Лауреатӑн кӑкӑр ҫине ҫакмалли палли

Нестер Янкас ячӗллӗ пӗрлӗх 2024 ҫулшӑн литературӑпа искусство тата культура аталанӑвӗнче палӑрнисене Красноармейски муниципалитет округӗн Нестер Янкас ячӗллӗ преми лауреачӗн ятне парассипе ҫыхӑннӑ сӗнӳсене йышӑнма тытӑнать. Кӑҫал ҫак ӗҫ 2024 ҫулхи раштав уйӑхӗн 22-мӗшӗччен пырать, мӗншӗн тесен Трак енре асӑннӑ пӗрлӗх йӗркеленнӗренпе шӑп 35 ҫул ҫитет. Уяв ячӗпе ҫак кун Культура ҫуртӗнче лауреатсен пысӑк концерчӗ пулать тата ҫӗнӗ лауреатсене чыслаҫҫӗ.

Кашни ырӑ япала, пултарулӑх хӑйӗн хакне тивӗҫлех. Конкурса иртсе каякан ҫулта литературӑпа искусство тата культура шайӗнче Трак тӑрӑхӗшӗн ырми-канми ӗҫленӗ, вулакансемшӗн, куракансемшӗн уҫӑмлӑ, чун-чӗрене ҫывӑх пысӑк пӗлтерӗшлӗ сцена ӗҫӗсемпе, юрӑ-кӗвӗсемпе, куравсемпе, кӗнекесемпе, ытти литература ӗҫӗсемпе савӑнтарнӑ, хавхалантарнӑ ентешӗмӗрсем хутшӑнасса шанатпӑр эпир.

Пулас лауреатсен ӗҫ-хӗлне коллективсенче тишкерсе тухмалла, документсене тӑратса Нестер Янкас ячӗллӗ пӗрлӗх правленийӗн (канашӗн) ларӑвӗнче пӑхса тухса пӗтӗмлетмелле, ӑна Нестер Янкас ячӗллӗ пӗрлӗхӗн наградӑсем паракан комиссин пӑхса тухса ҫирӗплетмелле.

Малалла...

«Чӑваш Ен» ПТРК видеовӗнчен илнӗ сӑнӳкерчӗк

«Чӑваш Ен» патшалӑх телерадиокомпанийӗн журналисчӗ Алексей Енейкин Кемӗр чӑвашӗсем ҫинчен фильм ӳкернӗ. Ӑна вӑл «Пурӑнатпӑр-ха, тӑван» ят панӑ.

Ҫӗпӗре тата тайгана чӑвашсем иртнӗ ӗмӗр пуҫламӑшӗнче йышлӑн куҫса кайса ҫӗнӗ ялсем пуҫарса янӑ.

Алексей Енейкин пӗлтернӗ тӑрӑх,

Кузбасра пурӑнакан пиншер чӑваш тӑван халӑхӑмӑрӑн культурине аталантарать. Промышленность районӗнчи Ивано-Родионовск ялӗнче пурӑнакан Курицынсен ҫемйи уйрӑмах ырӑ тӗслӗх кӑтартать-мӗн.

Таисия Ташней хатӗрленӗ сӑн

Раштавӑн 7-мӗшӗнче чӑвашсен «Хавал» пуҫару ушкӑнӗ И. Я. Яковлев ячӗллӗ Чӑваш патшалӑх педагогика университечӗпе Чӑваш патшалӑх гуманитари ӑслӑлӑхсен институчӗ пулӑшнипе шкул ачисен 2-мӗш ӑслӑлӑхпа практика конференцийӗ иртӗ. Кун пирки «Хавал» халӑх тетелӗнчи хӑйӗн страницинче пӗлтернӗ.

Конференци тӗллевӗсен шутӗнче вӗренекенсен хастарлӑхне ӳстерессине, тишкерӳ ӗҫне аталантарса пырассине, ӑслӑлӑха кӗме ҫул уҫса парассине, хӑйсем тӗллӗн ӗҫлеме хӑнӑхтарассине,

вӗренекенсен ӑслӑлӑхри ҫитӗнӗвӗсемпе паллаштарассине кӗртнӗ.

Конференцие 5-11-мӗш класра вӗренекенсем хутшӑнма пултарӗҫ.

DIVA анонсӗнчен илнӗ сӑнӳкерчӗк

Паян Шупашкара хальхи вӑхӑтри чаплӑ чӑваш ушкӑнӗсенчен пӗри, «DIVA», концертпа килнӗ.

Асӑннӑ ушкӑн пултарулӑхӗпе киленсе савӑнма, хавхаланса ҫунатланма куракансем (ку ырӑ хыпара ҫак йӗркесен авторӗ ку хыпара ҫак самантра пӗлчӗ) Чӑваш патшалӑх филармонине пуҫтарӑннӑ.

Чӑваш халӑх юррисене илемлетсе ҫӗнӗлле янӑратакан ушкӑн тӑван халӑхӑмӑрӑн культурин аталанӑвне чӑннипех те тӳпе хывать. Раштав уйӑхӗнче вӑл Мускавра концерт лартса парӗ.

