Пушкӑртстанри Федоровка районӗнчи Ашкатар ялӗнче Семеновсен ҫемйине хисеп туса мероприяти иртнӗ. Хӑнасене культура ҫурчӗ умӗнче чӑваш апачӗпе кӗтсе илнӗ. Уяв йӗркелӳҫисем «Сӑн ӳкерчӗксенче истори» тата «Семеновсен ҫитӗнӗвӗсем» ятлӑ куравсем хатӗрленӗ. Семеновсен несӗлӗнче учительсемпе тухтӑрсем, спортсменсемпе педагогсем‚ юрӑҫсемпе ташӑҫӑсем тата купӑсҫӑсем пулнӑ.

«Урал сасси» хаҫатра пӗлтернӗ тӑрӑх, Вячеслав Ерохин таврапӗлӳҫӗ йӑх-несӗл йывӑҫҫин икӗ туратне питӗ интереслӗ хатӗрленӗ. Вӑлах пухӑннисене ҫак ӑрӑвӑн паллӑ ҫыннисемпе паллаштарнӑ.

Федоровка тӑрӑхӗнчи чӑвашсен канашӗн ӗҫтӑвком председателӗ Анна Ремпель асӑннӑ ялта йӑла-йӗркесене тытса пынине‚ вӗсене ҫамрӑк ӑрӑва вӗрентнине палӑртса хӑварчӗ. Ӑру уявӗ вӑхӑтӗнче «Пикесем» ушкӑн (ертӳҫи – Елена Газизова)‚ «Ашкатар ҫӑлкуҫӗсем» халӑх ансамблӗн вокал йышӗ‚ «Ашкатар ҫӑлкуҫӗсем» ташӑ ушкӑнӗ (ертӳҫи – Марс Хайбуллин) халӑха савӑнтарнӑ.

Илья Бархатов сӑнӳкерчӗкӗ

Чӑваш Енри Пахчаҫӑсен союзӗн ертӳҫи Юрий Соколов Челябинск хулине 70 пин хыр хунавӗ, 2-шер пин чӑрӑшпа юман, 800 ҫӑка парнеленӗ. Хунавсене пахчаҫӑ Мускав облаҫӗнчи тата Чӑваш Енри пахчасенче ӳстерет. Ыркӑмӑллӑх акцийӗпе Челябинск хулине вӑл ӗнер, юпа уйӑхӗн 5-мӗшӗнче, пырса ҫитнӗ. Унсӑр пуҫне кӗпӗрнаттӑра вӑл 20 кедрпа 50 юман парнеленӗ.

«Хулара Космонавтсен аллейине уҫма сирӗн ертӳҫӗсем ирӗк парсан эпӗ 120 кӑвак чӑрӑш илсе килнӗ пулӑттӑм», – тенӗ Юрий Соколов «74.RU» онлайн-медиа журналисчӗсене.

Вырӑнти ертӳҫӗсем ҫеҫ мар, Челябинск ҫыннисем те Юрий Соколова тав тӑваҫҫӗ. «Ҫын-тӑк ҫын! Пирӗн хушӑра ҫавӑн пек ҫынсем пулсанччӗ!», «Пур пек ҫавӑн пек ҫынсем!!! Йывӑҫсем чӗрӗлччӗр кӑна, пысӑк тав ӑна!», «Чӑвашсем – ӗҫчен халӑх. Маттурсем. Шупашкарта питӗ таса!», — тесе ҫырнӑ вӗсем.

Пӗрремӗш канал тунӑ видео скринӗ

«Асамлӑх уйӗ» телекӑларӑмӑн юпан 2-мӗшӗнче тухна эфирӗнче Чӑваш Енри таксист пулнӑ. Шупашкарта пурӑнакан Владимир Дмитриев пӗрремӗш тапхӑрта вылянӑ. Вӑл хӑйӗнпе паллаштарса акӑ мӗн пӗлтернӗ: ниҫта та ӗҫлемест, таксире кӑштах тупӑш тукалать.

Пирӗн ентеш Леонид Якубович панӑ ыйтӑвӑн тӗрӗс хуравне пӗлнӗ. Малтан вӑл виҫӗ саспалли уҫнӑ, унтан сӑмахне пӗлтернӗ – «опрятность».

