scoopnest.com сайтри сӑн

Ывӑлӗ арӑмӗнчен уйрӑлсан хӗрарӑма кинӗ мӑнукӗпе хутшӑнма чарнӑ-мӗн. Хайхискер опекӑпа попечительлӗх органӗсене ҫитнӗ, кинӗ тӗлӗшпе ҫӑхавланӑ.

Хӗрарӑм каланӑ тӑрӑх, ывӑлӗ арӑмӗнчен уйрӑлнӑ, кун хыҫҫӑн кинӗ амӑшӗн правипе ытлашши усӑ курнӑ, асламӑшне мӑнукӗпе курнаҫма чарнӑ.

Амӑшӗ ҫакна епле ӑнлантарнӑ-ха? Вӑл ачине асламӑшӗпе хутшӑнма чармасть-мӗн. Асламӑшӗ вара ӑна мӑнукӗпе курнӑҫма сӗннӗ графикпе килӗшмест.

Опека органӗ постановлени кӑларнӑ. Унпа килӗшӳллӗн, амӑшӗн ачине асламӑшӗпе курнӑҫма чармалла мар. Графике ҫуллахи каникул валли хатӗрленӗ.

Николай Егоров. cap.ru сӑнӳкерчӗкӗ

Чӑваш Республики умӗнче хисепе тивӗҫнисене паян орденпа тата орден медалӗпе чыслама йышӑннӑ. Хушӑва республика Элтеперӗн тивӗҫӗсене вӑхӑтлӑх пурнӑҫлакан Олег Николаев паян, ҫурла уйӑхӗн 4-мӗшӗнче, алӑ пуснӑ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ.

«Чӑваш Республики умӗнчи тава тивӗҫлӗ ӗҫсемшӗн» орденпа Чӑваш Республикин вӗренӳ институчӗн регион аталанӑвӗн центрӗн ертсе пыракан ӗҫченне, паллӑ чӗлхеҫӗне, Николай Егорова тата Г.А. Ильенко ячӗллӗ «ЭЛАРА» ӑслӑлӑхпа производство комплексӗн директорӑн патшалӑх влаҫӗсемпе ҫыхӑну тытас енӗпе тӑрӑшакан ҫумне Наталия Партасовӑна чыслама йышӑннӑ. Асӑннӑ предприятин персонал тата режим енӗпе ӗҫлекен директорне Ольга Киселевӑна «Чӑваш Республики умӗнчи тава тивӗҫлӗ ӗҫсемшӗн» орден медалӗ парӗҫ.

Волонтерсен ӗҫне хакласа Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев «Чӑваш Республикинче волонтерлӑха аталантарнӑшӑн» паллӑна туса хурасси ҫинчен калакан указ кӑларнине эпир утӑ уйӑхӗн пуҫламӑшӗнче пӗлтернӗччӗ. Аса илтерер: республика ертӳҫи документа нимеҫӗсемпе тӗл пулса калаҫнӑ чух алӑ пуснӑччӗ. Унсӑр пуҫне нимеҫӗсене Хисеп грамотипе те хавхалантарӗҫ.

Паян асӑннӑ паллӑпа Хисеп грамоти ҫинчен калакан положение ҫирӗплетнӗ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ. Кӑкӑр ҫине ҫине ҫакмалли паллӑна тивӗҫиччен Хисеп грамотиллӗ пулмалла. Хисеп паллипе чысланӑ хыҫҫӑн ҫулталӑк иртсен кӑкӑр ҫине ҫакмалли паллӑпа хавхалантарма юрать.

moygorod-online.ru сайтран илнӗ сӑн

Ҫурла уйӑхӗнче Чӑваш Енре Чаваш автономи облаҫне туса хунӑранпа 100 ҫул ҫитнине тата Шупашкарӑн ҫуралнӑ кунне уявлассине пӗлтернӗччӗ. Анчах хальлӗхе кӑшӑлвируспа ҫыхӑннӑ лару-тӑру массӑллӑ мероприятисем ирттерме памасть.

Ҫавна май палӑртса хунӑ хӑш-пӗр мероприятие хӗллене куҫарӗҫ, теприсене онлайн режимра ирттерӗҫ. Чӑваш Ен хальлӗхе кӑшӑлвируса пула йышӑннӑ чарусене пӑрахӑҫламалли виҫҫӗмӗш тапхӑра кӗмен-ха. Массӑллӑ мероприятисене вара ун чухне ҫеҫ ирттерме юрать.

Хӗлле фейерверксен фестивалӗ, ҫутӑ шоу иртӗҫ. Хальлӗхе палӑртнӑ тӑрӑх, вӗсене Ҫӗнӗ ҫулта йӗркелӗҫ.

«Про Город» сайтран илнӗ сӑн

Шупашкар районӗнче пӗр хӗрарӑм кӗпер ҫинчен ӳкнӗ. Телее, вӑл чӗрех юлнӑ. Ку пӑтӑрмаха курнӑ халӑх корреспонденчӗ «Про Город» хаҫата каласа кӑтартнӑ.

Ку паян ҫӗрле 2 сехетре Куснар ялӗ ҫывӑхӗнче пулнӑ. Кӗпертен ӳкнӗ хӗрарӑма иртен-ҫӳрен асӑрханӑ. Вӑл йӑлтах юнланса пӗтнӗ пулнӑ.

Вырӑна васкавлӑ медпулӑшу ҫитнӗ. Тухтӑрсем палӑртнӑ тӑрӑх, вӑл нумай вырӑнта шӑммисене хуҫнӑ, ӳчӗ ҫинче сурансем пур. Тухтӑрсем хӗрарӑма реанимацие илсе кайнӑ.

