тесе тӗнче тетелӗнче каҫӑпа кайнӑ, банк карттин реквизичӗсене ҫырнӑ. Кӑштахран унӑн счечӗ ҫинчен 25 пин ытла тенкӗ ҫухалнӑ.

ЧР ШӖМӗ пӗлтернӗ тӑрӑх, ҫав сайт суя пулнӑ. Кун тӗлӗшпе пуҫиле ӗҫ пуҫарнӑ. Халӗ шырав мероприятийӗсене ирттереҫҫӗ.

cap.ru сӑнӳкерчӗкӗ

Президент пепкелӗх центрӗнче пӗлтӗр 4493 ача ҫут тӗнчене килнӗ. Вӗсенчен 159-шӗ кӑшӑлвируспа чирлӗ амӑшӗнчен ҫуралнӑ.

Ҫак пулницӑра кун ҫути курнӑ ачасен 8 проценчӗ вӑхӑтран маларах ҫуралнӑ. 37 пепкен кӗлетке йывӑрӑшӗ питӗ пӗчӗк пулнӑ: 500-999 грамм.

Сӑмах май, Президент пепкелӗх центрӗнче 490 грамм таякан пепке те кун ҫути курнӑ. Тухтӑрсем унӑн пурнӑҫне упраса хӑварма пултарнӑ.