Шупашкар арҫынни парнесӗр килмен. Вӑл Якубовича чӑваш тӗрриллӗ кӗпе, портрет тата ытти япала парнеленӗ. «Ӗҫсӗр ҫынран парне илесси – ку ҫӗнӗлӗх», - тенӗ Леонид Якубович.

mrsworld.ru сайтри сӑн

Шупашкарти хӗрарӑм «Тӗнчери Раҫҫей мисисӗ» конкурса хутшӑннӑ. 49 ҫулти «Mrs World Russia–2020» Орендеева илем конкурсӗнче Чӑваш Ен чысне хӳтеленӗ.

Светлана – виҫӗ ача амӑшӗ, унӑн икӗ мӑнук пур. Конкурс тупӑшӑвӗ хӗрӳ иртнӗ. Чи илемлӗ хӗрарӑм ятне ҫӗнсе илессишӗн 46-ӑн тупӑшнӑ. Пирӗн ентеш Мускавран икӗ ятпа таврӑннӑ: вӑл «Раҫҫей пуянлӑхӗ» тата «Хастарлӑх миссисӗ» номинацисенче ҫӗнтернӗ. Ҫавӑн пекех вӑл «Раҫҫейри Халӑх миссисӗ» топ-10 списока кӗнӗ.

Светлана илем салонӗнче администраторта ӗҫлет. Кӑрлач уйӑхӗнче вӑл Болгарире иртекен «Mrs. World Classic–2021» конкурса хутшӑнма хатӗрленет.

os-taxi.ru сайтри сӑн

Юпан 2-мӗшӗнче республикӑра чи лайӑх таксиста суйлама тытӑнӗҫ. Ҫӗнтерӳҫӗ «Раҫҫейри чи лайӑх такси водителӗ» конкурса хутшӑнӗ. Ӑна РФ Транспорт министерстви, Таксие аталантаракан общество канашӗ тата Патшалӑх Думи ирттереҫҫӗ.

Конкурса харпӑр усламҫӑсем е такспарксен ӗҫченӗсем хутшӑнаҫҫӗ. Вӗсен Раҫҫей гржданстви, «В» категорири водитель прави пулмалла. Кунсӑр пуҫне виҫӗ ҫул аварие лекменнине, кӑҫал штраф пулманнине шута илеҫҫӗ.

Раҫҫей шайӗнчи конкурс Сочире иртӗ. Республика ҫӗнтерӳҫи унта Чӑваш Ен чысне хӳтӗлӗ. Конкурса хутшӑнакансем Сочире конкурс йӗркелӳҫин шучӗпе пурӑнӗҫ.

Палӑртмалла: тестсемсӗр пуҫне пултарулӑх конкурсӗ те пулӗ. Таксистсен хӑйсен регионӗ пирки хӑйне евӗр каласа кӑтартма тивӗ.

ok.ru сӑнӳкерчӗкӗ

Раҫҫейри паллӑ актера Михаил Ефремова Мускаври аваришӗн 8 ҫуллӑха айӑпланӑ. Аса илтерер: вӑл руль умне ӳсӗр ларса машинӑпа ҫапӑннӑ, тепӗр водитель вилнӗ.

Михаил Ефремов айӑпне Чӑваш Енри колонире каҫарттарасшӑн пулнине пӗлтернӗ. «Унта – манӑн тымар. Иван Яковлев Ленин ашшӗн пулӑшуҫи пулнӑ», — тенӗ вӑл. Михаил Ефремов – Иван Яковлевӑн тӑванӗ.

Актер каланӑ тӑрӑх, Чӑваш Енри ФСИН ӗҫченӗсем ыйту ҫыраҫҫӗ. Михаил Ефремовӑн – икӗ вакат, анчах вӗсен ячӗсене вӑл пӗлтермен. Пӗри – Чӑваш Енрен.

Ӗнер, авӑн уйӑхӗн 10-мӗшӗнче, Севастополь хулинче чӑваш ҫыннине асӑнса хисеп хӑми уҫнӑ. Ҫав ятпа унта савӑнӑҫлӑ митинг иртнӗ. Хулари 10-мӗш гимназин ҫине вырнаҫтарнӑ мемориал хӑмине Чӑваш Енре ҫуралнӑ Мирон Ефимова халалланӑ. Вӑл — Совет Союзӗн Геройӗ.

Аса илтерер: Мирон Ефимович 1915 ҫулта Элӗк районӗнчи Самушка ялӗнче ҫуралнӑ. Вырӑс Сурӑмӗнчи тата Элӗкри шкулсенче вӗреннӗ, Шупашкарти педагогика институтне пӗтернӗ, учитель пулса ӗҫленӗ.