Денис Матюхин тунӑ сӑн

Ӗренпур облаҫӗнче пурӑнакан чӑвашсем Чӳклеме ирттернӗ. Уявра Ӗренпур, Чӗлепи облаҫӗсенчи, Чӑваш тата Пушкӑрт республикисенчи пултарулӑх коллективӗсем хутшӑннӑ. Унтах ярмӑрккӑ ӗҫленӗ, наци ҫимӗҫӗсене тутанса пӑхма май пулнӑ.

Ӗренпур облаҫӗнче тӗрлӗ наци ҫыннисес пурӑнаҫҫӗ. Вӗсем пӗр-пӗрин йӑли-йӗркине хисеплеҫҫӗ.

Владимир Живов страницинчен илнӗ сӑнӳкерчӗк

Питӗрти чӑвашсем юпа уйӑхӗн 19-мӗшӗнче Илем фестивальне хутшӑннӑ.

«St. Petersburg Beauty 2024» Илем, мода тата пултарулӑх фестивалӗнчи Пултаруллисен конкурсне Питӗрти чӑваш культура обществин дизайнерӗсемпе модельерӗсен ушкӑнӗ пулнӑ. Вӗсем – тӗрлӗ конкурс ҫӗнтерӳҫисемпе лауреачӗсем Алиса Шарпаева тата Фаина Антонова. Чӑваш тумӗн илемне Алиса Семёновна кӑтартнӑ.

«Чӑваш Ен» патшалӑх телерадиокомпанийӗн видеовӗнчен илнӗ скриншот

Севастопольти чӑвашсен наципе культура пӗрлешӗвӗ 20 ҫул тултарнӑ. Кун пирки «Чӑваш Ен» патшалӑх телерадиокомпанийӗ пӗлтернӗ.

Алексей Енейкин хыпарланӑ тӑрӑх, Крым ҫурутравӗнче вырнаҫнӑ паттӑр хулари ентешсем 2004-мӗш ҫулта чӑмӑртаннӑ. Малтанах ушкӑна ҫар ҫыннисем хастаррӑн хутшӑннӑ. Пӗрлехи тӗллевӗсене палӑртса ырӑ ӗҫе хӑйсен ҫемйисене явӑҫтарнӑ. Ҫапла майпа «Туслӑх» ансамбль те йӗркеленнӗ.

«Крымпа Севастополь хулинче 5 пин ытла чӑваш пурӑнать. Официаллӑ кӑтартусене илес пулсан вара кӑштах сахалрах. 2021-мӗш ҫулхи ҫыравра Севастопольте 461 ҫын хӑйне чӑваш тесе ҫыртарнӑ. Ентешсен пӗрлӗхӗнче вара 50 ытла пайташ. Юлашки вӑхӑтра вӗсем ушкӑна ҫамрӑксене явӑҫтарассипе тухӑҫлӑ ӗҫлеҫҫӗ», — хыпарланӑ сюжетра.

Кристина Макосеева архивӗнчи сӑн

Мускавра иртекен Мода эрнинче Чӑваш Енри ылтӑн алка-эреш брендне, «Виҫӗ хӗвеле», курма пулать. Бренд йӗркелӳҫи - пултаруллӑ дизайнер Кристина Макосеева.

Кристинӑшӑн чӑваш эрешӗллӗ эреш-алка тӑвасси - чун киленӗҫӗ. «Сӗтел хушшинчен темиҫе сехет тӑмасӑр ирттерме пултаратӑп», - тет вӑл.

Кристина алка-эреш кӑна мар, хӑйне евӗр стильлӗ тата меллӗ тумтир те шухӑшласа кӑларать.

Музей проекчӗ

Раҫҫейӗн тӗрленӗ карттин музейӗ валли тепӗр 20 млн тенкӗ уйӑрма хатӗр. Ку укҫапа медиахатӗрсем вырнаҫтарасшӑн.

Аукцион иртет. Малтанхи хак - 20 млн та 199,3 пин тенкӗ. Аукцион ҫӗнтерӳҫин хатӗрсене чӳк уйӑхӗн 11-мӗшӗччен вырнаҫтармалла.

Аса илтерер: Шупашкарти кӳлмекре Раҫҫейӗн тӗрленӗ карттин музейне тума 51,9 млн тенкӗ уйӑрнӑ. Вӑл 250 тӑваткал метр пулӗ. Ӑна чӳк уйӑхӗн 10-мӗшӗччен туса пӗтермелле.

Чӑваш Енре 2023 ҫултанпа тин ҫуралнӑ ачасене парне параҫҫӗ. Ку таранччен унта тӗрленӗ пододеяльник, простынь, наволочка, ал шӑлли, «Чӑваш Енри халӑхсен юмахӗсем» кӗнеке тата саламлӑ открытка кӗнӗ.

Юпа уйӑхӗнчен вара комплекта ҫӗнӗ япаласем кӗнӗ: тетте-погремушка тата медицина термометрӗ.

Сӑмах май, паянхи кун тӗлне 239 комплект парне панӑ.