Чӑваш наци музейӗ халӑх тетелӗнче вырнаҫтарнӑ сӑнӳкерчӗксем

Чӑваш наци музейӗн археологи секторӗн заведующийӗнче ӗҫленӗ Александр Волкова паян юлашки ҫула ӑсатӗҫ.

«Кӑрлачӑн 11-мӗшӗнче эпир хамӑрӑн ӗҫтешӗмӗре, ывӑнма пӗлмен тӗпчевҫӗ-археолога, Тӑван ҫӗршыва парӑннӑ Александр Волкова юлашки ҫула ӑсатӑпӑр. Чӑн-чӑн патриот пулнӑ май вӑл Раҫҫее хӳтӗлеме хӑйӗн ирӗкӗпе кайрӗ», — хыпарланӑ музейӗн пресс-служби халӑх тетелӗнчи хӑйӗн страницинче.

Каччӑ музейра 2012 ҫулта ӗҫлеме тытӑннӑ. Вӑл ун чухне И.Н. Ульянов ячӗллӗ Чӑваш патшалӑх университетӗнче историпе географи факультетӗнче вӗреннӗ, икӗ ҫултан ӑна археологи тата авалхи истори секторӗн заведующийӗ пулма шаннӑ.

Александр Волков Чӑваш Енри тата ытти регионти археологи шыравӗсене пӗрмай хутшӑннӑ. Шырав енӗпе те тӑрӑшнӑ.

Александр Волковпа Патӑрьел тӑрӑхӗнчи Нӑрваш Шӑхаль ялӗнче 10 сехетре чиркӳре сывпуллашӗҫ. Каччӑна юлашки ҫула ӑстама каяс кӑмӑллисене Шупашкартан ятарлӑ автобус илсе кайӗ.

trip-for-the-soul.ru сӑнӳкерчӗкӗ

Ҫӗнӗ ҫул тӗлӗнчи канмалли кунсенче Чӑваш Ене 40 пине яхӑн турист килнӗ. Ку цифрӑна республикӑн Правительствинче эрнесерен иртекен канашлура экономика аталанӑвӗн тата пурлӑх хутшӑнӑвӗсен министрӗ Дмитрий Краснов асӑнса хӑварнӑ.

«2023 ҫулти Ҫӗнӗ ҫул уявӗсен тӗлӗнче пирӗн тӑрӑха 22 пин ҫын килнӗ пулсан, хӑна ҫурчӗсем кӑҫал пӗлтернӗ тӑрӑх, 40 пине яхӑн турист килнӗ. Унччен хӑна ҫурчӗсенчи номерсенчен 40 процентӗнче ҫынсем йышӑннӑ пулсан, халӗ — 55 процента яхӑн. Ку вӑл Шупашкар тата Чӑваш Республики туристсене илӗртнине пӗлтерет», — тенӗ министр.

t.me/tsur21 сӑнӳкерчӗкӗ

Чӑваш Енӗн Регион управленийӗн центрӗ муниципалитетсен тӳри-шари халӑх тетелӗсенчи хӑйсен страницисене епле тытса пынине ишкернӗ.

Хула пуҫлӑхӗсенчен Шупашкар хулин администрацийӗн пуҫлӑхӗ Денис Спирин малти вырӑнта, муниципаллӑ округсенчен — виҫӗ районӑн: Патӑрьелти Рудольф Селиванов, Ҫӗрпӳри Алексей Иванов тата Пӑрачкаври Евгений Лебедев.

Вӗсем ҫынсен ыйтӑвӗсене хастаррӑн хуравлаҫҫӗ, муниципалитета епле аталантарассипе ҫынсене вӑхӑтра паллаштарса тӑраҫҫӗ.

Чи хастар пилӗк пуҫлӑх шутне ҫавӑн пекех Элӗк округӗн пуҫлӑхӗ Александр Терентьев тата Комсомольски округӗн пуҫлӑхӗн Николай Раськин лекнӗ.

ҪҪХПИ тунӑ сӑн

Хусанти ҫемье Мускавран таврӑннӑ чухне Сӗнтӗрвӑрри ҫул пӑрӑнӑшӗнче чарӑнса ларнӑ. Анчах вӗсене пулӑшма никам та чарӑнман.

Полици ӗҫченӗсем Сергей Федоровпа Александр Данилов вӗсене асӑрхасан чарӑннӑ. Ҫемье шартлама сивӗре пӗр сехет тӑнӑ иккен. Полицейскисем вӗсене хӑйсен машинине лартнӑ та сӳнсе ларнӑ машинӑна ҫывӑхри кафе таран туртса ҫитернӗ. Унта вара ҫемье Хусантан пулӑшу килессе кӗтсе илнӗ.

