Хӗрарӑм ачасене ашшӗ хӗнет тесе полицие пӗлтернӗ. 32 ҫулти арҫын тӗлӗшпе пуҫиле ӗҫ пуҫарнӑ.

Следстви версийӗ тӑрӑх, 2017 ҫултан пуҫласа кӑҫалхи авӑн уйӑхӗччен 8-13 ҫулсенчи виҫӗ ачине хӗненӗ, психика тӗлӗшӗнчен сиен кӳнӗ. Кӑҫал кӑрлач уйӑхӗнче аслӑ хӗрӗ тӗлӗшпе ясар ӗҫсем тунӑ. Ун чухне хӗрача 13 ҫулта пулнӑ.

Ачасен амӑшӗ кун пирки полицие пӗлтернӗ. Кун хыҫҫӑн арҫынна тытса чарнӑ.

Халӗ ун тӗлӗшпе пуҫарнӑ пуҫиле ӗҫе малалла тӗпчеҫҫӗ.

discover24.ru сайтри сӑн

Тӑвай районӗнчи тӑлӑх прокуратура пулӑшнипе ҫеҫ хӑтлӑ хваттерлӗ пулнӑ. Ашшӗ-амӑшӗн хӳттисӗр юлсан ӑна 2015 ҫулта пурӑнмалли кӗтесе хӑтлӑлатмалла тесе черете тӑратнӑ.

Анчах вӑхӑт иртнӗ — ӑна вара хваттер паман. Хӑйӗн вара кӗтес пулман, пӗчӗк ачисемпе тара тытнӑ хваттерте пурӑнма тивнӗ.

Прокуратура Тӑвай район администрацийӗн тӑлӑха хваттерпе тивӗҫтермелле тесе суда тавӑҫ тӑратнӑ. Суд вӑл ыйтнине туллин тивӗҫтернӗ. Халӗ тӑлӑха хваттер панӑ ӗнтӗ.

Юпа уйӑхӗн 7-мӗшӗнче Хӗрлӗ Чутай районӗнче арҫын ҫухалнӑ. Вӑл вӑрмана кайнӑ та таврӑнман.

Владимир Нагоров хӑмӑр куртка, сӑрӑ-ҫутӑ кӑвак кӗпе, сӑрӑ тӗслӗ футболка, хура шӑлавар, хура калуш, ҫутӑ кӑвак карттус тӑхӑннӑ. Хӑйӗнпе пӗрле шурӑ витре илнӗ.

Арҫынна «Лиза Алерт» отряд хастарӗсем те, полицейскисем те шыраҫҫӗ.

Владимир Нагорова шырамашкӑн татах ҫынсем кирлӗ. Хӑйирӗкҫӗсене хапӑлласах кӗтеҫҫӗ.

cap.ru сӑнӳкерчӗкӗ

Ҫӗмӗрле районӗнче пурӑнакан хӗрарӑм, йӗкӗреш кӗтекенскер, тухтӑр патне йышӑнӑва кайнӑ. Шӑп ҫав самантра унӑн юн кайма пуҫланӑ. Шурӑ халатлисем ӑна хӑвӑрт пулӑшнӑ, 8 минутранах операци тунӑ.

Ҫут тӗнчене арҫын ачапа хӗрача килнӗ. Хӗр пӗрчи 1500 ытларах грамм тайнӑ, арҫын ача - 1900 грамм.

Ачасем халӗ Президент пепкелӗх центрӗнче. Арҫын ачана реанимаци уйрӑмӗнчен ахаль палатӑна куҫарнӑ. Хӗрачана хальлӗхе реанимацире сӑнаҫҫӗ. Арҫын ачапа амӑшӗ курнӑҫнӑ ӗнтӗ.

veterinarian.hozvo.ru сайтри сӑн

Кӑҫал ҫурла уйӑхӗнче Елчӗк районӗнче пурӑнакан 73 ҫулти арҫын качакине кайса кӑкарнӑ та тепӗртакран ӑна кайса пӑхнӑ: лешӗ вилнӗ. Чӗрчуна йытӑсем туртса ҫурнӑ иккен.

Арҫын тӑкака саплаштарасшӑн. Вӑл кун тӗлӗшпе суда тавӑҫ тӑратнӑ. Прокуратура тӗрӗсленӗ те ҫакна палӑртнӑ: вырӑнти хӑйтытӑмлӑх килсӗр-ҫуртсӑр йытӑсем тӗлӗшпе ӗҫлесе ҫитереймен. Ҫавна май вӗсен саккунпа килӗшӳллӗн йытӑсем кӳнӗ тӑкака саплаштармалла.

