ШӖМ тунӑ сӑн

Нарӑс уйӑхӗн 16-мӗшӗнче Патӑрьел районӗнче пурӑнакан арҫын манипулятор установки туянма хатӗрленнӗ. Ӑна сутни пирки вӑл тӗнче тетелӗнче курнӑ.

Хайхискер сутуҫӑпа ҫыхӑннӑ та ӑна 500 пин тенкӗ куҫарса панӑ. Кун хыҫҫӑн лешӗ ҫыхӑнӑва тухма пӑрахнӑ.

Ултавҫа тепӗр регионта тупнӑ. Йӗрке хуралҫисем Ижевск хулине командировкӑна кайса ӑна тытса килнӗ. Чӑваш арҫынни укҫа куҫарнӑ карттине блокировка тунӑ.

Ҫав ҫын – 22 ҫулти арҫын, унччен судпа пӗрре кӑна мар айӑпланнӑ.

«Раҫҫей пенсионерӗсен пӗрлӗхӗн» Хӗрлӗ Чутайри уйрӑмне ертсе пыракан Юрий Егорович Егоров нумай пулмасть 80 ҫул тултарнӑ. Хӗрлӗ Чутай районӗн сайчӗ хыпарланӑ тӑрӑх юбиляра ӗнер район пуҫлӑхӗн ҫумӗ, вӗренӳпе ҫамрӑксен политикин тата спорт пайӗн начальникӗ Игорь Живоев, район администрацийӗн культура, социаллӑ аталанупа архив ӗҫӗн пай пуҫлӑхӗ Алина Михуткина, вырӑнти пенсионерсен пӗрлӗхӗн ҫумӗ Елизавета Грузинова, ветерансен Канашӗн председателӗ Галина Тимакова саламланӑ.

Юрий Егорович халӗ Хӗрлӗ Чутай тӑрӑхӗнче пурӑнать пулин те ҫураласса вӑл Вӑрнар районӗнчи Хирпуҫра 1943 ҫулхи кӑрлачӑн 25-мӗшӗнче ҫуралнӑ. Ҫӗрпӳри ял хуҫалӑх техникумӗнче ӑс пухнӑ, кайран Горькийри партин аслӑ шкулӗнче вӗреннӗ. Ӗмӗр тӑршшӗпе районти тӗрлӗ пуҫлӑх вырӑнӗсене йышӑннӑ: районти иккӗмӗш секретарь, районти пропагандӑпа агитацин инструкторӗ, ӗҫ тӑвакан комитечӗн ҫумӗ, статистика пайӗн начальникӗ, культурӑпа спорт тата ҫамрӑксен ӗҫӗпе ӗҫлекен пай заведующийӗ, тата ытти те. «Раҫҫей пенсионерӗсен пӗрлӗхӗн» Хӗрлӗ Чутайри уйрӑма вӑл 2007 ҫултанпа ертсе пырать.

cap.ru сӑнӳкерчӗкӗ

Паян Ҫӑварни эрни пуҫланнӑ. Шупашкар хула администрацийӗн культура управленийӗ пӗлтернӗ тӑрӑх, нарӑс уйӑхӗн 20-26-мӗшӗсенче Шупашкарти тата Йошкар-Олари кафе-ресторансем пӗр-пӗрин хушшинче тупӑшӗҫ. Ку эрнере икерчӗсен фестивалӗ иртӗ.

Ҫынсем ӑшне тултарнӑ тӗрлӗ икерчӗ, икерчӗ десерчӗ туянма пултараҫҫӗ.

Ҫӑварнири тӗп мероприятисем Шупашкарти парксенче нарӑсӑн 26-мӗшӗнче иртӗҫ.

Ҫыхӑнура форумри сӑнӳкерчӗк

Шупашкар районӗн администрацийӗ (халӗ вӗсене муниципалитет округӗ теме пуҫларӗҫ-ха) тулли приводлӑ «Geely Atlas Pro» кроссовер туянасшӑн.

Шупашкар муниципалитет округӗн финанспа тата ресурспа тивӗҫтерекен центрӗ автомобиль туянма аукцион ирттерессине пӗлтернӗ. Ӑна 2 миллион та 825,6 пин тенкӗ парса туянасшӑн.

«Автомобиль кузовӗ вараланни ытлашши ан курӑнтӑр» тата юрлӑ ҫанталӑкра машина ҫул ҫинче лайӑх курӑнтӑр тесе хура тӗслӗ машина туянасшӑн.

novyefoto.ru сайтри сӑн

Вӑрнар районӗ ҫамрӑк тухтӑрсене илӗртес тесе ӗҫлеме килнӗ специалистсене пурӑнмалли ҫурт-йӗр илмешкӗн пособи парать. Ку - "Ялти тухтӑр" программӑпа килекен тухтӑрсене памалли хушма тӳлев.

Пособи виҫи - 500 пин тенкӗ. Ӑна 35 ҫула ҫитмен тухтӑрсене параҫҫӗ.