Ҫемье телеграм-каналта Чӑваш Енри полицейскисене тав тунӑ.

riadagestan.ru сайтри сӑн

Чӑваш Енре газпа наркӑмӑшланнӑ тӗслӗх нумайланнӑ. Пӗр талӑкра 7 ҫын шар курнӑ.

Ҫавна май республикӑра пурӑнакансене асӑрхануллӑ пулма ыйтаҫҫӗ. Газ кӑмакисене тӗрӗс вырнаҫтармалла, унпа тӗрӗс усӑ курмалла. Кирек мӗнле кӑлтӑк сиксе тухсан та специалистене кӑмакана тӗрӗслеме чӗнмелле. Кӑмакана юсасси те, мӗн те пулин улӑштарасси те - специалистсен тивӗҫӗ.

ШӖМ тунӑ сӑн

Кӑрлач уйӑхӗн 3-мӗшӗнче Улатӑрти ҫул-йӗрпе патруль службин ӗҫченӗсем юр ҫинче выртакан арҫынна асӑрханӑ. Вӗсем ӑна машинӑна лартнӑ та васкавлӑ медпулӑшу чӗннӗ.

Арҫын 20 градус сивӗре юр ҫинче самай вӑхӑт выртнӑ, пӳрнисене, питне тӑм илме ӗлкӗрнӗ. Васкавлӑ медпулӑшу килсен инспекторсем арҫынна машинӑна вырнаҫтарма пулӑшнӑ, кайран пульницӑна ҫити ӑсатнӑ.

Ҫак арҫын, 39 ҫултискер, Хусантан мӑшӑрӗпе тӑванӗсем патне хӑнана килнӗ иккен.

"За рулем" порталти сӑн

Шупашкартан Кӳкеҫе пассажирсене илсе ҫӳрекен 162-мӗш маршруткӑра билет хакӗ ӳснӗ. Анчах каҫхи 21 сехет хыҫҫӑн кӑна.

«Каҫхи тариф» 10 тенкӗ хӑпарнӑ. ЕТКпа тӳлесен - 40 тенкӗ, чӗрӗ укҫапа - 42 тенкӗ. Ахаль чухне билет ЕТКпа 30 тенкӗ тӑрать, чӗре укҫапа - 32 тенкӗ.

Расписанипе килӗшуллӗн, 162-мӗш маршрутӑн пӗрремӗш рейсӗ ирхи 5 сехетре ҫула тухать. Каҫхине юлашки рейс 23 сехет те 20 минутра каять.

Яндекс.карттӑран илнӗ сӑнӳкерчӗк

Шупашкарти «Малютка» ача-пӑчан ятарлӑ ҫурчӗ унччен республикӑн Сывлӑх сыхлав министерствине пӑхӑнса тӑнӑ. Анчах иртнӗ ҫул вӗҫӗнче, раштав уйӑхӗн 29-мӗшӗнче, республика ертӳҫи Олег Николаев йышӑну кӑларнӑ. Унпа килӗшӳллӗн ача ҫуртне Чӑваш Енӗн Вӗренӳ тата ҫамрӑксен политикин министерствине панӑ.

Асӑннӑ ҫуртра ашшӗ-амӑшӗсӗр юлнӑ тин ҫуралнӑ ачасенчен пуҫласа тӑватӑ ҫул тултариччен пурӑнаҫҫӗ.

«Малютка» ача ҫуртӗнче – 189,75 штат единици.

ҪҪХПИ тунӑ сӑн

Паян ҪҪХПИ экипажӗ М-7 ҫул хӗррипе утакан арҫын ачана асӑрханӑ. Вӑл Мускав еннелле утнӑ, хӑй макӑрнӑ, темшӗн хуйхӑрнӑ.

Йӗрке хуралҫисем арҫын ачапа мӗн пулнипе кӑсӑкланнӑ. 10 ҫултискер ашшӗ-амӑшӗпе хирӗҫнӗ те килтен тухса кайнӑ иккен. Инспекторсем ӑна полици уйрӑмне илсе ҫитернӗ. Вӗсем арҫын ачана ашшӗ-амӑшӗпе мирлештересшӗн.

ШӖМ тунӑ сӑн

Нумаях пулмасть Етӗрнере ӳсӗр арҫын капӑр чӑрӑш ҫине хӑпарса кайнӑ та ӑна сиенлетнӗ.

Ҫак ӗҫе тунӑ 29 ҫулти арҫынна полицейскисем тата Росгварди ӗҫченӗсем тытса чарнӑ. Вӑл хулари тӗп чӑрӑша сиенлетсе хула администрацине 50 пин тенкӗлӗх тӑкак кӳнӗ.

Андрей Эдуардович /арҫын хӑйӗнпе ҫапла паллаштарнӑ/ каҫару ыйтнине видео ӳкернӗ. «Эпӗ айӑплӑ. Питӗ япӑх хӑтлантӑм. Каҫарӑр мана тархасшӑн», - тенӗ вӑл.