Палӑртмалла: кӗпер ҫинчен ӳкнӗ хӗрарӑм 42 ҫулта.

Патӑрьел районӗнчи Турханти тухтӑр-волонтерсем ырӑ ӗҫ тума ӳркенмеҫҫӗ. Хастарсене вырӑнти Анатолий Кольцов тухтӑр хавхалантарса пырать.

Хальхиче вӗсем тавралли ялсенче хут пуҫтарнӑ. Пӗтӗмпе пӗр тоннӑна яхӑн пуҫтарӑннӑ. Ҫав укҫапа виҫӗ велосипед туяннӑ. Ӑна ачасене парнеленӗ.

Маларах хастарсем 85 ҫулти Любовь Дубининӑна кӑмака туса панӑччӗ. Ачасем кивӗ кӑмакана пӑснӑ, ҫырмаран тӑмпа хӑйӑр йӑтнӑ.

Тухтӑр-волонтерсен пӗтӗм Раҫҫейри уйрӑмӗн Турханти уйрӑмне 2018 ҫулта йӗркеленӗ. Вӑл вырӑнти шкул никӗсӗ ҫинче тӗпленнӗ. Пӗлтӗрхи чӳк уйӑхӗнче уйрӑм волнтерсен конкурсӗнче «Чи лайӑх социаллӑ проект» номинацире ҫӗнтернӗ.

pinterest.es сайтри сӑн

Атӑл леш енче Сосновка ялӗнче пурӑнакан пӗр ҫынна вӑкӑр шар кӑтартнӑ. Кун пирки «Про Город» хаҫата халӑх корреспонденчӗ пӗлтернӗ.

Ку пӑтӑрмах паян, ҫурла уйӑхӗн 2-мӗшӗнче, пулнӑ. Арҫынна вӑкӑр тӗкнӗ. Тухтӑрсем палӑртнӑ тӑрӑх, унӑн аяк пӗрчисем хуҫӑлнӑ, алли суранланнӑ.

Арҫынна васкавлӑ медпулӑшупа Шупашкара Республикӑри клиника пульницине илсе кайнӑ. Унта вара тухтӑрсем вӑкӑр унӑн ӳпкине шӑтарнине те палӑртнӑ.

ryazan.bezformata.com сӑнӳкерчӗкӗ

Етӗрне районӗнчи Чаканар Упинче карантин тесе йышӑннӑ. Ку хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ӗнер, ҫурла уйӑхӗн 1-мӗшӗнче, алӑ пуснӑ. Ҫапла йышӑнӑва республика ертӳҫи «Ветеринари ҫинчен» федераци саккунӗпе килӗшӳллӗн тата Чӑваш Ен Патшалӑх ветеринари службин ертӳҫи сӗннипе тунӑ.

Тискер чӗрчунсен урнӑ чирне палӑртнӑ хыҫҫӑн ял ҫыннисен выльӑх-чӗрлӗх сутса туянма юрамӗ. Асӑннӑ террриторири чӗрчунсене куравсене те илсе кайма чарнӑ.

Урнӑ чире пула йышӑннӑ карантин вӑхӑчӗ ӗнер пуҫланнӑ. Республика ертӳҫин хушӑвӗнче каланӑ тӑрӑх, чару мерисем выльӑх чирленӗ хыҫҫӑн икӗ уйӑх иртсен вӗҫленӗҫ.

ШӖМ тунӑ сӑн

Кӳршӗ регионта пурӑнакан икӗ ҫын Чӑваш Енри лавккасенчен япаласем вӑрланӑ. Ҫӗртме уйӑхӗн вӗҫӗнче Улатӑрта лавккасенчен хаклӑ йышши эрех, парфюм ҫухални пирки полицие пӗлтерме тытӑннӑ.

Йӗрке хуралҫисем вӑрӑсене тупса палӑртнӑ. Вӗсем – Мӑкшӑ Республикинчи гастролерсем. Арҫынпа хӗрарӑм машинӑпа ҫӳренӗ, икӗ сехет хушшинче виҫӗ лавккана кӗрсе 9 кӗленче виски, 5 мартини, 13 дезодорант, 6 шӑл пасти, боритва станокӗ вӑрттӑн йӑтса тухнӑ.

Улатӑрти полицейскисем Мӑкшӑ Республикине кайса 30 ҫулти арҫынна тата 42 хӗрарӑма тытса чарнӑ. Вӗсем унччен те вӑрланӑшӑн айӑпланнӑ-мӗн. Арҫынпа хӗрарӑм тӗлӗшпе пуҫиле ӗҫ пуҫарнӑ. Вӗсем ҫакнашкал ытти преступленипе ҫыхӑннипе ҫыхӑнманнине тӗрӗслеҫҫӗ.

ШӖМ тунӑ сӑн

Шупашкарта пурӑнакан 31 ҫулти хӗрарӑм ӗлӗкхи кинжала халӑх тетелӗнче сутма пуҫланӑ. Анчах вӑл йӗрке хуралҫисен аллине лекнӗ.

Хӗрарӑм пӗлтернӗ тӑрӑх, ӗлӗкхи кинжал унӑн упӑшкине аслашшӗнчен лекнӗ. Оперативниксем хӗҫ-пӑшал сутнине асӑрханӑ, халӗ ҫав хӗрарӑма явап тыттарнӑ ӗнтӗ.

Хӗрарӑм кинжала 14 пин тенкӗпе сутнӑ. Ҫак хатӗре 1914 ҫулта хатӗрленӗ. Анчах вӑл упрама, сутма юраман хӗҫ-пӑшал йышне кӗрет. Хӗрарӑм вара ҫакна чухламан та. Анчах ку яваплӑхран хӑтармасть.