Комсомол путевкипе Мирон Ефимов Ейскри ҫар авиаци училищинче вӗреннӗскер летчик-истребитель пулса тӑнӑ. Икӗ хут Хӗрлӗ ялав орденне тивӗҫнӗ. 1942 ҫулхи ҫӗртме уйӑхӗнче ӑна «Совет Союзӗн Геройӗ» ят панӑ.

1961 ҫултан отставкӑна кайсан Мускав хулинче пурӑннӑ. Пурӑннӑ чухнех Крымра тата Севастопольте Мирон Ефимов подполковник ячӗпе палӑксем лартнӑ, 10-мӗш гимназие ун ячӗпе панӑ.

Раҫҫейӗн Ӗҫ министерствинче палӑртнӑ тӑрӑх, 2021 ҫулхи раштав уйӑхӗн 31-мӗшӗн пирӗн ҫӗршывра кану кунӗ пулӗ.

Ҫитес ҫул темиҫе уяв кунӗ кану кунӗпе пӗр килнӗрен канмалли кунсене куҫарма тивӗ. Кӑрлачӑн 2 тата 3-мӗшӗсем шӑматкунпа вырсарникуна лекӗҫ. Вӗсен вырӑнне чӳк уйӑхӗн 5-мӗшӗнче тата раштав уйӑхӗн 31-мӗшӗнче канас шанчӑк пур. Нарӑс уйӑхӗн 20-мӗшӗнчи шӑматкуна нарӑс уйӑхӗн 22-мӗшне куҫарма палӑртнӑ.

Ҫапла вара 2021 ҫулта пирӗн ҫӗршывра кану кунӗсем ҫапларах пулӗҫ: кӑрлач уйӑхӗн 1-10-мӗшӗсем; нарӑс уйӑхӗн 21-23-мӗшӗсем; пуш уйӑхӗн 6-8-мӗшӗсем; ҫу уйӑхӗн 1-3-мӗшӗсем тата 8-10-мӗшӗсем; ҫӗртме уйӑхӗн 12-14-мӗшӗсем;, чӳк уйӑхӗн 4-7-мӗшӗсем; раштав уйӑхӗн 31-мӗшӗ.

Тӳрех пӗлтерер: ку вӑл хальлӗхе проект шайӗнче ҫеҫ-ха. Ҫӗршыв Правительстви палӑртсан ҫеҫ йышӑну вӑя кӗрӗ.

solreg.ru сайтри сӑн

Ыран, авӑн уйӑхӗн 3-мӗшӗнче, Раҫҫейре Тӑван ҫӗршывӑн Аслӑ вӑрҫине халалланӑ акци – «Ҫӗнтерӳ диктанчӗ» - иртӗ. Унта кашниех хутшӑнма пултарать.

Чӑваш Енре диктанта 34 лапамра ҫырӗҫ. Вӗсенчен 16-шӗ Шупашарта пулӗ. Тӗп лапам – И.Н.Ульянов ячӗллӗ ЧПУн ҫӗнӗ корпусӗ /Университет урамӗ, 38-мӗш ҫурт/.

Акцие хутшӑкансен Тӑван ҫӗршывӑн Аслӑ вӑрҫипе ҫыхӑннӑ 25 ыйтӑва хуравламалла. Задание пурнӑҫлама 45 минут уйӑраҫҫӗ.

Регистраци 13 сехетре пуҫланать, интруктаж – 13.30 сехетре. 14 сехетре диткант ҫырма тытӑнӗҫ.

Элӗк районӗнче пурӑнакан Семеновсен ҫемйи пӗтӗм Раҫҫейри «Ҫулталӑк ҫемйи-2020» конкурсра палӑрнӑ.

Ӑмӑртӑва Йывӑрлӑха лекнӗ ачасене пулӑшакан фонд тата РФ Ӗҫ тата социаллӑ хӳтлӗх министерстви йӗркеленӗ. Унта ҫӗршывӑн тӗрлӗ кӗтесӗнчи хастар ҫемьесем хутшӑнаҫҫӗ. Конкурса «Манӑн ҫемье – манӑн Раҫҫей» девизпа йӗркеленӗ. Унта хутшӑнакансен пултарулӑхне пилӗк номинаципе: «Нумай ачаллӑ ҫемье», «Ҫамрӑк ҫемье», «Ял ҫемйи», «Ылтӑн ҫемье», «Йӑла-йӗркене упракан ҫемье» — хакланӑ.

«Ял ҫемйи» номинацире Григорийпе Светлана Семеновсем мала тухнӑ. 20 ҫул пӗрле пурӑнать йыш, нумай ача ӳстерет. Туса кил-йыш тӗрлӗ конкурса хутшӑнать.