Вӑрнар районӗн пульницинче 13 специалист ҫитмест: 3 пӗтӗмӗшле практика тухтӑрӗ,

2 анестезиолог-реаниматолог, кардиолог, акушер-гинеколог, офтальмолог, отоларинголог, невролог, эпидемиолог, профпатолог, онколог.

drive2.ru сайтри сӑн

Елчӗк районӗнче пурӑнакан 44 ҫулти арҫын хӗлле никам та пурӑнман ҫурта чӳрече ҫӗмӗрсе кӗнӗ. Унтан вӑл электроплита, тимӗр профильсем тата пӑтасем вӑрланӑ. Пӗтӗмпе - 3 пин тенкӗлӗх. Хайхискер урайне пирус тӗпӗсем пӑрахса хӑварнӑ. Ку кӑна мар, вӑл "пысӑккипе" ҫавӑнтах тула кайнӑ.

Ҫак биологи материалӗсемпе шыраса тупнӑ та ҫав арҫынна. Экспертиза ку ӗҫе вӑл тунине ҫирӗплетнӗ.

Арҫын судра айӑпне йышӑннӑ. Вӑл пӗтӗм тӑкака саплаштарнӑ.

kartinkin.net сайтри сӑн

Вӑрнар районӗни хӗрарӑм пӗчӗк ачине хур кӑтарнӑ тесе шутлаҫҫӗ. Ҫапла пӗлтереҫҫӗ Следстви комитечӗн Чӑваш Енри следстви органӗсем.

Следстви палӑртнӑ тӑрӑх, ҫак хӗрарӑм пӗлтӗрхи чӳк уйӑхӗнчен пуҫласа кӑҫалхи нарӑсчен 6 ҫулти ывӑлне пӗрре мар хӗненӗ. Ача халӗ кукамӑшӗпе (е асламӑшӗпе) пульницӑра выртать.

Хӗрарӑмӑн тепӗр икӗ ача пур: 14-ра тата 6 ҫулта. Хальхи вӑхӑтра вӗсене ҫемьерен илсе кайса вӑхӑтлӑха пульницӑна вырнаҫтарнӑ.

Ҫакӑ паллӑ: 2018-2020 ҫулсенче ҫемье ӑнӑҫсӑррисен шутӗнче пулнӑ. Кайран вӗсем унтан тухнӑ. Хӗрарӑм тӗлӗшпе халӗ пуҫиле ӗҫ пуҫарнӑ.

Шупашкар районӗнчи Ҫатра Марка ялӗнче пурӑнакан Вячеслав Федорова икӗ эрне шыраҫҫӗ. 59 ҫулти арҫын килтен нарӑс уйӑхӗн 3-мӗшӗнче тухса кайнӑ. Ҫав кун мӗн тӑхӑнни, ӑҫталла кайни паллӑ мар.

Вячеслав Валентинович 175 сантиметр ҫӳллӗш, ырханскер. Куҫӗ кӑвак, ҫӳҫӗ ҫутӑ тӗслӗ.

Ҫак арҫын пирки мӗн те пулин пӗлсен ҫак номерпе шӑнкӑравлама ыйтаҫҫӗ: 8(800)700-54-52 е 112.

https://somanyhorses.ru/devushka-taksist-zachem-krasotka-rabotaet-vip-voditelem/ сӑнӳкерчӗкӗ

Чӑваш Енре хӗрарӑм водительсен ӑмӑртӑвне ирттерӗҫ. Темиҫе туртан тӑракан «АвтоЛеди-2023» конкурс пуш уйӑхӗн 5-мӗшӗнче пулӗ.

Хӗрарӑмсен ҫул-йӗр правилисене мӗнле пӗлнине туллин кӑтартма, унсӑр пуҫне вӗсен руле маттур тытса пынине ҫирӗплетсе пама лекӗ. Унтан хӗрарӑмсен пултарулӑх конкурсӗ те пулӗ.

Заявкӑсене Чӑваш Енӗн Транспорт тата ҫул-йӗр хуҫалӑхӗн министерствинче пуш уйӑхӗн 1-мӗшӗччен йышӑнӗҫ.

cap.ru сайтри сӑн

Шупашкарти троллейбус управленине республика харпӑрлӑхне парасшӑн. Проекта ЧР Экономика министерстви хатӗрленӗ.

Документра палӑртнӑ тӑрӑх, управленипе пӗрле пӗтӗм пурлӑх республика харпӑрлӑхне куҫӗ. Ҫав йышра – администраци ҫурчӗсем, подстанцисем, депосем, складсем, ытти ҫурт.

Республика харпӑрлӑхне куҫсан вӑл «Троллейбус управленийӗ» унитари предприятийӗ ятлӑ пулӗ. Ун йышне Ҫӗнӗ Шупашкарти троллейбус управленийӗ те кӗрӗ.