Хальхи вӑхӑтра заявление судра пӑхса тухаҫҫӗ.

chgtrk.ru видеовӗнчен илнӗ скриншот

Етӗрне районӗнчи Тури Ачакра пурӑнакан Николай Потапов изобретательсен пӗрлӗхне йӗркелес ӗмӗтпе пурӑнать иккен.

Арҫын велосипед насусӗнчен тунӑ музыка инструменчӗ, сывлӑха ҫирӗплетмелли массажер таран ӑсталать. «Чӑваш Ен» телерадиокомпани пӗлтернӗ тӑрӑх, Николай Потапов 270-е яхӑн хатӗр шутласа кӑларнӑ. Хӑшӗсемпе патент илнӗ.

Тележурналистсем пӗлтернӗ тӑрӑх, электрофильтрпа Африкӑри специалистсем кӑсӑкланнӑ, ятарлӑ завод уҫасшӑн пулнӑ. Николай Потаповпа канашланма Чӑваш Ене те ҫитнӗ, ӗҫ вырӑнӗ сӗннӗ, анчах вӑл тӑван тӑрӑхрах юлнӑ.

"Про Город" сайтӗнчи сӑн

Ҫӗмӗрлери 19-мӗш ача пахчин тӑрринчен шыв анать. Унта ӗҫлекенсем витресем лартса ҫумӑр шывне пуҫтараҫҫӗ. Пӳлӗмре нӳрӗ. Ку - 12-мӗш ушкӑнра. Ачасен унта мӗнле ҫӳремелле? Ашшӗ-амӑшӗ ача пахчин тӑррине юсаманшӑн кӑмӑлсӑрланса тӗнче тетелӗнче ҫырнӑ.

Ҫакна прокуратура асӑрханӑ та тӗрӗслев пуҫарнӑ. Ведомство чӑнах та ҫитменлӗхсене тупса палӑртнӑ: тӑрринчен шыв анать, стенасем йӗпеннипе кӑмпапа сиенленнӗ, мачча тата стена ҫинчи сӑрӑ хӑйпӑннӑ.

Ача пахчи ертӳҫи тӗлӗшпе административлӑ ӗҫ пуҫарнӑ. Ӗнер ача пахчине юсав ӗҫӗсем тума хупнӑ. Шӑпӑрлансене вӑхӑтлӑха урӑх ҫӗре вырнаҫтарнӑ.

www.bos21.ru сӑнӳкерчӗкӗ

Чӑваш Енри организацисенчен пӗрне Чӑваш Республикин Хисеп грамотипе чыслама йышӑннӑ. 112-мӗш номерлӗ хушӑва Олег Николаев алӑ пуснӑ.

Хисеп грамотине тивӗҫнӗ организаци — Ҫӗнӗ Шупашкарта вырнаҫнӑ «Биологилле тасатмалли сооружени» патшалӑхӑн унитарлӑ предприятийӗ. Ӗҫлӗ хутра палӑртнӑ тӑрӑх, унитарлӑ предприяти регионти экологи хӑрушсӑрлӑхӗшӗн пысӑк тӳпе хывнӑ.

"Лиза Алерт" сайтри сӑн

Ӗнер каҫхине ҫӑлавпа шырав службине вӑрманта икӗ хӗрарӑм ҫухални пирки пӗлтернӗ. Хайхискерсем, Атӑл леш енчи Сосновка поселокӗнче пурӑнаканскерсем, кӑмпана кайнӑ та киле каймалли ҫула тупайман.

39 ҫулти тата 60-ти хӗрарӑмсене "Лиза Алерт" хастарӗсем те шыранӑ. Вӗсем киле таврӑнманнине кура мӑнукӗ сехӗрленсе ӳкнӗ. Шырав вӑхӑтӗнче вӑл вӗсемпе ҫыхӑнура пулнӑ. Хӗрарӑмсем ӑшӑнас тесе пӗр-пӗрин ҫумне тӗршӗннӗ.

Ҫухалса кайнӑскерсене пӗр талӑкран тупнӑ. Вӑрмантан илсе тухса вӗсене вӗри чей ӗҫтернӗ, унтан киле ӑсатса янӑ.

Шупашкарта Сочи хулине ҫӗнӗ авиарейс янӑ. Ӑна Nordwind авиакомпани пурнӑҫлать.

Шупашкарти аэропорт пӗлтернӗ тӑрӑх, самолетсем Сочине ытларикунсерен тата эрнекунсерен вӗҫӗҫ. Пӗрремӗш рейс ӗнер каҫхине, юпа уйӑхӗн 4-мӗшӗнче, пулнӑ. Кӑнтӑрти хулана Шупашкартан 123 ҫын вӗҫнӗ. Каялла 139 пассажир килнӗ.

Самолет ытларикун – 18 сехет те 10 минутра, эрнекун 20 сехет те 35 минутра вӗҫӗ.